Ko Te Teuteu—Ko Te Kalavi ʼAia ʼo Te Fua Manuʼia
1 Ko te teuteuʼi fakatomuʼa ʼe tokoni anai kia tatou ke tou tekeʼi te lotolotolua ʼaē ʼe feala ke logoʼi e he tahi mokā ʼe ʼalu ʼo gāue fai faka mafola. ʼI takotou fakaōvi ki te ʼu matapā, ʼe koutou ʼiloʼi anai te ʼu meʼa ʼaē ʼe koutou fia ʼui age ki te hahaʼi ʼi te ʼu ʼapi. ʼE mole tonu anai ke koutou tuʼania ʼo ʼuhiga mo te ʼu faigataʼaʼia ʼaē ʼe feala ke hoko kia koutou. ʼI takotou liliu ki fale mai te gāue faka mafola, ʼe koutou lotomālohi anai ʼaki te ʼiloʼi ʼaē neʼe koutou faiga fakamalotoloto ʼi te minisitelio. ʼIo, ko te teuteuʼi fakalelei ʼe ko te kalavi ʼaia ʼo te fakamāsila ʼo tokotou poto ʼi te fai faka mafola mo te fai akonaki.
2 Ko Paulo neʼe ina fakahā ʼe maʼuhiga ke lelei te teuteuʼi, ʼo fakaloto mālohiʼi tatou ke tou “tui ki ʼotatou ʼu vaʼe te ʼu meʼa ʼaē ʼe ʼaoga ki te logo lelei ʼo te tokalelei.” (Ef. 6:15) ʼE kau kiai te teuteuʼi ʼo totatou ʼatamai pea mo totatou loto, pea ʼe tonu ke tou maʼu he manatu ʼe totonu pea mo he lotolelei. Mokā tou teuteu ke tou vaevae te moʼoni ki te hahaʼi, ko tatatou gāue ʼe fakapale anai ʼaki te fua ʼo te Puleʼaga, ʼo tou fiafia ai.—Gāue 20:35.
3 E Feafeaʼi Te Teuteuʼi ʼo Te Fai Faka Mafola: ʼE tonu ke tou fili he faʼifaʼitaki ʼe faigafua kia tatou, ʼo lagi toʼo mai te tohi Raisonner peʼe ʼi te pasina fakamuli ʼo Te Minisitelio ʼo Te Puleʼaga. Koutou fakakaukauʼi lelei te vaega ʼaē ʼe koutou fakatuʼutuʼu ke koutou fakaʼaogaʼi, ʼo vakaʼi pe koteā te ʼu kupuʼi palalau ʼaē ka koutou faka maʼuhigaʼi moʼo fakamahino te puani tāfito. ʼE mole tonu ke tāʼofi fakaʼatamai te faʼifaʼitaki, kae ko te meʼa ʼaē ʼe lelei, ke koutou tāʼofi te manatu, ʼo koutou fai ʼaki ʼakotou ʼu palalau māhani pea mo fakahā age ʼaki he faʼahiga palalau ʼe leleiʼia anai e ia ʼaē ʼe fakalogo atu.
4 Koutou vakaʼi te tohi ʼaē ʼe fakatuʼutuʼu ke koutou tuku age pea ke koutou fili ʼihi ʼu puani maʼuhiga ʼe feala anai ke palalau kiai. Koutou fili he meʼa ʼi takotou manatu ʼe fia logo anai kiai te hahaʼi ʼo tokotou telituale. Koutou fakakaukauʼi peʼe feala feafeaʼi te fetogi ʼo takotou ʼu faʼahiga palalau ʼo mulimuli pe ki te ʼu faʼahiga hahaʼi ohage la—ko he tagata, he fafine, he matuʼa peʼe ko he tūpulaga.
5 Kua koutou faiga koa ke koutou fakamāmāhani ki te ʼu faʼahiga palalau ʼaē ka koutou fai? Koutou fakatahi mo tokotou famili peʼe ko ʼihi kaugā fai faka mafola, mo palalau ʼo ʼuhiga mo te ʼu faʼifaʼitaki ʼaē ʼe feala ke fua lelei, pea ke koutou fai liuliuga, ʼo koutou fai leʼolahi ke koutou manatuʼi lelei. Koutou faiga ke koutou fakaʼaogaʼi ʼi takotou ʼu palalau he ʼu meʼa ʼe hoko moʼoni, pea mo te ʼu fehuʼi ʼaē ʼe feala ke fai e te hahaʼi ʼi te telituale. Ko te fakamāmāhani ʼaia ʼe tokoni anai kia koutou ke koutou tuputupu ʼi te ʼu poto palalau, ʼi te fai faka mafola pea ʼe ina fakatuputupu anai takotou falala kia koutou.
6 ʼO hilifaki ki te teuteuʼi pea mo te liuliuga ʼo takotou ʼu palalau, ʼe tonu ke koutou fai te ʼu fehuʼi ʼaenī kia koutou: ‘Ko te ʼu mutuʼi meʼa ʼaē ʼe ʼau fia tui ʼe tau koa mo te minisitelio? ʼE ʼau maʼu koa ʼi taku kato te ʼu meʼa ʼaē ʼe ʼaoga kia ʼau, ʼo kau kiai te ʼu tohi ʼaē ʼe ʼau fia fakaʼaogaʼi? ʼE maʼa koa te ʼu tohi ʼaia? ʼE ʼi ai koa taku tohi Raisonner, te ʼu kiʼi pepa lotu, te ʼu pepa nota ʼaē ʼe fakaʼaogaʼi ʼi te fai faka mafola pea mo he peni?’ Koutou fakakaukauʼi fakatomuʼa te ʼu meʼa ʼaia ʼe kau anai ki te fakatuputupu ʼo takotou ʼaho fai faka mafola.
7 ʼOsi ʼaia takotou fai ia meʼa fuli ʼe feala, ʼe tonu ke koutou faikole ke tokoni te laumālie ʼo Sehova kia koutou ke fua lelei. (1 Soane 5:14, 15) ʼAki te tokagaʼi fakalelei ʼo te teuteu ʼe iku anai ki te fiafia lahi ʼi tatatou gāue, ʼi tatatou ‘fakahoko katoa totatou minisitelio.’—2 Tim. 4:5.