Koutou Poto ʼi Te Palalau Mo Te Hahaʼi
1 Ko te “poto ʼi te palalau” ʼe ko he “fai palalau mo he tahi ke ina fetogi ai tana ʼu aga pea mo tana ʼu manatu.” Moʼo hikihiki tokotou minisitelio, ʼe ʼaoga ke koutou poto ʼi te palalau mo te hahaʼi ʼaē ʼe felāveʼi mo koutou. (Gaue 17:2-4) Kae ʼe lava feafeaʼi hakotou maʼu te poto ʼaia?
2 ʼE Kamata ʼAki Te Metitasio: Ka koutou ako te ʼu moʼoni ʼo te Tohi-Tapu, ʼe koutou fakatokagaʼi anai te ʼaoga ʼaē ke koutou fakakaukauʼi te meʼa ʼaē ʼe koutou ako. Kapau ʼe ʼi ai he ʼu manatu ʼe faigataʼa kia koutou, pea koutou toʼo he temi moʼo fai he ʼu kumi pea mo metitasio ki te ʼu tali. Koutou faiga ke koutou mahino lelei ki te ʼu fakamahino ʼaē ʼe foaki atu, pea ke koutou mahino ki te ʼu vaega faka Tohi-Tapu ʼaē ʼe fakamoʼoni ki te ʼu fakamahino ʼaia.
3 Koutou Teuteuʼi Takotou Minisitelio: Koutou fakakaukauʼi peʼe feafeaʼi anai hakotou fakamahino te moʼoni ki te hahaʼi kehekehe. Koutou lagaʼi he fehuʼi ʼe maʼua ke fakakaukauʼi e te hahaʼi pea ke tupu ai hanatou fia logo. Koutou vakaʼi peʼe lava feafeaʼi hakotou fakapipiki mo he vaega faka Tohi-Tapu pea koutou uga ia ia ke ina fakakaukauʼi. Koutou fakakaukauʼi fakatomuʼa te ʼu palalau peʼe ko te ʼu fehuʼi ʼaē ʼe feala ke fai atu, pea koutou vakaʼi peʼe lava feafeaʼi he fai palalau kiai. Koutou kumi ʼi te tohi ʼaē ka koutou tufa pe koteā te manatu maʼuhiga ʼaē ʼe ʼalutahi mo takotou fai palalau.
4 Koutou Mulimuli Ki Te Faʼifaʼitaki ʼa Sesu: Neʼe tuku mai e Sesu he faʼifaʼitaki ʼo ʼuhiga mo te poto palalau ʼaki te Tohi-Tapu. Moʼo sivisivi tana faʼahiga faiakonaki, koutou lau te fakamatala ʼaē ʼe tou maʼu ia Luka 10:25-37. Koutou tāʼofi te faʼahiga fai ʼaenī: (1) Koutou fakaʼaogaʼi te Tohi-Tapu moʼo tali ki te ʼu fehuʼi ʼa te hahaʼi. (2) Koutou fakaafe nātou ke nātou fakahā atu tanatou manatu, pea koutou fakamālo age mokā nātou tali lelei. (3) Koutou vakaʼi fakalelei peʼe mahino ki te pikipikiga ʼo te fehuʼi pea mo te vaega faka Tohi-Tapu. (4) Koutou fakaʼaogaʼi he lea fakatātā ʼe malave ki te loto, ke feala ai hakotou ʼiloʼi papau pe kua mahino ki te tali.—Koutou vakaʼi Te Tule Leʼo Fakafalani ʼo te ʼaho 1 ʼo Malesio 1986, ʼi te pasina 27 ki te 28, ʼi te palakalafe 8 ki te 10.
5 Tou Fakaʼaogaʼi Te ʼu Meʼa Gāue ʼAē Neʼe Foaki Mai: Neʼe tā te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu moʼo fakaʼaogaʼi ʼi te minisitelio. Ko te ʼu ʼuluaki palalau, mo te ʼu tali ʼaē ʼe feala ke tou fai kia nātou ʼaē ʼe fakafeagai mai, pea mo te ʼu manatu ʼaē ʼe feala ke tou fakaʼaogaʼi moʼo uga te hahaʼi ke nātou fakakaukau, ʼe tokoni mai ke tou poto ʼi te palalau. Ko te kiʼi kaupepa Tokoni Ki Te ʼu Fai Palalau ʼe ko he meʼa gāue maʼuhiga ʼe feala ke tou feʼāveʼaki tuʼumaʼu mo tatou ʼi tatatou fai faka mafola, pea mo tou fakaʼaogaʼi mokā tou fai palalau ʼo ʼuhiga mo te Tohi-Tapu.
6 Kapau ʼe koutou maʼu te fealagia fakakaukau pea ʼe tuputupu ai anai takotou poto ʼi te fai faka mafola pea mo te faiako. ʼE koutou maʼu ai anai he ʼu tapuakina lahi ʼo feiā pea mo te hahaʼi ʼaē ʼe koutou fai palalau mo nātou ʼi te minisitelio.