ʼE Lelei Koa Takotou ʼu Felogoi?
“KO HE tala ʼofa ʼo he matuʼa kua taʼu 60.” Neʼe ko te kupu tāfito ʼaia ʼo te sivi neʼe fai e te fale paʼaga ʼi Saponia ʼi te ʼu taʼu kua hili. Ko te sivi ʼaia neʼe ina eke te hahaʼi tagata Saponia ʼaē kua taʼu 50 pea mo taʼu 60 ke nātou fai ni ʼu tohi ʼo fakahā tonatou “ ʼu ʼofa moʼoni” ki ʼonatou ʼohoana. ʼI te sivi ʼaia, neʼe tohi fēnei e te tagata ki tona ʼohoana: “ ʼE lagi ke kata anai ki taku ʼu palalau, kae ʼe au fakahemala anai mo kapau ʼe mole au tala atu, koia ʼe au fakahā fakalelei atu: ʼE au fakamālo atu ʼi tau ʼohoana mo au.”
ʼE lahi te ʼu agaʼi fenua, ʼe kau ai mo ʼihi agaʼi fenua ʼi te Potu Esite, ʼe mole faʼa leleiʼia e te hahaʼi te tala fakahagatonu feiā ʼo te ʼu meʼa ʼaē ʼi tonatou loto. Kae ko te toko 15 000 tupu neʼe nātou kau ki te sivi tala ʼofa ʼaia. ʼI te leleiʼia ʼaupito ʼo te sivi ʼaia, neʼe toe fai te tahi sivi feiā, pea neʼe tā mo te ʼu tohi ʼe fakatafito ki te ʼu tohi tala ʼofa ʼaē neʼe fai. ʼI te sivi ʼaia ʼaē neʼe tonu ai ki te ʼu tagata ʼaia ke nātou fakahā te ʼu ʼofa ʼaē ʼi tonatou loto, ko te tokolahi ʼe nātou fia ʼavahi tonatou loto kiā nātou ʼaē ʼe ʼoʼofa mamahi ki ai. Kae ʼe ʼi ai ʼihi ʼe mole nātou faʼa fakahā te ʼu meʼa ʼaē ʼi tonatou loto. Koteā tona tupuʼaga? ʼE lagi mole nātou faʼa fakahā koteʼuhi ʼe fakamaʼua ai kiā nātou ke nātou faiga pea mo popoto ʼi te fakahā ki niʼihi—ohage ko tonatou ʼohoana—ke nātou mahino ki te ʼu meʼa ʼaē ʼi tonatou loto.
ʼE ʼui fēnei e Hitoshi Kato, ʼaē neʼe ina fai tana tohi ʼo ʼuhiga mo te lētelete, ʼe lahi te ʼu taumātuʼa kua mātutuʼa ʼi Saponia, ʼe fakaʼui e te hahaʼi fafine ke nātou māvete ʼuhi ko te ʼu mamahi neʼe taupau e nātou talu mai te ʼu taʼu. ʼE ina toe ʼui fēnei: “Kae ʼe toe tupu te faʼahi ʼaia ʼuhi ko te mole fai ʼa he ʼu felogoi mokā nā tokakovi.”
Ka kaku he tagata ʼohoana ki tona temi lētelete, ʼe lagi punamaʼuli anai mokā fakatoʼo age e tona ʼohoana he pepa māvete ʼohoana. Lolotoga ni ʼu taʼu, lagi neʼe mole faifai palalau te taumātuʼa ʼo ʼuhiga mo te ʼu meʼa ʼe nā logoʼi ʼi tonā loto. Neʼe lagi faigaʼi e te tagata pea mo te fafine ke nā fefakahāʼaki tonā ʼu loto kae neʼe mole nā lava palalau fakalelei. ʼE mole ʼui ke nā faʼufaʼu tanā ʼu felogoi ke mālohi, kae ʼe lahi pe tanā ʼu fetalanoaʼaki.
ʼE lava feafeaʼi ki te tagata pea mo tona ʼohoana ke nā fakatokatoka tonā ʼu fihifihia ʼi te tokalelei, pea mo fepalalau leleiʼaki moʼo fakahā te ʼu meʼa ʼaē ʼi tonā loto? ʼE lagi lelei ke tou tokagaʼi, ʼe lahi te ʼu tokoni ʼaoga ʼe maʼu ʼi te tohi kua ʼāfea ʼaupito kae ʼe leleiʼia ʼaupito, ia te Tohi-Tapu.