Kotou Fafaga Ia Koutou ʼi Te Faʼahi Fakalaumālie
1 Neʼe ʼui fēnei e Sesu: “Fiafia ia nātou ʼaē ʼe natou ʼiloʼi tonatou masiva fakalaumālie.” (Mat. 5:3, MN ) He koʼe ʼe maʼuhiga ʼaupitō ke tou mahino ʼe tou māsisiva ʼi te faʼahi fakalaumālie? ʼE tou lava fakahā feafeaʼi ʼe tou mahino ki te ʼaluʼaga ʼaia? Ko te ʼu hele fea ʼaē ʼe tonu ke tou tekeʼi, pea ko te ʼu tapuakina fea ʼaē ʼe tou maʼu mokā tou mahino ki tatatou māsisiva ʼi te faʼahi fakalaumālie?
2 ʼE mahino ia ʼe tou ʼiloʼi fuli, kapau ʼe tou fia mālolohi ʼi te faʼahi fakasino pea ʼe tonu ke tou kakai lelei. ʼE mole feala ki he tahi ke ina fai he gāue ʼe lelei ʼi te ʼaho fuli pē mo kapau ʼe mole tokaga ʼo kai ʼi te faʼahi fakasino. ʼE toe feiā anai mo kapau ʼe mole tou tōkakaga ʼo kakai fakalelei ʼi te faʼahi fakalaumālie.—Mat. 4:4; Soa. 17:3.
3 ʼE ʼAoga Te ʼu Fono Moʼo Fafaga ʼo Tātou ʼi Te Faʼahi Fakalaumālie: ʼE ʼi ai te pikipikiga ʼo totatou maʼuli lelei ʼi te faʼahi fakalaumālie pea mo tatatou polokalama kai fakalaumālie. ʼI tatatou ʼu fono, ko “te tagata kaugana agatonu pea mo poto” ʼe ina foaki mai he meʼa kai fakalaumālie lelei ke tou fakafīmālieʼi totatou ʼu maʼuli fakalaumālie. (Mat. 24:45-47, MN ) ʼE ʼi ai te ʼaoga ʼo te ʼu fono fuli, pea ʼe mole tonu ke tou tōtō ʼi te ʼu faʼahi ʼaia. ʼE kotou teuteuʼi koa takotou ʼu fono fuli pea mo kotou kau tuʼumaʼu kiai?
4 Tou vakaʼi fakanounou pē he ʼu fono e tolu ʼi te ʼu fono e nima ʼo te vāhaʼa. Ko te fono maʼuhiga ʼaē neʼe fakatuʼutuʼu ke tou tuputupu ʼi te moʼoni ʼe ko te Ako ʼo Te Tule Leʼo. Ko te Ako Faka Teokalatike ʼe tokoni mai ke tou liliu ko he kau minisi faiva. ʼI te Ako Tohi ʼe tou akoʼi fakalelei ai he ʼu manatu faka Tohi-Tapu kehekehe.
5 ʼE kotou teuteuʼi koa takotou ʼu fono? Ko ʼihi ʼe lagi natou vakaʼi fakavilivili te ʼu alatike ako, ʼo natou fakaʼiloga fakavilivili te ʼu tali ki te ʼu fehuʼi, kae mole natou lau ia te ʼu vaega Tohi-Tapu ʼaē ʼe tuʼu ai. ʼE lagi natou teuteuʼi hanatou tali, kae ʼe natou fakaʼaogaʼi kātoa koa te meʼa kai fakalaumālie ʼaia? ʼE feala koa ke kotou hikihiki takotou faʼahiga teuteuʼi ʼo te ʼu fono ʼaia, mokā kotou teuteuʼi takitokotahi peʼe kotou teuteuʼi faka fāmili?
6 Tou Fakaʼaogaʼi Lelei Totatou Temi: Kā kotou fakatuʼutuʼu he temi moʼo teuteuʼi ia te ʼu fono, ʼaua naʼa fakaleluʼi takotou fakatuʼutuʼu ʼaia e te televisio peʼe ko te tahi age ʼu gāue ʼe mole faʼa maʼuhiga. ʼE tonu tāfito ki te ʼu pule fāmili ke natou tokoni ki tonatou fāmili ke natou mulimuli tuʼumaʼu ki te polokalama ako ʼo te Tohi-Tapu, mo te teuteuʼi ʼo te fono, pea mo te lagolago ki te fai faka mafola. ʼE tonu ke tou tokagaʼi fakalelei te tokoni ʼa te ʼapositolo ko Paulo ʼaē neʼe ina ʼui ke tou ‘totogi te temi faigamālie’ pea mo tou fakamuʼamuʼa totatou maʼuli fakalaumālie.—Efe. 5:15-17.
7 ʼI tatatou mahino ki te maʼuhiga ʼo totatou maʼuli fakalaumālie, ʼe tou tekeʼi anai te ʼu hele ʼaē ko te fakaʼauʼauganoa. Ko tātou takitokotahi pea mo totatou fāmili, ʼe tou māsisiva ʼi te faʼahi fakalaumālie. ʼE fakalogo totatou fiafia heʼegata ki tatatou ʼu faiga ʼaē ke tou fafaga ia tātou ʼi te faʼahi fakalaumālie.