Ko Sehova ʼe Ina Fakahā “Te Fakaʼosi Talu Mai Te Kamataʼaga”

“[Ko] Ia ʼaē ʼe ina fakahā te fakaʼosi talu mai te kamataʼaga, pea talu mai te ʼu temi muʼa te ʼu meʼa ʼaē ʼe mole heʼeki hoko.”​—Isaia 46:⁠10.

1, 2. Koteā ʼaē ʼe fakatalakitupua ʼo ʼuhiga mo te ʼu ʼaluʼaga ʼaē neʼe iku ki te fakaʼauha ʼo Papiloni, pea ʼo ʼuhiga mo Sehova, koteā te ako ʼaē ʼe tou lava tāʼofi ai?

ʼI TE pōʼuli, ko te ʼu kautau fakafeagai neʼe nātou fakalaka fakafufū ʼi te Vaitafe ʼo Eufalate moʼo hūfi ia te kolo mālohi ko Papiloni. ʼI tanatou fakaōvi ki te hūʼaga ʼo te kolo, neʼe nātou punamaʼuli, he neʼe tuku ava te ʼu foʼi matapā lalahi e lua ʼo te kaupā ʼo Papiloni! ʼI tanatou ʼosi fakalaka ʼi te vaitafe neʼe nātou fekākeʼi ʼi te kaupā ʼo hū ki te kolo. Neʼe mole tuai pea neʼe nātou mālo ʼi te tauʼi ʼo te kolo. Ko Siliusi, te pule ʼo te foʼi solia ʼaia, neʼe ina puleʼi atu aipe ia te fenua ʼaia pea ki muli age neʼe ina tā te tohi moʼo faka ʼāteaina ia te kau Iselaele mai tanatou ʼaunofo. Neʼe toe liliu ki Selusalemi te toko lauʼi afe kau Sutea ʼaē neʼe pilisoniʼi, ʼo toe fakatuʼu ia te tauhi kiā Sehova.​—2 Fakamatala 36:​22, 23; Esitalasi 1:​1-4.

² ʼE fakamoʼoni e te ʼu tagata fakamatala hisitolia ki te ʼu meʼa ʼaia neʼe hoko ʼi te taʼu 539 ʼo aʼu ki te taʼu 537 ʼi muʼa ʼo totatou temi. Kae ko te meʼa ʼaē ʼe fakatalakitupua, heʼe ko te ʼu meʼa ʼaia neʼe kua fakakikite iā taʼu e 200 ki muʼa atu. Ko Sehova neʼe ina takitaki tana polofeta ko Isaia ke ina fakamatalatala ia te fakaʼauha ʼo Papiloni. (Isaia 44:24–45:7) Neʼe fakahā e te ʼAtua te ʼu ʼaluʼaga ʼaē ka iku anai ki te fakaʼauha ʼo Papiloni, pea mo te higoa ʼo te tagata ʼaē ka ina takitaki te tau ʼaia.a Neʼe ʼui fēnei e Sehova ki te kau Iselaele ʼaē neʼe ko tana kau fakamoʼoni ʼi te temi ʼaia: “Koutou manatuʼi te ʼu ʼuluaki meʼa ʼo te ʼu temi ki muʼa atu, ʼe ko au ko te ʼAtua pea ʼe mole ʼi ai he tahi age ʼAtua, peʼe ko he tahi ʼe tatau mo au; ia Ia ʼaē ʼe ina fakahā te fakaʼosi talu mai te kamataʼaga, pea talu mai te ʼu temi muʼa te ʼu meʼa ʼaē ʼe mole heʼeki hoko.” (Isaia 46:​9, 10a) Ko Sehova ʼe ko te ʼAtua ʼaē ʼe ina ʼiloʼi fakatomuʼa ia te ʼu meʼa ʼaē ka hoko.

3. Ko te ʼu tali ki te ʼu fehuʼi fea ʼaē ka tou vakaʼi anai ʼi te alatike ʼaenī?

³ Koteā te ʼu meʼa ʼaē ʼe lava ʼiloʼi fakatomuʼa e te ʼAtua? ʼE ʼiloʼi fakatomuʼa koa e Sehova te ʼu meʼa ʼaē ka tou fai takitokotahi? Kua tohi fakatomuʼa koa te ʼu meʼa ʼaē ka tou fai takitokotahi ʼi te ka haʼu? ʼE tou vakaʼi anai te ʼu tali ki te ʼu fehuʼi ʼaia ʼi te Tohi-Tapu, pea mo vakaʼi ʼi te alatike ʼaenī pea mo ʼaē ka hoa mai te tahi ʼu fehuʼi ʼe pipiki kiai.

Ko Sehova ʼe Ko Te ʼAtua ʼo Te ʼu Lea Faka Polofeta

4. Ko Ai ʼaē ʼe ina fakahā ia te ʼu lea faka polofeta ʼaē ʼe tuʼu ʼi te Tohi-Tapu?

⁴ ʼI te fealagia ʼa Sehova ke ina ʼiloʼi fakatomuʼa ia te ka haʼu, neʼe ina takitaki tana ʼu kaugana ʼo te temi muʼa ke nātou tohi te ʼu lea faka polofeta, ke feala kiā tatou ke tou ʼiloʼi fakatomuʼa te ʼu fakatuʼutuʼu ʼa Sehova. ʼE ʼui fēnei e Sehova: “Ko te ʼu ʼuluaki meʼa​—koʼenā kua hoko, kae ʼe au fakahā te ʼu meʼa foʼou. ʼI muʼa ʼo tanatou tutupu, ʼe au fakahā fakatomuʼa atu.” (Isaia 42:9) ʼE ko he toe pilivilesio ʼaē ʼe maʼu e te ʼu kaugana ʼa te ʼAtua!

5. Koteā te gāue ʼaē ʼe fakamaʼua mai ʼi tatatou ʼiloʼi fakatomuʼa ia te ʼu meʼa ʼaē ka fai e Sehova?

⁵ ʼE ʼui fēnei e te polofeta ko Amosi: “Ko te Tuʼi ʼAliki ko Sehova ʼe mole ina fai anai he meʼa kae neʼe mole heʼeki ina tala tana meʼa fakalilo ki tana ʼu kaugana, ia te kau polofeta.” ʼE ʼi ai te gāue ʼe fakamaʼua mai ke tou fai ʼi tatatou ʼiloʼi fakatomuʼa te ʼu meʼa ʼaē ka hoko. Koutou fakatokagaʼi ia te lea fakatātā ʼaē neʼe fakaʼaogaʼi e Amosi ʼi te vaega ʼaē ʼe hoa mai: “ ʼE ʼi ai te laione ʼe gugulu! Ko ai ʼaē ka mole mataku anai?” Ka gugulu he laione, pea ko te hahaʼi pea mo te ʼu manu ʼe nātou foimo feholaki, pea neʼe feiā mo te kau polofeta, ohage ko Amosi, neʼe nātou foimo tala ia te ʼu folafola ʼa Sehova. “Ko te Tuʼi ʼAliki ko Sehova neʼe palalau totonu! Ko ai ʼaē ka mole fai fakakikite anai?”​—Amosi 3:​7, 8.

Ko Te “Folafola” ʼa Sehova ʼe “Lava Lelei”

6. Neʼe hoko feafeaʼi te “manatu” ʼa Sehova ʼo ʼuhiga mo te tō ʼa Papiloni?

⁶ ʼAki tana polofeta ko Isaia, neʼe ʼui fēnei e Sehova: “ ʼE tuʼu anai taku manatu, pea ko meʼa fuli ʼe au fiafia ai, ʼe au fai anai.” (Isaia 46:10b) Ko te “manatu” ʼa te ʼAtua neʼe ko tona finegalo peʼe ko tana fakatuʼutuʼu ʼo ʼuhiga mo Papiloni, ʼaē ke ina fakaʼaogaʼi ia Siliusi te Pelesia moʼo fakatō pea mo fakaʼauha ia Papiloni. Neʼe tala e Sehova ia tana fakatuʼutuʼu ʼaia, kua fualoa ki muʼa atu. Ohage ko te faʼahi ʼaē neʼe kua tou vakaʼi, neʼe hoko te faʼahi ʼaia ʼi te taʼu 539 ʼi muʼa ʼo totatou temi.

7. He koʼe ʼe tou lava falala ʼe hoko tuʼumaʼu te “folafola” ʼa Sehova?

⁷ Iā teitei sēkulō e fā ki muʼa atu kae heʼeki hūfi e Siliusi ia Papiloni, neʼe fehōkosi ia Sosafate, Hau ʼo Suta, pea mo te ʼu kautau ʼaē neʼe tau fakatahi, ʼa Amone pea mo Moape. ʼAki he loto falala neʼe faikole fēnei: “Ê Sehova te ʼAtua ʼo tatatou ʼu kui, ʼe mole ke ʼAtua koa la ʼi te lagi pea ʼe mole ke pule koa la ki te ʼu puleʼaga fuli, pea ʼi tou nima ʼe mole ʼi ai koa la te mālohi pea mo te māfimāfi, heʼe mole he tahi ʼe ina lavaʼi koe?” (2 Fakamatala 20:6) Ko te taʼi falala ʼaia, neʼe toe maʼu e Isaia he neʼe ina ʼui fēnei: “Ko Sehova ʼo te ʼatu ʼu kautau neʼe kua ina fakahā tana manatu, pea ko ai ʼaē ʼe ina lava holoʼi? Kua ina faoʼi tona nima, pea ko ai ʼaē ʼe ina lava peluki?” (Isaia 14:27) Ki muli age, ʼi te kua toe ʼatamai ʼo te Hau ʼo Papiloni ko Nepukanesa, ʼaki he agavaivai neʼe ina fakamoʼoni ki te faʼahi ʼaenī: “ ʼE mole he tahi ʼe ina lava tāʼofi [te] nima [ʼa te ʼAtua] peʼe ina lava ʼui age kiā te ia, ‘Koteā ʼaē neʼe ke fai?’ ” (Taniela 4:35) Ei, ʼe fakapapau fēnei e Sehova ki tana hahaʼi: “[Ko] taku folafola . . . ʼe mole toe liliu mai anai kiā te au kae ʼe mole hona fua, kae ʼe mahino papau ia ʼe ina fai anai te meʼa ʼaē kua au leleiʼia, pea ʼe lava lelei anai te meʼa ʼaē neʼe au fekauʼi kiai.” (Isaia 55:11) ʼE tou lava falala kātoa ko te “folafola” ʼa Sehova pea mo tana fakatuʼutuʼu ʼe hoko tuʼumaʼu.

Te “Fakatuʼutuʼu Heʼegata” ʼa Te ʼAtua

8. Koteā ia te “fakatuʼutuʼu heʼegata” ʼa te ʼAtua?

⁸ ʼI tana tohi ki te kau Kilisitiano ʼo Efeso, neʼe ʼui e te ʼapositolo ko Paulo ʼe ʼi ai te “fakatuʼutuʼu heʼegata” ʼa te ʼAtua. (Efeso 3:​11, MN ) ʼE mole ko he gāue ʼe fai feiā e te ʼAtua, ohage neʼe tonu ke ina fakatuʼutuʼu peʼe ina fakahoko feafeaʼi anai. Kailoa ia, ʼe pipiki te gāue ʼaia ki te loto papau ʼa Sehova ke ina fakahoko tana fakatuʼutuʼu ʼaē neʼe ina ʼuluaki fai maʼa te malamanei. (Senesi 1:28) Ke feala hatatou mahino ki te hoko moʼoni anai ʼo tana fakatuʼutuʼu, tou vakaʼi age muʼa tana ʼuluaki lea faka polofeta ʼaē ʼe tuʼu ʼi te Tohi-Tapu.

9. Koteā te pikipikiga ʼo Senesi 3:15 pea mo te fakatuʼutuʼu ʼa te ʼAtua?

⁹ ʼE hā mai ʼi te fakapapau ʼaē ʼe tuʼu iā Senesi 3:​15, ʼi te hili pe ʼo te agahala ʼa Atama mo Eva, neʼe fakatuʼutuʼu e Sehova ko tona ʼohoana fakatātā ʼe ina fānauʼi anai he hāko, peʼe ko he tama. Neʼe toe ʼiloʼi fakatomuʼa e Sehova te ikuʼaga ʼo te fihi ʼaē ka hoko anai ʼi te fafine pea mo Satana, ʼi tana hāko pea mo tana ʼu fānau talagataʼa. Tatau aipe peʼe tuku anai e Sehova ke mamahi te Hāko ʼo te fafine ʼi te maumauʼi ʼo tona muliʼi vaʼe, kae ʼi te temi ʼaē kua fakakatofa e te ʼAtua, ko te Hāko ʼe ina maumauʼi anai te ʼulu ʼo te gata, ia Satana te Tevolo. ʼI te hoholo ʼo te temi, neʼe hoko moʼoni te fakatuʼutuʼu ʼa Sehova ʼaki te hōloga ʼaē neʼe ina fili ke tupu mai ai Sesu, te Mesia ʼaē neʼe fakapapauʼi mai.​—Luka 3:​15, 23-38; Kalate 4:⁠4.

Te ʼu Meʼa ʼAē ʼe Fakatuʼutuʼu Fakatomuʼa e Sehova

10. Neʼe fakakikite koa e Sehova ko Atama mo Eva ʼi te kamataʼaga ʼe nā agahala anai? Koutou fakamahino.

¹⁰ ʼO ʼuhiga mo te tuʼulaga ʼo Sesu ʼi te fakatuʼutuʼu ʼa te ʼAtua, neʼe tohi fēnei e te ʼapositolo ko Petelo: “[Ko Sesu] neʼe kua ʼiloʼi fakatomuʼa . . . ʼi muʼa ʼo te fakatuʼu ʼo te malamanei, kae neʼe fakahā ia ʼi te fakaʼosi ʼo te ʼu temi ʼuhi ko koutou.” (1 Petelo 1:​20, MN ) Neʼe kua ʼiloʼi fakatomuʼa koa e Sehova talu mai te kamata, ko Atama mo Eva ʼe nā agahala anai pea mo ʼaoga anai ke foaki e Sesu Kilisito ia he sākilifisio moʼo totogi ʼaki te agahala ʼaia? Kailoa. Ko te kupu “fakatuʼu” neʼe fakaliliu mai te kupu faka Keleka ʼe lava fakaliliu ʼaki te kupu “fakatupu.” ʼI muʼa ʼo te tupu ʼa Atama mo Eva, neʼe kua tupu koa he hōloga ? Kailoa. Neʼe hoki maʼu fānau ia Atama mo Eva ʼi tanā ʼosi talagataʼa. (Senesi 4:1) ʼI te ʼosi talagataʼa ʼa Atama mo Eva pea ʼi muʼa ʼo tanā maʼu fānau, neʼe fakatuʼutuʼu fakatomuʼa e Sehova ke tupu he “hāko.” Ko te mate pea mo te fakatuʼuake ʼa Sesu neʼe ko he fakatuʼutuʼu ʼofa ʼaia moʼo molehi ia te agahala pea mo te ʼu gāue ʼa Satana.​—Mateo 20:28; Hepeleo 2:14; 1 Soane 3:⁠8.

11. Koteā te ʼaluʼaga ʼaē neʼe fakatuʼutuʼu fakatomuʼa e Sehova moʼo fakahoko tona finegalo?

¹¹ Ko te ʼAtua neʼe ina fakatuʼutuʼu fakatomuʼa te tahi ʼaluʼaga moʼo fakahoko tona finegalo. ʼE hā te faʼahi ʼaia ʼi te tohi ʼa Paulo ki te kau Efeso, ʼaē ʼe ʼui ai ko te ʼAtua ʼe ina “fakatahiʼi [anai] ia meʼa fuli iā Kilisito, te ʼu meʼa ʼaē ʼi te lagi pea mo te ʼu meʼa ʼaē ʼi te kele.” ʼO ʼuhiga mo “te ʼu meʼa ʼaē ʼi te lagi,” ʼaē ʼe nātou fakatātā ia nātou ʼaē neʼe fili ke nātou kaugā hau mo Kilisito, neʼe fakamahino fēnei e Paulo: “Neʼe kua fili fakatomuʼa tatou ʼo mulimuli ki te fakatuʼutuʼu ʼa ia ʼaē ʼe ina fai ia meʼa fuli ʼo mulimuli ki tona finegalo.” (Efeso 1:​10, 11, MN ) Ei, neʼe fakatuʼutuʼu fakatomuʼa e Sehova ʼo ʼuhiga mo he tokosiʼi, ʼe ko nātou anai ia te lua koga ʼo te Hāko ʼo te ʼohoana ʼo te ʼAtua, pea ʼe kaugā hau anai mo Kilisito moʼo fakahoko ia te ʼu lelei ʼo te totogi ʼaē neʼe ina fai ʼaki tona maʼuli. (Loma 8:​28-30) Ko te ʼapositolo ko Petelo ʼe ina ʼui ʼo ʼuhiga mo nātou ʼe ko “he puleʼaga maʼoniʼoni.” (1 Petelo 2:​9, MN ) Neʼe foaki ki te ʼapositolo ko Soane ia te pilivilesio ʼaē ke sio ki te kaugamālie ʼo nātou ʼaē ka kaugā hau mo Kilisito: ko te toko 144 000. (Apokalipesi 7:​4-8; 14:​1, 3) ʼE nātou lagolago ki te Hau ko Kilisito, pea mo nātou kau “ki te vikiviki o [te] kolōlia [ʼo te ʼAtua].”​—Efeso 1:​12-14.

12. ʼE tou ʼiloʼi feafeaʼi ʼe mole heʼeki filifili fakatomuʼa ia te ʼu hahaʼi ʼaē ka nātou kau anai ki te toko 144 000?

¹² Ko te fakatuʼutuʼu fakatomuʼa ʼo te ʼu hahaʼi e toko 144 000, ʼe mole faka ʼuhiga leva ʼe kua ʼi ai te ʼu hahaʼi kua filifili fakatomuʼa ke nātou tauhi agatonu ki te ʼAtua. Neʼe tohi tāfito te Tauhi Foʼou moʼo takitaki pea mo fakaloto mālohiʼi te kau Kilisitiano fakanofo ke nātou nonofo agatonu pea mo nātou tuha mo te ʼamanaki ʼaē ke nātou māʼuʼuli ʼi selo. (Filipe 2:12; 2 Tesalonika 1:​5, 11; 2 Petelo 1:​10, 11) Ko Sehova ʼe ina ʼiloʼi fakatomuʼa ʼe ʼi ai te toko 144 000 hahaʼi ʼe nātou maʼu anai te ʼu kalitātē ʼaē ʼe fakamaʼua kiā nātou ʼaē ʼe tonu ke nātou fai ia tona finegalo. Ko te ʼu hahaʼi ʼaē ka kau anai ki te kalasi ʼaia, ʼe fakalogo anai ki te ʼu aga ʼaē ka nātou fai takitokotahi ʼi tonatou maʼuli, pea ʼe ko he tonu ʼe fakalogo kiā nātou takitokotahi.​—Mateo 24:⁠13.

Te ʼu Meʼa ʼAē ʼe ʼIloʼi Fakatomuʼa e Sehova

13, 14. Ko te ʼu kalitātē fea ʼo Sehova ʼe pipiki ki tana ʼu fai fakakikite, pea koteā tona tupuʼaga?

¹³ Kapau ko Sehova ʼe ko he ʼAtua ʼe fai fakakikite pea mo fai fakatuʼutuʼu, ʼe ina fakaʼaogaʼi feafeaʼi tana ʼiloʼi fakatomuʼa ia te ʼu meʼa ʼaē ka hoko? ʼUluaki, ʼe tou falala ko te ʼu gāue fuli ʼa te ʼAtua ʼe moʼoni, mo faitotonu, pea mo fai ʼaki te ʼofa. ʼI tana tohi ki te kau Kilisitiano Hepeleo ʼo te ʼuluaki sēkulō, neʼe fakahā lelei e te ʼapositolo ko Paulo, ko te fuakava ʼa te ʼAtua pea mo tana fakapapau ʼe ko ‘he ʼu meʼa ʼaia e lua ʼe mole feala ke fetogi pea ʼe mole feala ai ki te ʼAtua ke loi.’ (Hepeleo 6:​17, 18) ʼI tana tohi ki te tisipulo ko Tito, neʼe toe fakahā e Paulo te manatu ʼaia, ko te ʼAtua “ ʼe mole feala ke loi.”​—Tito 1:​2, MN.

¹⁴ Tahi ʼaē, logola ko Sehova ʼe māfimāfi, kae ʼe mole ina fai he ʼu aga ʼe heʼe faitotonu. Neʼe ʼui e Moisese ko Sehova ʼe ko te “ ʼAtua ʼo te agatonu, ʼaē ʼe mole ia te ia te heʼe faitotonu; ʼe faitotonu pea mo totonu.” (Teutalonome 32:4) Ko meʼa fuli ʼaē ʼe fai e Sehova ʼe ʼalutahi mo tona ʼulugaaga taulekaleka. ʼE ʼasi ʼi tana ʼu gāue ia te lahi ʼo tona ʼu kalitātē, ohage ko te ʼofa, mo te poto, mo te faitotonu pea mo te mālohi.

15, 16. Ko te fakatotonu fea ʼaē neʼe fai age e Sehova kiā Atama ʼi te ʼōloto ʼo Eteni?

¹⁵ Koutou fakatokagaʼi tona ʼu kalitātē ʼi tana ʼu gāue ʼaē neʼe ina fai ʼi te ʼōloto ʼo Eteni. ʼI tona ʼuhiga Tāmai ʼofa, neʼe foaki e Sehova ia meʼa fuli ʼaē ʼe ʼaoga ki te maʼuli ʼo te tagata. Neʼe ina faʼu ia Atama ʼaki te fealagia ʼaē ke poto ʼi te fakakaukauʼi ia te ʼu meʼa ʼaē ʼe ina fai, pea ke maʼu puleʼaki kiai. Neʼe kehekehe ia Atama mo te ʼu manu, he neʼe ina maʼu ia te fealagia ʼaē ke ina fai he ʼu tonu, kae ko te ʼu manu, neʼe faʼu nātou ʼaki he faʼahiga poto moʼo takitaki ʼo nātou. Mai tona ʼafioʼaga ʼi te lagi, neʼe mamata ifo te ʼAtua pea sio ia ‘kua lelei ʼaupito ia meʼa fuli ʼaē neʼe ina fakatupu.’​—Senesi 1:​26-31; 2 Petelo 2:⁠12.

¹⁶ ʼI te ʼosi fakatotonu age e Sehova kiā Atama ke mole ina kai “te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi,” neʼe ina akoʼi fakalelei ia ia ke feala hana fili faʼitaliha te meʼa ʼaē ka ina fai. Neʼe ina fakagafua kiā Atama ke ina kai ki te fua ʼo “te ʼu fuʼu ʼakau fuli ʼo te ʼōloto,” gata pe ki te fuʼu ʼakau e tahi, pea mo fakatokagaʼi ia ia ki te ʼu fua kovi ʼaē ka hoko anai kiā ia mo kapau ʼe ina kai te fuaʼi ʼakau ʼaē neʼe ina tapuʼi age. (Senesi 2:​16, 17) Neʼe ina fakahāhā age kiā Atama ia te ʼu fua kovi ʼo tana talagataʼa ki ai. Koteā ʼapē te meʼa ʼaē ka fai e Atama?

17. He koʼe ʼe tou lava ʼui ʼe filifili e Sehova te ʼu meʼa ʼaē ʼe feala ke ina ʼiloʼi fakatomuʼa?

¹⁷ ʼE ʼasi mai, neʼe mole fakaʼaogaʼi e Sehova te fealagia ʼaē ke ina ʼiloʼi fakatomuʼa te meʼa ʼaē ka fai anai e Atama mo Eva, logola tana lava ʼiloʼi fakatomuʼa ia meʼa fuli. Koia ko te meʼa ʼaē ʼe maʼuhiga, ʼe mole ko te lava ʼiloʼi fakatomuʼa e Sehova te ʼu meʼa ʼaē ka hoko, kae ko tana filifili ke ina ʼiloʼi fakatomuʼa peʼe kailoa. Tahi ʼaē, ʼe tou mahino ko Sehova ʼi tona ʼuhiga ʼAtua ʼofa, neʼe mole ina fakatuʼutuʼu fakatomuʼa ke hoko ia te talagataʼa pea mo tona ʼu fua kovi. (Mateo 7:11; 1 Soane 4:8) Koia, ka fakaʼaogaʼi e Sehova tana fealagia ʼaē ke ina ʼiloʼi fakatomuʼa te ʼu meʼa ʼaē ka hoko, ʼe ina filifili te ʼu meʼa ʼaē ʼe ina fia ʼiloʼi.

18. He koʼe ʼe mole tonu ke tou ʼui ʼe heʼe haohaoa ia Sehova ʼi tana faka tuʼakoi tana ʼiloʼi fakatomuʼa ia meʼa fuli?

¹⁸ Ko te faka tuʼakoi e Sehova tana lava ʼiloʼi fakatomuʼa, ʼe faka ʼuhiga koa ʼe heʼe haohaoa? Kailoa. Neʼe ʼui e Moisese ko Sehova ʼe ko “te Maka,” pea ʼe “haohaoa tana gāue.” ʼE mole tonu ke tou tukugakoviʼi te ʼAtua ki te ʼu fua kovi ʼo te agahala. ʼE tou tau iā ʼaho nei mo te ʼu fua kovi ʼo te agahala, ʼuhi ko te talagataʼa heʼe faitotonu. Neʼe ʼui fakalelei e te ʼapositolo ko Paulo “aki he tagata e tahi nee hu mai te agahala ki te mālama-nei pea aki te agahala ia te mate, pea nee ausia . . . te mate [ki] te tagata fuape: pea tahi, kua agahala fuli.”​—Teutalonome 32:​4, 5; Loma 5:12; Selemia 10:⁠23.

19. Ko te ʼu fehuʼi fea ʼaē ka tou vakaʼi anai ʼi te alatike ʼaē ka hoa mai?

¹⁹ ʼI te alatike ʼaenī, neʼe tou ako ko Sehova ʼe mole heʼe faitotonu. (Pesalemo 33:5) Pea ko te ʼu fealagia ʼa Sehova, mo tona ʼu kalitātē, pea mo tana ʼu lēkula, ʼe nātou lagolago ki tona finegalo. (Loma 8:28) ʼI tona ʼuhiga ʼAtua fai fakakikite, ko Sehova ʼe ina fakahā “te fakaʼosi talu mai te kamataʼaga, pea talu mai te ʼu temi muʼa te ʼu meʼa ʼaē ʼe mole heʼeki hoko.” (Isaia 46:​9, 10) Neʼe tou toe vakaʼi foki ko Sehova ʼe ina faka tuʼakoi tana lava ʼiloʼi fakatomuʼa ia meʼa fuli. ʼE malave feafeaʼi kiā tatou ia te ʼu meʼa ʼaia? E feafeaʼi hatatou ʼiloʼi papau ʼe ʼalutahi te ʼu tonu ʼaē ʼe tou fai pea mo te fakatuʼutuʼu ʼofa ʼa te ʼAtua? Ko te ʼu tapuakina fea ʼaē ka tou maʼu anai? ʼE tou vakaʼi anai te ʼu tali ki te ʼu fehuʼi ʼaia ʼi te alatike ʼaē ka hoa mai.

[Kiʼi nota]

ʼE Feala Koa Hakotou Fakamahino?

• Ko te ʼu faʼifaʼitaki fea ʼo te temi muʼa ʼe fakamoʼoni ai ko te “folafola” ʼa te ʼAtua ʼe “lava lelei” tuʼumaʼu?

• Koteā ʼaē neʼe ʼiloʼi fakatomuʼa e Sehova ʼo ʼuhiga mo tana “fakatuʼutuʼu heʼegata”?

• ʼE fakaʼaogaʼi feafeaʼi e Sehova tana lava ʼiloʼi fakatomuʼa ia meʼa fuli?

[Paki ʼo te pasina 18]

Neʼe falala ia Sosafate kiā Sehova

[Paki ʼo te pasina 19]

Neʼe fakakikite e te ʼAtua ia te mate pea mo te fakatuʼuake ʼa Sesu

[Paki ʼo te pasina 20]

Neʼe kua fakatuʼutuʼu fakatomuʼa koa e te ʼAtua ia te meʼa ʼaē ka fai anai e Atama mo Eva?