ʼE Koutou Fiafia Moʼoni Koa?

ʼE FEALA pe hakotou feʼekeʼaki fēnei: ‘Koteā ʼaē ʼe tonu ke au fai ke feala haku fiafia moʼoni?’ Ko te kau tōketā ʼaē ʼe nātou sivisivi ia te maʼuli faka sosiale, ʼe nātou toe hikihiki tanatou ʼu kumi ke feala hanatou ʼiloʼi peʼe feafeaʼi anai hakotou tali peʼe ko te tali ʼa ʼihi ʼo ʼuhiga mo te fehuʼi ʼaia, kae ʼe mole faigafua tanatou gāue. Ko te fakafuafua ʼo te fiafia ʼa he tahi, ʼe hage pe anai ko he fakafuafua ʼo te ʼofa ʼa he tagata ki tona ʼohoana, peʼe ko te lahi ʼaupito ʼo te mamahi ʼuhi ko te mate ʼa he tahi ʼi te famili. ʼE mole feala ke fakafuafua totonu te ʼu meʼa ʼaē ʼe tou logoʼi ʼi totatou loto. Ko te kau tagata popoto, ʼe nātou manatu tahi ʼo ʼuhiga mo te moʼoni ʼaenī: Ko te hahaʼi fuli ʼe nātou lava māʼuʼuli fiafia.

Logola neʼe tupu ake te tagata ʼaki te fealagia ʼaē ke fiafia, kae ʼe ʼi ai te ʼu fihifihia lahi ʼe tupu ai tana mole fiafia. Koʼeni te faʼifaʼitaki: ʼI ʼihi kolo, kua fonu te ʼu tānuma ʼi te kau mate ʼuhi ko te SITA. ʼE fakagafua e te puleʼaga ki te hahaʼi tanu mate, ke nātou toe ʼavahi te ʼu falemaka ʼaē kua ʼāfea, ʼo tanu kiai ia te hahaʼi ʼaē neʼe hoki mamate atu. ʼI ʼihi potu ʼo Afelika, ko te gāue tāfito ʼa te hahaʼi ʼe ko te faʼu puha mate. ʼI he potu pe ʼe koutou nonofo ai, ʼe koutou tokagaʼi ʼe lotomamahi ʼaupito te hahaʼi ʼaē ʼe nātou nonofo mo honatou mahaki kovi, ʼo feiā mo nātou ʼaē kua mamate honatou ʼu kāiga pea mo honatou ʼu kaumeʼa.

Kae e feafeaʼi ki te ʼu fenua ʼaē ʼe maʼu koloā ai te hahaʼi? ʼE feala pe ke ʼi ai ni ʼu mafuliʼaga ʼe hoko fakapunamaʼuli ki te maʼuli faka koloā ʼo te hahaʼi ʼaē ʼe mole nonofo teuteu. ʼI Amelika, tokolahi te kau letelete neʼe nātou toe liliu ʼo kumi gāue, he neʼe mole kei lī age tanatou ʼu kiʼi letelete gāue. Ko te meʼa ʼaē kua tau hoko, ʼe fakaʼaogaʼi kātoa e he famili tanatou ʼu vaega falā moʼo totogi ʼaki te ʼu meʼa faitoʼo. ʼE ʼui fēnei e te tagata tokoni ʼi te potu ʼo te lao: “ ʼE mamahi tokotou loto mokā koutou sisio ki te hahaʼi ʼaia ʼe nātou ʼōmai mo tonatou ʼu maʼua pea mo tonatou ʼu mahaki. Tuʼa lahi ʼe koutou tala age anai ke nātou fakatau tonatou ʼapi, ke maʼu ai hanatou falā moʼo taupau ʼo tonatou maʼuli.” Kae e feafeaʼi ia te hahaʼi ʼaē ʼe lelei tonatou maʼuli ʼi te faʼahi faka koloā? ʼE feala koa mo nātou ke mole nātou fiafia?

Ko ʼihi ʼe nātou hage ko te tagata fai hiva logona ko Richard Rodgers. Neʼe ʼui fēnei ʼo ʼuhiga mo te tagata ʼaia: “ ʼE mole hahaʼi ni ʼu tagata ohage ko ia neʼe nātou foaki he fiafia lahi ki he tokolahi.” Logola ʼe fiafia te hahaʼi ʼi tana ʼu hiva, kae ko te tagata ʼaia neʼe mole maʼuli fiafia. Neʼe kaku ki te ʼu fakatuʼutuʼu e lua ʼaē ʼe fakaʼamu kiai te tokolahi, ia te maʼu paʼaga pea mo te logona, kae neʼe ina maʼu koa te fiafia? ʼE ʼui fēnei e te tagata neʼe ina fai te tohi ʼo ʼuhiga mo Rodger: “Neʼe lava ʼaupito tana gāue, neʼe maʼu koloā, pea neʼe fakapale ʼaki ia fakapale e lua ʼo Pulitzer. Kae ʼi te tahi faʼahi, neʼe mole fiafia pea teitei pe ʼi te temi fuli ke lotomamahi.”

Kua lagi koutou tokagaʼi, ko te faiga ki te ʼu koloā moʼo maʼu ia te fiafia, ʼi te agamāhani ʼe iku ki he lotomamahi. Ko te tagata faitohi sulunale ʼo te The Globe and Mail ʼo Toronto, ʼe ina sivisivi ia te gāueʼi ʼo te paʼaga, ʼe ina ʼui ko te hahaʼi maʼu koloā “ ʼe mole nātou faifaitahi mo te hahaʼi pea ʼe mole honatou ʼamanaki.” ʼE ʼui e te tagata tokoni ʼi te potu ʼo te falā, ka foaki lahi e te ʼu mātuʼa maʼu koloā he falā peʼe ko he ʼu meʼa ʼofa, “ ʼi te agamāhani ʼe maʼuli fakaʼofaʼofa anai ia te ʼu fānau ʼaia ki ʼamuli.”

ʼE ʼi Ai Koa He Tafitoʼaga Mālohi Ki Te Fiafia?

Ke feala ke mātala he fuʼu teu, ʼe tonu ke lelei tona kele, ke maʼu hona moʼi vai, pea mo lelei te temi. ʼO toe feiā aipe, ʼe ʼui e te kau tōketā ʼe ʼi ai te ʼu faʼahi ʼe maʼua ke tōkakaga kiai te hahaʼi ke feala hanatou māʼuʼuli fiafia. ʼE nātou tōkakaga anai ke lelei tonatou maʼuli mālōlō, tanatou gāue, tanatou meʼa kai, tonatou nofoʼaga, mo tonatou ʼu meʼa vala, mo nātou fakahoko tonatou ʼu faiva, pea mo nātou maʼu honatou ʼu kaumeʼa moʼoni.

ʼE koutou fakamoʼoni anai ki te fua lelei ʼo te ʼu faʼahi ʼaia ki te ʼu fakaʼamu ʼa he tahi ʼe fia maʼuli fiafia. Kae ʼe ʼi ai te tahi faʼahi ʼe maʼuhiga tāfito age. ʼE ko te ʼiloʼi ʼo “te ʼAtua fiafia,” ia ia ʼaē ko tona huafa ʼe ko Sehova. (1 Timoteo 1:​11, MN ) He koʼe ʼe ʼaoga ke tou ʼiloʼi ia Sehova? Heʼe ko ia totatou Tupuʼaga, pea neʼe ina foaki mai ia te fealagia ʼaē ke tou fiafia. Koia ʼe ina ʼiloʼi te ʼu faʼahi ʼaē ʼe feala ke tou maʼu ai ia te fiafia moʼoni. ʼI te ʼalatike ʼaē ka hoa mai, ʼe talanoa anai ki tana faʼahiga taki ia te hahaʼi, ʼi he potu pe ʼe nātou nonofo ai peʼe ko he ʼaluʼaga pe ʼe nātou felāveʼi mo ia, ki he maʼuli fiafia ʼe tologa.

[Paki ʼo te pasina 4]

Ohage pe ko he fisiʼi teu, ʼe ʼi ai te ʼu faʼahi ʼe ʼaoga ke kita maʼuli fiafia ai

[Haʼuʼaga ʼo te paki pasina 3]

© Gideon Mendel/CORBIS