Ko He Akonaki Kua Mafola ʼi Te Mālamanei
“Neʼe au moemisi ʼo ʼuhiga mo te ʼifeli! Neʼe au moemisi ʼe lī au ki te afi kakaha pea neʼe au kalaga ʼi taku ʼala ake. ʼE kotou mahino ai, ki taku faiga lahi ʼaē ke ʼaua naʼa au agahala.”—Arline.
ʼE KOTOU tui koa ko te ʼifeli ʼe ko he koga meʼa ʼe fakamamahiʼi ai te hahaʼi agahala? Tokolahi ia te hahaʼi ʼe natou tui kiai. Ohagē lā ʼi te taʼu 2005, ko te tagata ʼe ina ako ia te ʼu ʼatua kehekehe ʼi te Univelesitē ʼo Sagato Atelea ʼi Ekosi, neʼe ina maʼu ʼi tana sivi ko te vahe tolu ʼi te kau takitaki lotu ʼo Ekosi neʼe natou tui ko nātou ʼaē ʼe mavae mai te ʼAtua ʼe natou nonofo anai ʼi “te hoha heʼegata ʼo te ʼifeli.” Pea ko te vahe nima iā nātou neʼe natou tui ko nātou ʼaē ʼe ʼolo ki te ʼifeli ʼe fakamamahiʼi anai ʼonatou sino.
ʼI te ʼu fenua e tokolahi, kua mafola ia te tui ʼaē ki te ʼifeli. Ohagē lā, ʼi Amelika, ko te sivi neʼe fai ʼi te taʼu 2007, neʼe maʼu ai ko te teitei toko 70 ʼi te teau iā nātou ʼaē neʼe fakafehuʼi ʼe natou tui ki te ʼifeli. Māʼiapē lā mo te ʼu fenua ʼaē ʼe mole faʼa lotu ai ia te hahaʼi, kae ʼe kei natou tui pē ki te ʼifeli. Ko te sivi neʼe fai ʼi te taʼu 2004, neʼe maʼu ai ko te toko 42 ʼi te teau ʼo te hahaʼi ʼi Kanata neʼe natou tui ki te ʼifeli. Pea ʼi Pilitānia, ko te toko 32 ʼi te teau neʼe natou tui papau ki te ʼifeli.
Te Akonaki ʼAē ʼe Akoʼi e Te Kau Takitaki Lotu
Tokolahi ʼi te kau takitaki lotu ʼe mole kei natou akoʼi, ko te ʼifeli ʼe ko he koga meʼa moʼoni ʼe fakamamahiʼi ai ia te hahaʼi. Kae ʼe natou lagolago ki te akonaki ʼaē ʼe tatau ʼe tuʼu ʼi te tohi ʼaē neʼe tā ʼi te taʼu 1994 (Catechism of the Catholic Church). ʼE ʼui fēnei ʼi te tohi ʼaia: “Ko te tautea tāfito ʼo te ʼifeli ʼe ko te fakamavae mai ʼosi ʼo he tahi mai te ʼAtua.”
Kae ko te akonaki ʼaē ko te ʼifeli ʼe ko he koga meʼa ʼe nonofo hoha ai ia te hahaʼi peʼe fakamamahiʼi ai nātou ʼi te faʼahi fakasino, ʼe kei tui pē kiai ia te hahaʼi. Ko nātou ʼaē ʼe natou lagolago ki te akonaki ʼaia, ʼe natou ʼui ko te taʼi akonaki ʼaia ʼe fakatafito ki te Tohi-Tapu. Ko te tagata ko R. Albert Mohler, te pelesitā ʼo te seminalio fakateolosia (Séminaire théologique des baptistes du Sud), ʼe ina ʼui fēnei: “ ʼE tuʼu ia te faʼahi ʼaia ʼi te Tohi-Tapu.”
He Koʼē ʼe Maʼuhiga Ia Te Meʼa ʼAē ʼe Kotou Tui Kiai?
Kapau ko te ʼifeli ʼe ko he koga meʼa moʼoni ʼe fakamamahiʼi ai ia te hahaʼi, pea ʼe mahino ia ʼe tonu ke kotou mātataku kiai. Kae kapau ʼe mole moʼoni ia te akonaki ʼaia, pea ko te kau takitaki lotu ʼaē ʼe natou akoʼi ia te akonaki ʼaia ʼe natou fakatupu maveuveu ki te ʼatamai pea mo fakatupu he tuʼania ʼe mole hona ʼaoga kiā natou ʼaē ʼe tui age kiā nātou. ʼE natou toe pātapāta ki te ʼAtua.
Koteā ʼaē ʼe ʼui ʼi te Folafola ʼa te ʼAtua, te Tohi-Tapu ʼo ʼuhiga mo te faʼahi ʼaia? Ko te ʼu ʼalatike ʼaē kā hoa mai ʼe fakaʼaogaʼi ai anai ia te ʼu Tohi-Tapu Katolika pea mo Polotesitā moʼo tali ki te ʼu fehuʼi ʼaenī: (1) Koteā ʼaē ʼe hoko moʼoni mokā mate he tahi? (2) Koteā ʼaē neʼe akoʼi e Sesu ʼo ʼuhiga mo te ʼifeli? (3) ʼE malave feafeaʼi kiā koutou takotou ʼiloʼi ʼaē ia te moʼoni ʼo ʼuhiga mo te ʼifeli?