Ko He Meʼa Gāue Moʼo Fakahā Te ʼAtamai Mālama Fakaʼatua
1 Neʼe poto te ʼapositolo ko Paulo ʼi te fai palalau mo te hahaʼi ʼaki te ʼatamai mālama fakaʼatua. Ia Gaue 17:17, ʼe ʼui fēnei ai “nee feleu i te sinakoka mo te kau sutea, . . . pea mo natou ae nee ina mau i te malae fakapuleaga i te aho fuape.” Neʼe faitohi ki te kau Kolonito ʼo ina ʼui, ko tanatou ʼu mahafu fakalaumālie neʼe “mālohi ʼuhi ko te ʼAtua [MN],” ʼo feala ai ki te kau Kilisitiano ke nātou ‘holoʼi te ʼu manatu pea mo te ʼu meʼa fialahi fuli ʼaē ʼe fakatuʼu ʼo fakafeagai ki te ʼatamai mālama ʼo te ʼAtua.’—2 Ko. 10:4, 5.
2 Mo tatou foki, ʼe ʼi ai tatatou ʼatamai mālama, ʼe ina faka fealagia mai ke tou fai palalau mo te hahaʼi fuli ʼaē ʼe tou felāveʼi mo nātou ʼi totatou minisitelio. Ohage ko Paulo, ʼe tou felāveʼi mo he ʼu hahaʼi ʼe kehekehe tanatou ʼu lotu, mo tanatou ʼu filosofia, mo tanatou ʼu ʼamanaki, pea mo tanatou ʼu manatu. Neʼe fakaafe nātou e Paulo ke nātou fakakaukau, pea ʼe feala mo tatou ke tou fai te faʼahi ʼaia.
3 Tou Fakaʼaogaʼi Te Kaupepa Te ʼu Tokoni Ki Te ʼu Fai Palalau Faka Tohi-Tapu: Ko totatou kaupepa foʼou ʼaia ʼe tokoni mai anai ke tou loto falala mokā tou fai palalau mo te hahaʼi. ʼE maʼu ai he ʼu manatu moʼo tokoni ki te hahaʼi ke nātou fakakaukau pea mo fai he ʼu tonu ʼe fakapotopoto. Koia, ʼe feala anai hatatou fai palalau mo te hahaʼi tatau aipe pe neʼe feafeaʼi tanatou ako pe ko tanatou faʼahiga maʼuli. Ohage la, kapau ʼe fai atu he ʼu fehuʼi ʼo ʼuhiga mo te ʼifeli pe ko te tauhi ʼaē kia Malia, pea ʼe feala anai ke koutou ʼui fēnei: “Mole heʼeki faʼa fualoa, neʼe ʼau lau he tohi ʼo ʼuhiga mo te faʼahi ʼaia, pea ʼe ʼau fia fakahā atu te manatu ʼaē neʼe ʼau maʼu ai.” ʼOsi ʼaia, pea ʼe feala ke tou toʼo te kaupepa pea mo tou hoko atu tatatou fai palalau ʼo fakatafito kiai. ʼAki te kaupepa ʼaia, ʼe faigafua anai tatatou fai palalau ki he fehuʼi pe ʼe fai mai e te hahaʼi. Kapau ʼe tou ʼave tuʼumaʼu te kaupepa ʼaia ke tou fakaʼaogaʼi ʼi te minisitelio, pea ʼe tou “teuteu [anai] ki te gaue lelei fuape.”—2 Tim. 3:17.
4 ʼE Maʼuhiga Ke Tou Fai Palalau Mo Te Hahaʼi: ʼE mole tonu ke gata ʼaki pe tatatou fai faka mafola ki te hahaʼi; kae ʼe tonu ke tou fai palalau mo nātou ke nātou mahino pe koʼe ʼe maʼuhiga tatatou logo, mo ʼaoga kia nātou, pea ʼe feafeaʼi tona lave ki tonatou maʼuli takitokotahi. Moʼo fai fakalelei te faʼahi ʼaia, ʼe tonu ke faigafua tatatou fai palalau mo te hahaʼi, ke nātou fia logo ki te Logo ʼo te Puleʼaga. ʼE lava lelei anai totatou minisitelio mo kapau ʼe tou faiga ke tou agalelei pea mo fakamalotoloto ʼi tatatou fai palalau moʼo tokoni ki te hahaʼi ke nātou ʼiloʼi te moʼoni. Kapau ʼe tou fakamāmāhani mo te kaupepa, pea ʼe tou lava fai anai te faʼahi ʼaia.
5 Neʼe ʼiloʼi e Sesu te ʼu meʼa ʼaē neʼe ʼaoga ki te hahaʼi ʼi te faʼahi fakalaumālie, pea neʼe ina foaki age kia nātou. ʼE tonu ke tou lotomālohi moʼo fai te faʼahi ʼaia. ʼUhi ko tana faiga ki te ʼu koloā fakamālama pea mo tana mole fia fai ki te ʼu meʼa fakalaumālie, kua hēʼia te fakakaukau ʼa te tagata, ʼo fakaʼofaʼofa ai tona ʼatamai, mo tona loto, pea mo tona maʼuli fakasino. (1 Tim. 6:9) ʼE feala ke tou tokoni ki te hahaʼi mo kapau ʼe tou fakaʼaogaʼi te kaupepa Te ʼu Fai Palalau Faka Tohi-Tapu, ʼaē ʼe tokoni mai kia tatou ke tou fai palalau ki te ʼu akonaki faka lotu māhani.
6 Tou Tali Ki Te ʼu Fehuʼi ʼAē ʼe Fai e Te Hahaʼi: Ohage la, kapau ʼe ʼui atu e he tahi, “ ʼE mole koutou faka tui koutou kia Malia.” ʼAua naʼa koutou fakaʼaogaʼi ai he manatu pe ko he vaega neʼe koutou fakaʼaogaʼi ʼi muʼa atu, kae ʼe lelei age hakotou ʼui age ki te tagata ʼaia, ʼe koutou fia fakahā age ki ai he meʼa neʼe koutou lau ʼi he tohi ʼo ʼuhiga mo te faʼahi ʼaia. Koutou toʼo te kaupepa mai tokotou kato, pea koutou fuli age te pasina 15, ʼi te kupu “Malia.” ʼI takotou fakasiosio fakavilivili ki te ʼu kupu tāfito ʼo te kapite ʼaia, ʼe koutou tuʼu anai ʼi te fehuʼi ʼaē ʼe lagaʼi ʼi te pasina 16, “Neʼe kei nofo taupoʼou koa ia Malia ʼi te temi ʼaē neʼe ina fānauʼi ai Sesu?” heʼe pipiki te faʼahi ʼaia ki te fehuʼi ʼaē neʼe fai atu. ʼE feala pe hakotou lau te ʼu palakalafe ʼo te kaupepa.
7 ʼI takotou ʼosi fai palalau, ʼe feala hakotou fuli age ki te fakaʼosi ʼo te kapite ʼo ʼuhiga mo “Malia.” ʼE koutou maʼu ai anai te kupu maʼuhiga ʼaenī, “Kapau ʼe ʼui atu e he tahi.” Ko te palakalafe ʼo te pasina 22 ʼaē ʼe ʼui fēnei ai “ ʼE mole koutou faka tui ki te taupoʼou ko Malia” ʼe pipiki fakahagatonu ki te fehuʼi ʼaē neʼe fai atu. Koutou tāʼofi ai peʼe feafeaʼi anai takotou fai palalau mokā toe fai atu anai te fehuʼi ʼaia kia koutou.
8 ʼE toe tokoni mai foki te kaupepa ke tou kamata he ʼu fai palalau. ʼI te vāhaʼa fuli ʼi muʼa ʼo takotou ʼolo ʼo fai faka mafola, koutou faiga ke koutou toe vakaʼi he puani e tahi peʼe lua ʼi te kupu “Te ʼu ʼUluaki Palalau ki te fai faka mafola” (ʼi te pasina 5). Koutou fakaʼaogaʼi te ʼu faʼifaʼitaki kehekehe ʼaia ʼi te fai faka mafola. Koutou fetogi ʼo mulimuli pe ki te manatu ʼaē ʼe koutou palalau kiai pea mo te hahaʼi ʼo te telituale. Mole tuai, pea ʼe koutou fakatokagaʼi anai kua faigafua takotou kamata he ʼu fai palalau.
9 ʼE tou loto ke malave tatatou ʼu palalau ki te loto ʼo te hahaʼi. Kapau ʼe tou palalau fakamalotoloto pea mo tou agalelei kia nātou, pea ʼe tou lava fai anai te faʼahi ʼaia. ʼE ʼui fēnei ia Tāʼaga Lea 16:24: “Ko he ʼu palalau lelei ʼe ko he meli ʼe mālie ki te nefesi pea ʼe ko he faitoʼo ki te ʼu hui.” ʼAki tatatou kaupepa ʼaia, ʼe feala anai ke tou faiva ʼi te fakahā ʼo te logo lelei ʼo te Puleʼaga pea ke fia logo te hahaʼi, ʼo feala ai ki te hahaʼi ʼaē ʼe faitotonu tonatou loto ke nātou tafoki mai ki te moʼoni.