Te ʼu Tali Ki Te ʼu Fehuʼi Fakatohi-tapu

Ko te Tohi-Tapu ʼe ko te Folafola moʼoni koa ʼa te ʼAtua?

Kapau ko te Tohi-Tapu, ʼe ko te Folafola ʼa te ʼAtua, ʼe lagi kotou manatu ʼe tonu ke makehe. Pea ʼe makehe koteʼuhi ko Tohi-Tapu ʼe lau ʼi miliale neʼe ta ia lea ʼe lau ʼi teau. Ko te poto ʼae ʼe haʼu mai te Tohi-Tapu, ʼe ina lava fetogi te maʼuli ʼo te hahaʼi ke lelei age.—Lau ia 1 Tesalonika 2:13; 2 Timoteo 3:16.

ʼE tou tui papau, ʼe haʼu ia te Tohi-Tapu mai te ʼAtua koteʼuhi ʼe moʼoni ʼana fakakikite ʼo ʼuhiga mo te ka haʼu. ʼE mole feala ki te tagata ke ina fai ia te faʼahi ʼaia. Ohage la ko te hiki ʼo te tohi ʼo Esaia, ʼae neʼe maʼu ʼi te ʼana neʼe tuʼu ovi ki te Tai Mate. Neʼe tohi hili ki ai taʼu ʼe teau ʼi muʼa ʼo te tupu ʼa Sesu. Neʼe ina fakakikite ʼe tuʼu lavaki anai ia te kolo ko Papilone. Pea neʼe hoko moʼoni ia te faʼahi ʼaia hili ki ai ni taʼu ki te temi ʼo Sesu.—Lau ia Esaia 13:19, 20; 2 Petelo 1:20, 21.

Neʼe tohi feafeaʼi ia te Tohi-Tapu?

Neʼe tohi ia te Tohi-Tapu lolotoga taʼu ʼe 1 600 tupu. Neʼe ko tagata faitohi ʼe teitei toko 40, pea neʼe natou mulimuli ki te manatu ʼe tahi. Neʼe lava feafeaʼi ia te faʼahi ʼaia? Neʼe takitaki e te ʼAtua ia tanatou gaue.—Lau ia 2 Samuele 23:2.

ʼI ʼihi temi, ka palalau te ʼAtua ki te ʼu tagata faitohi ʼo te Tohi-Tapu, neʼe ina fakaʼaogaʼi he ʼu ʼaselo peʼe ko he ʼu meʼa ʼe ha, peʼe ko he ʼu moemisi. ʼI te agamahani, ʼe ʼai e Sehova ʼana manatu ki te fakakaukau ʼa te tagata faitohi pea mo tuku ki ai ke ina filifili ia te ʼu kupu moʼo fakaha ia te logo ʼa te ʼAtua.—Lau ia Apokalipisi 1:1; 21:3-5.