Tou Pionie Vaeluaʼi Temi ʼi Tesepeli
1 ʼE tonu ke tou fai fuli te fehuʼi ʼaenī: “ ʼE feafeaʼi anai haku kau ki te hahaʼi toʼo mālama ʼi tesepeli? ʼE feala anai koa ke ʼau pionie vaeluaʼi temi?” — Mat. 5:14, 16.
2 Ko te ʼu tūpulaga kau faka mafola ʼaē kua papitema ʼe ʼi ai māhani tonatou temi mālōlō ʼi te ako lolotoga te ʼu ʼaho lafeti ʼo te fakaʼosi taʼu. Ko te ʼu mātuʼa pea mo ʼihi hahaʼi kua matumatuʼa ʼe lagi feala anai ke nātou lagolago ia nātou ʼi tanatou gāue ʼi te māhina ʼaia. Pea, tokolahi te kau faka mafola ʼe gāue ʼaho katoa, ʼe maʼu anai tonatou temi ke nātou kau ki te minisitelio ʼaia ʼe ina hāofaki te ʼu maʼuli.
3 Ko he ʼuluaki faʼahiga meʼa ʼe ʼaoga ki te toʼo ʼo te pionie vaeluaʼi temi, ko te lotolelei ʼo fai he faiga ke lahi ake (Luka 13:24). Kapau ʼe tou teuteuʼi fakalelei tatatou ʼu gāue, ʼo mole galoʼi totatou famili pea mo totatou ʼu maʼua ki te kokelekasio, ʼe feala ke tou maʼu he temi ke tou ʼiloʼi ai te ʼu fiafia ʼo te selevisi pionie vaeluaʼi temi.
4 ʼE feala koa hatatou fai ke lahi ake totatou minisitelio ʼi tesepeli? ʼE feala ai ke tokoni kia tatou ke tou mālohi ʼi te fai faka mafola pea ʼe ina faigaʼi anai ke tou maʼu he ʼu temi fakafiafia. Ko totatou fiafia ʼe toe lahi age. — Gāue 20:35.