Tou Kumi Ia Te Takitaki ʼa Te ʼAtua ʼi Te ʼu Faʼahi Fuli Pē
“Ko te ʼAtua ʼaia ʼe ko tomatou ʼAtua ki he ʼu temi ʼe mole ʼiloʼi hona gataʼaga, ʼeī ʼo talu ai. Ko ia ʼaē kā ina takitaki anai mātou ʼo aʼu ki tomatou mate.”—PES. 48:14.
1, 2. He koʼē ʼe tonu ke tou mulimuli ki te takitaki ʼa Sehova kae ʼaua naʼa tou falala ki totatou poto, pea koteā te ʼu fehuʼi ʼaē ʼe lagaʼi ai?
KĀ TOU fakakaukauʼi ia he ʼu meʼa noa peʼe ko he ʼu meʼa ʼe fakatupu tuʼutāmaki, ʼe faigafua hatatou kākāʼi ia totatou loto. (Taag. 12:11) Kapau ʼe tou loto moʼoni ke tou fai he meʼa ʼe mole lelei ki totatou ʼuhiga Kilisitiano, ʼi te agamāhani ʼe haga totatou loto ʼo tuku mai he ʼu takuʼaki mālohi ke tou fai ia te aga ʼaia. (Sel. 17:5, 9) Koia neʼe agapoto te tagata fai pesalemo, ʼo faikole kiā Sehova, ʼo ina ʼui fēnei: “Foaki mai tou mālama pea mo tau moʼoni. Ke nā taki tonu ia au!” (Pes. 43:3) Neʼe falala ia kiā Sehova, ʼaē neʼe ko te takitaki pē ʼaia e tahi neʼe lelei age moʼona takitaki, kae neʼe mole falala ia ki tona poto ʼaē ʼe fakatuʼakoi. Ohagē ko te tagata fai pesalemo, ʼe fua lelei anai kiā tātou ke tou kumi te takitaki ʼa te ʼAtua.
2 Kae he koʼē ʼe tonu ke tou falala ʼe ko te takitaki pē ʼaē ʼa Sehova ʼe lelei age? Ko te temi fea ʼaē ʼe tonu ai ke tou kumi tana takitaki? Koteā te ʼu kalitātē ʼe tonu ke tou maʼu ke fua lelei ai kiā tātou tana takitaki, pea ʼe takitaki feafeaʼi tātou e Sehova iā ʼaho nei? ʼE talanoa anai te ʼalatike ʼaenī ki te ʼu fehuʼi maʼuhiga ʼaia.
He Koʼē ʼe Tonu Ke Tou Falala Ki Te Takitaki ʼa Sehova?
3-5. He koʼē ʼe tonu ke tou falala kātoa ki te takitaki ʼa Sehova?
3 Ko Sehova ko totatou Tamai ʼaē ʼe ʼi selō. (1 Ko. 8:6) ʼE ina ʼiloʼi lelei ia tātou takitokotahi pea ʼe ina ʼiloʼi totatou loto. (1 Sam. 16:7; Taag. 21:2) Neʼe ʼui fēnei e te Hau ko Tavite ki te ʼAtua: “Neʼe ke ʼiloʼi te temi ʼaē ʼe au heka ai, pea mo te temi ʼaē ʼe au tuʼu ai. Neʼe ke tokaga mai mamaʼo ki taku manatu. Koteʼuhi ʼe mole heʼeki lea toku ʼalelo ki he meʼa e tahi, kae koʼenī ia, Ê Sehova, kua ke ʼiloʼi kātoa.” (Pes. 139:2, 4) Mai tona ʼaluʼaga ʼaē ʼe ʼiloʼi lelei tātou e Sehova, ʼe mole tonu koa ke tou tui papau ʼe ina ʼiloʼi te meʼa ʼaē ʼe lelei maʼa tātou? Tahi ʼaē meʼa, ʼe mole ʼi ai he tuʼakoi ʼo te poto ʼo Sehova. ʼE sio ia kiā meʼa fuli pē, ʼe loloto age tana sio ʼi te sio ʼaē ʼa te tagata, pea ʼe ina ʼiloʼi te ikuʼaga ʼo he meʼa talu mai tona kamataʼaga. (Isa. 46:9-11; Loma 11:33) Ko ia “te ʼAtua, ʼaē ʼe poto tokotahi pē.”—Loma 16:27.
4 Tahi ʼaē meʼa, ʼe ʼofa ia Sehova kiā tātou pea ʼe ina kumi tuʼumaʼu pē ia te meʼa ʼaē ʼe lelei maʼa tātou. (Soa. 3:16; 1 Soa. 4:8) ʼI tona ʼuhiga ʼAtua ʼofa, ʼe lahi ʼaupitō te ʼu meʼa ʼaē ʼe ina foaki mai kiā tātou. Neʼe tohi fēnei e te tisipulo ko Sake: “Ko te meʼa ʼofa lelei fuli pea mo te mōlaga haohaoa fuli ʼe haʼu ia mai ʼoluga, heʼe hifo mai te Tamai ʼo te ʼu mālama ʼaē ʼe ʼi selō.” (Sake 1:17) Ko nātou ʼaē ʼe natou tuku ke takitaki nātou e te ʼAtua ʼe fua lelei lahi kiā nātou tona foaki lahi ia te ʼu meʼa ʼofa.
5 Moʼo fakaʼosi, ko Sehova ʼe māfimāfi. ʼO ʼuhiga mo te faʼahi ʼaia, neʼe ʼui fēnei e te tagata fai pesalemo: “Ko ʼaē ʼe nofo ʼi te potu fakalilo ʼo te Māʼoluga, ʼe nofo anai ia ʼi te malumalu ʼo te Māfimāfi. ʼE au fia ʼui kiā Sehova: ‘Ko koe toku holaʼaga pea mo toku tule mālohi, toku ʼAtua, ʼaē ʼe au falala anai ki ai.’ ” (Pes. 91:1, 2) Kā tou mulimuli ki te takitaki ʼa Sehova, pea ʼe tou hola anai kiā te ia heʼe ina puipui anai tātou. Tatau aipē pe fakafeagai mai ʼihi kiā tātou, kae ʼe tokoni mai Sehova kiā tātou. ʼE mole ina liʼaki anai tātou. (Pes. 71:4, 5; lau ia Tāʼaga Lea 3:19-26.) ʼEī, ʼe ʼiloʼi e Sehova te meʼa ʼaē ʼe lelei maʼa tātou, ʼe loto ia ke tou maʼu ia te meʼa ʼaē ʼe lelei, pea ʼe ina maʼu te mālohi ke ina foaki mai te meʼa ʼaē ʼe lelei maʼa tātou. ʼE ko he agavale anai hatatou mole tokagaʼi ia tana takitaki! Kae ko te temi fea ʼaē ʼe ʼaoga ai ke takitaki tātou?
Ko Te Temi Fea ʼAē ʼe ʼAoga Ai Ke Takitaki Tātou?
6, 7. Ko te temi fea ʼaē ʼe ʼaoga ai kiā tātou ia te takitaki ʼa Sehova?
6 ʼE moʼoni, ʼe ʼaoga ke takitaki tātou e te ʼAtua ʼi totatou maʼuli kātoa, talu mai totatou temi tūpulaga ʼo aʼu ki totatou temi matuʼa. Neʼe ʼui fēnei e te tagata fai pesalemo: “Ko te ʼAtua ʼaia ʼe ko tomatou ʼAtua ki he ʼu temi ʼe mole ʼiloʼi hona gataʼaga, ʼeī ʼo talu ai. Ko ia ʼaē kā ina takitaki anai mātou ʼo aʼu ki tomatou mate.” (Pes. 48:14) Ohagē ko te tagata fai pesalemo, ʼe kumi tuʼumaʼu pē e te kau Kilisitiano popoto ia te takitaki ʼa te ʼAtua.
7 ʼE mahino ia, ʼe ʼi ai te ʼu temi ʼe tou logoʼi ai te maʼua ʼaē ke tokoni mai kiā tātou. ʼI ʼihi temi ʼe tou ʼi “he ʼaluʼaga faigataʼa,” lagi ʼe fakatagaʼi tātou, peʼe tou tau mo he mahaki kovi, peʼe fokifā pē ʼe mole kei ʼi ai hatatou gāue. (Pes. 69:16, 17) ʼI te ʼu temi ʼaia, ʼe fakalotofīmālie hatatou haga kiā Sehova, ʼo tou falala ʼe ina foaki mai anai te mālohi ke tou kātakiʼi te faʼahi ʼaia pea mo ina takitaki tātou ke tou fai he ʼu tonu ʼe lelei. (Lau ia Pesalemo 102:17.) Kae ʼe toe ʼaoga tana tokoni ʼi te tahi age ʼu ʼaluʼaga. Ohagē lā, kā tou palalau ki totatou ʼu vāhaʼa fale ʼo ʼuhiga mo te logo lelei ʼo te Puleʼaga, ʼe ʼaoga kiā tātou ia te takitaki ʼa Sehova mo kapau ʼe tou loto ke fua lelei tatatou fai fakamafola. Pea ʼi te ʼu temi fuli pē ʼaē ʼe tonu ai ke tou fai he puleʼaki, peʼe ki he fakafiafia, he faʼahiga teuteu pea mo he faʼahiga faʼu ʼo te lauʼulu, te fakakaumeʼa, he gāue, te ako ʼi te ʼu faleako lalahi, peʼe ko he tahi age meʼa, ʼe hoki tou popoto pē anai ʼi te fai ʼo te ʼu puleʼaki ʼaē ʼe lelei mo kapau ʼe tou mulimuli ki te takitaki ʼa Sehova. ʼI tona ʼuhiga moʼoni, ʼe ʼaoga kiā tātou he takitaki ʼi te ʼu faʼahi fuli ʼo totatou maʼuli.
Te ʼu Tuʼutāmaki ʼo Te Mole Kumi Ia Te Takitaki ʼa Te ʼAtua
8. Koteā ʼaē neʼe fakahā e Eva ʼi tana kai ia te fuaʼi ʼakau ʼaē neʼe tapuʼi age?
8 Kae tou manatuʼi, ʼe tonu ke tou mulimuli ki te takitaki ʼa Sehova heʼe tou loto kiai. ʼE mole fakakinauʼi anai tātou e te ʼAtua ke tou tali tana takitaki mo kapau ʼe mole tou loto kiai. Ko Eva ʼaē neʼe ʼuluaki filifili ke mole mulimuli ki te takitaki ʼa Sehova, ʼo tou sio ai ki te ʼu fua kovi ʼaupitō ʼo te fai ʼo he tonu ʼe mole lelei. Tou toe fakakaukauʼi age muʼa te ʼu meʼa ʼaē neʼe tupu ai ia tana talagataʼa. Neʼe kai e Eva te fuaʼi ʼakau ʼaē neʼe tapuʼi age he neʼe fia “hagē . . . ko te ʼAtua, ʼo ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Sen. 3:5) ʼI tana fai te faʼahi ʼaia, neʼe fia hagē ia ko te ʼAtua, ke ina ʼiloʼi e ia totonu te meʼa ʼaē ʼe lelei pea mo te meʼa ʼaē ʼe kovi, kae mole fia mulimuli ia ki te ʼu fakatotonu ʼa Sehova. Koia neʼe ina liʼaki ia te pule faʼitaliha ʼa Sehova. Neʼe fia pule pē ia kiā ia totonu. Ko tona ʼohoana, ia Atama, neʼe toe agatuʼu mo ia.—Loma 5:12.
9. Kapau ʼe tou situʼa ki te takitaki ʼa Sehova, koteā ʼaē ʼe tou fakafisi kiai, pea he koʼē ʼe mole ko he agapoto ʼaia?
9 Iā ʼaho nei, kapau ʼe mole tou mulimuli ki te takitaki ʼa Sehova, pea ʼe tou toe fakafisi mo tātou ki tana pule faʼitaliha. Ohagē lā ko he tahi ʼe ko hana agamāhani ia te sioʼi ʼo he ʼu pāki ʼe fakahā ai he ʼu felāveʼi fakasino heʼeʼaoga. Kapau ʼe kau ki te kōkelekāsio Fakakilisitiano, pea ʼe ina ʼiloʼi te ʼu fakatotonu ʼa Sehova ʼo ʼuhiga mo te faʼahi ʼaia. Kapau māʼiapē lā mo te ʼu meʼa heʼemaʼa ʼe mole tonu ke tou lea kiai, pea ʼe mahino ia ʼe toe fēia pē mo te ʼu aga heʼeʼaoga ʼe mole tonu ke tou sio kiai. (Efe. 5:3) ʼI tana mole fia fakalogo ki te ʼu fakatotonu ʼa Sehova, ʼe fakafisi ia te tagata ʼaia ki te pule faʼitaliha ʼa Sehova, ʼo situʼa ia ki Tona pule. (1 Ko. 11:3) ʼE mole ko he agapoto ʼaia, heʼe ʼui fēnei e Selemia: “ ʼE mole ʼa te tagata ʼaē ʼe haʼele te takitaki ʼo tana haʼele.”—Sel. 10:23.
10. He koʼē ʼe pipiki ki tatatou faʼahiga fakaʼaogaʼi ʼo totatou loto faʼitaliha ia he ʼu maʼua?
10 ʼE fakafihiʼi anai e ʼihi ia te ʼu palalau ʼaē neʼe fai e Selemia, ʼo natou ʼui, ʼuhi he neʼe foaki mai e Sehova ia te loto faʼitaliha, ʼe mole tonu ke ina tauteaʼi tātou ʼo ʼuhiga mo tatatou faʼahiga fakaʼaogaʼi ʼo totatou loto faʼitaliha. Kae ʼaua naʼa galo kiā tātou ko te loto faʼitaliha ʼe ko he meʼa ʼofa kae ʼe toe pipiki foki kiai ia he ʼu maʼua. ʼE tou huʼi maʼua anai ki te ʼAtua ʼo ʼuhiga mo te ʼu palalau peʼe ko te ʼu meʼa ʼaē ʼe tou filifili ke tou fai. (Loma 14:10) Neʼe ʼui fēnei e Sesu: “Ko te mahu ʼo te loto ʼaē ʼe palalau ai te gutu.” Neʼe ina toe ʼui fēnei: “[ʼE] haʼu mai te loto te ʼu fakakaukau kovi, te ʼu fakapō, te ʼu tono, te ʼu folonikāsio, te ʼu kaihaʼa, te ʼu fakamoʼoni loi, te ʼu laukovi ki te ʼAtua.” (Mat. 12:34; 15:19) Koia, ʼe hā ʼi tatatou ʼu palalau pea mo te ʼu meʼa ʼaē ʼe tou fai ia te ʼuhiga ʼo totatou loto. ʼE natou fakahā totatou ʼuhiga moʼoni. Ko tona tupuʼaga lā ʼaia ʼo te kumi e he Kilisitiano agapoto ia te takitaki ʼa Sehova ʼi te ʼu faʼahi fuli pē. Pea ko ia ʼaia ʼe hagē anai kiā Sehova ko he tahi ʼe ‘totonu tona loto’ pea mo ina ‘fai anai ki ai te meʼa ʼaē ʼe lelei.’—Pes. 125:4.
11. Koteā te ako ʼe tou maʼu mai te hisitolia ʼo Iselaele?
11 Tou manatuʼi ia te hisitolia ʼo Iselaele. ʼI te temi ʼaē neʼe fai ai e te puleʼaga te meʼa ʼaē ʼe lelei, ʼo natou fakalogo ki te ʼu fakatotonu ʼa Sehova, neʼe puipui nātou e Sehova. (Sos. 24:15, 21, 31) Kae neʼe tuʼa lahi ia tanatou fakaʼaogaʼi kovi ʼo tonatou loto faʼitaliha. ʼI te temi ʼo Selemia, neʼe ʼui fēnei e Sehova ʼo ʼuhiga mo nātou: “Neʼe mole natou fakalogo, neʼe mole fakalogo tonatou taliga, kae neʼe natou mulimuli ki te ʼu tokoni mo te ʼuigataʼa ʼo tonatou loto ʼaē ʼe kovi, ʼo natou toe liliu ai ki muli kae mole natou haʼele ki muʼa.” (Sel. 7:24-26) ʼI meʼa fakaʼofaʼofa foki! ʼOfa pē ke mole tou situʼa ki te takitaki ʼa Sehova ʼuhi ko hatatou ʼuigataʼa peʼe ko hatatou fia fai te meʼa ʼaē ʼe tou loto kiai, ʼo tou mulimuli ki tatatou ʼu tokoni pea tou “toe liliu ai ki muli kae mole [tou] haʼele ki muʼa”!
Koteā ʼAē ʼe Tonu Ke Tou Fai Moʼo Mulimuli Ki Te Tokoni ʼa Te ʼAtua?
12, 13. (a) Koteā te kalitātē ʼaē ʼe tupu ai tatatou fia mulimuli ki te takitaki ʼa Sehova? (b) He koʼē ʼe maʼuhiga ia te tui?
12 Ko totatou ʼofa ʼaē kiā Sehova ʼaē ʼe tupu ai tatatou fia mulimuli ki tana takitaki. (1 Soa. 5:3) Kae neʼe fakahā e Paulo ia te tahi faʼahi ʼe ʼaoga kiā tātou, ʼi tana ʼui fēnei: “ ʼE tou haʼele ʼaki te tui, kae mole ʼaki te sio.” (2 Ko. 5:6, 7) He koʼē ʼe maʼuhiga ia te tui? ʼE taki tātou e Sehova ʼi “te ʼu ala foufou ʼo te faitotonu,” kae ko te ʼu ala foufou ʼaia ʼe mole iku ia ki he maʼuli koloaʼia peʼe ko he maʼu tuʼulaga ʼi te mālama ʼaenī. (Pes. 23:3) Koia, ʼe tonu ai ke tou tui mālohi ki te ʼu tapuakina fakalaumālie lahi ʼaē ʼe tou maʼu ʼi tatatou tauhi kiā Sehova. (Lau ia 2 Kolonito 4:17, 18.) Pea ʼe tokoni mai e te tui ke tou fakafeʼauga pē mo te ʼu meʼa ʼaē ʼe tou maʼu.—1 Tim. 6:8.
13 Neʼe fakahā e Sesu ʼi te tauhi moʼoni ʼe tonu ke tou loto fakasākilifisio, pea ʼe fakamaʼua ai ke tou maʼu ia te tui. (Luka 9:23, 24) Ko ʼihi kau ʼatolasio agatonu ʼa Sehova neʼe natou fai te ʼu sākilifisio lalahi, ʼo natou kātakiʼi ia te masiva, te aga kovi ʼa te hahaʼi, te fakapalatahi, pea mo tonatou fakatagaʼi kovi. (2 Ko. 11:23-27; Fakh. 3:8-10) ʼUhi pē he neʼe mālohi tanatou tui, ʼaē neʼe feala ai hanatou kātakiʼi te ʼu mamahi ʼaia ʼaki he loto fiafia. (Sake 1:2, 3) ʼI te mālohi ʼo tatatou tui, ʼe tou falala kātoa ai ʼe lelei tuʼumaʼu age pē ia tatatou mulimuli ʼaē ki te takitaki ʼa Sehova. ʼE fua lelei tuʼumaʼu pē anai kiā tātou ʼo talu ai. ʼE tou ʼiloʼi papau ko te fakapale ʼo nātou ʼaē ʼe kātaki agatonu ʼe lahi age ia ʼi te ʼu mamahi fakatemi ʼaenī.—Hep. 11:6.
14. He koʼē neʼe tonu ke agavaivai ia Akale?
14 Tou toe vakaʼi mo te agavaivai ʼaē ʼe ʼaoga ke tou maʼu ke feala ai hatatou mulimuli ki te takitaki ʼa Sehova. ʼE hā ia te faʼahi ʼaia ʼi te faʼifaʼitaki ʼo Akale, te fafine kaugana ʼa Sala. ʼI te mole maʼu e Sala hana fānau, neʼe ina foaki age leva ia Akale kiā Apalahamo, pea neʼe faitama ai ia Akale. Pea neʼe kamata fiatuʼu ia Akale ki tona fafine pule ʼaē neʼe paʼa, ʼo tupu ai ‘tona kamata fakalainoaʼi’ e Sala pea neʼe hola ai ia Akale. Ko te ʼāselo ʼa Sehova neʼe felāveʼi mo Akale pea neʼe ina ʼui fēnei age: “Toe liliu ki tau fafine pule pea ke ke fakamālalo ifo ʼi tona lalo nima.” (Sen. 16:2, 6, 8, 9) ʼE lagi neʼe fakaʼamu ia Akale ke mole fai age e te ʼāselo te tokoni ʼaia. Kae ke mulimuli ki te fakatotonu ʼaē neʼe fai age e te ʼāselo, neʼe tonu ke ina tuku tana fiatuʼu. ʼAki he agavaivai, neʼe fai e Akale te meʼa ʼaē neʼe ʼui age e te ʼāselo, pea ko tana tama, ia Isimaele, neʼe tupu ake ʼi te nofoʼaga fīmālie ʼo tona tamai.
15. Kotou fakamatala he ʼu ʼaluʼaga ʼaē ʼe tonu ke tou agavaivai ai, ke tou mulimuli ai ki te takitaki ʼa Sehova iā ʼaho nei.
15 Ke tou mulimuli ki te takitaki ʼa Sehova ʼe lagi tonu mo tātou ke tou agavaivai. ʼE lagi tonu ki niʼihi ke natou tali te manatu ʼa Sehova ʼo ʼuhiga mo he faʼahiga fakafiafia ʼe natou leleiʼia kae ʼe fehiʼa ia kiai. Neʼe lagi fakatupu loto mamahi he Kilisitiano ki he tahi age pea tonu ke ʼalu ʼo faifakalelei. Pe neʼe lagi faihala pea ʼe tonu ke ina tali tana hala ʼaia. ʼE feafeaʼi mo kapau ʼe fai e he tahi ia he agahala mamafa? ʼE tonu ke ina maʼu ia te agavaivai, ʼo tala ia tana agahala ki te kau tagata ʼāfea. ʼE feala ke fakamavae he tahi ʼi te kōkelekāsio. Ke toe tali ia ia ke hū ki te kōkelekāsio, ʼe tonu ke fakahemala ʼaki he agavaivai pea mo lītuʼa ki tana agahala. ʼI te ʼu ʼaluʼaga ʼaia, ʼe fakalotofīmālie ia te ʼu palalau ʼaē ʼe tuʼu iā Tāʼaga Lea 29:23: “Ko te fialahi ʼa te tagata ʼaē neʼe toʼo mai te kele kā ina fakalainoaʼi anai ia, kae ko ʼaē ʼe agavaivai ʼe ina maʼu anai ia te kolōlia.”
ʼE Takitaki Feafeaʼi Tātou e Sehova?
16, 17. ʼE feafeaʼi hatatou fakaʼaogaʼi lelei ia te Tohi-Tapu ke tou maʼu ai ia te takitaki fakaʼatua?
16 Ko te tohi tāfito ʼaē ʼe maʼu ai ia te takitaki fakaʼatua ʼe ko te Tohi-Tapu, te Folafola ʼaē ʼe haʼu mai te ʼAtua. (Lau ia 2 Timoteo 3:16, 17.) Ke lahi te ʼu fua lelei ʼaē ʼe tou maʼu mai te Folafola ʼaia, ʼe tou agapoto anai ʼo mole tou fakatalitali ke hoko he faigataʼaʼia pea hoki tou kumi tokoni ai leva ki te Tohi-Tapu. Kae ʼe tonu ke liliu ko hatatou agamāhani te lau ʼo te Tohi-Tapu ʼi te ʼaho fuli pē. (Pes. 1:1-3) Kapau ʼe tou fai fēia, pea ʼe tou ʼiloʼi anai pe koteā te manatu ʼa te Tohi-Tapu ki te ʼu ʼaluʼaga ʼaē ʼe tau mo tātou. Kua liliu te ʼu manatu ʼa te ʼAtua ko tatatou ʼu manatu, pea kua tou nofo teuteu pē ki he faigataʼaʼia ʼe feala ke hoko mai.
17 ʼO hilifaki kiai, ʼe maʼuhiga ke tou metitāsioʼi te ʼu meʼa ʼaē ʼe tou lau ʼi te Tohi-Tapu pea mo tou hūfakiʼi te faʼahi ʼaia. Kā tou metitāsioʼi ni ʼu vaega Fakatohi-tapu, pea ʼe tou vakavakaʼi anai pe feafeaʼi hatatou maʼuliʼi ia te ʼu tokoni ʼaia ʼi he ʼu ʼaluʼaga. (1 Tim. 4:15) Kā tou tau mo ni ʼu faigataʼaʼia mamafa, tou faikole kiā Sehova, ʼo tou kole ki ai ke tokoni mai ke tou maʼu ia te takitaki ʼaē ʼe ʼaoga kiā tātou. ʼE tokoni mai anai ia te laumālie ʼo Sehova ke tou toe manatuʼi ia te ʼu pelesepeto ʼaoga ʼi te Tohi-Tapu peʼe ʼi te ʼu tohi Fakatohi-tapu neʼe kua tou lau.—Lau ia Pesalemo 25:4, 5.
18. Ko te ʼu faʼahi fea ʼaē ʼe fakaʼaogaʼi ai e Sehova ia te fale tautēhina Fakakilisitiano moʼo takitaki tātou?
18 Ko tatatou fale tautēhina Fakakilisitiano ʼe ko te tahi faʼahi maʼuhiga ʼaia ʼe tou maʼu ai ia te takitaki ʼa Sehova. Ko te faʼahi tāfito ʼo te fale tautēhina ʼaia ʼe ko “te tagata kaugana agatonu mo poto” pea mo tona fakafofoga ʼaē ko te Kolesi Pule, ʼaē ʼe ina foaki tuʼumaʼu pē ia te meʼa kai fakalaumālie ʼi te ʼu tohi pea mo te ʼu polokalama ki te ʼu fono pea mo te ʼu fakatahi lalahi. (Mat. 24:45-47; vakaʼi ia Gāue 15:6, 22-31.) Pea ʼi te fale tautēhina Fakakilisitiano, ʼe tou maʼu ai te ʼu hahaʼi kua fotufotuʼa ʼi te faʼahi fakalaumālie, tāfito lā te ʼu tagata ʼāfea, ʼaē kua natou maʼu ia te ʼu kalitātē moʼo tokoni ki te hahaʼi takitokotahi pea mo foaki he ʼu tokoni Fakatohi-tapu. (Isa. 32:1) ʼE ʼi ai te tahi faʼahi maʼuhiga ʼe maʼu e te kau tūpulaga ʼi te ʼu loto fale Kilisitiano moʼo takitaki ʼo nātou. Neʼe foaki e te ʼAtua te pule ki te ʼu mātuʼa Kilisitiano, ʼaē ʼe tonu ke kumi tokoni tuʼumaʼu ki ai ia te fānau.—Efe. 6:1-3.
19. Koteā te ʼu tapuakina ʼaē ʼe tou maʼu ʼuhi ko tatatou kumi tuʼumaʼu pē ia te takitaki ʼa Sehova?
19 ʼEī, ʼe lahi te ʼu ʼaluʼaga ʼe takitaki ai tātou e Sehova, pea ʼe lelei hatatou fakaʼaogaʼi kātoa ia te ʼu ʼaluʼaga ʼaia. ʼI tana palalau ʼo ʼuhiga mo te temi ʼaē neʼe agatonu ai Iselaele, neʼe ʼui fēnei e te Hau ko Tavite: “Neʼe falala atu tamatou ʼu tamai; neʼe natou falala, pea neʼe ke haofaki nātou. Neʼe natou kalaga atu, pea neʼe natou maʼuli ai; neʼe natou falala atu, pea neʼe mole natou ufiufi.” (Pes. 22:3-5) Kapau ʼe tou falala ʼo mulimuli ki te takitaki ʼa Sehova, ‘ ʼe mole tou ufiufi’ anai mo tātou. ʼE hoko moʼoni anai tatatou ʼamanaki. Kapau ʼe tou ‘tuku totatou ala kiā Sehova,’ kae mole tou falala ki totatou poto, pea ʼe tou maʼu ai anai he ʼu tapuakina lahi ʼi te temi nei. (Pes. 37:5) Pea kapau ʼe tou faʼa kātaki agatonu ʼi te faʼahi ʼaia, pea ʼe tou maʼu anai te ʼu tapuakina ʼaia ʼo talu ai. Neʼe tohi fēnei e te Hau ko Tavite: “[ʼE] ʼofa Sehova ki te faitotonu, pea ʼe mole ina liʼaki anai tana hahaʼi agatonu. Ki he ʼu temi ʼe mole ʼiloʼi hona gataʼaga, ʼe taupau anai nātou. . . . ʼE maʼu anai te kele e te kau faitotonu, pea ʼe natou nonofo ai anai ʼo talu ai.”—Pes. 37:28, 29.
ʼE Feala Koa Hakotou Fakamahino?
• He koʼē ʼe tonu ke tou falala ki te takitaki ʼa Sehova?
• Koteā ʼaē ʼe tou fakahā mo kapau ʼe tou situʼa ki te takitaki ʼa Sehova?
• Ko te ʼu ʼaluʼaga fea ʼaē ʼe ʼaoga ai ki he Kilisitiano ke agavaivai?
• ʼE takitaki feafeaʼi tātou e Sehova iā ʼaho nei?
[Paki ʼo te pasina 12]
ʼE kotou kumi koa ia te takitaki ʼa Sehova ʼi te ʼu ʼaluʼaga fuli pē ʼo tokotou maʼuli?
[Paki ʼo te pasina 13]
Neʼe liʼaki e Eva ia te pule faʼitaliha ʼa Sehova
[Paki ʼo te pasina 14]
Koteā te kalitātē ʼaē neʼe tonu ke maʼu e Akale ke feala hana mulimuli ki te takitaki ʼa te ʼāselo?