ʼE Koutou Fakaʼaogaʼi Fakalelei Koa Te Folafola ʼa Te ʼAtua?
1 Ko Sesu Kilisito neʼe ko te tagata faiako ʼaē neʼe lahi tokotahi ʼi te ʼu temi fuli. Ko tana ʼu akonaki neʼe lave ki te loto ʼo te hahaʼi, ʼo uga ai ia nātou e te ʼu meʼa ʼaē ʼi tonatou loto ke nātou fai he ʼu gāue ʼe lelei. (Mat. 7:28, 29) Neʼe ina fakaʼaogaʼi tuʼumaʼu te Folafola ʼa te ʼAtua moʼo fakatafito kiai tana ʼu faiakonaki. (Luka 24:44, 45) Neʼe ina ʼui ʼe ko Sehova ʼAtua ʼaē neʼe ina akoʼi ia ia, pea neʼe poto ia ʼi te faiakonaki ʼuhi ko Sehova. (Soane 7:16) Neʼe tuku e Sesu te faʼifaʼitaki lelei ki tana kau tisipulo ke nātou fakaʼaogaʼi fakalelei te Folafola ʼa te ʼAtua.—2 Tim. 2:15.
2 ʼO toe feiā pe foki mo te ʼapositolo ko Paulo, ʼe ko he faʼifaʼitaki lelei ʼo he tagata neʼe poto lelei ʼi te fakaʼaogaʼi ʼo te Folafola ʼa te ʼAtua. Neʼe mole gata ʼaki pe tana lau ia te Tohi-Tapu ki te hahaʼi, kae neʼe ina fakamahino pea mo ina uga te hahaʼi ke nātou fakakaukauʼi te ʼu meʼa ʼaē neʼe ina lau age kia nātou, ʼo ina fakahā te ʼu fakamoʼoni ʼaki te Folafola ʼa te ʼAtua neʼe ko Sesu te Kilisito. (Gāue 17:2-4) ʼO toe feiā aipe, mo te tisipulo ko Apolose ʼaē neʼe poto palalau, neʼe “ina ʼiloʼi lelei te Tohi-Tapu,” pea neʼe ina fakaʼaoga lelei ʼi tana fakahā te mālohi ʼo te moʼoni.—Gāue 18:24, 28.
3 Ke Tou Liliu Ko He Kau Faiako ʼo Te Folafola ʼa Te ʼAtua: Ko te ʼu kaugā fai faka mafola ʼo te Puleʼaga ia ʼaho nei, ʼe nātou maʼu te ʼu fua lelei ʼi tanatou ako fakamalotoloto te hahaʼi, ʼi tanatou fakaʼaogaʼi te Tohi-Tapu pea mo tanatou uga te hahaʼi ke nātou fakakaukauʼi te ʼu meʼa ʼaē ʼe nātou ako. ʼI te tahi lakaga, neʼe fakaʼaogaʼi e te tēhina ia Esekiele 18:4 pea mo te tahi ʼu vaega, moʼo uga te pasitea pea mo te ʼu tagata e toko tolu ʼe kau ʼi te lotu ʼa te pasitea, ke mahino kia nātou te meʼa ʼaē ʼe hoko ki te kau agakovi pea mo te kau faitotonu. Ko te meʼa ʼaē neʼe hoko, ko ʼihi hahaʼi ʼi te lotu ʼaia, neʼe nātou kamata ako te Tohi-Tapu, pea ki muli age neʼe tali e te tahi ia nātou te moʼoni. Koʼeni te tahi faʼifaʼitaki: Ko te fafine neʼe ina kole ki te tuagaʼane ke ina fakamahino ki tona ʼohoana ʼaē ʼe fakafeagai ki te moʼoni, pe koʼe ʼe mole fai e te kau Fakamoʼoni ʼa Sehova te Po tapu pea mo te ʼu ʼaho tupu. Lolotoga tana lau age te ʼu vaega faka Tohi-Tapu ʼaē neʼe ina toʼo ʼi te tohi Comment raisonner, neʼe fakahā e te tagata ʼe lototahi mo te manatu ʼaia. Neʼe fiafia ʼaupito te ʼohoana ʼo te tagata ʼaia, ʼo ina ʼui fēnei: “ ʼE ma ʼolo atu anai ki takotou ʼu fono.” Pea neʼe tali e tona ʼohoana!
4 Tou Fakaʼaogaʼi Te Tokoni ʼAē ʼe Tou Maʼu: Ko Te Minisitelio ʼo Te Puleʼaga pea mo te polokalama ʼo te Fono Gāue, ʼe maʼu ai he takitaki ʼe lelei moʼo tokoni kia tatou ke tou fakaʼaogaʼi fakalelei te Folafola ʼa te ʼAtua. ʼE lahi te ʼu kaugā fai faka mafola neʼe nātou fakahā tanatou leleiʼia te ʼu faʼifaʼitaki kehekehe ʼaē neʼe tā ʼi te Minisitelio, pea ko te ʼu faʼifaʼitaki ʼaia ʼe tou maʼu ai te fua lelei pea ʼe hā ai ʼe tou maʼu te minisitelio ʼi te temi totonu pea ʼe lelei kia tatou. ʼE lahi te ʼu manatu ʼe tuʼu ʼi te tohi Comment raisonner à partir des Écritures ʼo ʼuhiga mo te faʼahiga fakamahino lelei ʼo te ʼu manatu tāfito e 70 ʼaē ʼe talanoa kiai te Folafola ʼa te ʼAtua. Ko te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe ina fakanounou lelei te fakamatala ʼo te ʼu akonaki tāfito ʼo te Tohi-Tapu, ʼaē ʼe tonu ke mahino kiai te hahaʼi ʼaē ʼe foʼofoʼou mai ki te moʼoni. Ko te ako 24 pea mo te 25 ʼi te tohi Manuel pour l’École du ministère théocratique, ʼe nā fakahā mai kia tatou peʼe tonu ke fakahā feafeaʼi te Tohi-Tapu e nātou ʼaē kua faiva ʼi te faiako, pea mo feafeaʼi tona lau pea mo tona fakamahino. ʼE tonu ke tou fakaʼaogaʼi fakalelei te ʼu tokoni fuli ʼaia ʼaē ʼe tuku mai kia tatou.
5 Mokā tou fakaʼaogaʼi fakalelei te Folafola ʼa te ʼAtua, ʼe tou fakatokagaʼi anai “ ʼe maʼuli pea ʼe mālohi . . . pea ʼe feala ia ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto” ʼo te hahaʼi ʼaē ʼe tou faka mafola kiai. (Hep. 4:12) Ko te ʼu fua lelei ʼaē ʼe tou maʼu ʼaki te Folafola ʼa te ʼAtua, ʼe ina uga anai tatou ke tou palalau ki te moʼoni ʼaki he lototoʼa lahi!—Gāue 4:31.