Tou Fakahā Te Logo Lelei ʼo Tou Tali Ki Te ʼu Palalau Fakafeagai
1 ʼI te ʼu lakaga fuli ʼaē ʼe tou faka mafola ai, ʼe tou fakaʼamu ke tou fakahā fakalelei te logo lelei. Māʼia ʼi te ʼu ʼaluʼaga faigataʼa, ʼe tonu ke tou mulimuli ki te tokoni ʼaenī ʼe fai ia Hepeleo 13:15: “Tou momoli tuumau he sakilifisio o te fakavikiviki ki te Atua, ko te fua aia o te u laugutu e natou fakamooni ki tona Huafa.” Kapau ʼe tou faiga ke tou fakaʼaogaʼi fakalelei te kaupepa Te ʼu Tokoni Ki Te ʼu Fai Palalau Faka Tohi-Tapu mokā fai mai he ʼu fehuʼi e te hahaʼi, pea ʼe tou hikihiki anai te lelei ʼo totatou minisitelio.
2 ʼE ʼi ai te ʼu tupuʼaga kehekehe ʼo te fai e te hahaʼi he palalau fakafeagai kia tatou. ʼE ʼi ai te ʼu hahaʼi ʼe nātou fakamalotoloto, kae ʼe ʼi ai ʼihi ʼe nātou fia fakagata te fai palalau. Kapau ʼe kita fakamāmāhani mo te ʼu tokoni ʼaē ʼe fai mai ʼi te kaupepa Te ʼu Tokoni Ki Te ʼu Fai Palalau Faka Tohi-Tapu, pea ʼe feala ke kita maʼu vave te tali ʼaē ʼe ʼalutahi mo te ʼu palalau ʼaē ʼe fai mai kia kita. (Taag. 25:11; Isa. 50:4) ʼE tokoni mai anai te kiʼi kaupepa ʼaia ke lelei takita fai faka mafola, mo kapau ʼe kita teuteuʼi fakalelei takita ʼu palalau. Koutou fakakaukauʼi fakalelei peʼe koutou tali feafeaʼi anai ki te ʼu palalau fakafeagai ʼaē ʼe fai atu kia koutou.
3 “ ʼE Mole ʼAu Loto ʼAu Kiai”: Koutou fakatokagaʼi, ʼi te ʼu manatu fuli ʼaē ʼe fakahā ʼi te pasina 11 ʼo te kaupepa Te ʼu Tokoni Ki Te ʼu Fai Palalau Faka Tohi-Tapu, ʼe tokoni mai ke tou fai he ʼu fehuʼi fakahagatonu pea mo fakaʼapaʼapa ki te tagata peʼe ko te fafine ʼo te ʼapi. ʼE ko he puleʼaki lelei ʼaia, heʼe feala ke hoko he fai palalau, ʼo lagi ina fakahā mai anai tana manatu, pea mo te ʼu meʼa ʼaē ʼi tona loto. ʼAki te faʼahi ʼaia, ʼe koutou ʼiloʼi anai peʼe tonu ke hoko feafeaʼi atu takotou fai palalau.
4 Ka ʼui atu e he tahi, “ ʼE mole ʼau loto ʼau kiai,” kua koutou ʼahiʼahi koa te fehuʼi ʼaenī: “ ʼE lagi ko tamatou lotu ʼaē ʼe mole ke loto kiai? . . . Kia koe ʼe feala koa ʼi he ʼaho ke fakatahi fuli te hahaʼi ʼi he lotu pe e tahi? . . . He koʼe ʼe mole lava hoko te faʼahi ʼaia?” Koutou ʼahiʼahi te ʼu palalau ʼaia, he kua ʼahiʼahi e ʼihi, pea neʼe fua lelei.
5 “ ʼE ʼAu Maʼumaʼua”: Kapau ʼe fai atu e he tahi te ʼu palalau ʼaia, pea koutou faiga ke koutou maʼu he puleʼaki moʼo tali ki ai. Lagi ʼe koutou fia fakaʼaogaʼi anai te ʼu ʼuluaki palalau ʼaē ʼe fai ʼi te pasina 14: “ ʼE mole ʼau tuai anai. ʼE ʼau fia fakahā atu te manatu maʼuhiga.” ʼOsi ʼaia pea koutou palalau fakanounou ki te tufa ʼo te māhina.
6 Ka koutou fakatokagaʼi ʼe maʼumaʼua moʼoni, pea ʼe tonu ke koutou fakaʼapaʼapa ki te faʼahi ʼaia. Koutou lagaʼi he fehuʼi, pea koutou talaga mo ia ki te ʼaho ʼaē ka koutou toe liliu mai ai ʼo tali ki te fehuʼi ʼaia. Ko te kaugā fai faka mafola neʼe ina fakaʼaogaʼi te tokoni ʼaia, pea neʼe ʼalu age te tagata ʼo te ʼapi ʼo kumi ia ia, he neʼe ina fia ʼiloʼi te tali ki te fehuʼi ʼaē neʼe ina lagaʼi. ʼE ko he fakaloto mālohi ʼaia ke tou fakaʼaogaʼi he temi fualoa pea mo tou faiga mālohi, moʼo teuteuʼi te ʼu palalau ʼaē ka tou fai moʼo tali ki he tahi ʼe fakafisi mai ki tatatou gāue.
7 “Kua ʼi Ai Taku Lotu”: ʼE koutou tali feafeaʼi anai mo kapau ʼe ʼui atu e he tahi: “Kua ʼi ai taku lotu?” ʼE feala ke koutou ʼui fēnei: “ ʼE mahino mai kia ʼau ʼe ke leleiʼia tau lotu,” pea koutou hoko atu te fai palalau ki he faʼahi ʼe ina ʼiloʼi, ohage la ko te kole ʼo te Tāmai ʼe ʼi selo pe ko te ʼu ʼaluʼaga ʼo te malamanei. Kapau neʼe ina fakahā atu tana lotu pea ʼe feala ke koutou ʼui age: “ ʼI tau kau ʼaē ki te lotu ————, ʼe ʼau mahalo ʼe ke fakaʼamu ke hoko te tokalelei ʼi te kele. ʼI tau manatu, ʼe hoko anai koa te faʼahi ʼaia? Kapau ʼe feala, pea ʼe hoko anai ʼafea?” ʼOsi ʼaia, pea koutou fakahā age te tohi Te ʼAtamai Mālama, pea mo fakaʼaogaʼi te kapite ʼaē ʼe ʼalutahi mo te faʼahi ʼaē neʼe ina fia ʼiloʼi.
8 “ ʼE ʼAu Katolika”: Kapau ʼe ʼui e he tahi ʼe Katolika, pea ʼe feala ke koutou ʼui fēnei: “Kapau koia ʼaia, pea ʼe lagi ke lau tuʼumaʼu te kole ʼo te ‘Tāmai ʼi Selo.’ (Mat. 6:9-13) ʼE mātou toe faikole mo mātou ke hoko mai te Puleʼaga ʼa te ʼAtua, pea ke hoko tona finegalo ʼi te kele ohage ko selo. Kua ke ʼeke koa la pe koteā te Puleʼaga ʼa te ʼAtua, peʼe feafeaʼi anai tana fakahoko te finegalo ʼo te ʼAtua ʼi te kele?” Tuku ke fai atu hana tali, pea koutou tali ki te ʼu fehuʼi ʼaia. Kapau ʼe koutou fai te ʼu palalau ʼaia, pea ʼe feala anai hakotou fakahā age te tohi Te ʼAtamai Mālama.
9 Ko te ʼu ʼuluaki palalau ʼaē ʼe fakahā ʼi te pasina 10 pea mo te 11 ʼo te kaupepa Te ʼu Tokoni Ki Te ʼu Fai Palalau Faka Tohi-Tapu, ʼe nātou fakamanatuʼi mai, ko te logo ʼo te Puleʼaga ʼe ko he logo fakafiafia pea ʼe ina fakamālohiʼi te tui. ʼE feala ke ina fetogi te maʼuli ʼo nātou ʼaē ʼe nātou fakalogo kiai. ʼI tanatou ʼiloʼi te faʼahi ʼaia, ʼe tonu ki te kau fai faka mafola fuli ʼo te Puleʼaga mokā nātou kau ki te fai faka mafola, ke nātou momoli he sakilifisio ʼe lelei age, “te ʼu vitulo ʼe kei mui ʼo [tonatou] ʼu laugutu.” (Osea 14:2) ʼAua naʼa koutou tuku ki te ʼu palalau fakafeagai ʼa te hahaʼi, ke nātou tāʼofi takotou gāue lelei peʼe nātou pulihi tokotou fiafia. Koutou fakaʼaogaʼi lahi te kaupepa Te ʼu Tokoni Ki Te ʼu Fai Palalau Faka Tohi-Tapu ʼi takotou tala te logo lelei.