Tou Liliu ʼo Faiva ʼi Tatatou Minisitelio
1 Neʼe fakalotomālohiʼi e te ʼapositolo ko Paulo ia te ʼaoga ʼaē ke kita faiva ʼi te minisitelio. Neʼe ina tohi fēnei: “Faiga fakamālotoloto ke ke tuʼu iā muʼa ʼo te ʼAtua ohagē ko he tagata ʼe ina tali lelei, ko he tagata gāue ʼe mole ufiufi ʼi he meʼa, ʼe ina fakaʼaogaʼi lelei te folafola ʼo te moʼoni.”—2 Tim. 2:15.
2 ʼE mole tou tutupu ake mo te kalitātē ʼaē ko te faiva ʼi te minisitelio, ʼe tonu ke tou gāueʼi. Koia ʼe tonu ai ke tou “faiga fakamālotoloto” ke tou liliu ko he ʼu minisi faiva. Kae koteā ʼaē kā tokoni mai anai ke tou maʼu ia te kalitātē ʼaia?
3 Tou Ako Mai Te Folafola ʼa Te ʼAtua: Ko te ʼatamai mālama ʼaē ʼe tou maʼu mai te Folafola, ʼe ʼi ai anai tona fua lelei ki tatatou gāue fakaminisitelio. Kapau ʼe lahi te ʼu meʼa ʼaē ʼe tou ako ʼi te Tohi-Tapu, pea ‘ ʼe toe lelei age anai mo tatatou fakaʼaogaʼi ia te folafola ʼo te moʼoni.’ Koia ʼe maʼuhiga ai ke tou tuku he temi ki te ako takitokotahi.—1 Tim. 4:15, 16.
4 Ko te tahi puleʼaki moʼo fakatuputupu ia te ʼatamai mālama ʼaē ʼe tou maʼu mai te Folafola ʼa te ʼAtua, ke “makehe [age] tatatou tokagaʼi” te ako Fakatohi-tapu ʼaē ʼe tou logo kiai ʼi te ʼu fono. (Hep. 2:1) ʼI te ʼu akonaki ʼaē ʼe fai maʼa te hahaʼi fuapē peʼe ʼi te ʼu ako tohi, ʼe tou maʼu ai te ʼu manatu lelei ke tou fakaʼaogaʼi ʼi te minisitelio. ʼE tou maʼu ʼi te Ako Fakateokalatike ia te ʼu manatu maʼuhiga ke tou liliu ai ko he kau faiako faiva. ʼI te Fono Gāue, ʼe tou maʼu ai ia te ʼu tokoni ʼaoga pea mo te ʼu faʼifaʼitaki lelei ke tou liliu ai ko he kau minisi faʼafai. Kae ke fua lelei ia te ʼu faʼahi fuli ʼaia kiā tātou, ʼe tonu foki ke tou teuteuʼi fakalelei ia te ʼu fono fuli pea mo fai tuʼumaʼu hatatou ʼu tali.
5 Tou Fakaʼaogaʼi Ia Te ʼu Tokoni: Neʼe ʼui e Paulo ki te kau Kilisitiano ʼo te kōkelekāsio ʼo Filipe, ke natou maʼuliʼi ia te ʼu meʼa ʼaē neʼe natou ako ʼo ʼuhiga mo ia. (Filp. 4:9) Mo tātou foki ʼi te temi nei, ʼe tonu ke tou maʼuliʼi ia te ʼu meʼa ʼaē neʼe akoʼi mai e te kautahi ʼa Sehova. Ohagē lā, ʼi Te Tule Leʼo Fakafalani ʼo te ʼaho 15 ʼo Sūlio 1988, ʼi te pāsina 15 ki te 20, neʼe tou ako ai peʼe feafeaʼi hatatou gāueʼi he telituale ʼe tou fai tuʼumaʼu. ʼO mole gata pē ʼi hata fakaʼaogaʼi ia he ʼu ʼuluaki palalau foʼou, mo lelei pea mo fakafiafia, kae neʼe toe fakalotomālohiʼi tātou ʼi te ʼalatike ʼaia, ke tou fakahā kiā ia ʼaē ʼe tou fai palalau mo ia, ʼe lagi tou ʼomai putuputu anai ki ai. Neʼe tokoniʼi tātou ke tou kumi fakalelei ia nātou ʼaē ʼe tuha mo te logo lelei, ʼo tou faiga ke tou felāveʼi mo nātou fuli ʼo te loto fale. Kapau ʼe tou fakaʼaogaʼi te ʼu tokoni ʼaia, pea ʼe tou maʼuliʼi ai anai ia te ʼu meʼa ʼaē ʼe tou ako pea ʼe tou liliu ai anai ʼo faiva age ʼi tatatou minisitelio.
6 ʼE tou fakaʼaogaʼi tuʼumaʼu koa ʼi tatatou gāue fai fakamafola ia te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu? ʼAki te ʼu ʼuluaki palalau ʼaē ʼe tuʼu ai pea mo te ʼu tali ki he ʼu palalau fakafeagai, ʼe feala ai ke hikihiki tatatou faiva ʼi te fai fakamafola. Tahi ʼaē, kapau ʼe tou teuteu lelei ke tou fakaʼaogaʼi te ʼu ʼuluaki palalau ʼo te tufa, pea ʼe tokoni mai anai ke fua lelei tatatou gāue ʼi te minisitelio.
7 ʼE kotou fia maʼu koa he tahi age ʼu tokoni ke lelei age takotou gāue ʼi te minisitelio? Pea kotou kumi tokoni ki te taupau gāue ʼo tokotou kōkelekāsio peʼe ko te tehina ʼo takotou ako tohi. ʼE feala kiā tātou fuli ke tou liliu ko he ʼu minisi faiva ʼi te minisitelio, pea ke tou “fakaʼaogaʼi lelei te folafola ʼo te moʼoni.” Kua vave pē, pea fakagata leva e Sehova ʼAtua ia te mālama agakovi ʼaenī. Kae ʼi te temi nei, ʼe tou fia tokoni tāfito ki he hahaʼi tokolahi ke natou maʼu ia te maʼuli, pea ʼaki tatatou fai ʼaia, ʼe tou fakahā ai tatatou fakaʼapaʼapa ʼaē ki totatou ʼAtua ko Sehova.—Soa. 15:8.