“Kotou Gaue Ohage He ʼu Kaugana Kia Sehova”

1. Kotou fakamahino pe kotea te kehekehe ʼo te manatu ʼa te tokolahi ki te ʼuhiga kaugana pea mo ʼae ʼe talanoa ki ai ia Loma 12:11, MN.

KO TE ʼuhiga kaugana ki te ʼAtua, ʼe kehe ia mo te ʼuhiga kaugana ʼae ʼe manatu ki ai te tokolahi. ʼI tanatou manatu, ko he kaugana ʼe ko he tahi ʼe gaohi koviʼi, mo puleʼi fakamalohi. Kaʼe ʼe talanoa ia te Folafola ʼa te ʼAtua ki he kaugana ʼe tauhi ki he Pule ʼofa ʼaki te lotolelei. Koia ʼi te temi ʼae neʼe ui ai e te apositolo ko Paulo ki te kau ʼuluaki Kilisitiano ke natou “kaugana kia Sehova,” neʼe ina fakalotomalohiʼi natou ke natou fai ki te ʼAtua he tauhi taputapu ʼaki te ʼofa. (Loma 12:11, MN) Kotea ʼae ʼe tonu ke fai e he kaugana? Kotea ʼae ʼe tonu ke tou fai ke ʼaua naʼa fakapopulaʼi tatou e Satana mo tona malama? Pea kotea te ʼu fakapale ʼae ʼe tou maʼu moka tou tauhi kia Sehova ohage ko he ʼu kaugana agatonu?

“E AU OFA KI TOKU PULE”

2. (1) Kotea ʼae neʼe ina uga he tagata kaugana Iselaele ke ʼaua naʼa mavae mai tona pule? (2) Kotea te fakaʼuhiga ʼo te puhi ʼo te taliga ʼo he tagata kaugana?

² ʼE tou iloʼi pe kotea te faʼahiga tauhi ʼae ʼe fakamaʼua mai e Sehova kia tatou ʼaki te Lao ʼae neʼe ina foaki age ki Iselaele. Neʼe fakatotonu ai ke fakaʼateaina te tagata kaugana Hepeleo ʼi te fitu taʼu ʼo tana nofo popula. (Eke. 21:2) Kaʼe neʼe fai e Sehova he fakatuʼutuʼu lelei maʼa natou ʼae neʼe mole fia mavae mai tonatou pule koteʼuhi neʼe natou ʼoʼofa ai. Neʼe tonu ke fakaovi e te pule tana tagata kaugana ki te muʼa matapa, peʼe ki te kaumatapa, pea mo puhi tona taliga ʼaki he hui. (Eke. 21:5, 6) Neʼe ʼi ai tona fakaʼuhiga maʼuhiga. ʼI te lea Fakahepeleo, ko te kupu talagafua ʼe pipiki ki te fagono pea mo te logo. Koia neʼe fakaha ai e te kaugana ʼaia tana loto ʼae ke ina hoko atu tana fakalogo pea mo tana gaue ki tona pule. ʼAki te aluʼaga ʼaia, ʼe tou mahino ai, ka tou foaki ia tatou totonu kia Sehova, ʼe tou fakaha ai ʼe tou ʼofa ki te ʼAtua pea mo tou lotolelei ke tou fakalogo kia te ia.

3. Kotea te tupuʼaga tafitō ʼo tatatou foaki totatou maʼuli ki te ʼAtua?

³ ʼI muʼa ʼo tatatou papitema, neʼe kua tou fakatotonu ke tou tauhi kia Sehova ohage ko hana kaugana. Neʼe tou fakapapau ai ʼe tou fakalogo anai kia Sehova pea mo fai tona finegalo. Neʼe mole fakakinauʼi tatou e he tahi ke tou fai te tonu ʼaia. Maʼiape la mo te kau tupulaga, ʼe natou papitema ʼi tanatou ʼosi fai takitokotahi te tonu ʼaia, kaʼe mole ʼuhi pe ko tanatou fia fakafiafiaʼi te loto ʼo ʼanatou matuʼā. Ko te tupuʼaga tafitō ʼo tatatou foaki ia totatou maʼuli kia Sehova ʼe ko tatatou ʼofa ki totatou Pule ʼae ʼi selo, ia Sehova. Neʼe tohi fenei e te apositolo ko Soane: “Koeni te ofa ki te Atua, ko te fai o ana fakatotonu.”—1 Soa. 5:3.

ʼE TOU ʼATEAINA KAʼE ʼE TOU KAUGANA

4. Kotea ʼae ʼe tonu ke tou fai ke tou liliu ai “o popula ki te faitotonu”?

⁴ ʼE tou loto fakafetaʼi kia Sehova he neʼe ina foaki mai te fealagia ʼae ke tou tauhi kia te ia ohage ko hana kaugana. ʼE feala ke tou ʼateaina mai te popula ki te agahala mo kapau ʼe tou tui ki te sakilifisio faitotogi ʼa Kilisito. Tatau aipe pe kei tou agahala, neʼe tou lotolelei ke puleʼi tatou e Sehova mo Sesu. Neʼe fakamahino lelei e Paulo ia te faʼahi ʼaia ʼi tana tohi fenei: “Ke kotou sio kia koutou, kua kotou mamate mooni ki te agahala, pea kua kotou mauli ki te Atua ia Sesu-Kilisito.” Kaʼe neʼe ina toe fai te fakatokaga ʼaeni: “Pe e mole kotou iloi kapau kua koutou tuku koutou ke koutou tauhi ki he tahi o fakalogo kia ia, e kotou popula kia ia e koutou fakalogo ki ai: Pee ki te agahala ae e ina taki ki te mate, pee ki te fakalogo ae e ina taki ki te faitotonu? Kae ke tuku te u fakafetai ki te Atua, koteuhi, i te osi o takotou popula ki te agahala, kua kotou fakalogo [ʼaki] te loto ki te lekula o te akonaki ae nee tuku atu kia koutou. Kua osi koutou i te fakaateainai mai te agahala, kua kotou liliu o popula ki te faitotonu.” (Loma 6:11, 16-18) Kotou tokagaʼi ʼi heni ʼe talanoa ia te apositolo ʼe tonu ke tou fakalogo ʼaki te loto. Koia la ʼae ʼe tou liliu ai “o popula ki te faitotonu” moka tou foaki totatou maʼuli kia Sehova.

5. Kotea ʼae ʼe tonu ke tou tauʼi, pea kotea tona tupuʼaga?

⁵ Kaʼe ʼe mahino ia, ʼe ʼi ai te ʼu fihifihia ʼe tonu ke tou tauʼi moʼo fakahoko te fakapapau ʼaia neʼe tou fai ki te ʼAtua. Ko faʼahi ʼe lua ʼe tonu ke tou tauʼi. ʼUluaki, ʼe ko te faʼahi ʼae neʼe talanoa ki ai ia Paulo, ʼi tana tohi fenei: “I te takele o toku loto, e au fakafiafia i te lao a te Atua; kae e au sio i oku kogasino ki he tahi age lao ae e tau fakafehagai ki te lao o toku atamai, pea e ina fakapopulai au i te lao o te agahala ae e nofo i oku kogasino.” (Loma 7:22, 23) ʼE toe feia mo tatou, ʼe tou agahala. Koia ʼae ʼe tonu ai ke tou tauʼi tuʼumaʼu te ʼu holi kovi ʼo totatou kakano agahala. Neʼe foaki mai e te apositolo ko Petelo te fakalotomalohi ʼaeni: “Koutou fai outou mauli o hage ko he hahai ateaina, aua naa koutou fakaʼaoga te ateaina ko he kie moʼo uʼufi aki autou gaue kovi, kae koutou gaue o hage ko he u kaugana a te Atua.”—1 Pet. 2:16, Tauhi Foou.

6, 7. ʼE faiga feafeaʼi e Satana ke leleiʼia e te hahaʼi tona malama?

⁶ Ko te lua faʼahi ʼae ʼe tonu ke tou tauʼi, ʼe ko te malama ʼaeni ʼe puleʼi e te kau temonio. Ko Satana, te pule ʼo te malamanei, ʼe ina ʼohofi tatou heʼe ina fia maumauʼi tatatou agatonu kia Sehova pea mo Sesu. ʼE ina loto ke ina fakapopulaʼi tatou ʼo ina fakaneke tatou ke tou kau ki tona malama. (Lau ia Efeso 6:11, 12.) ʼE toe faigaʼi e Satana ke tou leleiʼia tona malama. Neʼe fai e te apositolo ko Soane te fakatokaga ʼaeni: “Kapau e ofa he tahi ki te malamanei, e mole nofo te ofa o te Tamai ia ia; koteuhi ko te u mea fuli ae e mau i te malamanei, te u holi o te kakano, mo te manumanu o te u mata, pea mo te fiamealahi o te mauli, e mole hau mai te Tamai, kae hau mai te malamanei.”—1 Soa. 2:15, 16.

⁷ Ko te fia maʼu koloa ʼe ko he holi malohi ʼo te malama. ʼE fakaneke e Satana te hahaʼi ke natou manatu ko te fiafia ʼe haʼu mai te paʼaga. ʼE laga te ʼatu fale koloa lalahi. ʼE uga te hahaʼi ke natou maʼu he faʼahiga maʼuli ʼe fakamaʼuhigaʼi ai te ʼu koloa pea mo te ʼu fakafiafia. ʼI te ʼu pilo vakalele, ʼe fakatuʼutuʼu he ʼu folau ki he ʼu koga meʼa matalelei mo he ʼu hahaʼi ʼe natou maʼu te faʼahiga sio ʼa te malama. ʼE moʼoni, ʼe uga tatou e te hahaʼi ke tou hikihiki totatou faʼahiga maʼuli, kaʼe ʼo mulimuli ki te faʼahiga manatu ʼa te malama.

8, 9. Kotea te faʼahi ʼe feala ke fakatupu kovi kia tatou, pea kotea tona tupuʼaga?

⁸ ʼI tana talanoa kia natou ʼae neʼe natou maʼu te faʼahiga manatu ʼa te malama, ʼi te ʼuluaki kokelekasio Fakakilisitiano, neʼe fai ai e Petelo te fakatokaga ʼaeni: “E natou mau tonatou fiafia i te fakahoko fakahaha o onatou holi kovi; ko ni tagata maimoa mo uli natou; e natou fiafia i anatou kaka, o kau i akotou kaitahi fakatautehina. I ni palalau fiamealahi mo loi, e natou kakaai aki te u holi o te kakano mo te u aga fakalialia natou ae nee hoki mavae pe mai te u tagata ae e mauli hehe; e natou fakapapau kia natou te ʼateaina kae ko natou totonu ae e popula ki ni agafakalialia, koteuhi e tahi popula te tagata ki te mea ae kua pule kia ia.”—2 Pet. 2:13, 18, 19.

⁹ ʼE mole ʼateaina he tahi ʼuhi ko tana lava maʼu te ʼu meʼa ʼae ʼe “manumanu” ki ai ʼona mata. Kaʼe ʼe liliu ai ko he tagata popula ki te pule fakapulipuli ʼo te malama, ia Satana te Tevolo. (1 Soa. 5:19) ʼE fakatupu kovi kia tatou te fia maʼu koloa, heʼe feala ke tou popula ki ai pea ʼe faigataʼa te hao mai ai.

KO HE GAUE ʼE KOTOU MAʼU AI TE FIAFIA

10, 11. Ko ai ʼae ʼe ʼohofi tafitō e Satana ia ʼaho nei, pea kotea ʼae ʼe feala ke faigataʼa kia natou ʼae ʼe fia olo ki te ʼu fale ako lalahi?

¹⁰ Ohage ko tona fai ʼi Eteni, ʼe toe ʼohofi e Satana ia ʼaho nei ia natou ʼae ʼe heʼeki fakapotopoto, tafitō la te kau tupulaga. ʼE ita ia Satana ʼi tana sio ki he tupulaga, peʼe ko he tahi age, ʼe fia kaugana kia Sehova. Kaʼe ʼe ina loto ke liakī e natou ʼae neʼe natou foaki tonatou maʼuli kia Sehova ia tanatou tauhi pea mo tanatou agatonu kia te ia.

¹¹ Tou toe vakaʼi te faʼifaʼitaki ʼo te tagata kaugana ʼae neʼe ina tali ke puhi tona taliga. ʼE mahino ia, neʼe mamahi, kaʼe neʼe puli vave te mamahi ʼaia ʼo ina maʼu ai leva te fakaʼiloga ʼo tona ʼuhiga kaugana. ʼO toe feia mo he tupulaga, ʼe feala ke faigataʼa ki ai tana filifili he faʼahiga maʼuli ʼe mole tatau mo ʼae ʼo ʼona kaumeʼa. ʼE fakamafola e Satana te manatu ʼae ʼe lava maʼu e he tahi te fiafia moka maʼu hana gaue lelei ʼi te malama ʼaeni. Kaʼe ʼe iloʼi e te kau Kilisitiano ʼe tonu muʼa ke natou tokagaʼi te ʼu meʼa ʼae ʼe ʼaoga kia natou ʼi te faʼahi fakalaumalie. Neʼe akoʼi mai e Sesu te manatu ʼaeni: “Fiafia ia natou ʼae ʼe natou iloʼi tonatou masiva fakalaumalie.” (Mat. 5:3, MN) Neʼe foaki e te kau Kilisitiano tonatou maʼuli ki te ʼAtua moʼo fai tona finegalo, kaʼe mole ko ʼae ʼa Satana. ʼE natou maʼu tonatou fiafia ʼi te lao ʼa Sehova pea mo metitasio ki ai ʼi te ʼaho mo te po. (Lau ia Pesalemo 1:1-3.) Kaʼe ʼi te agamahani, ʼe faigataʼa ki he kaugana ʼa Sehova ʼe fia alu ki te ʼu fale ako lalahi, hana maʼu he temi moʼo tauhi ki te ʼAtua pea mo metitasio ki tana Folafola.

12. Kotea te tonu ʼae ʼe maʼua ke fai e te kau tupulaga ia ʼaho nei?

¹² ʼI te temi ʼo te kau ʼuluaki Kilisitiano, neʼe feala ke kinakina te maʼuli ʼo he tagata kaugana Kilisitiano ʼuhi ko tona pule. ʼI tana ʼuluaki tohi ki te kau Kolinito, neʼe ui fenei e Paulo: “Nee paui koe kae kei ke kaugana, aua naa ke tuania ki ai; kae kapau e feala tau ateaina, too te faigamalie aia.” (1 Ko. 7:21) Kapau neʼe feala, pea neʼe lelei age ke natou filifili te ʼateaina. Ia ʼaho nei, kua lahi te ʼu fenua ʼae ʼe fakamaʼua ai ki te tamaliki ke natou ako. Ki muli age, ʼe tonu ke fai e te tamaliki ako te tonu ʼae ke natou hoko atu tanatou ako peʼe kailoa. Kaʼe kapau ʼe natou hoko atu tanatou ako moʼo maʼu hanatou gaue lelei ʼi te malama ʼaeni, pea ʼe natou liakī ai te fealagia ʼae ke natou pionie temi katoa.—Lau ia 1 Kolinito 7:23.

TE ʼU AKO LALAHI PEA MO TE AKO ʼAE ʼE LELEI TOKOTAHI

13. Kotea te ako ʼae ʼe fua lelei anai ki te ʼu kaugana ʼa Sehova?

¹³ Neʼe fai e Paulo te fakatokaga ʼaeni ki te kau Kilisitiano ʼo Kolose: “Koutou tokaga naa hele koutou e he tahi aki te filosofia pea mo he kaka alunoa, o falala ki te talatisio a te u tagata, pea ki te u malohi fakalaumalie o te malamanei, kae mole kei fai kia Kilisito.” (Kol. 2:8) Ko “te filosofia” pea mo te ʼu akonaki kakā ʼaia, ʼae ʼe mulimuli “ki te talatisio a te u tagata,” ʼe ha ʼi te ʼu faʼahiga manatu ʼae ʼe fakamaʼuhigaʼi e te hahaʼi popoto ʼo te temi nei. Kaʼe ʼaki te ʼu faʼahiga ako ʼaia, ʼe mole ina teuteuʼi ai te kau ako ke natou tauʼi te ʼu fihifihia ʼo te maʼuli. ʼE kehe ia mo te ʼu kaugana ʼa Sehova, heʼe natou filifili he ʼu ako ʼae ʼe tokoni anai kia natou ke natou taupau tonatou maʼuli pea mo tauhi ki te ʼAtua. ʼE natou mulimuli ki te tokoni ʼaeni neʼe fai e Paulo kia Timoteo: “Io e mooni ko he matapuna koloa lahi te lotu kia ia ae e fakafiafia i te mea e ina mau; koia kapau e tou mau te meakai mo te mealaofi, pea e tou feauga anai i ai.” (1 Tim. 6:6, 8) Ki te kau Kilisitiano moʼoni, ʼe mole maʼuhiga te maʼu ʼo he ʼu pepa lalahi. Kaʼe, ʼe natou faiga ke natou faiva ʼi te gaue faifakamafola ke natou maʼu ai ʼanatou “tohi fakamooni,” te hahaʼi ʼae neʼe natou tokoni ki ai ke liliu ko ni tisipulo ʼa Sesu.—Lau ia 2 Kolinito 3:1-3.

14. Ohage ko tona ha mai ia Filipe 3:8, neʼe kotea te manatu ʼa Paulo ʼo ʼuhiga mo tana pilivilesio ʼae ke kaugana ki te ʼAtua pea mo Kilisito?

¹⁴ Tou fakakaukauʼi te faʼifaʼitaki ʼa te apositolo ko Paulo. Neʼe akoʼi ia ia e te tagata faiako ʼo te Lao Fakasutea ko Kamaliele. ʼE feala ke fakatatau te ako ʼaia ki ʼae ʼe fai ʼi te ʼu univelesite ia ʼaho nei. Kaʼe neʼe kotea te manatu ʼa Paulo ʼo ʼuhiga mo te faʼahi ʼaia pea mo te pilivilesio ʼae ke kaugana ki te ʼAtua pea mo Kilisito? Neʼe ina tohi fenei: “Pea kua au sio foki ki te u mea fuli o hage ko he puli noa uhi ko te mauhiga o te iloi o Sesu-Kilisito toku Aliki, ae kua au fakafisi ai ki te u mea fuli.” Pea neʼe ina toe ui fenei: “Pea e au sio ki te u mea aena o hage ko he pela, koteuhi ke mau ia Kilisito.” (Filp. 3:8) ʼE feala ke tokoni te ʼu palalau ʼaia, ki te kau tupulaga Kilisitiano pea mo ʼanatou matuʼā, ke natou fai he tonu fakapotopoto ʼo ʼuhiga mo te ako fakamalama. (Vakaʼi te ʼu pakī.)

TE ʼU LELEI ʼE HAʼU MAI TE AKO FAKAʼATUA

15, 16. Kotea te ako ʼae ʼe fai e te kautahi ʼa Sehova, pea kotea tana fakatuʼutuʼu tafitō?

¹⁵ Kotea te faʼahiga manatu ʼae ʼe akoʼi ʼi te ʼu fale ako lalahi ʼo te malama ʼaeni? ʼE mahino ia, ʼi ʼihi temi ʼe uga ai ia te kau ako ke natou fakafeagai ki te kau takitaki fakapolitike pea mo fakasosiale. (Efe. 2:2) Kaʼe ʼe mole feia te ako ʼae ʼe fai e te kautahi ʼa Sehova ʼi te ʼu kokelekasio Fakakilisitiano ʼae ʼe maʼu ai te tokalelei. ʼI te vahaʼa fuli, ʼe feala ke tou maʼu takitokotahi he ʼu lelei mai te Ako Fakateokalatike. Pea ʼe toe feala ke kau ia te ʼu tehina pionie selipatea ki te Ako Tohi-Tapu ʼo Te ʼu Tehina Selipatea pea ko te ʼu taumatuʼa pionie ʼe feala ke natou kau ki te Ako Tohi-Tapu ʼo Te ʼu Taumatuʼa Kilisitiano. ʼE tokoni mai te ako fakateokalatike ʼaia ke tou fakalogo kia Sehova, totatou Pule ʼae ʼi selo.

¹⁶ ʼE tou lava maʼu te tahi ʼu koloa fakalaumalie ʼi te Index des publications de la Société Watch Tower peʼe ko te CD-ROM. Ko te fakatuʼutuʼu tafitō ʼo te faʼahiga ako ʼaia ke lelei age tatatou atolasio kia Sehova. ʼE akoʼi mai ai ke tou tokoni ki te hahaʼi ke natou fakatokatoka mo te ʼAtua. (2 Ko. 5:20) Pea ki muli age, ko natou ʼaia ʼe natou akoʼi anai ki ʼihi atu.—2 Tim. 2:2.

TE FAKAPALE ʼO TE TAGATA KAUGANA

17. Kotea te ʼu fakapale ʼe tou maʼu ʼi tatatou kau ki te ako ʼae ʼe lelei tokotahi?

¹⁷ ʼI te lea fakatata ʼa Sesu ʼo ʼuhiga mo te ʼu taleta, neʼe vikiʼi e te pule ʼana tagata kaugana agatonu ʼe lua ʼuhi ko tanā gaue. Neʼe ko he meʼa fakafiafia kia natou pea neʼe toe hinoʼi naua e te pule ki ʼihi atu gaue. (Lau ia Mateo 25:21, 23.) ʼE tou maʼu anai te fiafia pea mo he ʼu fakapale moka tou filifili te faʼahiga ako ʼae ʼe lelei tokotahi. Tou fakakaukauʼi muʼa te faʼifaʼitaki ʼo Michael. Neʼe lelei ʼosi ʼona nota, koia neʼe fakaafe ia ia e tana kau faiako ki he fono moʼo uga ia ia ke hoko atu tana ako ʼi te univelesite. Kaʼe neʼe natou punamaʼuli koteʼuhi neʼe filifili e Michael he faʼahiga ako ʼe mole loaloaga, ke feala hana taupau tona maʼuli pea mo pionie katoa ai. ʼE ina logoʼi nei koa neʼe mole lelei te tonu ʼaia? ʼE ina ui fenei: “Ko te ako fakateokalatike ʼae neʼe au kau ai ʼi toku ʼuhiga pionie pea mo tagata ʼafeā, ʼe ko he faʼahi maʼuhiga ʼaupito. Ko te ʼu tapuakina pea mo te ʼu pilivilesio neʼe au maʼu ai ʼe maʼuhiga age ʼi te paʼaga ʼae neʼe feala ke au maʼu. ʼE au fiafia ʼosi he neʼe mole au filifili ke au kau ki he ʼu ako lalahi.”

18. He ko ʼe ʼe tonu ke tou filifili te ako ʼae ʼe lelei tokotahi?

¹⁸ ʼAki te ako ʼae ʼe lelei tokotahi ʼe tou mahino ai ki te finegalo ʼo te ʼAtua pea ʼe tokoni mai ke tou kaugana kia Sehova. ʼE tou maʼu ai leva te fealagia ʼae ke tou ʼateaina “mai te popula o te pala” pea ke tou maʼu “te ateaina o te u foha a te Atua i te kololia.” (Loma 8:21) Kaʼe ʼe akoʼi tafitō mai kia tatou ke tou fakaha tatatou ʼofa moʼoni kia Sehova, ia totatou Pule ʼae ʼi selo.—Eke. 21:5.