ʼAua Naʼa Tou Iita Kia Sehova

1, 2. He ko ʼe ʼe mole tonu ke tou tukugakoviʼi ia Sehova ʼo ʼuhiga mo te ʼu fihifihia ʼo te malamanei? Tuku mai he faʼifaʼitaki.

FAKAKAUKAUʼI age muʼa, ko he tahi ʼe maʼuli fimalie mo tona ʼohoana. Pea ʼi te tahi ʼaho ʼi tana liliu mai ki tona loto fale, ʼe maveu te ʼapi. ʼE sio ki te maumau ʼo te ʼu puha mo te foafoa ʼo te ʼu pa mo te ʼu ipu. ʼE ina ui fenei anai: “He ko ʼe koa kua feia te finematuʼa?” peʼe ina ui anai “Ko ai neʼe ina fai te meʼa ʼaeni?” ʼE mahino ia, ko te lua fehuʼi ʼae ʼe ina fai anai. Kotea tona tupuʼaga? Koteʼuhi ʼe ina iloʼi lelei te ʼuhiga ʼo tona ʼohoana pea ʼe mole feala ia ke ina fai he toe maumau feia.

² Ia ʼaho nei, ʼe tou sisio ki te ʼulihi ʼo te kele pea mo te kua kovi ʼo te aga ʼa te hahaʼi. ʼI tatatou ako te Tohi-Tapu, ʼe tou mahino ai ʼe mole ko Sehova te tupuʼaga ʼo te ʼu fihifihia ʼaia. He neʼe ina fakatupu te kele ke liliu ko he palatiso taulekaleka. (Sen. 2:8, 15) Pea ko Sehova ʼe ko he ʼAtua ʼofa ia. (1 Soa. 4:8) ʼE ui mai ʼi te Tohi-Tapu ko te tupuʼaga tafitō ʼo te ʼu fihifihia ʼae ʼe tau mo te malamanei, ʼe ko Satana te Tevolo, “te pule o te malamanei.”—Soa. 14:30; 2 Ko. 4:4.

3. ʼE lava feafeaʼi ke hala ʼatatou manatu?

³ Kaʼe ʼe mole feala ke tou tukugakoviʼi pe ia Satana. He kotea tona tupuʼaga? Koteʼuhi ko ʼihi fihifihia ʼe tou tau mo ia ʼe tupu pe ʼuhi ko tatou totonu. (Lau ia Tetelonome 32:4-6.) ʼE feala pe ke tou mahino ki te faʼahi ʼaia, kaʼe ʼe feala ke hala ʼatatou manatu ʼuhi ko totatou ʼuhiga agahala ʼo tupu ai totatou malaʼia. (Taag. 14:12) ʼO mole kei tou tukugakoviʼi ia Satana peʼe ko tatou totonu, kaʼe kua tou kamata tukugakoviʼi ia Sehova. ʼO tupu ai leva tatatou iita kia te ia.—Taag. 19:3.

4, 5. ʼE lava itaita feafeaʼi he Kilisitiano kia Sehova?

⁴ Kaʼe ʼe feala koa ke tou iita kia Sehova? ʼE mahino ia, ʼe mole ko he aga fakapotopoto. (Esa. 41:11) ʼE mole tou maʼu ai anai he meʼa ʼe lelei. Neʼe ui fenei e te tagata faituketuke: “ ʼE nonou ʼotatou nima ke feala hatatou fuhu mo te ʼAtua.” ʼE lagi mole tou palalau anai ʼo fakaha tatatou iita kia Sehova. Kaʼe ʼe ui mai ia Taaga Lea 19:3: “Ko te vale o te tagata e ina fakakovii tona ala, pea e itaita tona loto [kia Sehova].” Koia, ʼe feala ke itaita he tahi ki te ʼAtua ʼi tona loto, pea ʼe feala ke iloga ʼi tana aga. Kapau ʼe ita taʼofi he tahi ki te ʼAtua, ʼe fakamamaʼo anai ia mai te kokelekasio peʼe mole toe lagolago anai ia ki te ʼu fakatuʼutuʼu ʼa Sehova ʼo ʼuhiga mo te tauhi.

⁵ Kaʼe, kotea ʼae ʼe feala ke tupu ai hatatou iita kia Sehova? Kotea ʼae ʼe feala ke tou fai ke ʼaua naʼa tou to ki te hele ʼaia? ʼE maʼuhiga ke tou iloʼi te ʼu tali ki te ʼu fehuʼi ʼaia ke lelei ai ʼatatou felogoʼi mo Sehova ʼAtua.

KOTEA ʼAE ʼE FEALA KE TUPU AI TATATOU IITA KIA SEHOVA?

6, 7. Kotea ʼae neʼe tupu ai te muhumuhu ʼa te kau Iselaele kia Sehova?

⁶ Kotea ʼae ʼe feala ke tupu ai he ita ʼa he kaugana agatonu ʼa te ʼAtua ʼi tona loto kia Sehova? Tou vakaʼi ia tupuʼaga ʼe nima pea mo te ʼu faʼifaʼitaki ʼi te Tohi-Tapu ʼo niʼihi neʼe to ki te hele ʼaia.—1 Ko. 10:11, 12.

⁷ Te ʼu palalau fakalotovaivai. (Lau ia Tetelonome 1:26-28.) Neʼe hoki fakaʼateaina age pe te kau Iselaele mai tanatou nonofo popula ʼi Esipito. Neʼe fakahoko e Sehova te ʼu tautea ʼe hogofulu ki te puleʼaga agakovi ʼaia pea neʼe ina matehi ia Falaone pea mo tana kautau ʼi te Tai Kula. (Eke. 12:29-32, 51; 14:29-31; Pes. 136:15) Neʼe teuteu ulu te hahaʼi ʼa te ʼAtua ki te Kele ʼo Te Fakapapau. ʼI te lakaga maʼuhiga ʼaia, kua kamata muhumuhu te kau Iselaele kia Sehova. Kotea ʼae neʼe tupu ai tanatou mole kei falala ki te ʼAtua? Neʼe natou lotolotolua ʼuhi ko te ʼu palalau fakalotovaivai ʼa te ʼu tagata ʼae neʼe olo ʼo vakaʼi te fenua. (Num. 14:1-4) Kotea ʼae neʼe hoko? Neʼe mole feala ke ulu te taitupu katoa ki “te fenua lelei” ʼaia. (Tet. 1:34, 35) ʼE tou fakagafua koa ʼi ʼihi temi he ʼu palalau fakalotovaivai ke mole malohi ai tatatou tui ʼo tupu ai tatatou muhumuhu ʼo ʼuhiga mo te faʼahiga takitaki ʼa Sehova?

8. Kotea ʼae neʼe tupu ai te tukugakoviʼi e te hahaʼi ʼa te ʼAtua ia Sehova ʼo ʼuhiga mo ʼonatou fihifihia?

⁸ Te ʼu ʼahiʼahi pea mo te ʼu faigataʼaia. (Lau ia Esaia 8:21, 22.) ʼI te temi ʼo Esaia, neʼe tau te puleʼaga ʼo Suta mo te ʼu faigataʼaia. Neʼe a takai natou e ʼonatou fili. Neʼe mole kei ʼi ai he meʼa kai. Tokolahi neʼe halofia. Kaʼe fakaʼofaʼofa age la, he neʼe natou hoge ʼi te faʼahi fakalaumalie. (Amo. 8:11) ʼO mole natou haga kia Sehova ke foaki age te tokoni ʼaoga moʼo tauʼi ʼonatou fihifihia, kaʼe neʼe natou kamata “laukovi” ki tonatou hau pea mo tonatou ʼAtua. Koia neʼe natou tukugakoviʼi ai ia Sehova ʼo ʼuhiga mo ʼonatou fihifihia. Kapau ʼe tou tau mo he mamahi peʼe ko he fihifihia, ʼe tou ui anai koa ʼi totatou loto: “Neʼe ʼifea koa ia Sehova ʼi te temi ʼae neʼe ʼaoga mai ai tana tokoni?”

9. Kotea ʼae neʼe tupu ai te manatu hala ʼa te kau Iselaele ʼo te temi ʼo Esekiele ʼo ʼuhiga mo Sehova?

⁹ Te mole mahino ki te ʼu aluʼaga fuli. Mai tona tupuʼaga ʼae ko te kau Iselaele ʼo te temi ʼo Esekiele neʼe mole natou mahino ki te ʼu aluʼaga fuli, neʼe natou manatu ai neʼe faihala te ʼAtua. (Esk. 18:29) ʼI tanatou manatu, neʼe tonu ke natou fakamauʼi te ʼAtua pea mo filifili te meʼa ʼe tonu ke fai, logo la neʼe mole natou mahino ki te tupuʼaga ʼo tana aga feia. ʼE tou lava maʼu feafeaʼi ia te faʼahiga manatu ʼaia? ʼE feala ke mole tou mahino ki he ʼu fakamatala ʼi te Tohi-Tapu peʼe ko he aluʼaga ʼe hoko kia tatou, ʼo tupu ai tatatou maʼu te manatu ʼae ʼe faihala ia Sehova pea ʼe “mole totonu” ʼona ala.—Sopo 35:2.

10. Kotea ʼae ʼe feala ai ke tou hage ko Atama?

¹⁰ Te mole fia tali ʼo ʼatatou hala. Neʼe tukugakoviʼi e te ʼuluaki tagata ko Atama ia te ʼAtua ʼuhi ko tana agahala. (Sen. 3:12) Neʼe iloʼi e Atama neʼe talagataʼa ia ki te ʼAtua pea ʼe tauteaʼi anai ia ia. Kaʼe neʼe ina tukugakoviʼi ia Sehova ʼuhi ko te fafine ʼae neʼe ina foaki age. Ko ʼihi ʼe natou hage ko Atama ʼo natou tukugakoviʼi te ʼAtua ʼuhi ko ʼanatou hala. ʼE tonu ke tou fai te fehuʼi ʼaeni kia tatou takitokotahi: “ ʼE au mamahi koa ʼuhi ko ʼaku hala pea mo ui ʼe fefeka fau te ʼu lekula ʼa te ʼAtua?”

11. Kotea te ako ʼe tou maʼu mai ia Sonasi?

¹¹ Te manatu pe ʼae kia kita. Neʼe itaita te polofeta ko Sonasi ʼi te fakaha e Sehova tona manavaʼofa ki te hahaʼi ʼo Ninive. (Son. 4:1-3) Kotea tona tupuʼaga? Koteʼuhi neʼe tuʼania ia naʼa ui e te hahaʼi ko ia ko he polofeta loi ʼuhi ko te mole hoko ʼo te fakamau ʼae neʼe ina ʼuluaki tala. Neʼe hage ia neʼe manatu pe ia Sonasi kia ia, kaʼe tuku te hahaʼi. ʼE feala koa ke tou maʼu te taʼi manatu ʼaia? Kapau ʼe tou manatu pe kia tatou totonu, pea ʼe mole feala ke tou tokoni ki te hahaʼi. Ohage la, ʼe lagi kua lau ʼi taʼu tatatou tala te logo ʼae kua ovi mai te ʼaho ʼo Sehova. Kaʼe ʼi tatatou logo ki te ʼu manukinuki ʼa te hahaʼi ʼuhi ko te mole heʼeki hoko ʼo te ʼaho ʼaia, ʼe tou fakaʼamu koa ke vave mai la te ʼaho ʼo Sehova?—2 Pet. 3:3, 4, 9.

KOTEA ʼAE ʼE FEALA KE TOU FAI KE ʼAUA NAʼA TOU IITA KIA SEHOVA?

12, 13. Kotea ʼae ʼe tonu ke tou fai mo kapau ʼe tou lotolotolua ʼo ʼuhiga mo he fakatuʼutuʼu ʼa Sehova?

¹² Kotea ʼae ʼe tonu ke tou fai mo kapau ʼe tou lotolotolua ʼo ʼuhiga mo he fakatuʼutuʼu ʼa Sehova? Tou manatuʼi ʼe mole fakapotopoto te taʼi manatu ʼaia. Pea ʼe fakamanatuʼi mai ia Taaga Lea 19:3, ʼe ko he agavale hatatou tukugakoviʼi ia Sehova ʼuhi ko he ʼu fihifihia neʼe tupu ʼuhi ko tatou. Koia tou vakaʼi ia faʼahi ʼe nima ʼe tokoni mai anai ke ʼaua naʼa tou iita kia Sehova.

¹³ Tou fakamalohiʼi ʼatatou felogoʼi mo Sehova. Kapau ʼe malohi ʼatatou felogoʼi mo Sehova pea ʼe mole feala anai ke tou iita kia ia. (Lau ia Taaga Lea 3:5, 6.) ʼE ʼaoga ke tou falala kia Sehova. ʼAua naʼa tou fia popoto age peʼe tou fia maʼuhiga age ʼi te ʼAtua. (Taag. 3:7; Ekl. 7:16) Ko te faʼahiga manatu ʼaia ʼe tokoni mai anai ke ʼaua naʼa tou tukugakoviʼi ia ia moka hoko mai he ʼu faigataʼaia.

14, 15. Kotea ʼae ka tokoni mai anai ke tou tekeʼi te ʼu palalau fakalotovaivai?

¹⁴ Tou tekeʼi te ʼu palalau fakalotovaivai. ʼI te temi ʼo Moisese, neʼe lahi te ʼu tupuʼaga ke falala ai ia te kau Iselaele ʼe tokoni age anai ia Sehova ke natou ulu ki te Kele ʼo Te Fakapapau. (Pes. 78:43-53) Kaʼe ʼuhi ko te ʼu palalau fakalotovaivai ʼa te toko hogofulu malomu ʼo ʼuhiga mo te fenua, ʼe ui ʼi te Tohi-Tapu ko te kau Iselaele neʼe mole kei natou “manatui tona mafimafi,” neʼe natou galoʼi te ʼu gaue ʼae neʼe fakahoko e Sehova maʼa natou. (Pes. 78:42) ʼE malohi anai ʼatatou felogoʼi mo Sehova mo kapau ʼe tou metitasio ki te ʼu gaue neʼe ina fakahoko maʼa tatou. Pea ʼe tou tekeʼi anai te ʼu faʼahiga palalau ʼae ʼe feala ke ina fakamamaʼo tatou mai ia te ia.—Pes. 77:12, 13.

¹⁵ Kapau ʼe mole lelei tatatou manatu ʼo ʼuhiga mo ʼotatou tehina mo tuagaʼane pea ʼe toe feala ke ina fakamamaʼo tatou mai ia Sehova. (1 Soa. 4:20) Ohage la, neʼe muhumuhu te kau Iselaele ʼo ʼuhiga mo Alone ʼi te temi ʼae neʼe fakanofo ai ko te pelepitelo lahi, kaʼe kia Sehova neʼe muhumuhu natou ʼo ʼuhiga mo Ia. (Num. 17:10) Koia, kapau ʼe tou muhumuhu ʼo ʼuhiga mo natou ʼae ʼe fakanofo e Sehova ke natou takitaki tana gaue ʼi te kele, ʼi tona fakahagatonu ʼe tou muhumuhu ʼo ʼuhiga mo Sehova.—Hep. 13:7, 17.

16, 17. He ko ʼe mole tonu ke tou tukugakoviʼi ia Sehova ʼo ʼuhiga mo ʼotatou fihifihia?

¹⁶ ʼE mole ko Sehova ia te tupuʼaga ʼo ʼotatou fihifihia. ʼI te temi ʼo Esaia neʼe mole kei tauhi te kau Iselaele kia Sehova, kaʼe neʼe fia tokoni aipe kia natou. (Esa. 1:16-19) Ka tou tau mo he ʼu fihifihia ʼe fakalotofimalie tatatou iloʼi ʼae ko Sehova ʼe tokaga pea mo fia tokoni mai. (1 Pet. 5:7) Pea ʼe ina fakapapauʼi mai ʼe ina foaki mai anai te malohi ke tou nonofo agatonu kia te ia.—1 Ko. 10:13.

¹⁷ Logo la tana agatonu kia Sehova, kaʼe neʼe tau ia Sopo mo te ʼu mamahi. Ka tou mamahi, ʼe ʼaoga ke tou manatuʼi ʼe mole ko he ʼu mamahi ʼe haʼu mai ia Sehova. ʼE ui ʼi te Tohi-Tapu ʼe fehiʼa ia te ʼAtua ki te heʼe faitotonu pea ʼe ʼofa ia ki te faitotonu. (Pes. 33:5) ʼE tonu ke tou hage ko Eliu te kaumeʼa ʼo Sopo, ʼo tou mahino ai ʼe mole feala ke heʼe faitotonu peʼe agakovi ia Sehova. (Sopo 34:10) Ko Sehova ʼe ina foaki “te u kalasia lelei fuli pea mo te u meaofa lelei tukupau fuli.” Koia ʼe mole feala ia ke ina fakamamahiʼi tatou.—Sakp. 1:13, 17.

18, 19. He ko ʼe ʼe tonu ke tou falala tuʼumaʼu kia Sehova? Tuku mai he faʼifaʼitaki.

¹⁸ Tou falala tuʼumaʼu kia Sehova. Ko te ʼAtua ʼe haohaoa pea ko ʼana manatu ʼe maʼoluga age ia ʼi ʼa tatou. (Esa. 55:8, 9) Kapau ʼe tou agavaivai moʼoni pea ʼe tou fakamoʼoni anai ʼe mole tou mahino kia meʼa fuli. (Loma 9:20) ʼI te agamahani, ʼe mole tou mahino katoa ki he aluʼaga, pea ʼe tou fakamoʼoni ki te taʼaga lea ʼaeni: “Ko ia ae e uluaki palalau i te fakamaauaga e mata mooni, kae ka hau te fakafehagai, e toe sioi ia ia.”—Taag. 18:17.

¹⁹ Ohage la, kapau ʼe tou tokagaʼi kua kehe te aga ʼo hotatou kaumeʼa lelei, ʼe tou ui fakavilivili anai koa neʼe ina fai he meʼa ʼe kovi? Kailoa ia. Kaʼe ʼe tou ui anai ʼe mole tou mahino katoa ki te aluʼaga ʼae neʼe hoko. Kapau ʼe tou maʼu te taʼi manatu ʼofa ʼaia ʼo ʼuhiga mo te ʼu vaivaiʼaga ʼo ʼotatou kaumeʼa, pea ʼe mahino ia, ʼe tonu ke tou maʼu te manatu ʼaia ʼo ʼuhiga mo totatou Tamai ʼae ʼi selo. Koteʼuhi ʼe maʼoluga age ʼona ala pea mo ʼana manatu ʼi ʼa tatou.

20, 21. He ko ʼe mole tonu ke tou tukugakoviʼi ia Sehova ʼo ʼuhiga mo ʼotatou fihifihia?

²⁰ Tou tali ʼatatou hala. ʼE ʼaoga ke tou mahino ko ʼihi fihifihia ʼe tupu ʼuhi ko tatou totonu. (Kal. 6:7) Koia ʼe mole tonu ai ke tou tukugakoviʼi ia Sehova ʼo ʼuhiga mo te ʼu fihifihia ʼaia. Kotea tona tupuʼaga? Ohage la, kotea ʼe feala ke hoko mo kapau ʼe vave fau te lele ʼa he motoka ʼi he pikoga? ʼE feala ke he te motoka. ʼI takotou manatu, ʼe tonu koa ke tukugakoviʼi e ia ʼae neʼe ina taki te motoka ia te fale faʼu motoka? Kailoa ia. ʼO toe feia, neʼe foaki mai e Sehova te loto faʼitaliha. Kaʼe neʼe ina toe akoʼi tatou ke tou toʼo he ʼu tonu ʼe lelei. Koia ka tou fai he ʼu hala, ʼaua naʼa tou tukugakoviʼi ia Sehova.

²¹ Kaʼe ko ʼotatou fihifihia fuli ʼe mole tupu pe ʼuhi ko tatou totonu. Ko ʼihi neʼe hoko koteʼuhi ʼe fakalogo te ʼu meʼa fuli ki te temi pea mo ʼona femaliuliuʼaki. (Ekl. 9:11) Pea tahi, ʼaua naʼa galo kia tatou ko te tupuʼaga tafitō ʼo te agakovi ʼo te malamanei ʼe ko Satana te Tevolo. (1 Soa. 5:19; Apk. 12:9) Ko ia te fili, kaʼe mole ko Sehova.—1 Pet. 5:8.

TOU PUIPUI ʼATATOU FAʼAHIGA FELOGOʼI MO SEHOVA

22, 23. Ka tou lotovaivai ʼuhi ko ʼotatou fihifihia, kotea ʼe tonu ke tou manatuʼi?

²² Ka tou tau mo he ʼu fihifihia, tou manatuʼi te faʼifaʼitaki ʼo Sosue mo Kalepo. Neʼe fai e te toko hogofulu malomu te ʼu palalau fakalotovaivai ʼo ʼuhiga mo te Kele ʼo Te Fakapapau, kaʼe neʼe lelei ia te ʼu logo ʼae neʼe fakaha e Sosue mo Kalepo. (Num. 14:6-9) Neʼe nā falala kia Sehova, kaʼe neʼe maʼua ke nā maʼuʼuli mo te toe ʼo te kau Iselaele ʼi te toafa lolotoga taʼu ʼe 40. Neʼe muhumuhu pe neʼe iita koa ia Sosue mo Kalepo he neʼe mole tonu ke nā tuʼā? Kailoa ia. Neʼe falala naua ki te tonu ʼae neʼe fai e Sehova pea neʼe nā maʼu ai te tapuakina. Logo la ko te tokolahi ʼo te kau Iselaele neʼe natou mamate ʼi te toafa, kaʼe neʼe fakafealagia e Sehova kia Sosue mo Kalepo ke nā ulu ki te Kele ʼo Te Fakapapau. (Num. 14:30) ʼE toe feia anai, ʼe tapuakina anai e Sehova ia tatou mo kapau ʼe mole tou fiu ʼi te fai ʼo tona finegalo.—Kal. 6:9; Hep. 6:10.

²³ Ka tou lotovaivai ʼuhi ko he fihifihia, peʼe ʼuhi ko te ʼu vaivaiʼaga ʼo he tahi peʼe ʼo kita, kotea ʼae ʼe tonu ke tou fai? Tou manatuʼi ko Sehova ʼe ko he ʼAtua ʼofa ia. Tou fakakaukauʼi te ʼu tapuakina neʼe fakapapauʼi mai e Sehova. Tou fai te fehuʼi ʼaeni: “ ʼE feafeaʼi age la totatou maʼuli mo ka na pau la neʼe mole tou iloʼi ia Sehova?” Koia, tou pipiki maʼu kia Sehova pea ke ʼaua naʼa tou iita kia te ia.