He Takitaki ʼe Tou Lava Falala Kiai ʼo ʼUhiga Mo Te Fiafia

“KO TE faiga ki te Fiafia” ʼe ko he fealagia ʼe foaki ki te tagata fuape. Neʼe ko te manatu ʼaia ʼa te kau fono ʼaē neʼe nātou fakatuʼutuʼu ʼi te Declaration of Independance (Te Maʼuli Faʼitaliha) ʼo Amelika. Kae ko te faiga ki he meʼa, ʼe kehe ia mo takita kaku kiai. Tokolahi te kau tūpulaga ʼe nātou faiga ki he ʼu gāue ohage ko te fai hiva, pea mo te ʼu faigaoʼi, kae ko te tokofia koa ʼe nātou kaku ki tanatou ʼu fakaʼamu ʼaia? “ ʼE mole koutou kaku anai kiai,” ko te ʼui ʼaia ʼa te tagata fai hiva ʼiloa ʼe ina ʼiloʼi lelei te faigataʼa ki he tahi hana liliu ko he tagata fai musika ʼe lava lelei tona maʼuli.

Kapau ʼe koutou logoʼi feiā takoutou faiga ki te maʼuli fiafia, ʼaua naʼa koutou lotovaivai. Kapau ʼe koutou faiga ki te fiafia ʼi tona faʼahiga fai ʼaē ʼe totonu, ʼe koutou kaku anai kiai. He koʼe ʼe tou lava faka tui ki te faʼahi ʼaia? ʼI te ʼuluaki ʼalatike, neʼe talanoa ai ʼo ʼuhiga mo “te ʼAtua fiafia” ko Sehova. (1 Timoteo 1:​11, MN ) ʼI te Tohi-Tapu, ʼe maʼu ai te takitaki ʼa te ʼAtua, ke ʼaua naʼa iku takotou faiga ki te fiafia ko he lotomamahi. ʼE lava tokoni atu ia Sehova ke koutou maʼu puleʼaki ki te ʼu tupuʼaga māhani ʼo te maʼuli lotomamahi. Ohage la, ko te fakaloto fīmālie ʼaē ʼe ina foaki atu mokā mate he tahi neʼe koutou ʼoʼofa ai.

Ka Mate He Tahi Neʼe Koutou ʼOʼofa Ai

ʼE mole he meʼa lelei ʼe ʼaumai e te mate, koteʼuhi ʼe ina fakamāvete ni ʼu mātuʼa mo tanatou fānau, pea mo te fānau mo tanatou ʼu mātuʼa. ʼE ina fakamāvete ni ʼu kaumeʼa lelei, pea mo pulihi ia te maʼuli fīmālie ʼa ni ʼu famili ʼe felogoi lelei. Ka mate he tahi, ʼe maʼuli mamahi he famili neʼe fiafia.

ʼE tou ʼiloʼi fuli ko te mate ʼe ko he meʼa fakaloto mamahi. Kae ʼe mole manatu feiā ʼihi hahaʼi, pea ʼe nātou ʼui ko te mate ʼe ko he tapuakina. Ohage ko te meʼa ʼaē neʼe hoko ʼi te ʼosi tō ʼa te ʼafā ko Katrina ʼi Mekesike, ʼi ʼAukusitō 2005. Lolotoga te tahi ʼavaifo, neʼe ʼui fēnei e te pātele ʼo ʼuhiga mo ia ʼaē kua mate: “Neʼe mole matehi ia ia e te [ʼafā], kae ko te ʼAtua ʼaē neʼe ina pāui ia ia ki selo.” ʼI te tahi temi, ko te pātele fafine ʼe ina ʼaʼahi te lōpitali, neʼe ina ʼui ki te kiʼi taʼahine ke tuku tana tuʼania, heʼe ko tana faʼē ʼaē kua mate, neʼe ʼave ia e te ʼAtua ki selo. Pea neʼe tagi fēnei te kiʼi taʼahine: “He koʼe neʼe ina toʼo taku faʼē?”

ʼE mahino mai, ko te ʼu manatu hala ʼaia ʼo ʼuhiga mo te kau mate, ʼe mole ina fakaloto fīmālieʼi ia nātou ʼaē ʼe lotomamahi. Koteā tona tupuʼaga? Heʼe mole ʼalutahi te ʼu manatu ʼaia pea mo te moʼoni ʼo ʼuhiga mo te mate. Ko te meʼa ʼaē ʼe kovi tāfito, heʼe fia fakahā ʼi te ʼu manatu ʼaia, ko te ʼAtua ʼe ina fai te ʼu meʼa fakaloto mamahi moʼo fakamāvete he ʼu hahaʼi mai tonatou famili pea mo tonatou ʼu kaumeʼa. ʼE hage mai te ʼAtua, ʼe mole ina fakaloto fīmālieʼi te hahaʼi, kae ʼe ko he ʼAtua ʼe fai fakapō ʼaki te mate. Kae ʼi te Folafola ʼa te ʼAtua, ʼe maʼu ai te moʼoni ʼo ʼuhiga mo te mate.

ʼE ʼui ʼi te Tohi-Tapu, ko te mate ʼe ko he fili, pea mo ina fakatātā ki he hau ʼe ina puleʼi ia te malamanei. (Loma 5:17; 1 Kolonito 15:26) Ko te mate ʼe ko he fili ʼe mālohi ʼaupito, koia ʼe faigataʼa ki he tagata hana mālo ai, pea ko he tahi ʼe mate, ʼe hilifaki ki tana ʼu lauʼi miliale mātea. ʼE fakamahino lelei ʼi te ʼu moʼoni faka Tohi-Tapu te mamahi pea mo te loto taʼomia ʼaē ʼe tou logoʼi mokā mate he tahi. ʼE fakamoʼoni mai ai, ke ʼaua naʼa tou punamaʼuli mo kapau ʼe tou lotomamahi. Kae ʼe fakaʼaogaʼi koa e te ʼAtua ia te fili ʼaē ko te mate, moʼo ʼave ki selo te ʼu hahaʼi ʼaē ʼe tou ʼoʼofa ai? Tou tuku ki te Tohi-Tapu ke ina tali ki te fehuʼi ʼaia.

ʼE ʼui fēnei iā Tagata Tānaki 9:​5, 10: “Ko te kau mate, ʼe mole kei nātou ʼiloʼi he meʼa . . . Heʼe mole he gāue, he fakatuʼutuʼu, he mālama, he poto ʼi te Seole, te potu ʼaē ʼe ke ʼalu kiai.” Koteā ia te Seole? ʼE ko te faitoka ʼaē ʼe ʼave kiai he tahi mokā mate. ʼI te faitoka, ko te kau mate ʼe mole kei nātou ʼiloʼi he meʼa, ʼe mole kei nātou gāugāue, ʼe mole kei nātou logoʼi he meʼa, peʼe nātou manatu ki he meʼa. ʼE hage ʼe nātou mate moe.a ʼE fakamahino lelei mai ʼi te Tohi-Tapu, ko te ʼAtua ʼe mole ina toʼo tatatou ʼu hahaʼi ʼaē kua mamate, ke nātou fakatahi mo ia ʼi selo. ʼAki te mate, kua gata ai tanatou māʼuʼuli.

Neʼe fakamoʼoni ia Sesu ki te moʼoni ʼaia ʼi te ʼosi mate ʼo tona kaumeʼa ko Lasalo. Neʼe ina fakatatau te mate ki te moe. Kapau la neʼe kua hake ia Lasalo ki selo ʼo nofo fakatahi mo te ʼAtua Māfimāfi, neʼe mole ko he agaʼofa ʼa Sesu tana toe fakahifo mai ia ia ki te kele, ke toe mate ʼaki te temi. ʼE tou lau fēnei ʼi te fakamatala ʼaia, neʼe ʼalu ia Sesu ki te falemaka pea neʼe kalaga leʼo lahi ʼo ʼui maʼana: “Lasalo, haʼu ki tuʼa.” ʼE hoko atu fēnei ia te fakamatala: “Ko te tagata ʼaē neʼe kua mate, neʼe haʼu ki tuʼa.” Neʼe toe maʼuli ia Lasalo. Neʼe ʼiloʼi e Sesu neʼe mole heʼeki mavae ia Lasalo ʼi te kele, kae neʼe kua mate pe ia.​—Soane 11:​11-14, 34, 38-44, MN.

Ko te fakatuʼuake ʼaia ʼaē ʼe fakamatala ʼi te Tohi-Tapu, ʼe ʼaoga kiā tatou ke feala hatatou mahino ko te mate ʼe mole ko he puleʼaki ʼe fakaʼaogaʼi e te ʼAtua moʼo ʼave ni hahaʼi ʼo te kele ki te lagi. Koia ʼe feala hatatou fakaōvi ki te ʼAtua, heʼe tou ʼiloʼi ʼe mole ko ia ʼaē ʼe ina fakatupu totatou lotomamahi. Tahi ʼaē, ʼe tou lava falala ʼe mahino kātoa ki te ʼu mamahi pea mo te ʼu fua kovi ʼaē ʼe fakatupu kiā tatou e te fili ʼaē ko te mate. Pea ko te ʼu moʼoni ʼo te Tohi-Tapu ʼo ʼuhiga mo te ʼaluʼaga ʼo te kau mate, ʼe nātou fakamoʼoni mai ʼe mole fakamamahiʼi nātou ʼi he ʼifeli peʼe ʼi he pulekatolio, kae ʼe nātou mālōlō ʼi te faitoka. Koia, ʼaua naʼa tou ʼiʼita ki te ʼAtua mokā tou manatuʼi tatatou ʼu hahaʼi ʼaē kua mamate, peʼe tou tuʼania peʼe nātou ʼifea ʼapē. ʼI te tahi faʼahi, ʼe tou maʼu ʼi te Tohi-Tapu te tahi fakaloto fīmālie mai ia Sehova.

Ko Te ʼAmanaki ʼe Ina Taki Tatou Ki Te Fiafia

Ko te ʼu vaega ʼaē neʼe tou vakaʼi, ʼe nātou fakahā ko te ʼamanaki, ʼe ko he faʼahi maʼuhiga ʼo te fiafia moʼoni. ʼI te Tohi-Tapu, ko te kupu “ ʼamanaki,” ʼe faka ʼuhiga ki “he fakaʼamu ki he meʼa ʼe lelei ʼaki he loto falala.” Ke tou mahino ki te fiafia ʼaē ʼe feala ke tou maʼu ʼi te temi nei ʼaki ia te ʼamanaki, tou toe vakaʼi age muʼa ia te fakamatala ʼo ʼuhiga mo te fakatuʼuake ʼo Lasalo e Sesu.

ʼE feala pe ke tou talanoa kiā tupuʼaga e lua ʼo te fakahoko e Sesu ia te milakulo ʼaia. ʼUluaki, neʼe ina fai moʼo fakafimālieʼi te lotomamahi ʼo Maleta, mo Malia, pea mo ʼonā kaumeʼa ʼaē neʼe fai fetāgihi. Pea neʼe nātou fiafia ai ʼi te toe felāveʼi mo ia ʼaē neʼe nātou ʼoʼofa mamahi ai. Kae neʼe fakahā age e Sesu kiā Maleta te lua tupuʼaga tāfito ʼo tana fai ia te milakulo ʼaia: “Neʼe mole heʼeki au ʼui atu koa la kiā te koe kapau ʼe ke tui, pea ʼe ke mamata anai ki te kolōlia ʼo te ʼAtua?” (Soane 11:​40, MN ) ʼI te Tohi-Tapu ʼa J. B. Phillips, The New Testament in Modern English, ʼe fakaliliu fēnei ai ia te koga fakaʼosi ʼo te vaega, ia “te gāue taulekaleka ʼaē ʼe lava fai e te ʼAtua.” ʼI tana toe fakatuʼuake ia Lasalo, neʼe fakahā ai e Sesu ia te ʼu gāue ʼaē ʼe lava fai e Sehova ʼAtua, pea mo ʼaē ka ina fai anai ʼi te ka haʼu. Koʼeni te tahi ʼu faʼahi ʼo ʼuhiga mo “te gāue taulekaleka [ʼaia] ʼe lava fai e te ʼAtua.”

Neʼe ʼui fēnei e Sesu iā Soane 5:​28, 29 (MN ): “ ʼAua naʼa koutou punamaʼuli ki te meʼa ʼaenī, koteʼuhi ʼe hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki tona leʼo pea ʼe nātou hū mai anai ki tuʼa.” Ko tona faka ʼuhiga, ko te kau mate ʼaē ʼe nonofo ʼi te Seole, ʼo kau ai mo nātou ʼaē ʼe tou ʼoʼofa ai, ʼe nātou toe māʼuʼuli ake anai. ʼE fakahā iā Gaue 24:15 (MN ) te tahi faʼahi ʼo ʼuhiga mo te ʼaluʼaga fakatalakitupua ʼaia, ʼo ina ʼui fēnei: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” Koia, māʼia mo “te kau heʼe faitotonu,” tokolahi te hahaʼi ʼaē neʼe mole nātou ʼiloʼi ia Sehova pea neʼe mole nātou tauhi kiā te ia, ʼe tuku age anai he fealagia kiā nātou ʼi te ka haʼu ke nātou felogoi lelei mo te ʼAtua.

Kofea ʼaē ka hoko ai ia te fakatuʼuake ʼaia? ʼE ʼui fēnei iā Pesalemo 37:29: “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” Ko tona faka ʼuhiga, ko te ʼu famili pea mo te ʼu kaumeʼa ʼaē neʼe fakamāvete e te mate, ʼe nātou toe felāveʼi anai ʼi te kele. ʼE mahino ia, ʼe koutou loto fiafia ʼaupito anai, ʼi takotou toe manatuʼi ia te ʼu temi fakafiafia ʼaē neʼe koutou nonofo ai mo te ʼu hahaʼi ʼaē neʼe koutou ʼoʼofa ai.

ʼE Loto e Sehova Ke Koutou Fiafia

Neʼe tou vakaʼi te ʼu ʼaluʼaga e lua ʼe feala ai kiā Sehova ke ina fakatuputupu takotou fiafia logola takotou ʼu fihifihia. ʼUluaki, ʼaki ia te Tohi-Tapu, ʼe ina foaki atu ia he ʼatamai mālama pea mo he takitaki, ke feala hakotou maʼu puleʼaki ki takotou ʼu faigataʼaʼia. ʼO mole gata ʼaki pe tana tokoni mai ʼaē ke tou kātakiʼi tatatou lotomamahi ʼuhi ko te mate, ʼe toe tokoni mai ia te Tohi-Tapu ke tou maʼu he ʼu puleʼaki ʼo ʼuhiga mo te ʼu fihifihia faka ekonomika pea mo te mahaki. ʼE ina lava foaki mai ia te mālohi moʼo kātakiʼi ia te ʼu aga heʼe faitotonu ʼi te faʼahi faka sosiale, pea mo te ʼu tokakovi faka politike. Pea kapau ʼe koutou mulimuli ki tana takitaki, ʼe koutou lava maʼu anai he ʼu puleʼaki ki takotou ʼu fihifihia takitokotahi.

Lua, ʼaki takotou ako ia te Tohi-Tapu, ʼe koutou maʼu ai he ʼamanaki mālohi ʼe mole lava foaki atu anai e he tagata ʼi te mālama ʼaenī. ʼI te ʼamanaki ʼaē ʼe maʼu ʼi te Tohi-Tapu, ʼe ʼi ai mo te fakatuʼuake ʼo totatou ʼu kaumeʼa pea mo totatou ʼu famili. ʼE maʼu te tahi ʼu fakamatalatala iā Apokalipesi 21:​3, 4 (MN ): “Ko te ʼAtua totonu ʼe nofo anai mo [te malamanei]. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.” Ko tona faka ʼuhiga, kua vave pulihi ʼo talu ai, ia te ʼu faʼahi fuli ʼaē ʼe feala ke koutou lotomamahi ai. ʼE hoko moʼoni anai te ʼu fakapapau ʼa te Tohi-Tapu, pea ʼe feala hakotou maʼu ia te ʼu fiafia ʼo te ʼu fakapapau ʼaia. ʼE ko he meʼa fakaloto fīmālie hakita ʼiloʼi, ʼe tou māʼuʼuli anai ʼi he ʼu temi fakafiafia. ʼE feala hakotou fiafia, heʼe kua koutou ʼiloʼi, ka koutou mamate pea ʼe mole fakamamahiʼi anai koutou lolotoga he ʼu temi ʼe mole hona gataʼaga.

Koʼeni tona faʼifaʼitaki: ʼI he ʼu taʼu ki muʼa atu, neʼe sio ia Maria ki te mate kinakina ʼo tona ʼohoana ʼi te kosea. Neʼe mole heʼeki faʼa fualoa te mate atu ʼo tona ʼohoana, pea felāveʼi mo te ʼu fihifihia faka paʼaga, ʼo maʼua ai kiā ia pea mo tana ʼu taʼahine e toko tolu, ke nātou mavae ʼi tonatou ʼapi. Hili taʼu e lua, neʼe ina toe maʼu mo ia ia te kosea. Neʼe fai tona ʼu tafa lalahi e lua, pea ʼi te ʼaho fuli neʼe tau mo tona ʼu mamahi lahi. Logola ia tona ʼu fihifihia ʼaia, kae neʼe faʼa kātaki aipe, pea mo fai fakaloto mālohi ki te tahi ʼu hahaʼi. Koteā ʼaē ʼe tokoni kiā ia ke ina haga taupau tona fiafia?

ʼE ʼui fēnei e Maria: “Ka au felāveʼi mo he fihifihia, ʼe au faiga ke mole au tokaga fau kiai. ʼE mole au fai ia te ʼu fehuʼi ʼaenī: ‘He koʼe koa ʼe hoko kiā au ia te fihifihia ʼaia? He koʼe koa ʼe au maʼuli mamahi? He koʼe koa ʼe au mahaki?’ ʼE kita ogosia mo kapau ʼe kita maʼu te ʼu manatu fakaloto vaivai ʼaia. Kae ʼe au fakaʼaogaʼi toku mālohi moʼo tauhi kiā Sehova pea mo tokoni ki te hahaʼi, pea ʼe au maʼu ai he loto fiafia.”

Koteā ʼaē neʼe ʼaoga ai ia te ʼamanaki ki te maʼuli ʼo Maria? Neʼe falala ki te ka haʼu, ki te temi ʼaē ka pulihi ai e Sehova ʼi te malamanei, ia te mahaki pea mo te tahi ʼu fihifihia. Ka ʼalu ki lōpitali ki tona ʼu faitoʼo, ʼe ina faka mafola tana ʼamanaki ʼaia ki te tahi hahaʼi ʼaē ʼe kosea, ʼaē ʼe lagi mole ʼi ai hanatou ʼamanaki. ʼE maʼuhiga feafeaʼi kiā Maria ia tana ʼamanaki ʼaia? ʼE ina ʼui fēnei: “ ʼE au tau manatuʼi te meʼa ʼaē ʼe ʼui ʼi te Tohi-Tapu iā Hepeleo 6:​19, ʼaē ʼe fakatatau ai e Paulo ia te ʼamanaki ki he foʼi tau ʼa he vaka ʼe tapiki kiai totatou maʼuli. Kapau ʼe mole koutou maʼu ia te foʼi tau ʼaia, ʼe koutou tafea anai ohage ko he vaka neʼe ʼafasia. Kae kapau ʼe koutou tapiki maʼu ki te foʼi tau ʼaia, ʼe mole koutou tuʼania anai, logo aipe he faʼahiga fihifihia ʼe feala hakotou felāveʼi mo ia.” Ko “te ʼamanaki [ʼaia] ʼo te maʼuli heʼegata ʼaē neʼe fakapapau . . . e te ʼAtua, ʼaē ʼe mole feala ke loi,” neʼe tokoni kiā Maria, ke ina haga taupau tana fiafia. ʼE feala ke feiā mo koutou.​—Tito 1:​2, MN.

ʼAki te ako ʼo te Tohi-Tapu, ʼe feala hakotou maʼu ia te fiafia moʼoni logola takotou ʼu fihifihia. Lagi ʼe ʼi ai hakotou ʼu fehuʼi ki te ʼu faʼahi ʼaē ʼe ʼaoga ai ke koutou ako ia te Tohi-Tapu. ʼE ko he meʼa fakafiafia ki te kau Fakamoʼoni ʼa Sehova hanatou fakahā atu ia te ʼu tali faka Tohi-Tapu ʼaē ʼe ʼaoga ke koutou ʼiloʼi, mo kapau ʼe koutou fia maʼu ia te fiafia moʼoni. ʼO fakatalitali ki te hoko anai ʼo te ʼamanaki mai ia Sehova, ʼe feala hakotou kau fakatahi kiā nātou ʼaē ʼe ʼui fēnei ʼi te Tohi-Tapu: “ ʼE nātou maʼu anai he fiafia lahi . . . pea ʼe pulihi anai te lotomamahi pea mo te goʼegoʼe.”​—Isaia 35:​10, King James Version.

[Kiʼi nota]

[Paki ʼo te pasina 5]

ʼE gata pe ki te ʼu moʼoni ʼo te Tohi-Tapu te fealagia ʼaē ke nātou fakamaʼamaʼa ia te lotomamahi

[Paki ʼo te pasina 7]

ʼAki te ʼamanaki faka Tohi-Tapu ʼo ʼuhiga mo te fakatuʼuake, ʼe feala ai hakotou maʼu te fiafia