ʼE Koutou Fiafia Anai Mo Kapau ʼe Koutou Teuteuʼi Fakatomuʼa
1 ʼE tou fiafia ʼaupito ʼi tatatou kau ki te minisitelio. (Pes. 89:15, 16) ʼE mahino ia, ʼe maʼuhiga tāfito ke tou teuteuʼi ke feala ke katoa tatatou fiafia. Kapau ʼe tou teuteuʼi lelei totatou minisitelio, pea ʼe lahi anai te ʼu meʼa ʼaē ʼe feala ke tou fai, pea kapau ʼe lahi tatatou ʼu gāue pea ʼe toe lahi anai mo tatatou fiafia.
2 Tou Fakaʼaogaʼi Te ʼu Meʼa Gāue ʼAē Neʼe Foaki Mai: Koutou kamata teuteuʼi ʼo koutou lau pea mo sivi te meʼa ʼaē ʼe tuʼu ʼi Te Minisitelio ʼo Te Puleʼaga. ʼI te agamāhani, ʼe fakahā ai he ʼu faʼifaʼitaki neʼe teuteuʼi lelei moʼo tokoni kia koutou ke koutou faiva ʼi te fakahā ʼo te logo ʼo te Puleʼaga pea ke faigafua takotou fai te faʼahi ʼaia. ʼE koutou maʼu ai anai he ʼu tokoni ʼo ʼuhiga mo te faʼahiga tali ki te ʼu fehuʼi ʼaē ʼe fai māhani e te hahaʼi. ʼE toe fakahā ai he ʼu manatu moʼo tokoni atu ke koutou fai fakalelei takotou ʼu ʼaʼahi, ʼaki te fakatuʼutuʼu ʼaē ke koutou kamata he ʼu ako Tohi-Tapu. ʼE feala hakotou faka ʼalutahi te ʼu manatu ʼaia mo takotou faʼahiga fai ʼa koutou totonu ke faigafua kia koutou te ʼu faʼahi ʼaia. Tahi ʼaē meʼa, ʼe toe ʼi ai foki mo te tohi Comment raisonner, ʼaē ʼe maʼu ai he ʼu ʼuluaki palalau kehekehe pea mo he ʼu tali ki te hahaʼi ʼaē ʼe mole fia fakalogo, pea ʼe tokoni atu anai te tohi ʼaia ke koutou ʼiloʼi pe koteā ʼaē ʼe tonu ke koutou fai ʼi te ʼu ʼaluʼaga kehekehe ʼo te minisitelio.
3 Koutou vakaʼi te tohi ʼaē ka koutou tufa pea koutou filifili he puani lelei e tahi peʼe lua ʼe feala ke koutou palalau kiai mo te hahaʼi. Moʼo kamata ʼaki te fai palalau, ʼe toe feala ke koutou fakaʼaogaʼi he ʼu meʼa neʼe koutou logo ʼi te tala logo. Koutou fakakaukauʼi fakatomuʼa te ʼu palalau ʼe feala ke fai atu e te hahaʼi pea koteā anai takotou tali. ʼOsi ʼaia pea koutou fakaʼaogaʼi he ʼu kiʼi minuta moʼo fai liuliuga te ʼu palalau ʼaē ka koutou fai ʼi te matapā.
4 Koutou Kau Ki Te ʼu Fono Gāue Fuli: Koutou fakalogo fakalelei ʼi te Fono Gāue mokā vakaʼi ai te ʼu manatu ʼo Te Minisitelio ʼo Te Puleʼaga, peʼe ka fai ai he ʼu faʼifaʼitaki. Koutou fakatokagaʼi te ʼu manatu ʼaē ʼe koutou sio ʼe feala ke koutou fakaʼaogaʼi ʼi takotou ʼu fai palalau. Koutou manatuʼi te tahi ʼu ʼaluʼaga ʼaē neʼe tau mo koutou ʼi te minisitelio, pea koutou fakakaukauʼi peʼe lava feafeaʼi hakotou fai ke toe lelei age takotou gāue fai faka mafola. Koutou palalau ki te ʼu faʼahi ʼaia mo te kau fai faka mafola ʼi muʼa ʼo te fono pea mokā ʼosi te fono.
5 Koutou tui papau, kapau ‘kua koutou teuteu ki te u gaue lelei fuape,’ pea ʼe tapuakinaʼi anai koutou ʼaki he fiafia lahi, pea ʼe koutou lava tokoni anai ki te hahaʼi ke nātou maʼu te ala ʼaē ʼe ina taki ki te maʼuli.—2 Tim. 2:21.