Tou Maʼu Te ʼOfa Ke Feala Hatatou Lototoʼa
“Neʼe mole foaki mai e te ʼAtua he laumālie fula, kae ko he laumālie mālohi, ʼofa pea mo fakapotopoto.”—2 Timoteo 1:7, MN.
1, 2. (a) Koteā ʼaē ʼe lava fai e he tahi ʼi tona ʼofa? (b) He koʼe neʼe fakaofoofo ia te lototoʼa ʼa Sesu?
KO TE taumātuʼa neʼe hoki ʼohoana pe neʼe nā ʼolo ʼo uku ʼo ōvi ki te kolo ʼi te faʼahi esite ʼo ʼOsitalalia. Neʼe nā kamata hake ake ʼi te tai, mo te ʼohofi age ʼo te fafine e te foʼi aga hina. ʼAki he lototoʼa, neʼe haga te tagata ʼo leʼei kehe tona ʼohoana kae ina tuku ke kai ia ia e te aga. Neʼe ʼui fēnei e te fafine ʼi te ʼavaifo: “Neʼe ina foaki tona maʼuli mo ʼoku hāofaki.”
2 Ei, ko te ʼofa ʼe ina lava uga te hahaʼi ke natou fakahā he toe lototoʼa lahi. Neʼe ʼui fēnei e Sesu Kilisito: “E mole he tahi e ina maù he ofa lahiʼage i te ofa o ia ae e ina momoli tona mauli ke matehi o uhiga mo ona kaumea.” (Soane 15:13) Hili hola e 24 ʼi te ʼosi fai e Sesu te ʼu palalau ʼaia, neʼe ina foaki ia tona maʼuli moʼo hāofaki te mālamanei kātoa kae mole ko he tokotahi pe. (Mateo 20:28) Tahi ʼaē meʼa, neʼe mole foaki fakapunamaʼuli feiā e Sesu tona maʼuli, moʼo hāofaki ai te tokolahi. Neʼe kua ina ʼiloʼi ʼe manukiʼi anai, mo gaohi koviʼi, mo fakatūʼā hala ia ia, pea mo matehi ʼi he pou fakamamahi. Neʼe ina teuteuʼi tana ʼu tisipulo ki te meʼa ʼaia ka hoko, ʼo ʼui maʼana: “Koeni e tou hake ki Selusalemi, pea e tukuʼage anai te Foha o te tagata ki te u pule pelepitelo mo te kau sekelipa, e natou tautea anai iaʼia ki te mate, pea e natou tukuʼage anai ia ki te kau pagani; pea e natou nukinukiʼi anai, pea e natou tau anuanu anai kia te ia, e natou kauʼi maeaʼi mo tamatei anai iaʼia.”—Maleko 10:33, 34.
3. Koteā ʼaē neʼe tupu ai te lototoʼa lahi ʼa Sesu?
3 Koteā ʼaē neʼe tokoni kiā Sesu ke ina maʼu te lototoʼa fakatalakitupua? Neʼe maʼuhiga kiā te ia te tui pea mo te manavasiʼi ki te ʼAtua. (Hepeleo 5:7; 12:2) Kae ko te faʼahi ʼaē ʼe maʼuhiga, neʼe lototoʼa ia Sesu he neʼe ʼofa ki te ʼAtua pea mo te hahaʼi. (1 Soane 3:16) Kapau ʼo hilifaki ki te tui pea mo te manavasiʼi ki te ʼAtua, ʼe tou maʼu mo te taʼi ʼofa ʼaia, pea ʼe feala anai ke tou maʼu mo tātou te lototoʼa ʼaē neʼe maʼu e Kilisito. (Efeso 5:2) ʼE tou lava maʼu feafeaʼi te ʼofa ʼaia? ʼE tonu ke tou ʼiloʼi te Matapuna ʼo te ʼofa.
“Ko Te ʼOfa ʼe Haʼu Mai Te ʼAtua”
4. He koʼe ʼe feala ke tou ʼui ko Sehova ʼe ko te Matapuna ʼo te ʼofa?
4 Ko Sehova ʼe ʼofa pea ko ia te Matapuna ʼo te ʼofa. Neʼe tohi fēnei e te ʼapositolo ko Soane: “Kau ʼofaina, tou haga feʼofaʼofani, he ko te ʼofa ʼe haʼu mai te ʼAtua, pea ko ʼaē ʼe ʼofa ʼe haʼu ia mai te ʼAtua, pea ʼe ina maʼu te ʼātamai mālama ʼo ʼuhiga mo te ʼAtua. Ko ʼaē ʼe mole ʼofa neʼe mole ina ako te ʼiloʼi ʼo te ʼAtua, koteʼuhi ko te ʼAtua ʼe ʼofa.” (1 Soane 4:7, 8, MN ) Koia, ʼe feala ke maʼu e he tahi te ʼofa ʼaē ʼe maʼu e te ʼAtua, mo kapau pe ʼe fakaōvi kiā Sehova ʼaki te ʼatamai mālama totonu pea mo mulimuli ki te ʼatamai mālama ʼaia ʼo fakalogo ʼaki tona loto kātoa.—Filipe 1:9; Sakopo 4:8; 1 Soane 5:3.
5, 6. Koteā ʼaē neʼe tokoni ki te ʼu ʼuluaki tisipulo ʼa Sesu ke natou maʼu te ʼofa ʼaē neʼe maʼu e Kilisito?
5 ʼI tana faikole fakamuli mo tana toko 11 kau ʼapositolo agatonu, neʼe fakahā e Sesu te pikipikiga ʼo te ʼatamai mālama ʼo ʼuhiga mo te ʼAtua pea mo te tuputupu ʼo te ʼofa, ʼo ina ʼui fēnei: “Neʼe au fakaʼilo age kiā nātou tou huafa, pea ʼe au fakaʼilo anai, koteʼuhi ke iā nātou te ʼofa ʼaē neʼe ke ʼofa ʼaki kiā te au, pea ke au logo tahi mo nātou.” (Soane 17:26, MN ) Neʼe tokoni ia Sesu ki tana kau tisipulo ke natou maʼu te faʼahiga ʼofa ʼaē neʼe iā ia mo tana Tamai, ʼo ina fakahā ia te faka ʼuhiga ʼo te huafa ʼo te ʼAtua, te ʼu kalitātē fakaofoofo ʼo te ʼAtua, ʼi tana ʼu palalau pea mo tana faʼifaʼitaki. Koia, neʼe faikole fēnei ai Sesu: “Ko ae kua mamata kia te au, kua mamata ia ki te Tamai.”—Soane 14:9, 10; 17:8.
6 Ko te ʼofa ʼaē neʼe maʼu e Kilisito ʼe ko te fua ʼo te laumālie māʼoniʼoni ʼo te ʼAtua. (Kalate 5:22) ʼI te Penikosite ʼo te taʼu 33 ʼo totatou temi, ʼi te maʼu e te ʼu ʼuluaki Kilisitiano ia te laumālie māʼoniʼoni ʼaē neʼe fakapapau, neʼe natou manatuʼi ai te ʼu tuʼuga meʼa ʼaē neʼe akoʼi age e Sesu pea mo natou toe mahino lelei age ki te faka ʼuhiga ʼo te Tohi-Tapu. ʼI te loloto ʼaia ʼo tanatou mahino neʼe natou ʼoʼofa mālohi ai ki te ʼAtua. (Soane 14:26; 15:26) Neʼe koteā ʼaē neʼe hoko? Neʼe natou faka mafola te logo lelei ʼaki he lototoʼa pea mo natou faʼafai, logolā neʼe feala ke natou mamate ai.—Gaue 5:28, 29.
ʼE Hā Te Lototoʼa Pea Mo Te ʼOfa
7. Koteā ʼaē neʼe kātakiʼi e Paulo pea mo Palenapa ʼi tanā folau misionea toko lua?
7 Neʼe tohi fēnei e te ʼapositolo ko Paulo: “Neʼe mole foaki mai e te ʼAtua he laumālie fula, kae ko he laumālie mālohi, mo ʼofa pea mo fakapotopoto.” (2 Timoteo 1:7, MN ) Neʼe palalau feiā Paulo he neʼe hoko te meʼa ʼaia kiā ia. Tou vakaʼi te meʼa ʼaē neʼe hoko kiā ia pea mo Palenapa ʼi tanā folau misionea tokolua. Neʼe nā faka mafola ʼi te ʼatu ʼu kolo, ʼo kau kiai ia Atioke, mo Ikoniume, pea mo Lisetala. ʼI te ʼu kolo ʼaia, ko ʼihi hahaʼi neʼe natou tui, kae liliu ʼihi ʼo fakafeagai ʼaupito. (Gaue 13:2, 14, 45, 50; 14:1, 5) ʼI Lisetala, neʼe taumakaʼi ia Paulo e te kaugamālie ʼiʼita, ʼo natou tuku ai ia ia ʼi tanatou manatu ʼaē kua mate! “Kae nee tutuu takatakai ia te ia te u tisipulo pea nee tuuʼake ia o hu mo natou ki te kolo. Pea i te aho ake nee fagona ia mo Palenapa ki Telepene.”—Gaue 14:6, 19, 20.
8. Neʼe hā feafeaʼi ʼi te lototoʼa ʼa Paulo pea mo Palenapa tanā ʼoʼofa lahi ki te hahaʼi?
8 Ko te ʼu faʼahi ʼaia, ʼaē neʼe feala ke mate ai Paulo, neʼe tupu ai koa hanā mātataku mo Palenapa ke liu tuku ai tanā gāue? Kailoa ia! ʼI tanā ʼosi ‘fai he ʼu tisipulo e tokolahi’ ʼi Telepene, ko te ʼu tagata ʼaia e toko lua neʼe nā “liliu ki Lisetala, pea mai ai ki Ikoniume pea mo Atioke.” Koteā tona tupuʼaga? Moʼo fakaloto mālohiʼi te ʼu tisipulo foʼou ke natou taupau mālohi tanatou tui. Neʼe ʼui fēnei e Paulo pea mo Palenapa: “E lahi ia mamahi e maua ke tou fakalaka ai o uhiga mo tatatou hu ki te Puleaga o te Atua.” ʼE hā lelei mai, neʼe nā lototoʼa he neʼe nā ʼoʼofa lahi ki te “ ʼu kiʼi faga ōvi” ʼa Kilisito. (Gaue 14:21-23; Soane 21:15-17, MN ) ʼI te ʼosi hinoʼi te ʼu tagata ʼāfea ʼi te kokelekasio foʼou ʼaia, neʼe faikole te ʼu tēhina ʼaia e toko lua pea “momoli leva e naua ia natou ki te Aliki kua natou tui ki ai.”
9. Neʼe feafeaʼi te kau tagata ʼāfea ʼo Efeso ʼi te ʼofa ʼaē ʼa Paulo kiā nātou?
9 Ko Paulo neʼe ʼofa pea mo lototoʼa, koia ʼaē neʼe lahi ai te ʼoʼofa ʼa te ʼu ʼuluaki Kilisitiano tokolahi kiā ia. Kotou manatuʼi, pe koteā ʼaē neʼe hoko ʼi te fono ʼaē neʼe fai e Paulo mo te kau tagata ʼāfea ʼi Efeso, ʼaē neʼe nofo ai iā taʼu e tolu pea neʼe lahi ai te fakafeagai. (Gaue 20:17-31) ʼI tana ʼosi fakaloto mālohiʼi nātou ke natou tauhi te faga ōvi ʼa te ʼAtua ʼaē neʼe tuku age kiā nātou, neʼe tuʼutuli ia Paulo mo nātou pea faikole. Koia “neʼe lahi te fai fetāgihi iā nātou fuli, pea neʼe natou fāʼufua ia Paulo pea mo natou ʼuma mamahi kiā te ia, he neʼe natou lotomamahi tāfito ʼi tana ʼui age ʼaē ʼe mole natou toe sisio anai ki tona fofoga.” Neʼe lahi ʼaupito te ʼofa ʼa te ʼu tēhina ʼaia kiā Paulo! Koia, ʼi te hoko ʼo te temi ke natou mavae, ko Paulo pea mo natou ʼaē neʼe kaugā ʼolo mo ia neʼe natou “māvete kinakina mo nātou,” ʼi te mole loto ʼaē ʼa te kau tagata ʼāfea ke natou ʼolo.—Gaue 20:36–21:1, MN.
10. Neʼe fakahā feafeaʼi e te kau Fakamoʼoni ʼa Sehova ʼi totatou temi tonatou lototoʼa ʼuhi ko tanatou feʼofaniʼaki?
10 Iā ʼaho nei, ko te ʼu tēhina taupau feʼoloʼaki, mo te ʼu tagata ʼāfea ʼi te ʼu kokelekasio, pea mo ʼihi atu hahaʼi tokolahi ʼe ʼofainaʼi lahi nātou ʼuhi ko tonatou lototoʼa ʼaē ʼe natou fakahā moʼo tokoni ki te ʼu ōvi ʼa Sehova. Ohage lā, ʼi te ʼu fenua ʼaē ʼe fetauʼaki peʼe tapuʼi ai te fai faka mafola, ko te ʼu tēhina taupau feʼoloʼaki pea mo tonatou ʼu ʼohoana neʼe feala pe ke natou mamate peʼe pilisoni ʼi tanatou ʼaʼahi te ʼu kokelekasio. ʼO toe feiā pe, tokolahi te kau Fakamoʼoni ʼa Sehova neʼe gaohi koviʼi e te kau pule agakovi mo tanatou kau gāue, ʼuhi he neʼe mole natou lavakiʼi tonatou ʼu tēhina pea neʼe mole natou fia tala age pe ko ai ʼaē neʼe ina tufa age tanatou meʼa kai fakalaumālie. Neʼe fakatagaʼi te tahi ʼu lauʼi afe, mo tā nātou, pea mo matehi nātou ʼuhi ko tanatou mole fia tuku te faka mafola ʼo te logo lelei peʼe ko te ʼu fono faka Kilisitiano. (Gaue 5:28, 29; Hepeleo 10:24, 25) ʼOfa pe ke tou faʼifaʼitakiʼi te tui pea mo te ʼofa ʼo te ʼu tēhina mo tuagaʼane lototoʼa ʼaia!—1 Tesalonika 1:6.
ʼAua Naʼa Momoko Tokotou ʼOfa
11. E feafeaʼi te tau fakalaumālie ʼaē ʼe fai e Satana ki te ʼu kaugana ʼa Sehova, pea koteā ʼaē ʼe tonu ke natou fai?
11 ʼI te lī ifo ʼo Satana ki te kele, neʼe ina fakatotonu ke ina fakatō tona ʼita ki te ʼu kaugana ʼa Sehova, heʼe natou “taupau te u fekau a te Atua pea mo taupau te fakamooni a Sesu.” (Apokalipesi 12:9, 17) Ko te faʼahi ʼaē neʼe fakaʼaogaʼi e te Tevolo ko te fakataga. Kae ʼi ʼihi temi, neʼe mole hoko tana fakatuʼutuʼu, he neʼe tupu ai te feʼoviʼaki lelei age ʼa te hahaʼi ʼa te ʼAtua ʼi tanatou feʼofaniʼaki pea mo uga ai te tokolahi ke lahi age tanatou faʼafai. Ko te tahi faʼahi ʼaē ʼe fakaʼaogaʼi e Satana, ko te ʼu holi ki te agahala. ʼE tonu ke tou maʼu he faʼahiga lototoʼa moʼo tauʼi te faʼahi ʼaia, heʼe hoko te tau ʼi totatou loto, ʼe tou tauʼi te ʼu holi ʼaē ʼe kovi ʼo totatou loto ʼaē ‘ ʼe kākā pea mo kovi.’—Selemia 17:9; Sakopo 1:14, 15.
12. ʼE fakaʼaogaʼi feafeaʼi e Satana “te laumalie o te malama-nei” moʼo fakavaivaiʼi totatou ʼofa ki te ʼAtua?
12 Ko te tahi mahafu mālohi ʼe fakaʼaogaʼi e Satana—ʼe ko “te laumalie o te malama-nei,” ko tona faka ʼuhiga ʼe ko te faʼahiga manatu maʼuhiga ʼaē ʼe maʼu ʼi te mālamanei, ʼaē ʼe fakafeagai ki te laumālie māʼoniʼoni ʼo te ʼAtua. (1 Kolonito 2:12) Ko te laumālie ʼo te mālamanei ʼe ina fakaneke te loto mānumānu pea mo te kumi ʼo te ʼu koloā—“te holi a te mata.” (1 Soane 2:16; 1 Timoteo 6:9, 10) Logolā ʼe mole kovi te ʼu koloā pea mo te falā, kae kapau kua tou ʼoʼofa tātou ki te ʼu meʼa ʼaia, ʼo mole kei tou ʼoʼofa kiā Sehova, pea kua mālo ia Satana. Ko te “mālohi” ʼo te laumālie ʼo te mālamanei ʼe ina fakaneke te kakano agahala, pea ʼe kākā, ʼe kovi pea ohage ko te ʼaele, ʼe maʼu ʼi te potu fuli pe. ʼAua naʼa kotou tuku te laumālie ʼo te mālamanei ke ina ʼulihi tokotou loto!—Efeso 2:2, 3, MN; Tāʼaga Lea 4:23.
13. ʼE lava ʼahiʼahiʼi feafeaʼi totatou lototoʼa ʼo taupau te aga ʼaē ʼe tonu ke fai?
13 Kae moʼo tauʼi pea mo tekeʼi te laumālie kovi ʼo te mālamanei, ʼe tonu ke tou lototoʼa ʼo taupau te aga ʼaē ʼe tonu ke fai. Ohage lā, ʼe tonu ke tou lototoʼa ke tou mavae ʼi he fale sinema peʼe matehi te ʼolotinatea peʼe ko te televisio mokā hā he ʼu aga heʼeʼaoga. ʼE tonu ke tou lototoʼa moʼo tekeʼi te ʼu fakaneke kovi ʼi te faleako pea mo fakagata te ʼu fakakaugā ʼaē ʼe kovi. ʼO toe feiā pe, ʼe tonu ke tou maʼu he lototoʼa moʼo taupau te ʼu lao pea mo te ʼu pelesepeto ʼa te ʼAtua mokā fakalainoaʼi tātou e te ʼu kaugā ako, peʼe ko te ʼu kaugā gāue, peʼe ko te ʼu vāhaʼa fale peʼe ko te fāmili.—1 Kolonito 15:33; 1 Soane 5:19.
14. Koteā ʼaē ʼe tonu ke tou fai mo kapau kua malave te laumālie ʼo te mālamanei kiā tātou?
14 Koia, ʼe maʼuhiga ʼaupito ke tou ʼofa mālohi ki te ʼAtua pea mo totatou ʼu tēhina mo tuagaʼane fakalaumālie! Tou toʼo he temi ke tou vakavakaʼi tatatou ʼu fakatuʼutuʼu pea mo totatou faʼahiga maʼuli, ke tou ʼiloʼi ai peʼe kua malave kiā tātou te laumālie ʼo te mālamanei. Kapau kua hoko te faʼahi ʼaia—tatau aipe peʼe veliveli—kae tou faikole kiā Sehova ke ina tuku mai te lototoʼa ke tou fetogi. ʼE tokagaʼi anai e Sehova te ʼu kole fakamalotoloto ʼaia. (Pesalemo 51:17) Tahi ʼaē meʼa, ʼe mālohi age tona laumālie ʼi te laumālie ʼo te mālamanei.—1 Soane 4:4.
Tou Tauʼi ʼAki He Lototoʼa Totatou ʼu Faigataʼaʼia
15, 16. ʼE lava tokoni feafeaʼi mai te ʼofa ʼaē neʼe maʼu e Kilisito ke tou tauʼi totatou ʼu faigataʼaʼia? Koutou tuku mai he faʼifaʼitaki.
15 Ko te tahi ʼu faigataʼaʼia ʼe tonu ke tauʼi e te ʼu kaugana ʼa Sehova ʼe ko te ʼu fua ʼo te agahala pea mo te temi matuʼa, ʼaē ʼe hoko ai he ʼu mahaki, he ʼu māʼimoa, he lotomamahi, pea mo te tahi ʼatu ʼu fihifihia. (Loma 8:22) Ko te ʼofa ʼaē neʼe maʼu e Kilisito ʼe feala ke tokoni mai ke tou tauʼi te ʼu faigataʼaʼia ʼaia. Tou vakaʼi te faʼifaʼitaki ʼo Namangolwa, ʼaē neʼe lahilahi ake ʼi he fāmili Kilisitiano ʼi Zambie. ʼI tona taʼu lua, neʼe māʼimoa ia Namangolwa. ʼE ina ʼui fēnei: “Neʼe au ufiufi ʼaupito, ʼi taku manatu ʼaē ʼe punamaʼuli anai te hahaʼi ʼi tanatou sisio mai. Kae neʼe tokoni mai toku ʼu tēhina fakalaumālie ke au fetogi taku manatu. Neʼe feala ai ke mole kei au ufiufi, pea ʼaki te temi neʼe au papitema.”
16 Logolā neʼe ʼi ai te hekaʼaga toho ʼa Namangolwa, kae ʼi ʼihi temi neʼe tonu ke totolo mokā neʼe ko he ala ʼone. Kae ʼe kau ki te minisitelio, ʼo pionie vaeluaʼi temi iā teitei māhina e lua ʼi te taʼu fuli. Neʼe tagi te tahi fafine ʼi te fai faka mafola age ʼa Namangolwa. Koteā tona tupuʼaga? He neʼe malave ʼaupito kiā ia te tui ʼo totatou tuagaʼane pea mo tona lototoʼa. Neʼe tapuakina lahi iā ia e Sehova, heʼe ko te toko nima ʼi te kau ako Tohi-Tapu ʼa Namangolwa kua papitema, pea ko te tahi ʼe tagata ʼāfea ʼi te kokelekasio. ʼE ʼui fēnei e Namangolwa: “ ʼI ʼihi temi, ʼe mamahi ʼaupito toku ʼu vaʼe, kae ʼe mole au tuku ai taku gāue.” ʼE kau te tuagaʼane ʼaia ʼi te ʼu Fakamoʼoni e tokolahi ʼi te mālamanei ʼaē ʼe natou vaivavai ʼi tonatou sino kae natou mālolohi ʼi te minisitelio, ʼuhi ko tonatou ʼofa ki te ʼAtua pea mo tonatou tatau. ʼE leleiʼia ʼaupito e Sehova ia natou fuli ʼaia!—Asea 2:7.
17, 18. Koteā ʼaē neʼe tokoni ai ki te tokolahi ke natou kātakiʼi he mahaki peʼe ko he tahi age faigataʼaʼia? Kotou tuku mai he ʼu faʼifaʼitaki neʼe hoko iō tātou.
17 Ko he mahaki kovi ʼe feala ke ina fakaloto vaivaiʼi tātou, peʼe feala ke tou liliu ʼo lotomamahi fualoa. ʼE ʼui fēnei e te tagata ʼāfea: “ ʼI te ako tohi ʼaē ʼe au kau ai, ʼe ʼi ai te tuagaʼane ʼe suka pea mole kei haʼele lelei tona foʼi ifiifi, ko te tahi tuagaʼane ʼe kosea, ko te ʼu tuagaʼane e toko lua ʼe nā maʼu te ʼola ʼo te ʼu hokoga hui, pea mo te tahi tuagaʼane ʼe ina maʼu te ʼu mahaki ko te lupus pea mo te fibromyalgie. ʼI ʼihi temi ʼe natou lotovaivai. Kae ʼe hoki natou tō fono pe mokā natou māhahaki kovi peʼe natou ʼi lōpitali. Ko nātou fuli ʼe natou kau tuʼumaʼu ki te fai faka mafola. ʼE au manatuʼi ai ia Paulo, ʼaē neʼe ina ʼui fēnei: ‘Kā au vaivai, ʼe ko te temi ʼaia ʼaē ʼe au mālohi ai.’ ʼE au vikiʼi tonatou ʼofa pea mo tonatou lototoʼa. ʼI tanatou mahaki ʼaia, ʼe lagi natou mahino lelei age ki te maʼuli pea mo te ʼu faʼahi ʼaē ʼe maʼuhiga moʼoni.”—2 Kolonito 12:10, MN.
18 Kapau ʼe kotou tauʼi hokotou māʼimoa, peʼe ko he mahaki, peʼe ko he tahi age fihifihia, kotou “faikole tuumau” ke tokoni atu ke tuku takotou lotovaivai. (1 Tesalonika 5:14, 17) ʼE moʼoni, ʼe ʼi ai anai he ʼu temi ʼe kotou lelei ai pea mo he ʼu temi ʼe kotou lotovaivai ai, kae kotou faiga ke haga tokotou ʼatamai ki he ʼu meʼa fakaloto mālohi, he ʼu meʼa fakalaumālie, tāfito takotou falala ʼaē ki te Puleʼaga. Neʼe ʼui fēnei e te tuagaʼane: “Maʼa ʼaku, ko te fai faka mafola ʼe ko he faitoʼo.” Ko tana vaevae te logo lelei ki te hahaʼi ʼe tokoni kiā ia ke ina maʼu he ʼu manatu ʼe lelei.
Ko Te ʼOfa ʼe Tokoni Kiā Nātou Neʼe Agahala Ke Natou Liliu Mai Kiā Sehova
19, 20. (a) Koteā ʼaē ka lagi tokoni kiā nātou ʼaē neʼe agahala ke natou lototoʼa ʼo toe liliu mai kiā Sehova? (b) Koteā ʼaē ka tou vakaʼi anai ʼi te alatike ka hoa mai?
19 Maʼa te tokolahi ʼaē neʼe liliu ʼo vaivavai ʼi te faʼahi fakalaumālie pe neʼe natou fai he agahala, ʼe mole faigafua hanatou toe liliu mai kiā Sehova. Kae ʼe natou maʼu anai te lototoʼa mo kapau ʼe natou fakahemala moʼoni pea mo natou toe ʼoʼofa ki te ʼAtua. Tou vakaʼi ia Mario,a ʼaē ʼe maʼuli ʼi Amelika. Neʼe mavae ia Mario ʼi te kokelekasio, neʼe liliu ʼo ʼinu kava pea mo toloke, pea hili taʼu e 20, neʼe pilisoni. ʼE ʼui fēnei e Mario: “Neʼe au kamata fakakaukauʼi lelei ʼo ʼuhiga mo toku kā haʼu pea mo au toe lau te Tohi-Tapu. ʼAki te temi, neʼe au leleiʼia te ʼu kalitātē ʼo Sehova, tāfito tona loto manavaʼofa, ʼaē neʼe au faikole tuʼumaʼu kiai. ʼI taku mavae mai te fale pilisoni, neʼe mole kei au fakatahi mo toku ʼu kaumeʼa ʼāfea, neʼe au kau ki te ʼu fono, pea ki muli age, neʼe au toe kau ki te kokelekasio. ʼI toku sino, neʼe au utu te meʼa ʼaē neʼe au to, kae meʼa lelei, heʼe ʼi te temi nei ʼe au maʼu he falala taulekaleka. ʼE au fakamālo tuʼumaʼu kiā Sehova ʼo ʼuhiga mo tona loto manavaʼofa pea mo tona loto fakamolemole.”—Pesalemo 103:9-13; 130:3, 4; Kalate 6:7, 8.
20 ʼE mahino ia, ko nātou ʼaē ʼe hage ko Mario, ʼe tonu ke natou gāue kinakina ke natou toe liliu mai kiā Sehova. Kae ko tanatou maʼu te ʼofa—mai tanatou ako faka Tohi-Tapu, mo te faikole, pea mo te metitāsio—ʼe foaki anai kiā nātou te lototoʼa pea mo natou fakatotonu mālohi ke natou fai te faʼahi ʼaia. Neʼe toe mālohi ia Mario ʼuhi ko tana falala ki te Puleʼaga. Ei, ʼaki te ʼofa, mo te tui, pea mo te manavasiʼi, ko te falala ʼe feala ke liliu ko he mālohi ʼe fua lelei ai ki totatou maʼuli. ʼI te alatike ka hoa mai, ʼe tou vakaʼi fakalelei anai te meʼa ʼofa fakalaumālie maʼuhiga ʼaia.
[Kiʼi nota]
a Neʼe fetogi te higoa.
ʼE Feala Koa Hakotou Tali?
• Neʼe ʼaoga feafeaʼi te ʼofa ke fakahā ai e Sesu he toe lototoʼa lahi?
• Neʼe lava maʼu feafeaʼi e Paulo pea mo Palenapa he lototoʼa fakaofoofo ʼi tonā ʼofa ki tonā ʼu tēhina?
• Koteā ʼaē ʼe fakaʼaogaʼi e Satana ke puli ai te ʼofa faka Kilisitiano?
• ʼUhi ko totatou ʼofa kiā Sehova ʼe tou lototoʼa ai ʼo kātakiʼi te ʼu faigataʼaʼia fea?
[Paki ʼo te pasina 23]
Ko te ʼofa ʼo Paulo ki te hahaʼi neʼe ina maʼu ai te lototoʼa ke faʼa kātaki
[Paki ʼo te pasina 24]
ʼE tonu ke tou lototoʼa ke feala hatatou taupau te ʼu lēkula ʼa te ʼAtua
[Paki ʼo te pasina 24]
Namangolwa Sututu