Tou Tauhi Ki Te ʼAtua ʼAē ʼe Ina Foaki Te ʼĀteaina

“Koeni te ofa ki te Atua, ko te fai o ana fakatotonu. Pea e mole faigataa ana fakatotonu.”—1 SOA. 5:3.

ʼE FEALA KOA HAKOTOU TALI?

Koteā ʼaē ʼe loto e Satana ke tou manatu ʼo ʼuhiga mo te ʼu meʼa ʼaē ʼe fakamaʼua mai e te ʼAtua?

He koʼē ʼe tonu ke tou filifili fakalelei ʼotatou kaumeʼa?

Koteā ʼaē kā tokoni mai ke tou haga nonofo agatonu ki te ʼAtua ʼaē ʼe ina foaki te ʼāteaina?

1. ʼE fakaʼaogaʼi feafeaʼi e Sehova tana ʼāteaina? Neʼe feafeaʼi te ʼāteaina ʼaē neʼe ina foaki kiā Atama mo Eva?

ʼE KO Sehova tokotahi pē ʼaē ʼe mole he tuʼakoi ʼo tana ʼāteaina, kae ʼe ina fakaʼaogaʼi lelei tuʼumaʼu pē tana ʼāteaina. Pea ʼe mole ina leʼoleʼo ia meʼa fuli pē ʼaē ʼe fai e ʼana kaugana, kae ʼe ina tuku ke natou fai he ʼu tonu pea mo te ʼu meʼa lelei fuli ʼaē ʼe natou loto kiai. Ohagē lā, neʼe ko te meʼa pē ʼe tahi ʼaē neʼe tapuʼi age e te ʼAtua kiā Atama mo Eva, ke mole nā kai “ki te akau o te iloilo o te lelei mo te kovi.” (Sen. 2:17) Koia neʼe lahi pē tanā ʼāteaina ʼi tanā fai te finegalo ʼo te ʼAtua!

2. He koʼē neʼe liliu ia Atama mo Eva ʼo pōpula ki te agahala?

² He koʼē neʼe tuku e te ʼAtua he toe ʼāteaina lahi fēia kiā Atama mo Eva? Koteʼuhi neʼe ina fakatupu nāua ʼo fakatatau ki tona pāki pea mo ʼaki he leʼo ʼo loto. Neʼe ʼamanaki e Sehova ke nā fai te meʼa ʼaē ʼe totonu tupu mai tonā ʼofa ʼaē kiā te ia, ʼaē neʼe ko tonā Tupuʼaga. (Sen. 1:27; Loma 2:15) Meʼa fakaʼofaʼofa foki, he neʼe mole loto fakafetaʼi ia Atama mo Eva ki te ʼāteaina ʼaē neʼe foaki age e tonā Tupuʼaga. Kae neʼe filifili pē e nāua te meʼa ʼaē ʼe lelei mo te meʼa ʼaē ʼe kovi. Neʼe nā manatu ʼe toe lahi age anai tanā ʼāteaina ʼi tanā fai te faʼahi ʼaia, kae ʼi tona fakahagatonu, neʼe liliu, ia nāua pea mo ʼanā fānau, ʼo pōpula ki te agahala pea neʼe iku ia ki te mamahi pea mo te mate.—Loma 5:12.

3, 4. Koteā ʼaē ʼe loto e Satana ke tou manatu ʼo ʼuhiga mo te ʼu meʼa ʼaē ʼe fakamaʼua mai e te ʼAtua?

³ Neʼe fakalotoʼi e Satana te taumātuʼa haohaoa pea mo ʼihi kau ʼāselo ke natou liʼaki te pule ʼa te ʼAtua. Pea ʼe feala pē ke toe hoko kiā tātou. Mole heʼeki fetogi te ʼu kākā ʼa Satana. ʼE loto ia ke tou manatu ʼe faigataʼa fau te ʼu meʼa ʼaē ʼe fakamaʼua mai e te ʼAtua. ʼE ina loto ke tou manatu ʼe mole he fiafia ʼi totatou maʼuli mo kapau ʼe tou tauhi ki te ʼAtua. (1 Soa. 5:3) ʼE ko te manatu ʼaia ʼa te hahaʼi ʼi te mālamanei, pea kapau ʼe tou fakatahi tuʼumaʼu mo nātou, pea ʼe feala ke tou manatu ohagē ko nātou. Neʼe ʼui e te tuagaʼane kua taʼu 24, neʼe mulimuli ia ki te manatu ʼo ʼana fakakaugā kovi, he neʼe tuʼania ia naʼa kehekehe mo ʼona kaumeʼa. Ki muli age neʼe ina fai he aga heʼeʼaoga. Koia, neʼe lagi kotou toe tokagaʼi ia te mālohi ʼo te fakaneke ʼo koutou e he ʼu kaumeʼa.

⁴ ʼE fakaʼofaʼofa foki he māʼiapē lā ʼi te kōkelekāsio ʼe feala ke liliu ʼihi ko he ʼu fakakaugā kovi. Neʼe ʼui e te tehina tūpulaga ko ʼihi ʼi ʼona kaumeʼa ʼi te kōkelekāsio, neʼe natou fakatahi mo ʼihi neʼe mole tauhi kiā Sehova. ʼI tana taka tuʼumaʼu mo nātou neʼe liliu leva ia ohagē ko nātou. Neʼe ina ʼui fēnei: “Neʼe mole kei mālohi taku felōgoi ʼaē mo Sehova. Neʼe mole kei au leleiʼia te ʼu fono, pea neʼe kua tahitahiga taku fai fakamafola. Neʼe au mahino ai leva neʼe tonu ke au fakagata taku fakatahi mo nātou, pea neʼe au fai te faʼahi ʼaia!” ʼE kotou mahino koa ki te mālohi ʼo te fakaneke ʼo koutou e ʼokotou kaumeʼa? Tou vakaʼi he faʼifaʼitaki ʼi te Tohi-Tapu ʼe feala ke tokoni mai iā ʼaho nei.—Loma 15:4.

NEʼE INA FAKAMALIU ʼONATOU LOTO

5, 6. Neʼe kākāʼi feafeaʼi e Apesalone te hahaʼi? Neʼe ʼi ai koa he fua ʼo tana fakatuʼutuʼu ʼaia?

⁵ ʼE lahi te ʼu faʼifaʼitaki ʼi te Tohi-Tapu ʼo te ʼu hahaʼi neʼe natou fakaneke ʼihi ke natou fai he ʼu meʼa ʼe kovi. ʼE kau iā nātou ʼaia te foha ʼo te Hau ko Tavite, ʼaē ko Apesalone. Ko Apesalone neʼe talavou ʼaupitō ia. Kae ohagē ko Satana, neʼe ina tuku ke tuputupu ʼi tona loto he holi ʼe kovi. Neʼe ina fia faʼao te tuʼulaga hau ʼo tana tamai, logolā neʼe mole ko ia ʼaē neʼe tonu ke ina maʼu te tuʼulaga ʼaia.a ʼI tana faiga ke ina maʼu te meʼa ʼaē neʼe loto kiai, neʼe ina fakaoloolo ia te hahaʼi ke natou tui ʼe fia tokoni moʼoni kiā nātou kae ko tonatou hau ʼe mole fēia ia. Ohagē pē ko te meʼa ʼaē neʼe fai e te Tēvolo ʼi te ʼōloto ʼo Eteni, neʼe fakaoloolo e Apesalone te hahaʼi ke natou manatu ʼe fia tokaga kiā nātou pea neʼe toe fasituʼu ia ki tana tamai.—2 Sam. 15:1-5.

⁶ Neʼe ʼi ai koa he fua ʼo te fakatuʼutuʼu ʼa Apesalone? ʼE tou ʼiloʼi neʼe ʼi ai tona fua. ʼE ʼui ʼi te Tohi-Tapu “nee fakamaliu e Apesalone te loto o te hahai o Iselaele kia ia.” (2 Sam. 15:6) Neʼe lahi te hahaʼi ʼaē neʼe kākāʼi e Apesalone, kae neʼe mole ina maʼu ki muli age te meʼa ʼaē neʼe loto kiai. Koteʼuhi ko tana fiameʼalahi ʼaia neʼe iku ki te matehi ʼo ia pea mo te toko lauʼi afe hahaʼi ʼaē neʼe ina lohiʼi.—2 Sam. 18:7, 14-17.

7. Koteā te ʼu ako ʼe tou lava tāʼofi mai te faʼifaʼitaki ʼo Apesalone? (Vakaʼi te pāki ʼi te pāsina 19.)

⁷ He koʼē neʼe faigafua kiā Apesalone hana kākāʼi te kau Iselaele ʼaia? Neʼe lagi natou holi ki te ʼu meʼa ʼaē neʼe fakapapau age e Apesalone. Peʼe lagi tupu ʼuhi ko tona talavou. Tatau aipē pe koteā tona tupuʼaga, kae ʼe tou ʼiloʼi papau neʼe mole natou agatonu kiā Sehova pea mo te hau ʼaē neʼe ina filifili. Iā ʼaho nei, ʼe kei fakaʼaogaʼi pē e Satana te hahaʼi, ʼaē ʼe natou hagē ko Apesalone, moʼo kākāʼi te ʼu kaugana ʼa Sehova. ʼE lagi natou ʼui ʼe faigataʼa fau te ʼu meʼa ʼaē ʼe fakamaʼua mai e Sehova, pea ko te hahaʼi ʼaē ʼe mole tauhi kiā Sehova ʼe lahi age tonatou ia fiafia. Kā fai atu he ʼu palalau fēia, ʼe kotou mahino koa ʼe ko he ʼu loi pea ʼe kotou haga nonofo agatonu koa ki te ʼAtua? ʼE kotou mahino koa ʼe gata pē ki “te lao haohaoa” ʼa Sehova, peʼe ko te lao ʼa Kilisito, ʼaē ʼe feala ke ina fakaʼāteaina moʼoni koutou? (Sakp. 1:25) Kapau koia, kotou fakahā ʼe kotou ʼofa ki te lao ʼaia, pea mo kotou fakaʼaogaʼi tokotou ʼāteaina ke fiafia ai Sehova.—Lau ia 1 Petelo 2:16.

8. Koteā he ʼu faʼifaʼitaki ʼe hā ai ʼe mole kita maʼu te fiafia mokā ʼe kita talagataʼa ki te ʼu fakatotonu ʼa Sehova?

⁸ ʼE kumi tāfito e Satana ke ina kākāʼi te kau tūpulaga. Neʼe ʼui e te tehina kua taʼu 30 tupu, ʼi tana kei tūpulaga neʼe manatu ia neʼe mole puipui ia ia e te ʼu fakatotonu ʼa Sehova. Kiā ia, neʼe mole feala ia ke faʼifaʼitaliha pea, ki muli age neʼe ina fai te aga heʼeʼaoga. Neʼe mole fiafia ia kae neʼe vevele tona loto pea mo fakahemala lolotoga ni taʼu. Neʼe ʼui e te tuagaʼane, ʼi tana kei finemui neʼe ina fai te aga heʼeʼaoga pea ki muli age neʼe lotomamahi pea mo manatu neʼe mole kei ʼi ai hona ʼuhiga. Neʼe ina toe ʼui fēnei: “Māʼiapē lā ʼi te temi nei, hili kiai taʼu e 19, ʼe kei au manatuʼi pē te ʼu faʼahi fakalotomamahi ʼaia.” Neʼe ʼui e te tahi tuagaʼane neʼe lotomamahi ʼosi ʼi tana manatuʼi ia te ʼu fua ʼo tana aga ki te hahaʼi ʼaē neʼe ʼoʼofa kiā ia. ʼE ina toe ʼui fēnei: “ ʼE fakaʼofaʼofa ʼosi te maʼuli mokā ʼe mole kei ʼofa Sehova kiā kita!” ʼE mole loto e Satana ke kotou manatu ki te ʼu fua kovi ʼo te agahala ʼaē ki ʼamuli.

9. (1) Ko te ʼu fehuʼi fea ʼe tonu ke tou fai ʼo ʼuhiga mo Sehova, mo ʼana lao pea mo ʼana pelesepeto? (2) He koʼē ʼe maʼuhiga ke tou ʼiloʼi lelei ia Sehova?

⁹ Ohagē ko tona fakahā ʼi te ʼu faʼifaʼitaki ʼaia, ʼe fua kovi ʼaupitō te talagataʼa ki te ʼAtua. ʼI meʼa fakaʼofaʼofa heʼe tokolahi te kau tūpulaga ʼi te moʼoni, ʼo toe fēia mo nātou ʼaē kua lalahi, neʼe tonu ke natou tau mo he ʼu mamahi pea hoki natou mahino leva ki te moʼoni ʼo te faʼahi ʼaia. (Kal. 6:7, 8) Koia, kotou fai te ʼu fehuʼi ʼaenī: “ ʼE au mālama koa ki te u faʼahiga fai ʼa Satana moʼoku kākāʼi? Ko Sehova ko toku Kaumeʼa koa ʼaē ʼe lelei tokotahi, ʼaē ʼe ina tala tuʼumaʼu pē te moʼoni pea mo ina loto ke au fiafia? ʼE au tui moʼoni koa ʼe mole ina fufū mai anai ʼi he temi he meʼa ʼe lelei kiā au pea mo au fiafia ai?” (Lau ia Esaia 48:17, 18.) ʼE feala hakotou ʼio ki te ʼu fehuʼi ʼaia mo kapau pē ʼe kotou ʼiloʼi lelei ia Sehova. ʼE tonu ke kotou mahino ʼe fakahā e te ʼu lao pea mo te ʼu pelesepeto ʼi te Tohi-Tapu ʼe ʼofa Sehova kiā koutou, kae ʼe mole ina fia puleʼi koutou.—Pes. 25:14.

KOTOU KOLE HE LOTO ʼE POTO MO TALAGAFUA

10. He koʼē ʼe tonu ke tou faiga ke tou faʼifaʼitakiʼi te Hau tūpulaga ko Salomone?

¹⁰ ʼI te kei tūpulaga ʼa Salomone, neʼe faikole ʼaki he agavaivai kiā Sehova pea neʼe ina ʼui fēnei: “Ko he toe au, e mole au iloi pe e feafeai te pule.” Koia neʼe faikole ia Salomone ke tokoni age Sehova ke liliu ʼo poto pea mo talagafua. (1 Hau 3:7-9, 12) Neʼe tali e Sehova tana faikole fakamālotoloto ʼaia. Kapau ʼe kotou toe kole ia te faʼahi ʼaia kiā Sehova, ʼe toe fakalogo anai ia ki takotou faikole, peʼe kei kotou tūpulaga peʼe kua kotou lalahi. ʼE mahino ia ʼe mole foaki atu anai e Sehova te poto ʼi te moʼi temi pē ʼaia. Kae ʼe ina fakaliliu anai koutou ʼo poto mokā kotou ako fakalelei tana Folafola, mo kole tona laumālie māʼoniʼoni, pea mo mulimuli ki te takitaki mo te ʼu tokoni ʼaē ʼe foaki atu ʼi te kōkelekāsio Fakakilisitiano. (Sakp. 1:5) ʼE fakaliliu e Sehova ʼana kaugana tūpulaga ʼo popoto age iā nātou fuli ʼaē ʼe mole talagafua kiā te ia, ʼo kau ai mo “te kau poto mo te kau atamai” ʼo te mālamanei.—Luka 10:21; lau ia Pesalemo 119:98-100.

11-13. (1) Koteā te ʼu ako maʼuhiga ʼe feala ke tou tāʼofi mai iā Pesalemo 26:4, mo Taaga Lea 13:20, pea mo 1 Kolinito 15:33? (2) ʼE kotou fakaʼaogaʼi feafeaʼi anai te ʼu ako ʼaia ʼi tokotou maʼuli?

¹¹ Tou vakaʼi ʼi te temi nei he ʼu vaega Tohi-Tapu ʼe tou lava tāʼofi ai he ʼu ako maʼuhiga ʼo ʼuhiga mo te filifili ʼo he ʼu kaumeʼa. ʼE tokoni mai anai ke tou mahino ki te maʼuhiga ʼaē ke tou ako te Tohi-Tapu pea mo tou metitāsio kiai ke feala hatatou ʼiloʼi lelei ia Sehova. ʼE ʼui fēnei iā Pesalemo 26:4: “E mole au lala fakatahi mo te kau faikaka, pea e mole au alu fakatahi mo te kau malualoi.” ʼE tou lau fēnei iā Taaga Lea 13:20: “Ko ae e nofo tuumau mo te kau poto e liliu anai o poto, kae ko ae e fiafia i te nofo mo te kau vale e liliu anai o kovi.” Pea ʼe ʼui fēnei iā 1 Kolinito 15:33: “E maumaui e te u kaumea kovi te u agalelei.”

¹² Koteā te ʼu ako maʼuhiga ʼe feala ke tou tāʼofi mai te ʼu vaega ʼaia? (1) ʼE loto e Sehova ke tou filifili fakalelei ʼotatou kaumeʼa. ʼE ina fia puipui tātou ke mole tou fai he ʼu meʼa ʼe feala ke fua kovi kiā tātou pea mo tatatou fakakaumeʼa ʼaē mo ia. (2) ʼE fakalotoʼi tātou e ʼotatou kaumeʼa ke tou fai te ʼu meʼa ʼaē ʼe lelei peʼe kovi, pea ʼe ko he ʼaluʼaga ia ʼe tau hoko tuʼumaʼu. ʼE fakahā ʼi te ʼu vaega ʼaia, ʼe faiga e Sehova ke malave ʼana palalau ki totatou loto. Koia, kotou tokagaʼi ʼe mole ina fai mai he ʼu fakatotonu, ohagē lā ʼe ina tapuʼi mai he meʼa, kae ʼe hagē pē ʼe ina ʼui fēnei mai: “ ʼE ko te ʼu ʼaluʼaga ʼaenī ʼe tau hoko tuʼumaʼu. Koteā ʼaē kā ke fai anai? Koteā te meʼa ʼaē ʼi tou loto?”

¹³ ʼE talanoa te ʼu vaega Fakatohi-tapu ʼaia ki he ʼu ʼaluʼaga ʼe tau hoko tuʼumaʼu iā ʼaho nei ohagē pē ko te temi ʼaē neʼe tohi ai, pea ʼe feala ke tokoni ki te hahaʼi ʼi te ʼu ʼaluʼaga kehekehe. Kotou fai te ʼu fehuʼi ʼaenī: Ko te ʼu ʼaluʼaga fea ʼaē ʼe feala ke au felāveʼi ai mo he “kau malualoi”? Koteā ʼaē ʼe feala ke au fai ke mole au kaumeʼa mo nātou? (Taag. 3:32; 6:12) Ko ai “te kau poto” ʼaē ʼe loto e Sehova ke au fakakaumeʼa mo nātou? Kae ko ai “te kau vale” ʼaē ʼe ina loto ke au fakamamaʼo mai ai? (Pes. 111:10; 112:1; Taag. 1:7) Ko “te u agalelei” fea ʼaē ʼe au maumauʼi anai mo kapau ʼe au filifili he ʼu kaumeʼa ʼe kovi? ʼE maʼu pē koa te ʼu “kaumea kovi” ʼi te mālama? (2 Pet. 2:1-3) ʼE kotou tali feafeaʼi anai ki te ʼu fehuʼi ʼaia?

14. Koteā ʼaē ʼe feala ke kotou fai ke lelei age takotou Tauhi Fakafāmili ʼi te ʼu afiafi?

¹⁴ ʼE feala hakotou lau he tahi ʼu vaega ke kotou mahino ki te manatu ʼa te ʼAtua ʼo ʼuhiga mo he ʼu faʼahi ʼe maʼuhiga kiā koutou pea mo tokotou fāmili, ohagē pē ko takotou fakakaukauʼi ia te ʼu vaega ʼaenī e tolu neʼe tou vakaʼi.b ʼU mātuʼa, kotou palalau ki te ʼu faʼahi ʼaia lolotoga takotou Tauhi Fakafāmili ʼi te ʼu afiafi. Kā kotou fai te faʼahi ʼaia, kotou manatuʼi ʼe kotou fia tokoni ki tokotou fāmili ke natou mahino ki te toe ʼofa lahi ʼa te ʼAtua kiā tātou, ʼaē ʼe hā ʼi ʼana lao pea mo ʼana pelesepeto. (Pes. 119:72) Kā kotou ako mo tokotou fāmili, pea ʼe liliu anai ʼo mālohi ʼakotou felōgoi ʼaē mo Sehova pea mo tokotou loto fale.

15. ʼE feafeaʼi hakotou ʼiloʼi kua kotou popoto pea mo talagafua?

¹⁵ ʼE feafeaʼi hakotou ʼiloʼi kua kotou popoto pea mo talagafua? Ohagē lā, ʼe feala ke kotou fakatatau takotou manatu pea mo te manatu ʼa he ʼu kaugana agatonu ʼa te ʼAtua ʼo te temi muʼa, ohagē ko te Hau ko Tavite. Neʼe ina tohi fēnei: “E au loto ke fai tou finegalo, sioku Atua! Pea e tuu tau lao i te takele o toku loto.” (Pes. 40:9) Pea neʼe toe ʼui fēnei e te tagata neʼe ina tohi ia te Pesalemo 119: “E au ofa osi ki tau lao! E au metitasio ki ai i te aho katoa.” (Pes. 119:97) ʼE tonu ke kotou faiga mālohi ke kotou maʼu te faʼahiga ʼofa ʼaia. ʼE tuputupu te ʼofa ʼaia mokā ʼe kotou ako fakalelei te Tohi-Tapu, mo faikole, pea mo metitāsio. ʼE toe tuputupu te ʼofa ʼaia mokā ʼe kotou tokagaʼi te ʼu tapuakina ʼaē ʼe kotou maʼu ʼi tokotou maʼuli, heʼe kotou fakalogo ki te ʼu fakatotonu ʼa Sehova.—Pes. 34:9.

KOTOU FAIGA KE KOTOU TAUPAU TAKOTOU ʼĀTEAINA FAKAKILISITIANO

16. Koteā ʼaē ʼe tonu ke tou manatuʼi mo kapau ʼe tou fia mālo ʼi te tau ʼaē moʼo taupau totatou ʼāteaina?

¹⁶ ʼI te temi fuli pē, neʼe tauʼi mālohi e te ʼu puleʼaga ke natou maʼu tonatou ʼāteaina. ʼE tonu ke lahi age takotou faiga ʼaē ke kotou taupau tokotou ʼāteaina Fakakilisitiano! Kotou manatuʼi ko te ʼu fili ʼaē ʼe tonu ke kotou tauʼi ʼe mole pē ko Satana pea mo te manatu ʼa te mālama ʼaē ʼe iku ki te mate. Kae ʼe toe kau kiai ʼokotou vaivaiʼaga pea mo tokotou loto ʼaē ʼe feala ke ina kākāʼi koutou. (Sel. 17:9; Efe. 2:3) ʼAki te tokoni ʼa Sehova, ʼe feala ai ke kotou mālo ʼi te tau. ʼI takotou fai te meʼa ʼaē ʼe totonu ʼi te temi fuli pē, ʼe ʼi ai ʼona fua lelei e lua. ʼUluaki, ʼe kotou fakafiafiaʼi anai te loto ʼo Sehova. (Taag. 27:11) Lua, ʼi takotou sio ʼaē ʼe fua lelei kiā koutou takotou fakalogo ki “te lao haohaoa, lao o te ateaina,” ʼe toe mālohi ai anai takotou fia haga haʼele ʼi te ala ʼaē ʼe ina taki ki te maʼuli heʼegata. ʼI te kā haʼu, ʼe kotou maʼu anai te ʼāteaina lahi ʼaē ʼe fakapapau e Sehova kiā nātou fuli ʼe nonofo agatonu kiā te ia.—Sakp. 1:25; Mat. 7:13, 14.

17. Kā tou lakahala, he koʼē ʼe mole tonu ke tou lotovaivai? ʼE tokoni feafeaʼi mai Sehova mokā ʼe tou lakahala?

¹⁷ ʼE moʼoni, ko tātou fuli ʼi ʼihi temi ʼe tou lakahala ai. (Ekl. 7:20) Kā hoko te faʼahi ʼaia, ʼaua naʼa kotou manatu ʼe mole kei ʼi ai hokotou ʼuhiga peʼe kotou lotovaivai. Kae kotou foimo fai ia meʼa fuli ʼe ʼaoga moʼona fakatonutonuʼi, pea ʼe lagi tonu ke kotou kole te tokoni ʼa te kau tagata ʼāfea. Neʼe tohi e Sakopo ko tanatou “faikole i te tui e ina fakamauli anai te mahaki, pea e fakatuu anai ia ia e [Sehova]; pea kapau nee ina fai ni agahala, e fakamolemole anai kia ia.” (Sakp. 5:15) ʼAua naʼa galo kiā koutou ko Sehova ʼe manavaʼofa moʼoni, pea neʼe ina taki mai koutou ki te kōkelekāsio he neʼe ina tokagaʼi te meʼa lelei iā koutou. (Lau ia Pesalemo 103:8, 9.) ʼE tokoni tuʼumaʼu atu anai Sehova mo kapau ʼe kotou faiga ke kotou tauhi kiā te ia ʼaki tokotou loto kātoa.—1 Klk. 28:9.

18. Koteā ʼaē ʼe tonu ke tou fai ke puipui ai tātou e Sehova?

¹⁸ ʼI te pō ʼi muʼa ʼo tana mate, neʼe faikole Sesu mo ʼana kau ʼapositolo agatonu e toko 11, pea neʼe ina kole ki tana Tamai ke ina puipui nātou. Neʼe ina fai te ʼu palalau maʼuhiga ʼaenī: “Ke ke taupau natou mai ae e kovi.” (Soa. 17:15) Ohagē pē ko te tokaga ʼa Sesu ki ʼana ʼapositolo, ʼe toe tokaga fēia pē ia ia ki ʼana tisipulo fuli iā ʼaho nei. Koia ʼe feala ke tou tui papau ʼe tali anai e Sehova ki te faikole ʼa Sesu ʼaki tana puipui tātou ʼi te ʼu temi faigataʼa ʼaenī. ʼE ʼui iā Taaga Lea 2:7, 8 ko Sehova ʼe ko he paletau maʼa nātou ʼaē ʼe agatonu kiā te ia, pea “e ina taupau te ala o tana kau agatonu.” ʼE mole faigafua tuʼumaʼu te fakalogo ki te ʼu fakatotonu ʼa Sehova. Kae ʼe gata pē kiā nātou ʼaē ʼe fakalogo kiā Sehova ʼaē kā natou maʼu anai te maʼuli heʼegata pea mo te ʼāteaina moʼoni. (Loma 8:21) ʼE lagi maʼu e te hahaʼi he tahi age faʼahiga manatu, kae ʼaua naʼa kotou tuku ke natou lohiʼi koutou!

[ʼU nota]

[Paki ʼo te pāsina 19]

ʼE feafeaʼi hatatou ʼiloʼi iā ʼaho nei ia nātou ʼaē ʼe hagē ko Apesalone, pea mo puipui tātou mai iā nātou?