Tou Taki He ʼu Ako Faka Tohi-Tapu ʼAki Te Tohi Mauli Heegata

¹ Neʼe tala fēnei ʼe he fafine ʼo ʼuhiga mo te tohi Mauli Heegata: “Ki muli mai ʼo te Tohi-Tapu totonu, ʼe ʼau faka ʼuhiga te tohi ʼaia ohage ko he tohi totonu pea ʼe fakatupu uga neʼe heʼeki ʼau lau!” ʼE tou ʼio fuli ko te tohi ʼaia ʼe ko he tohi lelei ia neʼe ta moʼo tokoniʼi ʼo te hahaʼi ke nātou mahino ki te Tohi-Tapu pea tahi ʼaē meʼa ke uga ai nātou ke nātou liliu ko he kau ʼatolasio faiva kia Sehova.

² ʼI te 1982, taʼu neʼe hā ai te tohi Mauli Heegata, neʼe ko te toko 428 kau faka mafola neʼe nātou taki te ʼu ako faka tohi-tapu e 482 ʼi Niu-Kaletonia. Ia ʼaho nei, ko te toko 1 380 kau faka mafola ʼe nātou taki te ʼu ako faka tohi-tapu e 1 544. ʼI te ʼaho ʼaenī, kua ʼosi ta te tohi Mauli Heegata e 62 miliona ʼi te ʼu lea e 115. ʼE ina fai he gāue maʼuhiga ʼi te gāue faka malamanei.

³ Tou fai hatatou ʼu fakatuʼutuʼu: ʼE ko te tapuaki ʼa Sehova pea mo te holi ʼa tana ʼu kaugana ke nātou tokoniʼi te hahaʼi fakamalotoloto ʼaki te logo ʼo te Tohi-Tapu, ʼe faka ʼuhiga ʼaki te maʼuli, ʼaē neʼe faka fealagia ai te tupu taulekaleka ʼaia (Lom. 10:13-15; 1 Tim. 2:4). ʼE mahino kia tatou kua nounou te temi pea ʼe tonu ke tou faiva ʼo faka mafola te Puleʼaga ʼo te ʼAtua.

⁴ ʼI te haʼele ki muʼa ʼo te kautahi ʼa Sehova, koteā koa te meʼa ʼe tou fai takitokotahi? Kua tou fakapapau koa ke tou kau katoa ki te gāue fakamaʼuli ʼaē ko te fai ʼo he ʼu tisipulo? Moʼo fakahoko ʼo te faʼahi ʼaia, ʼe tonu ke tou fai he ʼu fakatuʼutuʼu. ʼE feala koa hatatou taupau te fia logo ʼaki he faiva ʼo lahi ake? He koʼe koa ʼe mole tou fai he fakatuʼutuʼu ke kamata hatatou ako faka tohi-tapu foʼou ʼi fepualio?

⁵ Ko ai ʼaē ʼe feala ke ina taki he ako faka tohi-tapu?: Tokolahi te kau faka mafola ʼo te ʼu lanu kehekehe neʼe nātou maʼu te fiafia ʼi tanatou taki he ako faka tohi-tapu ʼaki te tohi Mauli Heegata. ʼUhi he neʼe lelei tona fai, ʼe faigafua ai te taki ʼo te ako faka tohi-tapu, ko he faka fealagia ʼaia ki te kau faka mafola foʼou ke nātou kau ki te gāue maʼuhiga ʼaia. Pea, neʼe tokolahi ia tatou neʼe tou akoʼi takitokotahi, koia ʼe tou ʼiloʼi lelei ai te lotolotoiga ʼo te tohi ʼaia. Ko he kau faka mafola neʼe mole ʼi ai hana ako faka tohi-tapu ʼi muʼa ʼo tana fakaʼaogaʼi te tohi Mauli Heegata neʼe ina fai tana tohi fakamālo ʼo ʼui fēnei maʼana: “ ʼE ʼau taki nei te ʼu ako faka tohi-tapu e tolu pea kua vave nei pe taku kamata te tahi ako, ʼo fā leva ki ai. ʼE mole ʼau ʼiloʼi pe ʼe feafeaʼi haku fakamālo atu ʼi takotou faiga ke faigafua te taki ʼo he ʼu ako faka tohi-tapu.”

⁶ Ko te kau tūpulaga ʼe nātou faiva foki ʼi te gāue ʼaē ko te taki ʼo te ʼu ako faka tohi-tapu ʼaki te tohi Mauli Heegata. Ko ʼihi tamaliki ʼe nātou fakaʼaogaʼi te faʼahiga fai fakahagatonu ʼaki tanatou kole ki te ʼu mātuʼa ʼaē ʼe felāveʼi mo nātou te faka fealagia ʼaē ke nātou ako te Tohi-Tapu mo ʼanatou fānau. Ko ʼatatou fānau ʼe mole tou ʼui ʼe kei veliveli ki te palalau ʼo ʼuhiga mo te ʼu meʼa ʼe fakapapau mai e Sehova: te maʼuli heʼegata ʼi he palatiso ʼi te kele.

⁷ Peʼe tou tūpulaga peʼe kei tou veliveli, ko he fiafia lahi ʼe feala ke tou maʼu ʼi te minisitelio ko te taki ʼo te ʼu ako faka tohi-tapu ʼi te ʼu ʼapi. Koia, tou kole kia Sehova ke tokoni mai pea ke tou faigaʼi ia meʼa fuli ʼe feala ai hatatou fakahā ki te hahaʼi tatatou ʼamanaki. Tou fakaʼaogaʼi te tohi Mauli Heegata moʼo uga ai te kāiga ke nātou vikiviki totatou ʼAtua, ia Sehova. — Pes. 148:12, 13.