ʼU Tūpulaga—Koutou Taki Fakapotopoto Tokotou Ala
1 Ko totatou Tāmai, ko Sehova, ʼe ko he tahi ʼe tokaga lelei ki te tuputupu fakalaumālie ʼa te kau tūpulaga. Ke nātou fakapotopoto ʼo fakalogo ki tana ʼu lao fonu ʼi te ʼofa, ʼo mole gata ʼaki pe te fakafiafia ʼo tona loto kae ʼe toe fakafimālie ki tonatou ʼu nefesi (Taag. 27:11; Mat. 11:28-30). ʼE nātou tuku ia Sehova ke ina akoʼi nātou ʼo taki tonatou ala. — Taag. 16:9.
2 Ko Kilisito Sesu neʼe ina foaki he faʼifaʼitaki ʼi tona temi tūpulaga ʼo ina maʼu te ʼofa ʼo te ʼAtua pea mo te ʼu tagata (Luka 2:52). ʼU tūpulaga ʼo te temi nei ʼe feala ke koutou holi ʼo fai feiā. Ko te taki fakapotopoto ʼo te ala ʼo te tūpulaga ʼe hā lelei mai ʼi tana kumi te ʼu meʼa fakalaumālie. ʼI te taʼu 12, neʼe ʼiloa Sesu ʼuhi ko tana holi ʼaē ʼo palalau ki niʼihi ʼo ʼuhiga mo Sehova (Luka 2:46, 47). Ko te kau tūpulaga ʼo te temi nei ʼe feiā foki mo nātou ke nātou holi ʼo fakamahino tanatou tui ki niʼihi. — w90 1/7 pp. 29-30; w87 1/12 p. 21.
3 Koteā te meʼa ʼaē ʼe feala ke fai e te kau tūpulaga moʼo “faka maʼuhigaʼi Sehova ʼaki ʼakotou ʼu meʼa fakamālama”? (Taag. 3:9.) He koʼe ʼe mole koutou hikihiki ʼo fakaʼaogaʼi tokotou temi māhani mo fai faka mafola pea mo akoʼi te logo lelei, peʼe ko te lagi toʼo ʼo te gāue pionie vaeluaʼi temi? ʼE feala anai ke koutou puna’maʼuli ki te tuputupu ʼo te fiafia pea mo ʼihi ʼu tapuakina ʼe haʼu mai te hikihiki ʼo te lahi ʼo te gāue ʼi te minisitelio. Ko te meʼa ʼaia ʼe ina foaki atu anai te fealagia ʼo gāue ʼi te gāue fai faka mafola mo he tokolahi ʼi te kau fai faka mafola. ʼE feala ai anai ke koutou kamata ʼi te temi nei ke koutou fakaafe he kau faka mafola peʼe tokolua ʼo gāue mo koutou ʼi te fakaʼosi vāhaʼa ʼaenī.
4 Ko te ʼu mātuʼa ʼe tonu ke nātou foaki he fakaloto mālohi lahi pea mo tokoniʼi tanatou fānau ke nātou fakaʼaogaʼi he ʼu faʼifaʼitaki pea mo kaugā faka mafola mo nātou ʼi te minisitelio. Ko ʼihi ʼi te kokelekasio kua māhani ʼe feala ke nātou fai he tonu mo ni tūpulaga ke nātou kaugā gāue mo nātou ʼi te minisitelio ʼi te ʼu ʼapi pea mo te ʼu ʼaʼahi pea mo te ʼu ako faka Tohi-Tapu. Ko te fakatahi mo te kau fai faka mafola ʼe mālohi fakalaumālie ʼe ina fakaloto mālohiʼi te kau tūpulaga pea mo tokoniʼi nātou ke nātou “laka fakavilivili ki te fakapotopoto”. — Hep. 6:1.
5 Ko te kilisitiano fuli ʼe ʼaoga ke hikihiki tana faʼahiga akonaki. Mo te kau tūpulaga fuli mole fakakeheʼi he tahi. ʼU tūpulaga ʼe koutou teuteuʼi fakalelei koa ʼakotou ʼu akonaki ʼaē ʼe ko he pilivilesio ʼe koutou fai ʼi te Ako ʼo te minisitelio faka teokalatike? ʼE ʼi ai koa hakotou polokalama tuʼumaʼu ʼo ʼuhiga mo te lautohi pea mo te ako takitokotahi ʼo toe feiā foki mo te metitasio? ʼE koutou maʼuliʼi fakalelei koa te ʼu manatu ʼaē ʼe koutou vakaʼi? ʼE koutou teuteuʼi lelei koa te ʼu fono ke koutou mahino katoa anai ki te ʼu manatu fuli ʼaē ka vakaʼi pea mo fai hakotou ʼu tali? ʼE koutou tohi koa te ʼu puani ʼaoga ʼaē ʼe fakahā lolotoga te ʼu fono pea mo ʼahiʼahi fakaʼaogaʼi te ʼu manatu ʼaē ʼe tuʼu ʼi tatatou Minisitelio ʼo te Puleʼaga?
6 ʼAua naʼa koutou tuku te ʼu fealagia ʼaē ʼo te kau ki te fakamaʼa ʼo te Fale ʼo te Puleʼaga pea mo tokoniʼi te hahaʼi ʼaē kua matutuʼa peʼe ko te ʼu tuagaʼane māʼimoa pea mo te ʼu tēhina ʼo fai tanatou menasi peʼe ko niʼihi ʼatu ʼu faʼahiga meʼa. ʼAua naʼa koutou meʼa noaʼi te foaki ʼo takotou ʼu meʼa ʼofa moʼo lagolago ʼo te totogi ʼo te ʼu meʼa ʼo te Fale ʼo te Puleʼaga pea mo te gāue faka malamanei ʼo te Sosiete.
7 Kapau ʼe tou ‘nonofo tokaga ʼo ʼalu tahi mo te folafola ʼa Sehova’ pea mo tuku ke ina taki totatou ala, ʼe ina taki anai tatou ki te manuʼia pea mo fakatuputupu ʼotatou ʼu pilivilesio ʼi te gāue. — Pes. 119:9.