Ke Fiafia Tokotou Loto ʼi Te ʼu Fakamanatu ʼa Sehova

1. (1) ʼE feafeaʼi te aga ʼa te hahaʼi moka fakamanatuʼi age he meʼa ke natou fai, pea kotea tona tupuʼaga? (2) ʼE feafeaʼi te manatu ʼa he tahi ʼe fiameʼalahi ʼo ʼuhiga mo he tokoni ʼe fai age?

ʼE KEHEKEHE te aga ʼa te hahaʼi moka fakatotonu age he meʼa ke natou fai. Kapau ko he tahi ʼe pule ʼe ina fakamanatuʼi mai he meʼa ke tou fai, pea ʼe lagi tou tali lelei anai, kaʼe kapau ʼe haʼu mai hotatou tatau peʼe mai he tahi ʼe malalo age, pea ʼe lagi tou meʼa noaʼi anai. ʼE toe kehekehe mo te ʼu meʼa ʼae ʼe tou logoʼi ʼi totatou loto moka fakatonutonuʼi tatou. ʼE lagi tou lotomamahi, peʼe mole tou leleiʼia, peʼe tou ufiufi. ʼI te tahi age faʼahi, ʼe lagi tou lotomalohi moʼo fakahoko ai ʼotatou maʼua. Kotea ʼae ʼe tupu ai te kehekehe ʼaia? Tupu tafitō ko te fiameʼalahi. ʼE moʼoni, ko he tahi ʼe fiameʼalahi, ʼe fakahalaʼi ai tana manatu, ʼo ina meʼa noaʼi te tokoni ʼae ʼe fai age, pea mole ina maʼu ai ni fua lelei.—Taag. 16:18.

2. He ko ʼe ʼe leleiʼia e te kau Kilisitiano moʼoni he tokoni ʼe haʼu mai te Folafola ʼa te ʼAtua?

² Kaʼe ki te kau Kilisitiano moʼoni, ʼe natou leleiʼia moka fai age he tokoni ʼaoga, tafitō la moka ʼe haʼu mai te Folafola ʼa te ʼAtua. ʼAki te ʼu fakamanatu ʼa Sehova, ʼe tou maʼu ai te fakasiosio poto, ʼe akoʼi ai tatou mo tokoni mai ke ʼaua naʼa tou to ki te ʼu hele ohage ko te fia maʼu koloa, te aga heʼe ʼaoga, pea mo te toloke peʼe ko te inu kava fakavale. (Taag. 20:1; 2 Ko. 7:1; 1 Tes. 4:3-5; 1 Tim. 6:6-11) Tahi ʼae, ʼe tou maʼu “te fiafia i [ʼotatou] loto” heʼe tou fakalogo ki te ʼu fakamanatu ʼa te ʼAtua.—Esa. 65:14.

3. Kotea te manatu ʼa te tagata faipesalemo ʼe lelei anai ke tou faʼifaʼitakiʼi?

³ Ke tou taupau ʼatatou felogoʼi maʼuhiga mo totatou Tamai ʼae ʼi selo, ʼe tonu ke tou haga maʼuliʼi te ʼu tokoni poto ʼa Sehova. ʼE lelei anai mo kapau ʼe tou manatu tahi mo te tagata faipesalemo, ʼae neʼe ina tohi fenei: “Kua liliu au pelesepeto [peʼe fakamanatu] ko toku tofiga o heegata, koteuhi ko te fiafiaaga natou o toku loto.” (Pes. 119:111) ʼE tou toe fiafia koa mo tatou ʼi te ʼu fakatotonu ʼa Sehova, peʼe hage koa ia ʼi ʼihi temi ko he kavega? Kapau la ʼi ʼihi lakaga neʼe tou iita ʼuhi ko he tokoni neʼe fai mai, ʼe mole tonu ke tou lotovaivai ai. Kaʼe ʼe feala ke tou falala malohi ki te poto ʼa te ʼAtua ʼae ʼe maʼoluga tokotahi. Tou vakaʼi faʼahi ʼe tolu ʼe feala ke tou fai.

FAKAMALOHI TAKOTOU FALALA ʼAKI TE FAIKOLE

4. Kotea te faʼahi ʼae neʼe mole fetogi ʼi te maʼuli ʼo Tavite?

⁴ Neʼe lahi te ʼu lakaga ʼi te maʼuli ʼo te Hau ko Tavite neʼe fiafia mo lotomamahi ai. Kaʼe neʼe ʼi ai te faʼahi neʼe mole fetogi, neʼe ko tana falala katoa ki tona Tupuʼaga. Neʼe ina ui fenei: “[Sehova]! E au hiki toku laumalie kia koe. Toku Atua! E au falala kia koe.” (Pes. 25:1, 2) Kotea ʼae neʼe tokoni kia Tavite ke feala hana falala katoa ki tana Tamai ʼae ʼi selo?

5, 6. Kotea ʼae ʼe ui mai ʼi te Folafola ʼa te ʼAtua ʼo ʼuhiga mo te felogoʼi ʼa Tavite pea mo Sehova?

⁵ Tokolahi te hahaʼi ʼe natou faikole pe ki te ʼAtua moka natou tau mo ni faigataʼaia. Kaʼe ʼe feafeaʼi la, mo kapau ʼe alu atu hokotou kaumeʼa peʼe ko hokotou kaiga ʼi te ʼu temi pe ʼae ʼe loto ai ki hana falā peʼe moka fia fai atu hana kole? ʼAki te temi, ʼe lagi kotou ui anai pe ʼofa moʼoni koa ia koutou. Kaʼe neʼe mole feia Tavite. Neʼe ha ʼi ʼana felogoʼi mo Sehova ia tana tui mo tona ʼofa ki te ʼAtua ʼi tona maʼuli, ʼi te ʼu temi lelei pea mo kovi.—Pes. 40:9.

⁶ Kotou tokagaʼi te fakavikiviki mo te fakafetaʼi ʼae neʼe fai e Tavite kia Sehova, ʼo ina ui fenei: “[Sehova], tomatou Aliki! E lelei lahi osi tou huafa i te kele katoa! Nee ke fakatuu tou afioaga i oluga o te atu lagi.” (Pes. 8:2) ʼE kotou tokagaʼi ai koa te felogoʼi lelei ʼa Tavite mo tana Tamai ʼae ʼi selo? Neʼe ko he fakafetaʼi ʼa Tavite ki te mafimafi mo te kololia ʼa te ʼAtua ʼae neʼe tupu ai tana vikiʼi ia Sehova ʼi te “aho fuli.”—Pes. 35:28.

7. Kotea te ʼu lelei ʼe tou maʼu ʼi tatatou fakaovi ki te ʼAtua ʼi te faikole?

⁷ Ohage ko Tavite, ʼe ʼaoga ke tou palalau tuʼumaʼu mo Sehova ke fakamalohi ai tatatou falala ʼae kia te ia. ʼE ui fenei ʼi te Tohi-Tapu: “Kotou fakaoviovi ki te Atua, pea e fakaoviovi atu anai ia kia koutou.” (Sakp. 4:8) Ko tatatou fakaovi ki te ʼAtua ʼi te faikole ʼe ko he tahi faʼahiga fai maʼuhiga ʼaia moʼo maʼu te laumalie maʼoniʼoni.—Lau ia 1 Soane 3:22.

8. He ko ʼe ʼe tonu ke ʼaua naʼa tatau tuʼumaʼu te ʼu palalau ʼae ʼe tou fai moka tou faikole?

⁸ Ka kotou faikole, ʼe tatau tuʼumaʼu pe koa te ʼu palalau ʼae ʼe kotou fai? Kapau koia, ʼi muʼa ʼo hakotou faikole, kotou toʼo he kiʼi temi moʼo fakakaukau ki te ʼu meʼa ʼae ʼe kotou fia ui. Kapau la ʼe tatau tuʼumaʼu pe te ʼu palalau ʼae ʼe kotou fai ki hokotou kaumeʼa peʼe ko hokotou kaiga, ʼe ina leleiʼia anai koa? ʼE lagi mole kei fia fagono atu anai. ʼE moʼoni, ko Sehova ʼe mole fakafisi ia ʼi he temi moka faikole fakamalotoloto age hana kaugana agatonu. Kaʼe ʼe lelei ke ʼaua naʼa tatau tuʼumaʼu te ʼu palalau ʼae ʼe tou fai moka tou faikole.

9, 10. (1) Kotea ʼae ʼe tou lava palalau ki ai ʼi ʼatatou faikole? (2) Kotea ʼae ʼe lava tokoni mai ke tou fakamalotoloto moka tou faikole?

⁹ ʼE mahino ia, ʼe loloto anai ʼatatou faikole mo kapau ʼe ko hotatou loto ke tou fakaovi ki te ʼAtua. Kapau ʼe tou avahi totatou loto kia Sehova, pea ʼe tou fakaovi ai kia te ia pea ʼe toe lahi ai mo tatatou falala kia te ia. Kaʼe kotea ʼae ʼe feala ke tou ui ʼi ʼatatou faikole? ʼE tali fenei ʼi te Folafola ʼa te ʼAtua: “Koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai.” (Filp. 4:6) ʼE feala ke tou palalau ʼi ʼatatou faikole ki he faʼahi pe ʼe pipiki ki ʼatatou felogoʼi mo te ʼAtua peʼe ki tatatou tauhi ʼae kia te ia.

¹⁰ ʼE lahi te ʼu meʼa ʼe tou ako moka tou vakaʼi te ʼu faikole ʼa ni tagata mo ni fafine agatonu neʼe tohi ʼi te Tohi-Tapu. (1 Sam. 1:10, 11; Gaue 4:24-31) ʼE maʼu ʼi te ʼu Pesalemo he ʼu faikole mo he ʼu hiva fakamalotoloto kia Sehova. ʼE maʼu ʼi te ʼu faikole mo te ʼu hiva ʼaia te ʼu meʼa ʼae ʼe lava logoʼi e he tahi, mai te lotomamahi ʼaupito ki te fiafia lahi. Ko te vakavakaʼi ia te ʼu palalau ʼaia neʼe fai e ni kau agatonu, ʼe lava tokoni mai ke tou momoli ni faikole ʼe loloto kia Sehova.

KOTOU METITASIO KI TE ʼU FAKAMANATU ʼA TE ʼATUA

11. He ko ʼe ʼe ʼaoga ke tou metitasio ki he ʼu fakatotonu mai te ʼAtua?

¹¹ Neʼe ui fenei e Tavite: “Ko te fakamanatu ʼa Sehova ʼe feala takita falala ki ai, heʼe ina fakaliliu ke poto ia ia ʼae ʼe heʼeki fakapotopoto.” (Pes. 19:7, MN) Koia, tatau aipe pe heʼeki tou fakapotopoto, kaʼe ʼe tou liliu anai ʼo popoto moka ʼe tou fakalogo ki te ʼu fakatotonu ʼa te ʼAtua. Kaʼe ʼe ʼi ai ʼihi fakatotonu Fakatohi-tapu ʼe maʼua ke tou metitasio ki ai ke fua lelei kia tatou. Ohage la ko tatatou nofo agatonu logo la te ʼu fakaneke ʼi te fale ako peʼe ʼi tatatou fale gaue, mo tatatou fakalogo ki te lao ʼa te ʼAtua ʼo ʼuhiga mo te toto, mo tatatou mole kau ki te ʼu meʼa fakapolitike, pea mo tatatou maʼuliʼi te ʼu pelesepeto ʼo ʼuhiga mo te faiteuteu mo te faʼu ʼo totatou lauʼulu. Kapau ʼe tou maʼu te manatu ʼa te ʼAtua ʼo ʼuhiga mo te ʼu faʼahi ʼaia, pea ʼe tou lava iloʼi fakatomuʼa anai te ʼu fihifihia ʼe feala ke hoko. ʼE feala ai leva ke tou fakatotonu ʼi totatou loto te aga ʼae ka tou fai moka hoko he aluʼaga feia. ʼE lahi anai te ʼu mamahi ʼe tou tekeʼi moka tou fakakaukau mo teuteu fakatomuʼa ki ai.—Taag. 15:28.

12. Kotea ʼae ʼe feala ke tou fakakaukau ki ai ke tokoni mai ke tou taupau ia te ʼu fakamanatu ʼa te ʼAtua?

¹² ʼI tatatou fakatalitali ki te fakahoko e te ʼAtua ʼana fakapapau, ʼe ha koa ʼi totatou maʼuli ʼe tou ʼalaʼala ʼi te faʼahi fakalaumalie? Ohage la, ʼe tou tui moʼoni koa kua vave fakaʼauha ia Papilone Lahi? Ko te ʼu tapuakina ʼi te ka haʼu, ohage la ko te maʼuli heʼe gata ʼi te palatiso ʼi te kele, ʼe kei moʼoni koa kia tatou ohage ko te temi ʼae neʼe tou kamata ako ai? ʼE kei tou faʼafai koa ʼi te minisitelio peʼe kua tou fakamuʼamuʼa ʼi totatou maʼuli te ʼu meʼa ʼae ʼe tou holi ki ai? ʼE kei maʼuhiga koa kia tatou te ʼamanaki ʼo te fakatuʼuake, te fakatapuha ʼo te huafa ʼo Sehova, pea mo te fakatonuhia ʼo tana pule faʼitaliha? Kapau ʼe tou metitasio ki te ʼu fehuʼi ʼaia, pea ʼe lava tokoni mai ke tou taupau ia te ʼu fakamanatu ʼa te ʼAtua ko hotatou tofiga ʼo heʼe gata, ohage ko tona ui e te tagata faipesalemo.—Pes. 119:111.

13. He ko ʼe neʼe faigataʼa ki te kau ʼuluaki Kilisitiano hanatou mahino ki ʼihi faʼahi? Kotou tuku mai he faʼifaʼitaki.

¹³ Ko ʼihi faʼahi ʼi te Tohi-Tapu ʼe lagi faigataʼa te mahino ki ai koteʼuhi heʼeki hoko te temi ʼae ke fakamahino e Sehova te ʼu faʼahi ʼaia. Neʼe fakaha tuʼa lahi e Sesu ki ʼana apositolo ʼe tonu anai ke mamahi pea mo matehi. (Lau ia Mateo 12:40; 16:21.) Kaʼe neʼe mole mahino te kau apositolo ki tona fakaʼuhiga. Neʼe natou mahino ki ai hili tana mate pea mo tona fakatuʼuake, ʼi tana kofuʼi te sino ʼi tagata, mo ha ki he ʼu tisipulo ʼe tokolahi, pea “nee ina avahi leva onatou atamai, ke natou mahino ki te Tohi tapu.” (Luka 24:44-46; Gaue 1:3) Pea ʼo toe feia pe, ʼi te temi ʼae neʼe maʼu e te ʼu tisipulo ʼa Kilisito te laumalie maʼoniʼoni ʼi te Penikosite ʼo te taʼu 33 H.T.S.,a neʼe natou mahino ai leva neʼe tonu ke fakatuʼu te Puleʼaga ʼa te ʼAtua ʼi selo.—Gaue 1:6-8.

14. ʼI te taʼu 1914, kotea te faʼifaʼitaki lelei neʼe tuku e te ʼu tehina ʼe tokolahi logo la tanatou mahino hala ʼo ʼuhiga mo te ʼu ʼaho fakamuli?

¹⁴ Pea ʼi totatou temi, neʼe lahi te ʼu ʼamanaki ʼa te kau Kilisitiano moʼoni ʼo ʼuhiga mo “te u aho fakamuli” neʼe to noa. (2 Tim. 3:1) Ohage la, ʼi te taʼu 1914, neʼe manatu e ʼihi kua ovi pe tanatou hake ʼae ki selo. ʼI te mole hoko ʼo te faʼahi ʼaia, neʼe natou toe vakavakaʼi loloto ai te Tohi-Tapu, ʼo natou mahino ai ʼe tonu muʼa ke fakahoko he gaue faifakamafola ʼe lahi. (Mko. 13:10) Pea ʼi te taʼu 1922, ko J. F. Rutherford, ʼae neʼe ina takitaki te gaue faifakamafola ʼi te temi ʼaia, neʼe ina ui fenei kia natou ʼae neʼe kau ki te fakatahi fakamalamanei neʼe fai ʼi Cedar Point, ʼi Ohio, ʼi Amelika: “Kotou fakatokagaʼi, te Hau ʼe ʼafio! Ko koutou ko tana hahaʼi lagolago. Kotou tala, kotou tala, kotou tala te Hau pea mo tona puleʼaga.” Talu mai ai, kua iloʼi lelei te ʼu kaugana ʼa Sehova ʼi totatou temi ʼuhi ko tanatou tala “te logo lelei o te puleaga.”—Mat. 4:23; 24:14.

15. Kotea te ʼu fua lelei ʼe tou maʼu ʼi tatatou metitasio ki te aga ʼa te ʼAtua ki tana hahaʼi?

¹⁵ Ka tou metitasio ki te fakaofoofo ʼo te aga ʼa Sehova ki tana hahaʼi, ʼi te temi muʼa mo te temi ʼaeni, ʼe tuputupu ai tatatou falala ʼae ki tana lava fakahoko ia tona finegalo pea mo tana fakatuʼutuʼu ki te ka haʼu. Pea ʼe tokoni mai te ʼu fakamanatu ʼa te ʼAtua ke tou manatuʼi mo taupau ʼi totatou loto ʼana lea fakapolofeta ʼae ʼe heʼeki hoko. ʼE tou lava tui papau, kapau ʼe tou metitasio ki te ʼu faʼahi ʼaia pea ʼe tokoni mai anai ke tou fakamalohi tatatou falala ʼae ki ʼana fakapapau.

FAKAMALOHI TAKOTOU FALALA ʼAKI NI GAUE FAKALAUMALIE

16. Kotea te ʼu tapuakina ʼe tou maʼu moka ʼe tou maʼumaʼua ʼi te minisitelio?

¹⁶ Ko Sehova totatou ʼAtua ʼe ko he ʼAtua malohi mo faʼa gaue. Neʼe ui fenei e te tagata faipesalemo: “Ko ai e mafimafi o hage ko koe, oi [Sah]? . . . E malohi tou alofi nima, e maoluga tou nima matau.” (Pes. 89:9, 14) ʼO mulimuli ki ai, ʼe leleiʼia e Sehova pea mo ina tapuakina ʼatatou faiga ʼae ke tou fakahoko te ʼu gaue ʼo te Puleʼaga. ʼE ina tokagaʼi ko ʼana kaugana, tagata mo fafine, fanau mo matutuʼa, ʼe mole natou fakafifimalie pe pea mo kai ki “te pane o te piko.” (Taag. 31:27) ʼE tou faʼifaʼitakiʼi totatou Tupuʼaga, ʼo tou maʼumaʼua ʼi te ʼu gaue fakateokalatike. ʼE tou fiafia ʼi tatatou tauhi ki te ʼAtua ʼaki totatou loto katoa, pea ʼe fiafia ai Sehova ʼi tana tapuakina tatatou minisitelio.—Lau ia Pesalemo 62:13.

17, 18. He ko ʼe ko te ʼu gaue ʼae ʼe tou fai ʼuhi ko tatatou tui ʼe fakamalohi ai tatatou falala ki te ʼu fakatotonu ʼa Sehova? Kotou tuku mai he faʼifaʼitaki.

¹⁷ ʼE lava tokoni feafeaʼi mai te ʼu gaue fakalaumalie ke fakamalohi ai tatatou falala kia Sehova? Tou vakaʼi te meʼa ʼae neʼe hoko ki te kau Iselaele ʼi tanatou ulu ki te Kele ʼo Te Fakapapau. Neʼe fakatotonu e Sehova ki te kau pelepitelo ʼae neʼe natou ʼamo te ʼaleka ʼo te fuakava, ke natou haʼele mo ulu ki te Vai Tafe ʼo Solotane. Kaʼe ʼi te fakaovi ʼa te hahaʼi ki te vai tafe, neʼe feala ke natou tokagaʼi te fakalaka maumau ʼo te ʼu vai, ʼuhi ko te ʼu ʼua ʼo te fasiga taʼu matalā. Kotea ʼae ka fai e te kau Iselaele? ʼE natou fakatuʼu anai koa he nofoʼaga ʼi te kauvai ʼo fakatalitali ke hifo te vai tafe? Kailoa ia. Neʼe natou falala katoa kia Sehova pea natou mulimuli ki ʼana fakatotonu. Kotea ʼae neʼe hoko? ʼE ui fenei ʼi te Tohi-Tapu: “I te temi nee kaku ai ki te Solotane te kau tagata faisakilifisio ae nee natou amo te aleka, pea nee palapala onatou vae i te kauvai, nee tuu leva te u vai ae nee tafe mai mua . . . Nee fakalaka leva te hahai i te Solotane i mua o Seliko. Nee tutuu leva te u tagata faisakilifisio ae nee natou amo te aleka o te fakapapau o [Sehova] i te kele moamoa, i te lotomalie o te Solotane.” (Sos. 3:12-17) Kotou fakakaukauʼi te lotomalohi neʼe lagi natou maʼu ʼi tanatou sio ʼae ki te taʼofi ʼo te ʼu vai! Neʼe toe malohi age te tui ʼa te kau Iselaele kia Sehova he neʼe natou fakalogo ki ʼana fakatotonu.

¹⁸ ʼE moʼoni, ʼe mole fakahoko e Sehova ni milakulo feia maʼa tana hahaʼi ia ʼaho nei, kaʼe ʼe mahino ia ʼe ina tapuakina ʼanatou gaue ʼuhi ko tanatou tui. Ko te malohi gaue ʼa te ʼAtua ʼe ina fakamalohi natou ke natou fakamafola te logo ʼo te Puleʼaga ʼi te kele katoa. Pea ko Sesu Kilisito, te Fakamoʼoni lahi ʼa Sehova, neʼe ina fakapapau ki ʼana tisipulo ʼe tokoni anai kia natou ʼi te gaue maʼuhiga ʼaia. Neʼe ina ui fenei: “Koutou olo, kotou fai ni tisipulo i te u puleaga fuli . . . e au fakatahi mo koutou i te aho fuli, o kaku ki te fakaosi o te malamanei.” (Mat. 28:19, 20) Tokolahi te kau Fakamoʼoni neʼe lagi ufiufi peʼe matataku, kaʼe kua feala ke natou fakamoʼoni neʼe foaki age e te laumalie maʼoniʼoni ʼa te ʼAtua te lototoʼa ʼae ke natou palalau ki ni hahaʼi ʼe mole natou iloʼi ʼi te faifakamafola.—Lau ia Pesalemo 119:46; 2 Kolinito 4:7.

¹⁹ Ko ʼihi tehina mo tuagaʼane kua mahahaki peʼe kua matutuʼa, ʼo mole feala ai hanatou gaue lahi ʼi te tauhi ki te ʼAtua. Kaʼe ʼe feala ke natou tui papau ko “te Tamai o te manavaofa fuli pea mo te Atua o te fakafimalie fuli” ʼe mahino ki ʼonatou aluʼaga. (2 Ko. 1:3) ʼE maʼuhiga kia te ia te ʼu gaue fuli ʼae ʼe tou fai moʼo lagolago ki te Puleʼaga. ʼE ʼaoga ke tou manatuʼi fuli, ʼe fakalogo tafitō totatou haofaki ki tatatou tui ki te sakilifisio faitotogi ʼa Kilisito.—Hep. 10:39.

²⁰ ʼE kau ki tatatou tauhi te fakaʼaogaʼi lahi ʼo totatou temi, mo totatou malohi pea mo ʼatatou koloa ʼo mulimuli ki ʼotatou fealagia. ʼE tou loto moʼoni ke tou fai te gaue faifakamafola. (2 Tim. 4:5) ʼE tou fiafia ʼi te gaue ʼaia heʼe tokoni ai ki ʼihi ke natou “kaku ki te iloi katoa o te mooni.” (1 Tim. 2:4) ʼE ha mai ai, ko tatatou fakaʼapaʼapa mo fakavikiviki kia Sehova, ʼe tou maʼu lahi ai ni koloa fakalaumalie. (Taag. 10:22) Pea ʼe tokoni mai ke tou maʼu he falala ʼe malohi ki totatou Tupuʼaga.—Loma 8:35-39.

²¹ Ohage ko tatatou vakaʼi, ʼe tonu ke tou faiga lahi ke tou falala ai ki te takitaki poto ʼa Sehova. Koia, kotou falala kia Sehova ʼaki te faikole. Kotou metitasio pe neʼe fakahoko feafeaʼi e Sehova ʼana fakapapau ʼi te temi muʼa, ʼo toe feia pe anai ʼi te ka haʼu. Pea kotou haga fakamalohi takotou falala kia Sehova ʼaki ni gaue fakalaumalie. ʼEi, ʼe heʼe gata te ʼu fakamanatu ʼa Sehova. Kapau ʼe kotou mulimuli ki ai, pea ʼe feala anai hakotou maʼuʼuli ʼo heʼe gata!