Koutou Manavasiʼi Kiā Sehova Pea Ke Koutou Fiafia!

“Fiafia ia te tagata ʼaē ʼe manavasiʼi kiā Sehova.”​—Pesalemo 112:⁠1.

1, 2. Koteā ʼaē ʼe feala ke foaki mai e te manavasiʼi ʼaē kiā Sehova?

ʼE MOLE ko he meʼa faigafua te maʼu ʼo te fiafia. Ko te fiafia moʼoni ʼe fakalogo ki takita filifili ia te ʼu meʼa ʼaē ʼe lelei, mo fai ia te ʼu meʼa ʼaē ʼe lelei pea mo lītuʼa ki te ʼu meʼa ʼaē ʼe kovi. Ko totatou Tupuʼaga ko Sehova, neʼe ina foaki mai tana Folafola, ia te Tohi-Tapu, moʼo akoʼi ʼo tatou ke tou mulimuli ki te faʼahiga maʼuli ʼaē ʼe lelei ʼaupito. Kapau ʼe tou kumi pea mo mulimuli ki te takitaki ʼa Sehova, ʼo fakahā tatatou manavasiʼi kiā te ia, ʼe tou maʼu ai anai ia te fiafia moʼoni.​—Pesalemo 23:1; Tāʼaga Lea 14:⁠26.

² ʼI te alatike ʼaenī, ʼe tou vakaʼi anai ia te ʼu faʼifaʼitaki faka Tohi-Tapu pea mo te ʼu faʼifaʼitaki ʼo totatou temi, ʼe nātou fakahā mai ko te manavasiʼi moʼoni ki te ʼAtua, ʼe ina foaki mai ia he mālohi moʼo fakafeagai ki te ʼu fakaneke ki te meʼa ʼaē ʼe kovi, pea mo he lototoʼa moʼo fai te meʼa ʼaē ʼe lelei. ʼE tou vakaʼi anai ko te manavasiʼi ʼaē ki te ʼAtua, ʼe ina lava foaki mai ia te fiafia, moʼo uga ʼo tatou ke tou fetogi tatatou aga ʼaē ʼe kovi, ohage ko te faʼahi ʼaē neʼe fai e te Hau ko Tavite. Tahi ʼaē faʼahi ka tou vakaʼi anai, ko te manavasiʼi ʼaē kiā Sehova ʼe ko he tofiʼa maʼuhiga ʼe lava foaki e te ʼu mātuʼa ki tanatou fānau. Ei, ko te Folafola ʼa te ʼAtua ʼe ina fakapapauʼi mai: “Fiafia ia te tagata ʼaē ʼe manavasiʼi kiā Sehova.”​—Pesalemo 112:⁠1.

ʼE Tou Toe Lava Maʼu Tatatou Fiafia

3. Koteā ʼaē neʼe tokoni kiā Tavite ke mavae mai tana ʼu agahala?

³ Ohage ko tatatou vakaʼi ʼi te alatike ʼaenī kua ʼosi atu, ʼi te ʼu lakaga e tolu neʼe mole maʼu ai e Tavite ia te manavasiʼi ʼaē ʼe tāu mo feʼauga mo te ʼAtua. Kae ʼaki tana tali ia te fakatonutonu mai ia Sehova, neʼe hā ʼaki ai neʼe ko he tagata neʼe manavasiʼi ki te ʼAtua. Ko tana manavasiʼi pea mo fakaʼapaʼapa ki te ʼAtua, neʼe ina uga ia ia ke ina fakamoʼoni ki tana agahala, ke ina fetogi tana aga, pea ke ina toe maʼu tana ʼu felogoi lelei mo Sehova. Logola ko tana ʼu agahala neʼe fakatupu ai he ʼu mamahi kiā ia pea mo ʼihi, kae ʼaki tana fakahemala moʼoni neʼe haga lagolago aipe ia Sehova kiā ia pea mo ina tapuakinaʼi. Ko te faʼifaʼitaki ʼo Tavite ʼe ina lava foaki he lototoʼa ki te kau Kilisitiano ʼo te temi ʼaenī, ʼaē ʼe nātou lava higa ki he agahala mamafa.

4. ʼE lava tokoni feafeaʼi ia te manavasiʼi ʼaē ki te ʼAtua ke toe fiafia he tahi?

⁴ Tou vakaʼi age muʼa te meʼa ʼaē neʼe hoko kiā Sonja.a Logola neʼe ko he tuagaʼane neʼe kau ʼi te selevisi pionie, neʼe fakatahi ia mo te ʼu fakakaugā kovi, ʼo ina fai te ʼu aga ʼe kovi, pea neʼe fakamavae ʼi te kokelekasio. ʼI tana ʼosi fakakaukauʼi lelei te kovi ʼo tana aga, neʼe faigaʼi mālohi e Sonja ke ina toe maʼu he ʼu felogoi lelei mo Sehova, pea ki muli age neʼe toe tali leleiʼi ʼi te kokelekasio. ʼI te ʼu ʼaluʼaga ʼaia ʼo tona maʼuli, neʼe haga faiga aipe e Sonja ke toe tauhi kiā Sehova, pea neʼe toe liliu ko he pionie. Ki muli age, neʼe ʼohoana mo te tagata ʼāfea, pea ʼi te temi nei ʼe tauhi ʼaki he lotofiafia ʼi te kokelekasio. Logola ʼe fakahemala Sonja ki tana mavae faka temi mai te ala ʼo te moʼoni, kae ʼe fiafia heʼe ko tana manavasiʼi ki te ʼAtua neʼe tokoni kiā ia ke toe liliu mai.

ʼE Lelei Age Hata Maʼuli Mamahi ʼi Hata Agahala

5, 6. Koutou fakamahino te ʼu lakaga e lua ʼaē neʼe mole matehi ai e Tavite ia Saulo, pea koteā tona tupuʼaga.

⁵ ʼE moʼoni, ʼe lelei age mo kapau ʼe lava tokoni mai te manavasiʼi ki te ʼAtua ke mole kita fai he agahala mamafa. Neʼe hoko te ʼaluʼaga ʼaia kiā Tavite, ʼi tona fetuliʼaki e Saulo pea mo tana kau solia e toko tolu afe. ʼI te tahi ʼaho, neʼe hū ia Saulo ki te ʼana ʼaē neʼe fenonoʼi ai ia Tavite pea mo tana kau solia. Neʼe uga Tavite e tana kau tagata ke ina matehi ia Saulo, heʼe lagi ko he faigamālie ʼaia neʼe tuku age e Sehova ke pule ki te maʼuli ʼo tona fili. Neʼe fakaōvi fakalogologo ia Tavite kiā Saulo, ʼo tuʼusi tona tapaʼi kofu. Logola neʼe mole ala ki te maʼuli ʼo Saulo, kae neʼe vevele tona leʼo ʼo loto ʼuhi ko tana manavasiʼi ʼaē ki te ʼAtua. Pea neʼe tāʼofi e Tavite tana ʼu tagata ʼaē neʼe kua ʼiʼita, ʼo ʼui maʼana: “ ʼE mole feala kiā au, ʼo ʼuhiga mo te manatu ʼa Sehova, ke au fai te meʼa ʼaia ki toku ʼaliki, te fakanofo ʼa Sehova.”b​—1 Samuele 24:​1-7.

⁶ ʼI te tahi pō, neʼe fakatuʼu e Saulo mo tana kau solia tonatou ʼu fale fehikitaki, pea neʼe “faka momoe nātou e Sehova” ke mole nātou lavelave ki he meʼa. Ko Tavite pea mo tona ʼilāmutu ko Apisai, neʼe nā hū fakalogologo ki tonatou nofoʼaga pea nā tutuʼu iā tafa ʼo Saulo kae lolotoga moe. Neʼe fia matehi e Apisai ia Saulo, kae neʼe tāʼofi ia ia e Tavite ʼo ina fehuʼi fēnei age: “Ko ai ʼaē kua ala tona nima ki te fakanofo ʼa Sehova pea neʼe mole hoko ki ai he tautea?”​—1 Samuele 26:​9, 12.

7. Koteā ʼaē neʼe ina tāʼofi ia Tavite ke mole agahala?

⁷ He koʼe koa ʼi te ʼu faigamālie ʼaia e lua, neʼe mole matehi ai e Tavite ia Saulo? ʼE tupu he neʼe lahi age tana manavasiʼi kiā Sehova, ʼi tana manavasiʼi ʼaē kiā Saulo. ʼUhi ko tana manavasiʼi ʼaē ʼe tāu mo te ʼAtua, neʼe tali e Tavite ke maʼuli mamahi mo kapau ʼe ko he faʼahi ʼe matatonu, kae neʼe mole fia agahala ia. (Hepeleo 11:25) Neʼe falala kātoa ko Sehova ʼe ina lava taupau ia ia pea mo Tana hahaʼi. Neʼe ʼiloʼi e Tavite ko tana fakalogo pea mo tana falala ki te ʼAtua, ʼe ina maʼu ai anai te fiafia pea mo he ʼu tuʼuga tapuakina, kae kapau la ʼe mole fakalogo ki te ʼAtua, pea ʼe mole ina tapuakinaʼi anai ia ia. (Pesalemo 65:4) Tahi ʼaē meʼa, neʼe mahino kiā Tavite ʼe fakahoko anai e te ʼAtua Tana fakapapau, ʼaē ke ina fakanofo hau ia ia pea mo ina fakahifo ia Saulo ʼi Tona temi totonu pea mo Tana faʼahiga fai ʼaē ʼe loto kiai.​—1 Samuele 26:⁠10.

Ko Te Manavasiʼi Ki Te ʼAtua ʼe Tupu Ai Hata Maʼuli Fiafia

8. Koteā te faʼifaʼitaki lelei ʼaē neʼe tuku mai e Tavite ʼi te ʼu temi ʼaē neʼe felāveʼi ai mo te ʼu faigataʼaʼia?

⁸ ʼE hoko anai kiā tatou he ʼu manukinuki, mo he ʼu fakataga pea mo ʼihi age ʼahiʼahi, ʼuhi heʼe ko tatou ko te kau Kilisitiano. (Mateo 24:9; 2 Petelo 3:3) ʼI ʼihi temi, ʼe tou lava tokakovi mo totatou ʼu tēhina mo tuagaʼane. Kae ʼe tou ʼiloʼi ko Sehova ʼe sio kiā meʼa fuli, ʼe logo ki ʼatatou faikole, pea ʼi tona temi totonu, ʼe ina toe fakatokatoka anai te ʼu faʼahi ʼaia ʼo mulimuli ki tona finegalo. (Loma 12:​17-21; Hepeleo 4:16) Koia ʼaua naʼa tou manavasiʼi ki totatou ʼu fili, kae tou manavasiʼi ki te ʼAtua pea mo tou falala ʼe ina hāofaki anai tatou. Ohage ko Tavite, ʼaua naʼa tou fia lagavaka, peʼe tou talagataʼa ki te ʼu pelesepeto faitotonu, ke mole tou māʼuʼuli mamahi, heʼe ki ʼamuli ʼe tou māʼuʼuli fiafia anai. Kae e feafeaʼi hatatou fai ia te faʼahi ʼaia?

9. Koutou tuku mai te faʼifaʼitaki, ko te manavasiʼi ki te ʼAtua ʼe tupu ai hata maʼuli fiafia logola te ʼu fakafeagai.

⁹ ʼE fakamatala fēnei e te tēhina kua fualoa tana misionea ʼi Afelika: “ ʼE au manatuʼi ia te faʼifaʼitaki ʼa te fafine mo tana kiʼi taʼahine, ʼaē neʼe mole nā fia totogi te kate politike ʼuhi ko tanā mole fia kau ki te ʼu meʼa faka politike. Neʼe tā nāua e te ʼu hahaʼi tagata, pea kapu nāua ki tonā ʼapi. ʼI tanā ʼolo ʼi te ala, neʼe fakaloto fīmālieʼi e te faʼē tana kiʼi taʼahine ʼaē neʼe tagi, he neʼe mole mahino pe koʼe neʼe gaohi koviʼi feiāʼi nāua. ʼE moʼoni neʼe mole nā fiafia, kae neʼe maʼa tonā ʼu leʼo ʼo loto. Neʼe nā fiafia ki ʼamuli, he neʼe nā ʼiloʼi neʼe nā fakalogo ki te ʼAtua. Kanapaula neʼe nā toʼo te kate politike, ʼe mahino ia neʼe fiafia ʼaupito ai te hahaʼi, mo nātou ʼavage hanā ʼu foʼi meʼa malie, pea mo nātou memeʼe ʼi ʼonā tafa ʼi te ala. Kae neʼe mahino ki te kiʼi taʼahine ʼaia pea mo tana faʼē, ʼe mole nā fiafia anai koteʼuhi ʼe ko he aga ʼe fakafeagai ki tanā tui.” Neʼe mole nā mātataku ki te tagata ʼuhi ko tanā manavasiʼi ʼaē ki te ʼAtua.

10, 11. Koteā te ʼu fua lelei ʼaē neʼe maʼu e te fafine ʼuhi ko tana manavasiʼi ʼaē ki te ʼAtua?

¹⁰ ʼE kita toe fiafia mokā kita manavasiʼi ki te ʼAtua ʼi te ʼu ʼahiʼahi ʼo ʼuhiga mo te fakaʼapaʼapa ki te taputapu ʼo te maʼuli. ʼI te kei fuafatuʼi e Mary tana tolu tamasiʼi, neʼe ʼui age e te tōketā ke fakatō fatu. Neʼe ina ʼui fēnei: “ ʼE feala ke ke tuʼutāmaki ʼi he temi pe pea mo ke mate ai. ʼE toe mate anai mo tau tamasiʼi. Tatau aipe peʼe koteā tona mafuliʼaga, kae ʼe mole ʼiloʼi papau peʼe hāo anai mo māʼimoa tau kiʼi tamasiʼi.” Neʼe ako e Mary te Tohi-Tapu mo te kau Fakamoʼoni ʼa Sehova, kae neʼe mole heʼeki papitema. ʼE ʼui fēnei e Mary: “Neʼe au fakatotonu ke au tauhi kiā Sehova, pea neʼe au lotomālohi ke au fakalogo kiā te ia, tatau aipe peʼe koteā te mafuliʼaga ʼo taku faifānau.”​—Ekesote 21:​22, 23.

¹¹ Lolotoga tona temi faitama, neʼe haga ako e Mary ia te Tohi-Tapu pea mo taupau tona kiʼi famili, ʼo aʼu ki te ʼaho ʼaē neʼe tupu ai tana kiʼi tamasiʼi. ʼE ina fakamatala fēnei: “Neʼe ʼi ai te kiʼi faigataʼa ʼo taku faifānau ʼaenī ʼi taku ʼu ʼuluaki tamaliki e lua, kae neʼe mole ʼi ai he tahi age ʼu faigataʼaʼia lalahi.” Ko te manavasiʼi ki te ʼAtua, neʼe tokoni kiā Mary ke ina taupau hona leʼo ʼo loto ʼe maʼa, pea ki muli age neʼe papitema. ʼI te lahilahi ake ʼo tana kiʼi tamasiʼi tagata, neʼe ina ako mo ia ia te manavasiʼi ʼaē kiā Sehova, pea ʼi te temi nei ʼe tauhi ʼi te filiale ʼa te kau Fakamoʼoni ʼa Sehova.

‘Koutou Kole Kiā Sehova Tona Mālohi’

12. Neʼe fakaloto mālohi feafeaʼi ia Tavite e te manavasiʼi ʼaē ki te ʼAtua?

¹² Ko te manavasiʼi ʼa Tavite kiā Sehova neʼe mole gata ʼaki pe tana tāʼofi ia ia ke mole ina fai he meʼa ʼe kovi. Neʼe ina maʼu ai he mālohi moʼo fai he ʼu puleʼaki pea mo aga fakapotopoto ʼi tona ʼu faigataʼaʼia. Lolotoga he taʼu kātoa pea mo māhina e fā, ko Tavite mo tana ʼu tagata neʼe nātou feholaki mai ia Saulo ʼo nonofo ʼi Sikelake, ʼi te fenua ʼo Filisitini. (1 Samuele 27:​5-7) ʼI te tahi ʼaho ʼaē neʼe pupuli ai te ʼu hahaʼi tagata, neʼe hūfi te kolo e te kau tagata kaihaʼa Amalesite, ʼo tutu te kolo pea mo nātou ʼave ia tonatou ʼu ʼohoana fuli, mo tanatou ʼu fānau pea mo tanatou ʼu faga manu. ʼI tanatou toe liliu mai ki te kolo ʼo sio ki te meʼa ʼaē neʼe hoko, neʼe fetāgihi ia Tavite pea mo tana ʼu tagata. Neʼe nātou ʼiʼita ʼaupito pea neʼe nātou fia taumakaʼi ia Tavite, kae logola te ʼu faigataʼaʼia ʼaia, neʼe haga taupau aipe e Tavite tana falala. (Tāʼaga Lea 24:10) Ko tana manavasiʼi ʼaē ki te ʼAtua, neʼe ina uga ia ia ke haga kiā Sehova ʼo ‘kole ki ai tona mālohi.’ ʼAki te tokoni ʼa te ʼAtua, ko Tavite mo tana ʼu tagata neʼe nātou lava tauʼi te kau Amalesite pea mo nātou toe maʼu tanatou ʼu meʼa fuli ʼaē neʼe kaihaʼa.​—1 Samuele 30:​1-20.

13, 14. Neʼe tokoni feafeaʼi te manavasiʼi ki te ʼAtua ki te tuagaʼane ke ina fai he ʼu tonu ʼe lelei?

¹³ ʼO feiā iā ʼaho nei, ko te ʼu kaugana ʼa te ʼAtua ʼe nātou felāveʼi mo he ʼu ʼaluʼaga ʼe maʼua ai ke nātou falala kiā Sehova pea mo lototoʼa moʼo fai ʼo he ʼu puleʼaki. Koʼeni te faʼifaʼitaki ʼa Kristina. ʼI tana kei ʼeva, neʼe ina ako ia te Tohi-Tapu mo te kau Fakamoʼoni ʼa Sehova. Kae neʼe fia liliu ko he tahi ʼe lomi piano ʼi te ʼu fai māholo, pea neʼe tuputupu ʼi tana faiga ʼaia. Tahi ʼaē meʼa, neʼe mahino ki te maʼuhiga ʼaē ke fai faka mafola, pea neʼe tuʼania ʼi te tali ia te ʼu maʼua ʼaē ka tonu anai ke ina fai mo kapau ʼe papitema. ʼI tana hoko atu ia tana ako ia te Folafola ʼa te ʼAtua, neʼe ina logoʼi ia te mālohi ʼo te Tohi-Tapu. Neʼe ina ako ia te manavasiʼi ʼaē kiā Sehova, pea neʼe mahino kiā ia ʼe fakamaʼua e Sehova ki tana ʼu kaugana ke nātou ʼoʼofa kiā te ia ʼaki tonatou loto kātoa, mo tonatou ʼatamai kātoa, mo tonatou nefesi kātoa pea mo tonatou mālohi kātoa. (Maleko 12:30) ʼAki tana ako ʼaia neʼe ina momoli ai tona maʼuli kiā Sehova pea mo papitema.

¹⁴ Neʼe kole e Kristina kiā Sehova ke tokoni age ke tuputupu ʼi te faʼahi fakalaumālie. ʼE ina ʼui fēnei: “Neʼe mahino kiā au ko he tahi ʼe lomi piano ʼi he foʼi māholo, ʼe lahi anai tana fai folau pea ʼe tonu anai ʼi te taʼu fuli ke ina fai he ʼu māholo e 400. Koia neʼe au fakatotonu ai ke au liliu ko he fafine faiako, moʼo taupau toku maʼuli pea ke feala haku pionie kātoa.” ʼI te temi ʼaia, neʼe kua fakatuʼutuʼu e Kristina ke ina fai tana ʼuluaki māholo ʼi te foʼi fale māholo ʼaē ʼe ʼiloa ʼi tona fenua. ʼE ina ʼui fēnei: “Neʼe ko taku ʼuluaki māholo ʼaia pea mo māholo fakaʼosi.” Talu mai ai, kua ʼohoana ia Kristina mo te tagata ʼāfea, pea ko nāua toko lua ʼe nā gāue nei ʼi te filiale ʼa te kau Fakamoʼoni ʼa Sehova. Kua fiafia he neʼe foaki age e Sehova he mālohi, ke feala hana fai he ʼu tonu ʼe lelei pea kua feala ʼi te temi nei ke ina fakaʼaogaʼi tona temi pea mo tona mālohi ki tana tauhi.

He Tofiʼa Maʼuhiga

15. Koteā ʼaē neʼe fia foaki e Tavite ki tana fānau, pea neʼe ina fai feafeaʼi ia te faʼahi ʼaia?

¹⁵ Neʼe tohi fēnei e Tavite: “Koutou ʼōmai, ʼu foha, koutou fagono mai kiā te au; ʼe au akoʼi atu anai kiā koutou te manavasiʼi kiā Sehova.” (Pesalemo 34:11) ʼI tona ʼuhiga tāmai, neʼe fia foaki e Tavite ki tana fānau, ia te tofiʼa ʼe maʼuhiga ʼaupito: ko te manavasiʼi moʼoni kiā Sehova, ʼaē ʼe fakafuafua lelei pea mo ʼaoga. ʼAki tana ʼu palalau pea mo tana ʼu gāue, neʼe fakahā ai e Tavite ko Sehova, ʼe ko he ʼAtua ʼe mole aga fefeka pea mo fakamataku, ʼe mole ina lamalama te ʼu temi ʼaē ʼe kita talagataʼa ai ki Tana ʼu lao, kae neʼe ina ʼui ʼe ko he Tāmai ʼe fonu ʼi te ʼofa, mo agalelei pea mo loto fakamolemole ki Tana fānau fakakelekele. Neʼe fehuʼi fēnei e Tavite: “Ko ai ʼaē ʼe feala ke ina ʼiloʼi lelei te ʼu agahala?” Pea moʼo fakahā tana falala ʼaē ko Sehova ʼe mole ina sivisivi tuʼumaʼu tatatou ʼu agahala, neʼe ina hoko atu fēnei: “Faka ʼāteaina au mai te ʼu agahala ʼaē ʼe ū.” Neʼe ʼiloʼi papau e Tavite, kapau ʼe faiga fakamalotoloto, ʼe tali fakafiafia anai e Sehova tana ʼu palalau pea mo tana ʼu manatu.​—Pesalemo 19:​12, 14, Byington.

16, 17. ʼE lava akoʼi feafeaʼi e te ʼu mātuʼa tanatou fānau ke nātou manavasiʼi kiā Sehova?

¹⁶ Ko Tavite ʼe ko he faʼifaʼitaki lelei ki te ʼu mātuʼa iā ʼaho nei. ʼE ʼui fēnei e Ralph, ʼaē ʼe gāue mo tona kiʼi tēhina ʼi te filiale ʼa te kau Fakamoʼoni ʼa Sehova: “Neʼe akoʼi māua e tamā ʼu mātuʼa ke mā fiafia ʼi te moʼoni. ʼI tamā kei tūpulaga, neʼe mātou fai palalau fakatahi ki te ʼu gāue ʼo ʼuhiga mo te kokelekasio, pea neʼe mā leleiʼia ia te moʼoni ohage ko nāua. Neʼe nā akoʼi māua ke mā faka tui ʼe mā lava fai he ʼu gāue lelei ʼi te tauhi ʼaē kiā Sehova. Lolotoga ni ʼu taʼu, neʼe mātou nonofo ʼi te fenua neʼe ʼaoga ʼaupito ai he kau fai faka mafola ʼo te Puleʼaga, pea mo tokoni ki te fakatuʼu ʼo ni ʼu kokelekasio foʼou.

¹⁷ “Neʼe tupu tamā mulimuli ki te ala ʼaē ʼe lelei, mole ʼuhi ko he ʼu lēkula fefeka, kae neʼe tupu ʼuhi ko te tui ʼo tamā ʼu mātuʼa, ko Sehova ʼe maʼuli moʼoni, mo agalelei pea mo agaʼofa ʼaupito. Neʼe nā fia ʼiloʼi lelei age ia Sehova pea mo fakafiafia ia ia, pea neʼe mā maʼu tanā manavasiʼi moʼoni ki te ʼAtua pea mo tonā ʼofa ʼaē kiā te ia. ʼI te ʼu temi ʼaē neʼe mā fai ai he ʼu aga ʼe kovi, neʼe mole ʼui mai e tamā ʼu mātuʼa ʼe mole kei ʼofa ia Sehova kiā māua, peʼe nā ʼiʼita ʼo fai he ʼu tapu kiā māua. Teitei pe ʼi te ʼu lakaga fuli ʼaia, neʼe nā fakaheheka māua pea nā fai tokoni mai, ʼi ʼihi temi neʼe tagi tamā faʼē, pea mo faiga ke ina faka malave tana ʼu palalau ki tomā ʼu loto. Neʼe fua lelei tanā ʼu faiga ʼaia. ʼAki te ʼu palalau pea mo te ʼu gāue ʼo tamā ʼu mātuʼa, neʼe mahino ai kiā māua ko te manavasiʼi ʼaē kiā Sehova ʼe ko he meʼa taulekaleka, pea ko hata liliu ko he Fakamoʼoni ʼa Sehova, ʼe ko he meʼa fakafiafia, kae ʼe mole ko he meʼa mamafa.”​—1 Soane 5:⁠3.

18. Koteā ʼaē ka tou maʼu anai mo kapau ʼe tou manavasiʼi ki te ʼAtua moʼoni?

¹⁸ ʼI “te ʼu palalau fakaʼosi ʼa Tavite,” ʼe tou lau fēnei ai: “Ka agatonu ia ia ʼaē ʼe pule ki te hahaʼi, ʼo pule ʼi te manavasiʼi ki te ʼAtua, pea ʼe hage ia ko te mālama ʼo te uhu, mokā hopo ake te laʼā.” (2 Samuele 23:​1, 3, 4) ʼE hā mai ko Salomone, te foha ʼo Tavite ʼaē neʼe hoa kiā ia ʼi te tuʼulaga hau, neʼe mahino ki te totonu ʼo te ʼu palalau ʼaia, he neʼe ina kole kiā Sehova ke ina foaki age “he loto ʼe talagafua,” pea mo te fealagia ʼaē “ke ina ʼiloʼi te meʼa ʼaē ʼe lelei pea mo te meʼa ʼaē ʼe kovi.” (1 Hau 3:9) Neʼe ʼiloʼi e Salomone, ko te manavasiʼi ʼaē kiā Sehova, ʼe ko he agapoto ʼaia pea ʼe ina maʼu ai anai ia te fiafia. Ki muli age, neʼe ina fakaʼosi te tohi ʼo Tagata Tānaki ʼaki te ʼu palalau ʼaenī: “Ko te manatu fakaʼosi ʼo ʼuhiga mo te faʼahi ʼaia, mai tona ʼaluʼaga ʼaē kua tou fagono kiā meʼa fuli: Manavasiʼi ki te ʹAtua moʼoni pea mo taupau tana ʼu fakatotonu. Heʼe koʼena te maʼua kātoa ʼo te tagata. Heʼe ko te ʼAtua moʼoni ʼe ina fakamāuʼi totonu anai te ʼu faʼahiga gāue fuli pe, ʼo ʼuhiga mo te ʼu meʼa fuli ʼaē ʼe ū, moʼo vakaʼi peʼe lelei peʼe kovi.” (Tagata Tānaki 12:​13, 14) Kapau ʼe tou mulimuli ki te tokoni ʼaia, ʼe tou sio ai anai ko “te ikuʼaga ʼo te agavaivai pea mo te manavasiʼi [ʼaē] kiā Sehova,” ʼe mole gata ʼaki pe anai takita maʼu ia te poto pea mo te fiafia, kae ʼo hilifaki kiai ʼe tou maʼu ai anai mo “te ʼu koloā, mo te kolōlia, pea mo te maʼuli.”​—Tāʼaga Lea 22:⁠4.

19. Koteā ʼaē ka tokoni mai anai ke tou mahino ki “te manavasiʼi [ʼaē] kiā Sehova”?

¹⁹ ʼAki te ʼu faʼifaʼitaki faka Tohi-Tapu pea mo te ʼu faʼifaʼitaki ʼo totatou temi, ʼe tou fakatokagaʼi ko te manavasiʼi ʼaē ʼe tāu mo te ʼAtua, ʼe ʼaoga ki te maʼuli ʼo te ʼu kaugana moʼoni ʼa Sehova. Ko te manavasiʼi ʼaia, ʼe mole gata ʼaki pe anai tana tāʼofi ʼo tatou ke mole tou fai he meʼa ʼe mole ina fakafiafia tatatou Tāmai ʼaē ʼe ʼi selo, kae ʼe toe feala foki anai ke ina foaki mai ia he lototoʼa moʼo tauʼi totatou ʼu fili, pea mo foaki mai he mālohi moʼo ʼutakiʼi totatou ʼu fihifihia pea mo faigataʼaʼia. Koia, peʼe tou tūpulaga peʼe tou mātutuʼa, tou faiga mālohi ke tou ako ia te Folafola ʼa te ʼAtua, ʼo metitāsio ki te ʼu meʼa ʼaē ʼe tou ako, pea mo tou faikole tuʼumaʼu kiā Sehova ʼaki he ʼu faikole fakamalotoloto. Kapau ʼe tou fai feiā, ʼe tou maʼu ai anai “te ʼatamai mālama ʼo ʼuhiga mo te ʼAtua” pea mo tou mahino ki “te manavasiʼi [ʼaē] kiā Sehova.”​—Tāʼaga Lea 2:​1-5.

[Kiʼi nota]

ʼE Feala Koa Hakotou Fakamahino?

ʼE lava feafeaʼi ki te manavasiʼi ʼaē ki te ʼAtua:

• hana tokoni ki he tahi ke mavae mai hana agahala mamafa?

• hana foaki he maʼuli fiafia logola te ʼu ʼahiʼahi pea mo te ʼu fakataga?

• hana foaki mai kiā tatou he mālohi moʼo fai ia te finegalo ʼo te ʼAtua?

• hana liliu ko he tofiʼa maʼuhiga ki tatatou ʼu fānau?

[Paki ʼo te pasina 26]

Ko te manavasiʼi kiā Sehova, neʼe ina tāʼofi ia Tavite ke mole ina matehi te Hau ko Saulo