Tou Kamata He ʼu Ako Faka Tohi-Tapu ʼAki Te Tohi Mauli O Heegata
1 Ko totatou ʼofa ki te hahaʼi ʼe tonu ke ina uga ai tatou ke tou liliu fakavilivili ʼo tokoni kia nātou ʼaē ʼe hālofia pea mo fia ʼiʼinu ki te moʼoni. (Mat. 5:6) ʼE tonu ke tou tokakaga fakalelei pea mo tou uga te fia logo ʼa te hahaʼi ʼaē ʼe palalau mo tatou, mo kapau ʼe mole tou loto ke pulinoa tanatou fia logo. Ko te teuteu, ko te kalavi ʼaia ʼo te fua manuʼia.
2 Ko tatatou fakatuʼutuʼu, ko te kamata ʼo te ʼu ako faka Tohi-Tapu. (Mat. 28:20) ʼI te ʼuluaki tā ʼo te tohi Mauli O Heegata neʼe tuʼu ʼi te kamata ʼo te tohi: “Ko te tohi ʼaenī, ko he tohi lelei ke fakaʼaogaʼi moʼo akoʼi ʼo te hahaʼi fuli, te kau tūpulaga peʼe ko te hahaʼi matutuʼa, tatau aipe pe neʼe mole loaloaga tanatou ako.” Ko te fakatuʼutuʼu ʼo te tohi ʼaia ke fai he ʼu ako faka Tohi-Tapu faigafua, ʼo faka fealagia kia nātou ʼaē ʼe foʼofoʼou ke nātou kau kiai. Ko te kamata ʼo he ʼu ako faka Tohi-Tapu ʼe fakalogo ki tatatou faiva ʼi te fai ʼo te ʼu ʼaʼahi.
3 E Feafeaʼi Hatatou Kamata He ʼu Ako Faka Tohi-Tapu? Mokā ʼe tou toe liliu, ʼi te agamāhani ʼe lelei ke tou faka ʼalutahi tatatou fai palalau mo he puani peʼe ko he fehuʼi neʼe lagaʼi ʼi tatatou ʼuluaki ʼaʼahi. E lagi neʼe koutou palalau ki te ʼaluʼaga ʼo te kau mate, ʼaki te fehuʼi ʼaenī, “Koteā te ʼamanaki ʼa te hahaʼi kua mamate ʼaē neʼe tou ʼoʼofa ai?” Koutou fakamahino age ko te fakatuʼuake ʼe mole ko he ʼamanaki ʼe mole hona fakatafitoʼaga; ʼe talanoa te Tohi-Tapu ki te lahi ʼo te hahaʼi neʼe kua ʼosi fakatuʼuake. Koutou toe vakaʼi te ʼu paki ʼi te ʼu pasina 167 ki te 169. ʼOsi ʼaia pea koutou talanoa ki te ʼu palakalafe 1 pea mo te 2 ʼi te pasina 166. Kapau ʼe hā mai tana fia logo, koutou fakahā ki ai ʼe koutou fia liliu mai ʼo hoko atu te fai palalau.
4 E lagi neʼe koutou palalau mo he tahi ʼi tokotou famili ʼe ina tuʼania te tuputupu ʼo te ʼu faigataʼaʼia ʼaē ʼe tau mo te ʼu tamaliki. ʼE feala ke koutou ʼui age, ʼaki ʼakotou ʼu palalau māhani:
◼ “Ko te ʼu mātuʼa fuli ʼe nātou loto ki te meʼa ʼaē ʼe lelei ki ʼanatou fānau. ʼE tuʼu ʼi te Tohi-Tapu te fakatotonu ʼe feala ke tokoni ki te ʼu mātuʼa ke nātou akoʼi tanatou fānau, ke nātou maʼu he maʼuli fīmālie ʼe ʼi ai hona ʼaoga pea mo hona fakatuʼutuʼu. Ko te tupuʼaga la ʼaia, ʼo tamatou fakatokagaʼi mālohi te ʼu famili ke nātou ako fakatahi te Tohi-Tapu. [Koutou fakaʼaogaʼi te palakalafe 23 ʼi te pasina 246.] Ko te mālama ʼaē ʼe koutou maʼu anai, ʼe feala ke ina ʼaumai te ʼu tapuakina heʼegata ki te famili katoa.” Lau ia Soane 17:3. Koutou ʼui age ʼe koutou toe fia ʼōmai ʼo fakahā ki te famili peʼe feafeaʼi te kamata ʼo he ako faka Tohi-Tapu.
5 Kapau ko koutou ko he tūpulaga peʼe ko he kaugā faka mafola foʼou pea neʼe koutou palalau fakanounou ki te ʼamanaki ʼo te Palatiso ʼi takotou ʼuluaki palalau, koutou ʼui age fēnei, ʼo koutou avahi te tohi ʼi te pasina 3:
◼ “ ʼE fakapapau mai e te Tohi-Tapu ko nātou ʼaē ʼe nātou fai te finegalo ʼo te ʼAtua ʼe feala hanatou maʼu te maʼuli ʼi he mālama ʼe maʼu ai anai te fiafia pea mo te tokalelei ohage ko tona tuʼu ʼi henī. Ko te tohi ʼaenī ʼe ina fakahā mai te meʼa ʼaē ʼe tonu ke tou fai ke feala ai hatatou fakafiafia ʼi te tapuakina ʼaia.” Koutou fakahā fakanounou age ki ai te faʼahiga fai ʼo te ako, pea koutou fai he faʼifaʼitaki.
6 ʼI totatou ʼuhiga tisipulo ʼa Sesu, ʼe maʼua ke tou tokoni ki te hahaʼi. (Lom. 10:14) Kapau neʼe tou tuku he tohi pe neʼe lelei hatatou fai palalau, ʼe maʼua ke tou uga te fia logo. (Mat. 9:37, 38) Kapau ʼe tou fakahoko fakalelei te maʼua ʼaia, ʼe feala hatatou maʼu te ʼu tapuakina ʼe haʼu mai ai.—1 Tim. 4:16.