Kotea ʼae ʼe tui ki ai te kau Fakamoʼoni ʼa Sehova?

ʼE tui ia te kau Fakamoʼoni ʼa Sehova “e hau te Tohi tapu katoa mai te tuku manava a te Atua, pea e aoga ia.” (2 Timoteo 3:16) ʼE natou fakaʼaogaʼi ia te Tohi-Tapu ko he takitaki ke natou ako ai ʼo ʼuhiga mo te Tupuʼaga pea ke ʼi ai he ʼuhiga ʼo tonatou maʼuli.

ʼE ui fenei ʼi te Tohi-Tapu: “Ke natou iloi ko koe toko tahi ae e higoa ko [Sehova], ko koe ko te Maoluga i te kele katoa!” (Pesalemo 83:19) Koia, ʼe natou tauhi pe kia Sehova ʼAtua pea ʼi tonatou ʼuhiga Fakamoʼoni ʼe natou faiga fakamalotoloto ke iloʼi ia tona huafa.—Esaia 43:10-12.

ʼI tonatou ʼuhiga Kilisitiano, ʼe natou tui ko Sesu, “te Alo o te Atua,”a neʼe haʼu ki te kele pea neʼe liliu ko te Mesia. (Soane 1:34, 41; 4:25, 26) Hili tona mate, neʼe fakatuʼuake ia Sesu ki te lagi. (1 Kolinito 15:3, 4) Ki muli age, neʼe ko te Hau ʼo te Puleʼaga ʼo te ʼAtua. (Apokalipisi 11:15) Ko te Puleʼaga ʼaia ʼe ko he puleʼaga moʼoni ʼae ka ina fakatuʼu anai te Palatiso ʼi te kele. (Taniela 2:44) ʼE ui fenei ʼi te Tohi-Tapu: “E mau e te kau masiva te fenua, pea e natou fiafia lahi i te tokalelei.”—Pesalemo 37:11, 29.

ʼE tui te kau Fakamoʼoni ʼa Sehova ko te ʼu pelesepeto ʼo te Tohi-Tapu ʼe ʼaoga ki te hahaʼi ʼo toe feia pe ia ʼaho nei. (Esaia 48:17, 18) Koia ʼae ʼe natou fakaʼapaʼapa ai ki te ʼu pelesepeto ʼaia. Ohage la, ʼe mole natou suluka peʼe fakaʼaoga te toloke koteʼuhi ʼe fakatokaga mai ʼi te Tohi-Tapu ke tekeʼi ia te ʼu aga ʼae ʼe ina ʼulihi ʼonatou ʼatamai pea mo ʼonatou sino. (2 Kolinito 7:1) ʼE natou toe tekeʼi ia te ʼu aga ʼae ʼe tapuʼi mai ʼi te Tohi-Tapu, ohage la ko te inu kava fakavale, mo te aga heʼe ʼaoga pea mo te kaihaʼa.—1 Kolinito 6:9-11.