Tou Tuputupu ʼi Tatatou Fai Fakamafola
1 ʼE fiafia tatatou Tamai ʼaē ʼe ʼi selō mokā tuputupu tana ʼu kaugana ʼi te faʼahi fakalaumālie. Ko tona fakaʼuhiga, ke natou liliu ko he kau fai fakamafola ʼo te logo lelei ʼe fakapotopoto pea mo fua lelei ʼi tanatou gāue. Neʼe fakalotomālohiʼi e Paulo ia te taupau ko Timoteo ke haga tokaga fakalelei kiā ia pea ke ʼiloga tana ʼu faiga. (1 Tim. 4:13-15) Ko tātou fuli ʼe tonu ke tou faiga ʼo hikihiki te lelei ʼo tatatou minisitelio, māʼia mo tātou ʼaē kua tou māhani lelei ʼi te fai fakamafola.
2 Tou Fai Hatatou ʼu Fakatuʼutuʼu: Ke feala hatatou tuputupu ʼi tatatou minisitelio, ʼe tonu ke tou fai hatatou ʼu fakatuʼutuʼu. Koteā he ʼu fakatuʼutuʼu ʼe lagi feala ke tou fai? ʼE lagi tou faiga anai ke tou popoto age ʼi te fakaʼaogaʼi ʼo tatatou heletā fakalaumālie, te Tohi-Tapu. (Efe. 6:17) ʼE lagi ʼe ʼi ai he faʼahiga fai fagonogono ʼi te minisitelio ʼe ʼaoga ai ke tou hikihiki, ohagē ko te fai fagonogono ʼi te ala, ʼaki te telefoni, peʼe ko te fai fagonogono ʼi te ʼu matani gāue. ʼE lagi tou faiga anai ke lelei age tatatou fai ia te ʼu ʼaʼahi. Ko te tahi fakatuʼutuʼu lelei ke tou fai, ʼe ko te kamata ʼo he ʼu ako Tohi-Tapu, ʼo fēia ki tona faʼahiga fai.
3 Te ʼu Faʼahi ʼAē Kā Tokoni Mai: Ko te ʼu fono, tāfito te Ako Fakateokalatike pea mo te Fono Gāue neʼe fakatuʼu moʼo tokoni mai ke tou tuputupu ʼi tatatou fai fakamafola. Kapau ʼe tou faiga lahi ke tou teuteu pea mo kau ki te ʼu fono ʼaia pea mo maʼuliʼi te ʼu tokoni ʼaē ʼe foaki mai, pea ʼe toe lahi age anai te ʼu lelei ʼaē kā tou maʼu.—2 Ko. 9:6.
4 ʼE toe ʼaoga foki ke tou fetokoniʼaki ke tou tuputupu. (Taag. 27:17) ʼI tatatou fakalogo lelei ki te faʼahiga fai fakamafola ʼo nātou ʼaē ʼe kaugā gāue mo tātou ʼi te minisitelio, ʼe tokoni mai anai ke lelei age tatatou fai ʼaē ʼo tatatou minisitelio. Tahi ʼaē meʼa, ʼe feala ki te tagata ʼāfea ʼo tatatou ako tohi ke ina fai he fakatuʼutuʼu ke tou maʼu he tokoni ki te faʼahi ʼaia. ʼE ko he tapuakina lahi mokā ʼe tokoni mai he pioniē kua faiva peʼe ko he tahi kaugā fai fakamafola kua faiva ke tou liliu ko he minisi ʼe fua lelei age ʼi te minisitelio pea mo fiafia lahi age! ʼE ʼi ai koa he kaugā fai fakamafola foʼou ʼi tatatou ako tohi? ʼE lagi feala ke tou fakaafe ke kaugā gāue mo tātou ʼi te minisitelio.
5 Ko te gāue maʼuhiga pē e tahi ʼaē ʼe lolotoga fai iā ʼaho nei, ʼe ko te minisitelio Fakakilisitiano. ʼI tatatou foaki kiā Sehova tatatou ʼu “sākilifisio fakavikiviki,” ʼe tou fia foaki kiā te ia te meʼa lelei ʼaupitō ʼaē ʼe tou maʼu. (Hep. 13:15) Kapau ʼe tou faiga ke tou tuputupu ʼi tatatou fai fakamafola, pea ʼe tou liliu anai ko he ʼu tagata gāue “ ʼe mole ufiufi ʼi he meʼa, ʼe [natou] fakaʼaogaʼi lelei te folafola ʼo te moʼoni.”—2 Tim. 2:15.