Tou Tali Ia Te Pule ʼa Sehova
“Koʼenī te fakaʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole mamafa ia.”—1 SOA. 5:3.
1, 2. (a) He koʼē ko te fakalogo ʼaē ki te pule ʼe mole ko he meʼa ʼe leleiʼia e te tokolahi iā ʼaho nei? (b) ʼE faʼifaʼitaliha moʼoni koa ia nātou ʼaē ʼe natou ʼui ʼe mole natou mulimuli ki he ʼu lēkula? Kotou fakamahino.
TOKOLAHI iā ʼaho nei ʼe mole natou tali ke fakatotonu age e he tahi te ʼu meʼa ʼaē ke natou fai, pea ʼe hā te faʼahi ʼaia iā nātou ʼaē ʼe natou ʼui ʼe mole natou mulimuli ki he ʼu lēkula. Kae ko nātou ʼaia ʼe natou faʼitaliha moʼoni koa? Kailoa ia, heʼe ʼi tona fakahagatonu ʼe natou mulimuli ki te ʼu lēkula ʼa te tokolahi ʼaē ʼe natou “muliʼi te tuʼu ʼo te ʼu faʼahiga meʼa ʼaenī.” (Loma 12:2) ʼE mole natou faʼifaʼitaliha kae ohagē ko tona ʼui e te ʼapositolo ko Petelo ʼe natou “kaugana . . . ki te fakahala.” (2 Pet. 2:19) ʼE natou haʼele “ ʼo mulimuli ki te tuʼu ʼo te ʼu faʼahiga meʼa ʼaenī, ʼo mulimuli ki te pule ʼo te mālohi ʼo te ʼaele” ia Satana te Tēvolo.—Efe. 2:2.
2 Ko te tagata faitohi neʼe palalau fiatuʼu fēnei: “ ʼE mole au fakagafua ki taku ʼu mātuʼa peʼe ki he pātele, ki he minisi peʼe ki he tagata faiako ʼo te lotu Inituisi peʼe ki te Tohi-Tapu, ke natou ʼui mai ia te meʼa ʼaē ʼe lelei kiā te au.” ʼE moʼoni ko ʼihi ʼe natou fakaʼaogaʼi kovi tonatou ʼuhiga pule pea ʼe lagi mole tāu mo nātou ia tatatou fakalogo ʼaē kiā nātou. Kae ʼe ko he manatu lelei koa hatatou fakafisi ki he faʼahiga tokoni ʼe foaki mai kiā tātou? ʼAki pē ia tatatou lau ia te ʼu kupu tāfito ʼo he sulunale, ʼe tou maʼu ai ia te tali ki te fehuʼi ʼaia. Kua ʼaoga tāfito ia he tokoni ki te hahaʼi ʼi te temi nei, kae tokosiʼi te hahaʼi ʼe mole kei natou loto ke takitaki nātou e he tahi.
Tatatou Manatu ʼo ʼUhiga Mo Te Tuʼulaga Pule
3. Neʼe fakahā feafeaʼi e te ʼu Kilisitiano ʼo te ʼuluaki sēkulō neʼe mole natou hoko fakalogo ki te pule ʼa te tagata?
3 ʼI totatou ʼuhiga Kilisitiano, ʼe mole tou hagē ko te hahaʼi ʼo te mālamanei ʼo ʼuhiga mo te fakalogo ki te tuʼulaga pule. Kae ʼe mole leva fakaʼuhiga ʼe tou hoko mulimuli pē ki te ʼu meʼa ʼaē ʼe ʼui mai ke tou fai. Kiā tātou ia, ʼi ʼihi temi ʼe tonu ke tou fakafisi ki te ʼu meʼa ʼe ʼui mai e ʼihi tatau aipē peʼe natou maʼu he tuʼulaga pule. Neʼe toe fēia pē lā mo te kau Kilisitiano ʼo te ʼuluaki sēkulō. Ohagē lā, ʼi te temi ʼaē neʼe fakatotonu ai e te pelepitelō lahi pea mo ʼihi takitaki ʼo te Sanetualio ki te kau ʼapositolo ke tuku tanatou fai fakamafola, neʼe mole natou fakalogo. Neʼe mole natou liʼaki te aga ʼaē ʼe lelei ke feala ai hanatou mulimuli ki te pule ʼa te tagata.—Lau ia Gāue 5:27-29.
4. Koteā te ʼu faʼifaʼitaki ʼe tou maʼu ʼi te ʼu Tohi Fakahepeleo ʼe hā mai ai neʼe tokolahi ʼi te hahaʼi ʼa te ʼAtua neʼe natou mulimuli ki he maʼuli ʼe mole tatau mo te hahaʼi fuli?
4 ʼO toe fēia mo te ʼu kaugana ʼa te ʼAtua ʼaē ʼi muʼa atu ʼo te temi ʼo Sesu, tokolahi neʼe natou fakatotonu ke natou nonofo agatonu. Ohagē ko Moisese, neʼe “fakafisi ke ʼui ko ia ko te tama ʼa te ʼofafine ʼo Falaone, kae neʼe ina tali ke gaohi koviʼi ia ia mo te hahaʼi ʼa te ʼAtua,” tatau aipē peʼe fakatupu ai “te ʼita ʼo te hau.” (Hep. 11:24, 25, 27) Neʼe tekeʼi e Sosefo ia te ʼu fakahala ʼo te ʼohoana ʼo Potifale ʼaē neʼe feala hana fai he lagavaka pea mo he meʼa ʼe fakatupu kovi kiā te ia. (Sen. 39:7-9) Ko Taniela ‘neʼe ina fakatotonu ʼi tona loto ke mole ina ʼulihi ia ia totonu ʼaki he ʼu meʼa kai lelei ʼo te hau,’ logolā neʼe mole ko he faʼahi faigafua ke tali e te pule lahi ʼo te fale hau ʼo Papiloni. (Tan. 1:8-14) ʼE hā mai ʼi te ʼu faʼifaʼitaki ʼaia, ʼi te temi fuli pē neʼe lagolago ai te hahaʼi ʼa te ʼAtua ki te faitotonu logolā te ʼu fihifihia ʼaē neʼe feala ke hoko kiā nātou. Neʼe mole natou fakalogo ki te tagata ke tupu ai honatou ʼofainaʼi, pea ʼe tonu mo tātou foki ke tou mulimuli ki tanatou faʼifaʼitaki.
5. Koteā ʼaē ʼe kehekehe ai tatatou manatu ʼo ʼuhiga mo te tuʼulaga pule pea mo ʼaē ʼa te mālamanei?
5 Ko tatatou lototoʼa ʼe mole tatau ia mo te fakafifihi, pea ʼe mole tou agatuʼu anai ʼuhi heʼe tou fia fakahā tatatou mole lagolago ki he faʼahi fakapolitike. Kae ʼe tou fakatotonu ke tou tali ia te pule ʼa Sehova ʼi he pule fakatagata. Kapau ʼe fakafeagai te ʼu lao ʼa te tagata ki te ʼu lao ʼa te ʼAtua, pea ko te tonu pē e tahi ʼe tonu ke tou fai. Ohagē ko te kau ʼapositolo ʼo te ʼuluaki sēkulō, ʼe tou fakalogo anai ki te ʼAtua ohagē ko he pule, ʼi hata fakalogo ki te tagata.
6. He koʼē ʼe fua lelei tuʼumaʼu ia te fakalogo ʼaē ki te ʼu fakatotonu ʼa Sehova?
6 Koteā ʼaē neʼe tokoni mai ke tou tali ia te pule ʼa te ʼAtua? ʼE tou mulimuli ki te manatu ʼaē ʼe tuʼu iā Tāʼaga Lea 3:5, 6: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” ʼE tou ʼiloʼi ko te ʼu meʼa ʼaē ʼe fakamaʼua mai e te ʼAtua ʼe fua lelei anai kiā tātou. (Lau ia Teutalonome 10:12, 13.) Neʼe ʼui tonu e Sehova ki te kau Iselaele, ko “Ia ʼaē ʼe ina akoʼi [nātou] ke fua lelei kiā [nātou], ia Ia ʼaē ʼe ina taki [nātou] ʼi te ala ʼaē ʼe tonu ke [natou] haʼele ai.” Neʼe ina toe ʼui fēnei: “Ê kanapau lā neʼe ke tokagaʼi moʼoni taku ʼu fakatotonu! Pea ko tou tokalelei ʼe hagē anai ia ko te liuʼa, pea ko tau faitotonu ʼe hagē anai ko te ʼu peau ʼo te tai.” (Isa. 48:17, 18) ʼE tou falala ki te ʼu palalau ʼaia pea ʼe tou tui papau ko te fakalogo ʼaē ki te ʼu fakatotonu ʼa te ʼAtua ʼe fua lelei tuʼumaʼu anai kiā tātou.
7. Koteā ʼaē ʼe tonu ke tou fai mo kapau ʼe mole tou mahino kātoa ki he fakatotonu ʼe tuʼu ʼi te Folafola ʼa te ʼAtua?
7 ʼE tou tali ia te pule ʼa Sehova pea mo tou fakalogo kiā te ia, logolā tatatou mole mahino kātoa ki te tupuʼaga ʼo he ʼu fakatotonu ʼe fakamaʼua mai ʼi tana Folafola. ʼE mole fakaʼuhiga leva ʼe tou tui kae mole tou mahino ki tana ʼu fakatotonu, heʼe tou fakahā ʼi tatatou fakalogo ʼaia ia tatatou falala fakamālotoloto ʼaē ko Sehova ʼe ina ʼiloʼi te meʼa ʼaē ʼe lelei maʼa tātou. ʼE tou toe fakahā foki ia totatou ʼofa, ʼaki tatatou fakalogo, he neʼe tohi fēnei e te ʼapositolo ko Soane: “Koʼenī te fakaʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu.” (1 Soa. 5:3) Kae ʼe ʼi ai te tahi faʼahi ʼo tatatou fakalogo ʼe mole tonu ke tou meʼa noaʼi.
Tou Akoʼi Totatou ʼu Fealagia Fakakaukau
8. ʼE feafeaʼi he pikipiki ʼo totatou ‘ ʼu fealagia fakakaukau ʼaē neʼe akoʼi’ pea mo tatatou tali ʼaē ia te pule ʼa Sehova?
8 ʼE ʼui mai ʼi te Tohi-Tapu ʼe tonu ki totatou “ ʼu fealagia fakakaukau ke akoʼi ke natou ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hep. 5:14) Koia, ʼe tou fakatuʼutuʼu anai ke tou fakalogo ki te ʼu lao ʼa te ʼAtua heʼe tou ʼiloʼi lelei tona ʼaoga ʼaē ki totatou maʼuli, pea ʼe tou fia “ ʼiloʼi te meʼa ʼaē ʼe lelei pea mo te meʼa ʼaē ʼe kovi” ʼaē ʼe fakatafito ki te ʼu lēkula ʼa Sehova. ʼE tou fia mahino ki te fakapotopoto ʼo te ʼu ala ʼa Sehova, ke feala ai hatatou ʼui ohagē ko te tagata fai pesalemo: “Ko tau lao ʼe nofo ʼi toku loto.”—Pes. 40:8.
9. ʼE feafeaʼi hatatou fakamāmāhani ia totatou leʼo ʼo loto ki te ʼu lēkula ʼa Sehova, pea he koʼē ʼe maʼuhiga ke tou fai ia te faʼahi ʼaia?
9 Ke tou sio ki te maʼuhiga ʼo te ʼu lao ʼa te ʼAtua ohagē ko te tagata fai pesalemo, ʼe tonu ke tou metitāsioʼi ia te ʼu manatu ʼaē ʼe tou lau ʼi te Tohi-Tapu. Ohagē lā, kā tou ako ia he faʼahiga lēkula ʼe fakamaʼua mai e Sehova, ʼe feala ke tou fai ia te ʼu fehuʼi ʼaenī: ‘He koʼē ʼe fakapotopoto ia te fakatotonu peʼe ko te pelesepeto ʼaenī? He koʼē ʼe tonu ke au fakalogo kiai? Koteā ʼaē neʼe hoko kiā nātou ʼaē neʼe mole natou fia fakalogo ki te tokoni ʼa te ʼAtua ʼo ʼuhiga mo te faʼahi ʼaia?’ Koia kapau ʼe tou fakamāmāhani ia totatou leʼo ʼo loto ki te ʼu ala ʼa Sehova, pea ʼe lahi age anai te ʼu tonu ʼaē kā tou fai ʼe ʼalutahi mo tona finegalo. ʼE feala hatatou “mahino peʼe koteā te finegalo ʼo Sehova” pea mo tou maʼuli fakalogo ai. (Efe. 5:17) ʼE mole ko he faʼahi ʼe faigafua tuʼumaʼu.
ʼE Faigaʼi e Satana Ke Ina Maumauʼi Ia Te Pule ʼa Te ʼAtua
10. Ko te faʼahi fea ʼaē neʼe faigaʼi e Satana ke ina maumauʼi ai ia te pule ʼa te ʼAtua?
10 Talu mai fualoa mo te faiga ʼa Satana ke ina maumauʼi ia te pule ʼa te ʼAtua. ʼE lahi te ʼu faʼahi ʼaē ʼe hā ai ia tana fia faʼifaʼitaliha. Ohagē lā, ko te hahaʼi ʼe mole natou fakaʼapaʼapa ki te fakatuʼutuʼu fakaʼatua ʼo ʼuhiga mo te ʼohoana, heʼe ko ʼihi ʼe natou leleiʼia age pē tanatou māʼuʼuli fakatahi kae mole natou ʼohoana, kae ki ʼihi ʼe natou kumikumi he ʼu takuʼaki ke natou māvete mo ʼonatou ʼohoana. ʼE lagi ko nātou ʼaia ʼe natou manatu tahi anai mo te fafine fai ʼata ʼiloa ʼaē neʼe ʼui fēnei: “Ko hata ʼohoana mo he tokotahi pē, ʼe ko he faʼahi ʼe mole lavaʼi ia e he tagata mo he fafine.” Neʼe ina toe ʼui fēnei: “ ʼE mole au ʼiloʼi nei he tahi ʼe nofo agatonu ki tona ʼohoana peʼe loto kiai.” ʼO toe fēia mo te tagata gaoʼi ʼata ʼiloa, ʼi tana fakakaukauʼi ia te ʼu fafine ʼaē neʼe ʼohoana mo ia pea mo māvete mo nātou, neʼe ina ʼui fēnei: “ ʼE mole au fakatui au neʼe fakatupu tātou ʼaki te fakatuʼutuʼu ʼaē ke kita nofo pē mo hota ʼohoana e tahi ʼo aʼu ki tokita mate.” ʼE lelei ke tou fai ia te fehuʼi ʼaenī kiā tātou totonu: ‘ ʼE au tali koa ia te pule ʼa Sehova ʼo ʼuhiga mo te ʼohoana, peʼe kua au pikisia koa au ʼi te manatu ʼaē ʼe maʼu ʼi te mālamanei ʼo ʼuhiga te faʼahi ʼaia?’
11, 12. (a) He koʼē ʼe feala ke mata faigataʼa ki te kau tūpulaga hanatou tali ia te pule ʼa Sehova? (b) Kotou fakamatala ia he hisitolia ʼe hā mai ai, ʼe ko he agavale hata talagataʼa ki te ʼu lao ʼa Sehova pea mo tana ʼu pelesepeto.
11 Ko koe koa ko he tūpulaga ʼo te kautahi ʼa Sehova? Kapau ko koe ko he tūpulaga, ʼe lagi kua fakahaga atu ia te ʼu fakahala ʼa Satana moʼo maumauʼi ia te pule ʼa Sehova. Ko “te ʼu holi ʼo te temi tūpulaga” pea mo te ʼu fakahala ʼo tou ʼu kaumeʼa ʼe feala ke natou uga ia koe ke ke ʼui ko te ʼu lao ʼa te ʼAtua ʼe mamafa fau. (2 Tim. 2:22) ʼAua naʼa ke tuku he meʼa fēia ke hoko. Kotou faigaʼi ke kotou sio ki te fakapotopoto ʼo te ʼu lēkula ʼa te ʼAtua, ohagē ko tona ʼui mai ʼi te Tohi-Tapu ke “kotou hola mai te fai folonikāsio.” (1 Ko. 6:18) Kotou toe fai ia te ʼu fehuʼi ʼaenī kiā koutou totonu: ‘He koʼē ʼe fakapotopoto ia te fakatotonu ʼaia? ʼE fua lelei feafeaʼi anai kiā au taku fakalogo ʼo ʼuhiga mo te faʼahi ʼaenī?’ ʼE lagi kotou ʼiloʼi niʼihi neʼe mole natou fia fakalogo ki te ʼu tokoni ʼa te ʼAtua pea ki muli age neʼe natou utu pē ia te ʼu fua kovi ʼo tanatou talagataʼa ʼaia. ʼE natou fiafia moʼoni koa ʼi te temi nei? Ko tonatou maʼuli ʼi te temi nei ʼe lelei age koa ʼi te temi ʼaē neʼe kei natou lagolago ai ki te kautahi ʼa Sehova? Kua natou maʼu moʼoni koa te kalavī ʼo te maʼuli fiafia ʼaē ʼe mole feala ke maʼu e ʼihi age ʼu kaugana ʼa te ʼAtua?—Lau ia Isaia 65:14.
12 Tou vakaʼi age muʼa ia te ʼu palalau neʼe fai e te tuagaʼane ko Sharon: “ ʼI taku mole fia fakalogo ki te ʼu lao ʼa Sehova, kua au maʼu nei ia te SITA, ko he mahaki ʼe feala pē ke kita mate ai. ʼE au manatuʼi tuʼumaʼu te ʼu taʼu ʼaē neʼe au tauhi fakafiafia ai kiā Sehova.” Neʼe ina fakamoʼoni ko tana talagataʼa ʼaē ki te ʼu lao ʼa Sehova neʼe ko hana agavale kae neʼe tonu ke fakaʼapaʼapa lahi kiai. Ko te ʼu lao ʼa Sehova ʼe ko he puipuiʼaga kiā tātou. Neʼe mate ia Sharon hili vāhaʼa e fitu ki tana tohi ia te ʼu palalau ʼaē ki ʼoluga. ʼE hā mai ʼi te ʼaluʼaga ʼaē neʼe hoko kiā Sharon, ʼe mole foaki e Satana ia he meʼa ʼe lelei kiā nātou ʼaē ʼe natou lagolago ki te tuʼu agakovi ʼaenī. Ko ia ko “te tamai ʼo te loi,” pea ko te ʼu fakapapau ʼaē ʼe ina fai ʼe mole ina fakahoko, ohagē ko te fakapapau ʼaē neʼe ina fai kiā Eva, kae kua mate lā ia. (Soa. 8:44) ʼEī, ʼe lelei age pē hata tali ʼi te temi fuli ia te pule ʼa Sehova.
Tou Tōkakaga Ki Te Fia Faʼifaʼitaliha
13. Ko te faʼahi fea ʼaē ʼe tonu ai ke tou tōkakaga ki te fia faʼifaʼitaliha?
13 ʼI tatatou tali ia te pule ʼa Sehova, ʼe tonu ke tou tōkakaga ki te loto faʼifaʼitaliha. ʼAki te fialahi ʼe feala ai ke tou manatu ʼe mole ʼaoga ke takitaki tātou e hina tahi. Ohagē lā, ʼe feala ke tou tekeʼi te ʼu tokoni ʼaē ʼe foaki mai e nātou ʼaē ʼe natou takitaki ʼi te kautahi ʼa te hahaʼi ʼa te ʼAtua. Neʼe fakatuʼu e Sehova ia he fakatuʼutuʼu ʼe feala ai ki te kalasi ʼo te tagata kaugana agatonu mo poto ke ina tufa te meʼa kai fakalaumālie ʼi tona temi totonu. (Mat. 24:45-47) ʼAki he agavaivai, ʼe tonu anai ke tou fakamoʼoni ʼe ko he faʼahiga tokaga ʼaia ʼa Sehova ki tana hahaʼi iā ʼaho nei. Tou hagē ko te kau ʼapositolo agatonu. ʼI te temi ʼaē neʼe tūkia ai ʼihi tisipulo, neʼe fehuʼi fēnei age e Sesu ki te kau ʼapositolo: “ ʼE mole koa lā toe fia ʼolo ai mo koutou?” Neʼe tali fēnei age e Petelo: “ ʼAliki, ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata.”—Soa. 6:66-68.
14, 15. He koʼē ʼe tonu ke tou fakalogo ʼaki he agavaivai ki te ʼu tokoni ʼa te Tohi-Tapu?
14 Ko te tali ia te pule ʼa Sehova, ko tona fakaʼuhiga ke tou mulimuli ki te ʼu tokoni ʼaē ʼe haʼu mai tana Folafola. Ohagē lā, neʼe fakalotomālohiʼi tātou e te kalasi ʼo te tagata kaugana agatonu mo poto ke tou “nonofo ʼalaʼala pea mo tou aga fakapotopoto.” (1 Tes. 5:6) Ko he tokoni ʼe matatonu tāfito ʼi te ʼu ʼaho fakamuli ʼaenī ʼaē kua tokolahi ai ia nātou ʼaē ʼe ‘kaumeʼa pē mo nātou totonu, pea mo kaumeʼa mo te paʼaga.’ (2 Tim. 3:1, 2) ʼE feala koa ke malave kiā tātou ia te ʼu aga ʼaia? ʼEī. ʼE feala ki he ʼu fakatuʼutuʼu fakamālama ke natou fakatō tātou ki he māʼumoea fakalaumālie peʼe ke tou mānumānu koloa. (Luka 12:16-21) Koia, ʼe ko he aga fakapotopoto hatatou tali ia te ʼu tokoni ʼo te Tohi-Tapu pea mo tekeʼi ia te manatu pē ʼaē kiā kita totonu ʼaē ko he faʼahiga maʼuli kua mafola ia ʼi te mālama ʼa Satana!—1 Soa. 2:16.
15 ʼE foaki e te ʼu tagata ʼāfea ʼi te ʼu kōkelekāsio ia te meʼa kai fakalaumālie ʼaē ʼe tufa mai e te kalasi ʼo te tagata kaugana agatonu mo poto. ʼE fakatokaga fēnei mai ʼi te Tohi-Tapu: “Kotou fakalogo kiā nātou ʼaē ʼe natou takitaki koutou, pea mo kotou talagafua, heʼe natou leʼoleʼo tuʼumaʼu ʼokotou ʼu nefesi, ohagē ko he ʼu tagata ʼe fakamāuʼi anai ʼi he ʼaho; koteʼuhi ke natou fai fakafiafia te faʼahi ʼaia kae ke ʼaua naʼa natou fai ʼaki he loto fītaʼa, heʼe fakatupu kovi anai kiā koutou.” (Hep. 13:17) Ko tona fakaʼuhiga koa ko te ʼu tagata ʼāfea ʼo te kōkelekāsio ʼe mole kei natou lakahala? Kailoa ia! Ko te ʼAtua ʼe mahino ki tonatou ʼu vaivaiʼaga. Koia, ʼe ina ʼamanaki ke tou fakalogo kiā nātou. Ko tatatou kaugā gāue fakatahi mo te ʼu tagata ʼāfea logolā tonatou ʼu vaivaiʼaga, ʼe tou fakahā ai ʼe tou tali ia te pule ʼa te ʼAtua.
Te Maʼuhiga ʼo Te Agavaivai
16. ʼE feafeaʼi hatatou fakahā tatatou fakaʼapaʼapa ʼaē kiā Sesu ko te Pule ʼo te kōkelekāsio?
16 ʼE tonu ke tou manatuʼi tuʼumaʼu ko Sesu ʼaē ʼe Pule ki te kōkelekāsio. (Kol. 1:18) Ko he tupuʼaga ʼaia ʼe tonu ai ke tou fakalogo ʼaki he agavaivai ki te takitaki ʼa te ʼu tagata ʼāfea, ʼo tou “fakamaʼuhigaʼi nātou.” (1 Tes. 5:12, 13) Ko te ʼu tagata ʼāfea ʼo te kōkelekāsio ʼe tonu foki mo nātou ke natou fakahā ia tanatou fakalogo, ʼaki tanatou tōkakaga ʼo foaki ki te kōkelekāsio ia te logo ʼa te ʼAtua, kae mole ko tanatou ʼu manatu ʼa nātou totonu. ʼE mole natou ‘hilifaki he tahi age ʼu meʼa ʼi te ʼu meʼa ʼaē kua tohi’ ke tupu ʼaki ai hanatou fakahā ʼo tanatou ʼu manatu ʼa nātou totonu.—1 Ko. 4:6.
17. He koʼē ʼe kovi ia te fialahi?
17 ʼE tonu kiā nātou fuli ʼi te kōkelekāsio ke natou tōkakaga naʼa natou kumi ia tonatou kolōlia ʼo nātou totonu pē. (Taag. 25:27) He neʼe ko he faʼahi ia neʼe liliu ko he hele ki te tahi tisipulo ʼaē neʼe felāveʼi mo te ʼapositolo ko Soane. Neʼe ina ʼui fēnei: “Ko Tiotefeso, ʼaē ʼe manako ki te tuʼulaga māʼoluga, ʼe mole ina tali fakaʼapaʼapa he meʼa ʼe ʼavatu iā mātou. Koia ʼaē kapau ʼe au ʼalu atu, ʼe au fakamanatuʼi atu anai tana ʼu gāue ʼaē ʼe ina fai tuʼumaʼu, ʼe ina fai te ʼu palalau agakovi ʼo ʼuhiga mo mātou.” (3 Soa. 9, 10) ʼE ʼi ai te ako kiā tātou ʼi te temi nei. Kapau ʼe tou fakatokagaʼi ʼe tou fiatuʼu, pea ʼe tonu ke tou fakamate te ʼu holi ʼaia ʼo ʼuhiga mo te faʼahi ʼaia. ʼE ʼui fēnei mai ʼi te Tohi-Tapu: “Ko te fialahi ʼe muʼa mai ia ʼi te fakaʼauha, pea ko te fiahā ʼe muʼa mai ia ʼi te higa.” Ko nātou ʼaē ʼe natou tali ia te pule ʼa te ʼAtua ʼe tonu ke natou tekeʼi te fialahi, heʼe kapau ʼe mole natou fai ia te faʼahi ʼaia ʼe natou tō anai ki te fakalainoa.—Taag. 11:2; 16:18.
18. Koteā ʼaē kā tokoni mai anai ke tou tali ia te pule ʼa Sehova?
18 ʼEī, kotou faiga mālohi ke kotou tekeʼi te fia faʼifaʼitaliha ʼaē ʼe maʼu e te hahaʼi ʼo te mālamanei pea mo kotou tali ia te pule ʼa Sehova. ʼI ʼihi temi, kotou loto fakafetaʼi ʼo metitāsioʼi te pilivilēsio lahi ʼaē ʼe kotou maʼu ko te tauhi kiā Sehova. Ko takotou kau ki te hahaʼi ʼaē ʼa te ʼAtua ʼe ko he fakamoʼoni neʼe ina taki mai koutou kiā te ia ʼaki tona laumālie māʼoniʼoni. (Soa. 6:44) ʼAua naʼa kotou fakavaivai ʼi he temi ia takotou ʼu felōgoi ʼaē mo te ʼAtua. Kotou faiga ʼi te ʼu faʼahi fuli ʼo tokotou maʼuli, ʼo kotou tekeʼi te fia faʼifaʼitaliha pea mo kotou tali te pule ʼa Sehova.
ʼE Kei Kotou Manatuʼi Koa?
• Koteā te fakaʼuhiga ʼo te tali ia te pule ʼa Sehova?
• Koteā ʼaē ʼe pipiki ai ia te ako ʼo totatou ʼu fealagia fakakaukau pea mo tatatou tali te pule ʼa Sehova?
• Ko te ʼu faʼahi fea ʼaē ʼe faigaʼi ai e Satana ke ina maumauʼi te pule ʼa te ʼAtua?
• He koʼē ʼe maʼuhiga ia te agavaivai moʼo tali ia te pule ʼa Sehova?