Te Mate—ʼE Mole He Tahi ʼe Hāo Mai Ai!

NEʼE tohi fēnei e te tagata Pilitania fai hisitolia ko Arnold Toynbee: “Ka tupu he tahi, pea ʼe mole hāo anai ʼi te mate. Pea ʼe moʼoni ia te faʼahi ʼaia, heʼe tou mamate fuli anai.” ʼI meʼa fakatupu lotomamahi mokā mate hota kāiga peʼe ko hota kaumeʼa!

Talu mai te ʼu sēkulō, ʼe mole he tahi ʼe hāo mai te mate. Ka mate he tahi ʼe tou ʼoʼofa ai, ʼe mole tou maʼu he faitoʼo ki te faʼahi ʼaia. Ko te ʼaluʼaga fakaʼofaʼofa ʼaia ʼe hoko kiā tatou fuli. Neʼe tohi fēnei e te tagata faitohi ʼo te 19 sēkulō: “Ka tou lotomamahi pea ʼe tou hage fuli ko ni ʼu kiʼi tamaliki​—ʼe mole tou maʼu he ʼu tali ki tatatou ʼu fehuʼi. Ko te tagata ʼaē ʼe lahi ʼosi tona poto, ʼe mole kei ina ʼiloʼi he meʼa.” ʼE tou hage ko te ʼu kiʼi tamaliki​—ʼe mole kei tou ʼiloʼi he puleʼaki pea ʼe mole tou lava fetogi te ʼaluʼaga ʼo ʼuhiga mo te mate. ʼE mole he tagata maʼu koloā peʼe mālohi peʼe poto pea mo ʼatamai, ʼe ina maʼu anai he faitoʼo ki te faʼahi ʼaia. Ko nātou ʼaē ʼe mālolohi, ʼe nātou fetāgihi ohage pe ko nātou ʼaē ʼe vaivavai.

Neʼe lotomamahi feiā ia te Hau ko Tavite, ʼi te mate ʼo tona foha ko Apisalone. ʼI te tala age ʼaē kua mate tona foha, neʼe tagi mamahi pea mo ʼui fēnei: “Toku foha ko Apisalone, toku foha, toku foha ko Apisalone! Ka na neʼe au mate la au kae ke maʼuli koe, Apisalone toku foha, toku foha!” (2 Samuele 18:33) Ko te hau mālohi ʼaē neʼe ina lavaʼi te ʼu fili mālolohi, neʼe mole hana puleʼaki, he neʼe mole hona mālohi ki te “fili fakaʼosi, ia te mate,” ko te tupuʼaga ʼaia ʼo tana fakaʼamu ke toʼo ia ia e te mate, kae ke ina tuku ke maʼuli tona foha.​—1 Kolonito 15:​26, MN.

ʼE ʼi ai koa he faitoʼo ki te mate? Kapau ʼe ʼi ai he faitoʼo, koteā te ʼamanaki ʼaē ʼe maʼu e te kau mate? ʼE tou toe fesioʼaki anai koa mo tatatou ʼu hahaʼi ʼaē kua mamate? ʼE tou maʼu anai te ʼu tali ki te ʼu fehuʼi ʼaia ʼi te alatike ʼaē ka hoa mai.