E Feafeaʼi Te ʼIfeli?

LOGOPE pe koteā takotou manatu ki te “ ʼifeli,” kae maʼa te tokolahi ʼe ko he koga meʼa moʼo tauteaʼi ai te hahaʼi agahala. ʼO ʼuhiga mo te agahala pea mo tona ʼu fua, ʼe ʼui fēnei e te Tohi-Tapu: “ ʼAki pe te tagata e tahi kua hū te agahala ki te malamanei, pea ʼaki te agahala te mate, pea koia kua mafola ai te mate ki te tagata fuli pe koteʼuhi kua nātou agahala fuli.” (Loma 5:12, MN ) ʼE toe ʼui fēnei e te Tohi-Tapu: “Ko te totogi ʼaē ʼe foaki e te agahala, ko te mate.” (Loma 6:23, MN ) ʼUhi ko te tūʼa ʼo te agahala ʼe ko te mate, ʼe ʼi ai te fehuʼi maʼuhiga ke tou fai moʼo ʼiloʼi peʼe feafeaʼi te ʼifeli: Koteā ʼaē ʼe hoko kia tatou mokā tou mamate.

ʼE ʼi ai koa he tahi maʼuli ʼi te hili ʼo te mate? Koteā te ʼifeli, pea ko ai te hahaʼi ʼaē ʼe ʼolo kiai? ʼE ʼi ai koa he ʼamanaki kia nātou ʼaē ʼe ʼolo ki te ʼifeli? ʼE foaki mai e te Tohi-Tapu te ʼu tali ʼe moʼoni pea mo ʼaoga ki te ʼu fehuʼi ʼaia.

ʼE ʼi Ai Koa He Maʼuli ʼi Te Hili ʼo Te Mate?

ʼE ʼi ai koa he meʼa ʼi totatou sino, ohage ko he laumālie, ʼe maʼuli mokā mate te sino? Tou vakaʼi pe neʼe foaki feafeaʼi te maʼuli ki te ʼuluaki tagata ko Atama. ʼE ʼui fēnei e te Tohi-Tapu: “Ko Sehova ʼAtua neʼe ina faʼu te tagata ʼaki te efu ʼo te kele pea neʼe ina pupuhi ki tona ihu te mānava ʼo te maʼuli.” (Senesi 2:7) Logola ko te mānava ʼe ina taupau tona maʼuli, kae neʼe maʼuhiga age te pupuhi ʼo “te mānava ʼo te maʼuli” ki tona ʼu poga ihu ʼi hana pupuhi pe ʼo te ʼaele ki tona ʼu ʼatefēfē. Ko tona faka ʼuhiga neʼe foaki e te ʼAtua ki te sino mate ʼo Atama ia te mālohi ʼo te maʼuli—pea ʼe maʼu e te ʼu meʼa maʼuli fuli ia “te mālohi ʼo te maʼuli” ʼaia. (Senesi 6:17; 7:22) ʼE ʼui e te Tohi-Tapu ko te mālohi ʼaia ʼo te maʼuli ʼe ko he “laumalie.” (Sakopo 2:26) ʼE lava fakatatau te laumālie ʼaia ki te hila ʼaē ʼe ina fakahaʼele he masini, pea mo ina faka fealagia ke ina fai tana gāue. Ohage pe ko te hila, ʼe mole ina maʼu te ʼu agaaga fuli ʼo te masini ʼaē ʼe ina fakahaʼele, ʼo toe feiā mo te mālohi ʼo te maʼuli, ʼe mole ina maʼu te ʼu agaaga ʼo te ʼu hahaʼi ʼaē ʼe ina fakamaʼuli. ʼE mole ʼi ai hona ʼulugaaga pea ʼe mole ʼi ai hana fakakaukau.

Koteā ʼaē ʼe hoko ki te laumālie mokā mate he tahi? ʼE ʼui fēnei ia Pesalemo 146:4: “Ko tona laumālie ʼe mavae, pea ʼe toe liliu ia ki te kele; ʼi te ʼaho pe ʼaia ʼe puli ai tana ʼu fakakaukau.” Ka mate he tahi, ʼe mole ʼalu tona laumālie ʼo maʼuli ʼi he tahi faʼahi ohage ko he laumālie ʼi te lagi. “ ʼE toe liliu ki te ʼAtua moʼoni ʼaē neʼe ina foaki mai.” (Tagata Tānaki 12:7) Ko tona faka ʼuhiga kua fakalogo ʼāteaina pe tona maʼuli ki te ʼAtua.

Ko te ʼu tagata fai filosofia Keleka ʼo te temi muʼa ko Socrate pea mo Platon, neʼe nā ʼui ʼe ʼi ai te laumālie ʼo te tagata ʼe maʼuli mokā hili tona mate, pea ʼe mole feala ke mate. Koteā ʼaē ʼe fakahā mai e te Tohi-Tapu ʼo ʼuhiga mo te nefesi? ʼE ʼui ia Senesi 2:7, ko Atama “neʼe liliu . . . ko te nefesi maʼuli.” Neʼe mole foaki age hona nefesi, he neʼe ko ia ko te nefesi—ko te tagata katoa. ʼE ʼui e te Tohi-Tapu ko te nefesi, ʼe fia kai, ʼe faʼao, ʼe mole mamoe, pea mo ʼihi atu meʼa. (Levitike 23:30; Teutalonome 12:20; 24:7; Pesalemo 119:28) Ei, ko te nefesi ʼe ko te tagata katoa. Ka mate he tahi, pea ko te nefesi ʼaia ʼe mate.—Esekiele 18:4.

Kae e feafeaʼi te ʼaluʼaga ʼo te kau mate? ʼI te temi ʼaē neʼe tauteaʼi ai Atama, neʼe ʼui fēnei e Sehova: “[ʼE] ke efu pea ʼe ke toe liliu anai ki te efu.” (Senesi 3:19) Neʼe ʼifea Atama ʼi muʼa ʼo tona faʼu e te ʼAtua mai te efu pea mo foaki age te maʼuli kia ia? Neʼe mole maʼuli ia! ʼI te temi ʼaē neʼe mate ai, neʼe toe pulinoa Atama. ʼE fakahā lelei te ʼaluʼaga ʼo te kau mate ia Tagata Tānaki 9:5, 10, ʼaē ʼe tou lau fēnei ai: “ ʼE mole kei ʼiloʼi he meʼa e te kau mate. . . . ʼI te faitoka, ʼaē ʼe koutou ʼolo kiai, ʼe mole kei ʼi ai he gāue, he fakatuʼutuʼu, pea mo he ʼatamai mo he poto.” (New International Version) ʼE ʼui e te Tohi-Tapu ko te mate ʼe ko he tahi ʼe mole kei maʼuli. Ko te kau mate ʼe mole kei nātou ʼiloʼi he meʼa, ʼe mole kei ʼi ai he ʼu meʼa ʼi ʼonatou loto pea ʼe mole kei ʼi ai hanatou ʼu fakakaukau.

ʼE Ko He ʼu Fakamamahi Heʼegata Koa Peʼe Ko Te Faitoka Pe?

ʼUhi ko te kau mate ʼe mole kei nātou ʼiloʼi he meʼa, ko tona faka ʼuhiga ko te ʼifeli ʼe mole ko he koga meʼa ʼe ulo ai he afi moʼo fakamamahiʼi te kau agakovi mokā nātou mamate. Kae koteā te ʼifeli? Moʼo tali ki te fehuʼi ʼaia, tou vakaʼi te meʼa ʼaē neʼe hoko kia Sesu ʼi tana ʼosi mate. ʼI te Tohi-Tapu, ʼe ʼui fēnei e te tagata faitohi ko Luka: “Neʼe mole līaki [Sesu] ʼi te Hatesi [ʼifeli, King James Version] pea neʼe mole ʼiloʼi e tona kakano te fakapopo.”a (Gaue 2:31, MN) Ko te ʼifeli feafeaʼi ʼaē neʼe ʼalu kiai ia Sesu? Neʼe tohi fēnei e te ʼapositolo ko Paulo: “Neʼe ʼau fakahā atu . . . neʼe mate ia Kilisito maʼa tatatou ʼu agahala ʼo mulimuli ki te Folafola; pea neʼe ʼavaifo, ei, pea fakatuʼuake ʼi te tolu ʼaho ʼo mulimuli ki te Folafola.” (1 Kolonito 15:3, 4, MN) Logola neʼe nofo ia Sesu ʼi ʼifeli, kae neʼe mole līʼakina ia ia, koteʼuhi neʼe toe fakatuʼuake.

Koutou toe vakaʼi mo te faʼifaʼitaki ʼo te tagata agatonu ko Sopo, ʼaē neʼe maʼuli mamahi ʼaupito. ʼI te lahi fau ʼo te ʼu mamahi ʼaē neʼe tau mo ia, neʼe tagi fēnei: “Ko ai anai ka ina fakamoʼoni mai te meʼa ʼaia, ke ke puipui ʼau ʼi te ʼifeli [te Seole], pea mo fufū ʼau mai tou hāūhāū?”b (Sopo 14:13, Douay Version) ʼE mole ko he manatu fakapotopoto ʼa Sopo hana fia kumi hona fīmālie ʼi he koga meʼa ʼe ulo ai he afi! Maʼa Sopo, ko te “ ʼifeli” neʼe ko te faitoka pe ia, ko he koga meʼa ʼe mole toe mamahi ai anai. Pea ko te ʼifeli faka Tohi-Tapu, ʼe ko te faitoka ʼaē ʼe ʼalu kiai te hahaʼi fuli, peʼe nātou agalelei peʼe nātou agakovi.

Ko He Afi Kakaha Koa ʼe Fakaʼauha Ai Te Meʼa Fuli?

Ko te afi ʼo te ʼifeli ʼe ina fakatātā koa te fakaʼauha? Moʼo fakakehekeheʼi te afi mai te Hatesi, peʼe ko te ʼifeli, ʼe ʼui fēnei e te Tohi-Tapu: “Neʼe lī te mate pea mo te Hatesi ki te ano ʼo te afi.” Ko te “ano” ʼaē ʼe talanoa kiai ʼi henī ʼe ko he koga meʼa fakatātā, koteʼuhi ko te mate pea mo te ʼifeli (Hatesi) ʼe mole feala ke lī moʼoni nāua ki he afi. “Ko te faka ʼuhiga ʼaenī ʼo te lua mate, ko te ano ʼo te afi”—te mate ʼaē ʼe mole feala ke toe fakatuʼuake ai he tahi.—Apokalipesi 20:14, MN.

ʼE toe tatau te faka ʼuhiga ʼo te ano ʼo te afi pea mo “te Seʼeni kakaha [ʼifeli kakaha, King James Version]” ʼaē neʼe talanoa kiai Sesu. (Mateo 5:22; Maleko 9:47, 48) ʼE tuʼa 21 te fakaʼaogaʼi ʼo te kupu Seʼeni ʼi te ʼu Tohi Faka Keleka Faka Kilisitiano, pea ʼe faka ʼuhiga ki te mafa ʼo Hinome, ʼi te tuʼa kaupā ʼo Selusalemi. ʼI te kei maʼuli ʼa Sesu ʼi te kele, ko te mafa ʼaia neʼe ko he lakuʼaga ʼotaʼota, pea “neʼe laku kiai te ʼu sino mate ʼo te kau agakovi, pea mo te ʼu manu mate, pea neʼe laku kiai mo te ʼu faʼahiga ʼotaʼota kehekehe.” (Smith’s Dictionary of the Bible) Neʼe ʼai te sufe ki te afi ke feala hana kakaha tuʼumaʼu moʼo tutu te ʼu ʼotaʼota. Neʼe fakaʼaogaʼi e Sesu te mafa ʼaia moʼo fakatātā te fakaʼauha heʼegata.

Ohage ko te Seʼeni, ʼe fakatātā e te ano ʼo te afi ia te fakaʼauha heʼegata. Ko te ʼui ʼaē ʼe “lī” te mate pea mo te Hatesi ki te ano ʼo te afi, ko tona faka ʼuhiga ʼe pulihi anai ʼo talu ai mokā faka ʼāteaina anai te hahaʼi mai te agahala pea mo te mate. Ko te hahaʼi agahala ʼaē ʼe mole nātou fakahemala, ʼe laku anai mo nātou ki te ano ʼo te afi. (Apokalipesi 21:8) ʼE fakaʼauha anai mo nātou ʼaia ʼo talu ai. Tahi ʼaē meʼa, ʼe manatuʼi e te ʼAtua te hahaʼi ʼaē ʼi ʼifeli—ia te faitoka ʼo te malamanei katoa—pea ʼe nātou maʼu anai te ka haʼu taulekaleka.

Kua Faka Gaʼasi Te ʼIfeli!

ʼE ʼui fēnei ia Apokalipesi 20:13, (MN ): “Neʼe liufaki e te tai te kau mate ʼaē neʼe ia te ia, pea neʼe liufaki e te mate pea mo te Hatesi te kau mate ʼaē neʼe ia nāua.” Ei, ko te ʼifeli ʼaē ʼe talanoa kiai te Tohi-Tapu ʼe faka gaʼasi anai. Ohage ko tona fakapapauʼi mai e Sesu: “ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki [te] leʼo [ʼo Sesu] pea ʼe nātou hū mai anai ki tuʼa.” (Soane 5:28, 29, MN ) ʼIo ko te hahaʼi ʼe lauʼi miliona kua mamate, kae kei manatuʼi nātou e te ʼAtua, pea ʼe ina fakatuʼuake anai nātou, peʼe ina toe fakamaʼuli age ia nātou, ʼi te palatiso ʼaē kua toe fakatuʼu ʼi te kele.—Luka 23:43; Gaue 24:15.

ʼI te mālama foʼou ʼa te ʼAtua, ko te hahaʼi ʼaē ka fakatuʼuake moʼo mulimuli ki tana ʼu lao faitotonu, ʼe mole nātou toe mamate anai ʼi he temi. (Isaia 25:8) Ko Sehova ʼe ina “holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi.” ʼIo, “[ʼe] puli [anai] te malama-nei afea.” (Apokalipesi 21:4) ʼI tapuakina taulekaleka leva ʼaē ʼe fakatalitali kia nātou ʼaē ʼe nonofo ʼi te ʼifeli—“te ʼu falemaka fakamanatu”! ʼE feʼauga te tapuakina ʼaia ke toe lahi age ai tatatou fia ʼiloʼi ia Sehova ʼAtua pea mo tona ʼAlo, ko Sesu Kilisito.—Soane 17:3.

[Kiʼi nota]

[Paki ʼo te pasina 5]

Neʼe faikole ia Sopo ke puipui ia ia ʼi ʼifeli

[Paki ʼo te pasina 6]

Ko te Seʼeni kakaha—ʼe ina fakatātā te fakaʼauha heʼegata

[Paki ʼo te pasina 7]

‘ ʼE hū mai anai ki tuʼa ia nātou ʼaē ʼi te ʼu falemaka fakamanatu’