Ko Te Paʼaga ʼe Ko Te Matapuna Koa ʼAia ʼo Te Fiafia Moʼoni?
NEʼE tupu ia Sonia ʼi Sepania. ʼI tana kei veliveli, neʼe kau ki te ʼu fono ʼa te kau Fakamoʼoni ʼa Sehova mo tana faʼē. Kae ʼi tana lahilahi ake, neʼe ʼalu leva ʼo maʼuli ʼi Lonitoni ʼi Pilitānia, pea neʼe kamata gāue ai ʼi te sōsiete dʼinvestissement.
Neʼe leleiʼia e Sonia tana gāue. Neʼe maʼu paʼaga lahi pea neʼe tokaga ia ki te ʼu toe paʼaga ʼa te ʼu hahaʼi ʼaē neʼe gāue ki ai. Neʼe ko he gāue fakafiafia kiā ia pea neʼe lelei ʼaupitō tana gāue. Neʼe teitei pē ke gāue ia Sonia iā hola e 18 ʼi te ʼaho, pea ʼi ʼihi pō neʼe moe pē iā kiʼi hola e tolu peʼe fā. Neʼe maʼuli pē ki tana gāue. Pea fokifā pē neʼe hoko te toe fetogi lahi ʼi tona maʼuli. Neʼe mahaki kovi—lagi tupu mai tona maʼuli hoha tuʼumaʼu. Neʼe ko tona taʼu 30 pē ʼaia.
Neʼe palalisia ia Sonia ʼi tona faʼahi kātoa ʼo tona sino, pea neʼe mole ʼiloʼi papau e te kau tōketā peʼe toe lava palalau anai ia Sonia. Neʼe folau mai aipē tana faʼē ki Pilitānia moʼona taupau. ʼAki leva te kua kamata haʼele ʼa Sonia, neʼe ʼui fēnei age e tana faʼē: “ ʼE au ʼalu ki te fono ʼo te kōkelekāsio, pea ʼe ke haʼu anai mo au koteʼuhi ʼe mole au lava tuku tokotahi ia koe.” Neʼe tali e Sonia ke nā ʼolo. Koteā te meʼa ʼaē neʼe hoko?
ʼE manatuʼi e Sonia: “Neʼe moʼoni te ʼu meʼa fuli ʼaē neʼe au logo kiai. Neʼe ko he meʼa fakaofoofo. Neʼe au tali fakafiafia ke fai haku ako Fakatohi-tapu mo he tahi iā nātou ʼaē neʼe fakamālo mai kiā au ʼi taku ʼuluaki hū ki te Fale ʼo Te Puleʼaga. Neʼe mole kei ʼomai leva toku ʼu feʼilo ʼi muʼa atu, kae ko toku ʼu kaumeʼa foʼou ʼaē neʼe lotoʼofa pea mo lototokaga.”
Neʼe māmālie pē pea neʼe toe lava palalau ia Sonia, pea neʼe vave mo tana tuputupu fakalaumālie. Neʼe mole pē lā hili kiai he taʼu pea neʼe papitema. Tokolahi ʼo tona ʼu kaumeʼa foʼou neʼe gāue temi kātoa ʼi te fai fakamafola, pea neʼe ina tokagaʼi tonatou fiafia ʼi tanatou gāue ʼaia. Neʼe manatu fēnei ia Sonia: ‘ ʼE au fia hagē ko nātou. ʼE au fia foaki te meʼa ʼaē ʼe lelei ʼaupitō ʼe au maʼu maʼa Sehova ʼAtua!’ ʼI te temi nei, kua gāue temi kātoa ia Sonia ʼi te fai fakamafola.
Koteā ʼaē neʼe tāʼofi e Sonia mai te meʼa ʼaē neʼe hoko ki ai ʼi tona maʼuli? “Logolā neʼe lahi te paʼaga neʼe au maʼu, kae ʼuhi ko te hoha pea mo te fakaapeapelua ʼo te gāue neʼe au maʼuli tuʼania ai pea neʼe mole au fiafia. Kua mahino kiā au ko te meʼa ʼaē ʼe maʼuhiga ʼaupitō ʼi te maʼuli, ʼe ko taku maʼu ia he felōgoi lelei mo taku Tamai ʼi selō, ia Sehova. ʼI te temi nei kua au fiafia moʼoni.”
Neʼe tohi fēnei e te ʼapositolo ko Paulo: “Ko te manako ki te paʼaga ʼe ko te aka ʼaia ʼo te ʼu meʼa kovi fuli, . . . ko ʼihi, ʼi tanatou fakaʼamu ki te holi ʼaia, neʼe natou hē ʼo mamaʼo ʼi te tui pea mo natou fehukiʼaki ia nātou totonu ʼaki te ʼu mamahi lahi.” (1 Timoteo 6:10) ʼE feala ke fakamoʼoni e Sonia ki te totonu ʼo te ʼu palalau ʼaia.