Te ʼu Tagata Heka Hosi ʼe Toko Fa. Pea Mo Tona Fakaʼuhiga Kia Koe

ʼE logoaʼa te lele ʼa te ʼu hosi. Pea ʼe ko he hisitolia fakaofoofo ʼi te Tohi-Tapu he ʼe talanoa ai ki te ʼu hosi ʼe fa pea mo te ʼu tagata ʼe heheka ai. Ko te ʼuluaki hosi ʼe hina pea ʼe maʼu e te tagata ʼae ʼe heka ai te kololia, ʼe ko he hau neʼe hoki fakanofo. ʼE muli mai ai te hosi ʼe lanu kula pea ʼe toʼo e te tagata ʼae ʼe heka ai te tokalelei mai te kele katoa. Pea ʼe toe muli mai te tolu hosi ʼae ʼe lanu ʼuli. Ko ia ʼae ʼe heka ai ʼe ina toʼo ʼi tona nima te meʼa fua ohage ko he logo fakamamahi ʼe fakaha ai te hoge. Ko te fa hosi ʼe lau tetea, ʼe ina ʼaumai te mahaki pea mo ʼihi atu aluʼaga ʼe tupu ai te mate. Ko ia ʼae ʼe heka ʼi te hosi ʼe ko te Mate. Pea ko te Faitoka, te maloloʼaga ʼo te kau mate, ʼe mole makona ia ʼi he temi.​​—Fakaha 6:​1-8.

“ ʼI taku ʼuluaki lau te hisitolia ʼo te ʼu tagata heka hosi ʼe toko fa, neʼe au mataku. Neʼe au ui kua hoko mai te ʼAho ʼo te Fakamau pea kapau ʼe heʼeki au tokalelei ki ai, ʼe mole au hao anai.”​—Crystal.

“Neʼe au fia iloʼi meʼa fuli ʼo ʼuhiga mo te ʼu tagata heka hosi ʼae ʼi te ʼu hosi lanu kehekehe. ʼI taku mahino leva ki te fakaʼuhiga ʼo te ʼu meʼa ʼaia neʼe ha, neʼe ʼi ai tona ʼuhiga moʼoni kia au.”​—Ed.

ʼE ke hage koa ko Crystal peʼe ko Ed? Ko te hisitolia ʼo te ʼu tagata heka hosi ʼaia ʼe toko fa ʼae ʼe tuʼu ʼi te tohi ʼo Fakaha, ʼe iloʼi e te hahaʼi. ʼE ke iloʼi koa ʼe feala ke ke maʼu he ʼu fua lelei mo kapau ʼe ke mahino ki te hisitolia ʼaia? ʼO feafeaʼi? ʼAki tau lau, mo ako pea mo maʼuliʼi te ʼu meʼa ʼae ʼe tohi ʼi te tohi fakapolofeta ʼaia. Kotea tona tupuʼaga? He ʼe ke maʼu anai te fiafia moʼoni, ohage ko tona fakapapau e te ʼAtua.​​—Fakaha 1:​1-3.

Ko ʼihi ʼe natou matataku moka natou lau te ʼu meʼa ʼae neʼe ha ʼo ʼuhiga mo te ʼu tagata heka hosi ʼe toko fa. Kaʼe, neʼe mole fakatuʼutuʼu te hisitolia ʼaia moʼo fakamatakuʼi ʼo koe. Neʼe tokagaʼi e te toko lauʼi miliona hahaʼi ko te ʼu meʼa ʼaia neʼe ha, neʼe fakamalohiʼi ai tanatou tui pea neʼe natou maʼu ai he ʼamanaki ki te ka haʼu. Pea ʼe feala ke toe malave feia kia koe. Koia, ʼe matou fakalotomalohiʼi ia koe ke ke lau te hisitolia.