ʼE Feala Koa Ke Toe Lahi Age Takotou Fakatokaga Te Hahaʼi?

ʼI te kamata ʼo te ʼu taʼu 1900, neʼe fai ai te ʼata ʼe higoa ko te A Trip Down Market Street (Mamata ʼi Te Ala ʼo Market Street) pea neʼe leleiʼia e te hahaʼi te ʼata ʼaia heʼe fakahaha ai te aluʼaga ʼo te maʼuli ʼi San Francisco, ʼi Amelika. Neʼe fakapipiki leva e te hahaʼi faiʼata ia he kamela ʼi te taumuʼa ʼo te kiʼi ka moʼo puke te ʼu meʼa ʼae neʼe hoko ʼi te ala ʼaia. Neʼe ha ai te ʼu saliote ʼe toho e ni hosi, mo te ʼu ʼuluaki motoka ʼo te temi muʼa mo te ʼu hahaʼi ʼe faikoloa pea mo te ʼu hahaʼi ʼe natou fakatau te ʼu sulunale.

Ko te faʼahi ʼae neʼe fakaʼofaʼofa ai te ʼata ʼaia he neʼe lagi ko tona puke ʼi Apelili 1906, ʼi muʼa pe ʼo te hoko ʼo te mafuike mo te vela ʼi te ʼaho 18 ʼo Apelili ʼae neʼe mateā ai te toko tolu afe tupu hahaʼi pea mo teitei pe ko te potu ʼaia ʼo te kolo neʼe maumau. Ko ʼihi ia natou ʼae neʼe ʼasi ʼi te ʼata ʼaia neʼe lagi kei toe pe ʼonatou kiʼi ʼaho ke natou maʼuʼuli ai. Ko Scott Miles ʼae ʼe kau ki te famili ʼo te tahi ia natou ʼae neʼe natou fai te ʼata, ʼe ina ui fenei: “ ʼI taku sio ki te hahaʼi ʼaia neʼe mole natou iloʼi pe la te tuʼutamaki ʼae ka hoko kia natou. Pea ʼi meʼa fakaʼofaʼofa foki.”

ʼE feala ke fakatatau te aluʼaga ʼaia ki totatou temi. ʼE tou toe fakaʼofaʼofa ki te hahaʼi. Koteʼuhi ʼe tokakaga pe natou ʼo fakahoko ʼanatou gaue ʼae ʼi te ʼaho fuli, kaʼe ʼe mole pe la natou lavelaveʼia te fakaʼauha ʼae kua vave hoko ki te tuʼu ʼo te ʼu faʼahiga meʼa ʼaeni pea mo tonatou faʼahiga maʼuli. Kaʼe ʼe kehekehe anai ia mo te mafuike, koteʼuhi ʼe kei maʼu pe te faiga malie ke tou fakatokaga ai ki te hahaʼi ʼo ʼuhiga mo te ʼaho ʼo te fakamau ʼa Sehova. ʼE mahino ia, kua kotou fakatuʼutuʼu he kiʼi temi pe ʼi te vahaʼa fuli ke kotou faifakamafola ai ʼi te ʼu ʼapi, kaʼe ʼe feala koa ke toe lahi age takotou fakatokaga te hahaʼi?

NEʼE GAUE TUʼUMAʼU IA SESU

ʼE ko he faʼifaʼitaki maʼuhiga neʼe tuku e Sesu ʼo ʼuhiga mo tana gaue tuʼumaʼu. Neʼe faifakamafola ia ki te hahaʼi fuli neʼe fetaulaki mo ia, tatau aipe pe ko he tagata tanaki tukuhau ʼe fakalaka ʼi te ʼala peʼe ko te fafine ʼae neʼe fetaulaki mo ia ʼi te vai keli lolotoga te temi manavā. (Luka 19:1-5; Soa. 4:5-10, 21-24) Maʼia pe la mo te temi ʼae neʼe tonu ke malolō ai, neʼe tuku e Sesu tana fakatuʼutuʼu ʼaia kaʼe ina akoʼi te hahaʼi. Neʼe faʼafai ia Sesu ʼi te faifakamafola ʼuhi ko tana manavaʼofa ki te hahaʼi. (Mko. 6:30-34) Ia ʼaho nei, ko ʼihi ʼe natou mulimuli ki te manatu ʼa Sesu ʼo ʼuhiga mo te maʼuhiga ʼo te temi. ʼO feafeaʼi?

ʼE NĀ KUMI TE ʼU FAIGA MALIE FULI

Ko Melika ʼe nofo ia ʼi he fale fata ʼe faigataʼa te ulu ki ai. Ko ʼona vahaʼa fale, ʼe ko te kau ako matapule pea tokolahi ia natou ʼe natou fakaʼaogaʼi te ʼu numelo telefoni ʼe mole tuʼu ʼi te kaupepa faitelefoni, pea maʼia mo ʼonatou higoa ʼe mole tuʼu ʼi te lisi ʼae ʼi te huʼaga. Koia ʼe ina leleiʼia te faiga malie ʼae kua ina maʼu ke kamata faipalalau ai mo natou ki te Tohi-Tapu ʼi te huʼaga pea mo te meʼa hake laufata. ʼE ina ui fenei: “Kua feala pe ke au ui ʼe ko taku telituale.” ʼE feʼaluʼaki tuʼumaʼu ia Melika mo te ʼu tohi fakatohi-tapu ʼi te ʼu lea kehekehe, pea tokolahi ʼe natou tali te ʼu pepa lotu pea mo te ʼu nusipepa. ʼE ina toe fakaha kia natou ia tatatou tuʼasila jw.org ʼae ʼi te Neti. Pea kua lahi mo te ʼu ako Tohi-Tapu neʼe ina kamata.

Pea ko Sonia kua nofo teuteu pe ia ke faifakamafola ki he tahi ʼe felaveʼi mo ia. ʼE gaue ʼi te fale mahaki, pea neʼe ina fai tana fakatuʼutuʼu ke faifakamafola ki ʼona kauga gaue. ʼUluaki, neʼe ina toʼo he temi ke ina iloʼi te ʼu meʼa ʼae ʼe ʼaoga kia natou pea mo ʼae ʼe natou leleiʼia. ʼOsi ʼaia, neʼe ina fakaʼaogaʼi tona temi kai ke palalau ai mo natou ki te Tohi-Tapu. Pea ki muli age, neʼe kamata leva e Sonia te ʼu ako Tohi-Tapu ʼe lua. Neʼe ina toe fakatuʼutuʼu ke ina fakaʼaogaʼi ʼihi temi manavā, ke nofo ʼi te huʼaga ʼo te fale mahaki moʼo palalau kia natou ʼae ʼe fakatalitali ki te toketa.

KOTOU FAKAʼAOGAʼI TE ʼU FAIGA MALIE FULI

Ko te tagata neʼe hao ʼi te mafuike ʼo te taʼu 1906 ʼe ina ui fenei: “Ko te hoki hoko ʼae te tuʼutamaki fakamataku feia ʼi te kolo.” Kaʼe, ko te ʼu tuʼutamaki fuli ʼe mole anai hona fakatatau mo te ʼaho lagavaka ʼae ka hoko kia “natou e mole natou iloi te Atua.” (2 Tes. 1:8) ʼE loto ʼaupito ia Sehova ke fetogi e te hahaʼi tanatou faʼahiga manatu mo tonatou loto. Pea ke natou fakalogo ki te ʼu fakatokaga ʼae ʼe tala e tana kau Fakamoʼoni.—2 Pet. 3:9; Apk. 14:6, 7.

ʼE tou maʼu te toe pilivilesio lahi ʼaeni, ke tou fakamalamaʼi te hahaʼi ʼo ʼuhiga mo te ʼu temi faigataʼa ʼaeni. ʼO tou tokoni kia natou ke natou maliu mai te ʼu meʼa ʼae ʼe natou maʼumaʼua ki ai pea ke natou kumi ia Sehova. (Sofo. 2:2, 3) ʼE feala koa hakotou fakaʼaogaʼi te ʼu faiga malie fuli moʼo faifakamafola ai ki ʼokotou kauga gaue, mo ʼokotou vahaʼa fale, pea mo natou ʼae ʼe kotou felaveʼi mo natou ʼi te ʼu aluʼaga fuli ʼo tokotou maʼuli? ʼE kotou faiga anai koa ke lahi age takotou fakatokaga ia te hahaʼi?