Te ʼu Milakulo ʼAē Kā ʼAmanaki Hoko
KAPAU ko he tōketā fai tafa ʼe ina fakatuʼutuʼu ke ina fai he tafa faigataʼa kiā koutou, koteā anai takotou manatu mo kapau ʼe kotou ʼiloʼi ʼe mole heʼeki ina fai he faʼahiga tafa fēia? ʼE mahino ia ʼe kotou tuʼania anai. Kae, ʼe feafeaʼi anai mo kapau lā ʼe kotou ʼiloʼi ko te tōketā ʼaia ʼe faiva ʼi te fai tafa pea kua ina lava fai te ʼu tafa fēia e lauʼi teau? ʼE mole koa lā kotou falala anai ʼe ina lava tokoni atu kiā koutou?
ʼE feala ke tou fakatatau ia Sehova ʼAtua ki he tōketā faiva pea mo te mālama ki he tahi ʼe mahaki ʼe ʼaoga kiai he tafa lahi. ʼAki tana Folafola, te Tohi-Tapu, ʼe fakapapau mai e Sehova ʼAtua ʼe ina toe fakatuʼu anai te Palatiso ʼi te kele ʼaenī. (2 Petelo 3:13) Kae, ke feala ke hoko te faʼahi ʼaia, ʼe tonu muʼa ke pulihi kātoa te agakovi. (Pesalemo 37:9-11; Taaga Lea 2:21, 22) Pea ʼi muʼa ʼo te toe fakatuʼu he palatiso, ko te ʼu ʼaluʼaga fakaʼofaʼofa fuli ʼaē ʼe tou sio kiai ʼi ʼotatou tafaʼaki ʼe tonu ke pulihi. Ke hoko te faʼahi ʼaia ʼe ʼaoga anai ke ʼi ai he milakulo!—Apokalipisi 21:4, 5.
Ko te kau Fakamoʼoni ʼa Sehova ʼe natou tui ko te ʼu fetogi lalahi ʼaia kua vave hoko pē. Koteā tona tupuʼaga? Koteʼuhi he ko te ʼu milakulo ʼaē neʼe kua fakahoko e Sehova ʼAtua, ʼe ko he fakamoʼoni ʼaia ʼe ina maʼu ia te mālohi ʼaē moʼo fakahoko ʼana fakapapau. Kotou fakatatau he ʼu milakulo pē e ono ʼe tuʼu ʼi te Tohi-Tapu mo te ʼu fakapapau ʼaē kā ina fakahoko anai ʼi te kā haʼu.
ʼOfa pē ke kotou haga ako te ʼu fakapapau Fakatohi-tapu ʼo ʼuhiga mo totatou kā haʼu. Ohagē pē ko te tuputupu ʼo takotou tui, ʼe toe fēia mo takotou ʼamanaki, ʼaē ke kotou maʼuli anai ʼi te temi ʼaē ʼe kotou maʼu ai te ʼu lelei mai te ʼu milakulo ʼaē ʼe fakahoko e Sehova.
[Talanoa/Palalau ʼo te pāsina 7]
TE MILAKULO:
NEʼE FAFAGA E SESU IA TE TOKO LAUʼI AFE HAHAʼI ʼAKI PĒ TE ʼU FOʼI PANE PEA MO TE ʼU KIʼI IKA.—MATEO 14:13-21; MALEKO 8:1-9; SOANE 6:1-14.
TE FAKAPAPAU:
“E foaki e te kele ona fua; ko te Atua, tomatou Atua, e tapuaki kia matou.”—PESALEMO 67:7.
TONA FAKAʼUHIGA MAʼA TĀTOU:
ʼE MOLE HE TAHI ʼE TOE MAMAHI ANAI ʼI TE PAKUPAKU.
TE MILAKULO:
NEʼE FAKAMĀLŌLŌ E SESU TE KAU KIVI.—MATEO 9:27-31; MALEKO 8:22-26.
TE FAKAPAPAU:
“I te aho aia, e avahi anai te u mata o te u kivi.”—ESAIA 35:5.
TONA FAKAʼUHIGA MAʼA TĀTOU:
KO TE KAU KIVI FULI ʼE NATOU TOE SIO ANAI.
TE MILAKULO:
NEʼE FAKAMĀLŌLŌ E SESU TE KAU KETU.—MATEO 11:5, 6; SOANE 5:3-9.
TE FAKAPAPAU:
“I te aho aia, e hopohopo anai te ketu o hage ko he tia.”—ESAIA 35:6.
TONA FAKAʼUHIGA MAʼA TĀTOU:
KO TE ʼU MĀʼIMOA FULI ʼE LILIU ANAI ʼO LELEI.
TE MILAKULO:
NEʼE FAITOʼO E SESU TE ATU MAHAKI FULI.—MALEKO 1:32-34; LUKA 4:40.
TE FAKAPAPAU:
“E mole ui e he tahi: E au mahaki!”—ESAIA 33:24.
TONA FAKAʼUHIGA MAʼA TĀTOU:
KO TE ʼU MAHAKI KOVI FULI ʼE PULIHI ANAI. PEA ʼE TOU FIAFIA ANAI ʼI HE MAʼULI HAOHAOA.
TE MILAKULO:
NEʼE PULEʼI E SESU IA MEʼA FULI.—MATEO 8:23-27; LUKA 8:22-25.
TE FAKAPAPAU:
“E natou fakatuu anai ni fale, pea e natou nonofo anai i ai; e natou to anai ni gaueaga vite, pea e natou kai anai onatou fua. E mole natou gaue anai ki te noa.”—ESAIA 65:21, 23.
“Kapu maia koe te tuania, koteuhi e mole tonu ke ke mataku ki he mea; pea mo tete, koteuhi e mole fakaovi anai ia ia kia koe.”—ESAIA 54:14.
TONA FAKAʼUHIGA MAʼA TĀTOU:
KO TE ʼU TUʼUTĀMAKI FAKANĀTULĀ ʼE MOLE TOE MAʼU ANAI.
TE MILAKULO:
NEʼE FAKATUʼUAKE E SESU TE KAU MATE.—MATEO 9:18-26; LUKA 7:11-17.
TE FAKAPAPAU:
Ko “natou fuli e nonofo i te u tanuma . . . e natou feulufi anai ki tua.”—SOANE 5:28, 29.
“Nee tuku ake leva e te tai te kau mate ae nee ina mau. Pea nee tuku ake leva e te mate mo te nofoaga o te kau mate te kau mate ae nee na mau.”—APOKALIPISI 20:13.
TONA FAKAʼUHIGA MAʼA TĀTOU:
KO NĀTOU ʼAĒ NEʼE MAMATE KAE NEʼE TOU ʼOFA MAMAHI AI, ʼE FAKATUʼUAKE ANAI.