Tou Faiga Ke Tou Maʼu He Tahi ʼe Fakalogo Fakalelei
1 Tokolahi te hahaʼi ʼe felāveʼi mo tatou ʼi totatou minisitelio ʼi te ʼu ʼapi ʼe mole nātou manatu ki te faʼahi faka laumālie. ʼE feala pe ke nātou tuʼaniaʼi tonatou famili, te ʼu faigataʼaʼia faka ekonomike, peʼe ko te ʼu faigataʼaʼia takitokotahi. Moʼo kamata ʼo te fai palalau, ʼe lelei age ke palalau ki he ʼu fihifihia ʼe felāveʼi mo te hahaʼi fuli. ʼE feala ke fakaʼaogaʼi he ʼu fehuʼi moʼo uga ʼo te fia logo, koteʼuhi ke faka fealagia kia ia ʼaia ke kau ki te fai palalau. Ko te ʼu fehuʼi ʼaē ke tou ʼiloʼi ai tanatou manatu ʼaē ʼe mole fakahohaʼa ki te hahaʼi ʼe ko he ʼu fehuʼi lelei ia.
2 ʼE feala ke koutou maʼu he tahi ʼe fakalogo fakalelei ʼaki hakotou fakaʼaogaʼi te palalau ʼaenī:
◼ “Mālo tou maʼuli. Ko toku higoa ko _____. ʼE ʼau vāhaʼa fale pe mo koe. Tokolahi te hahaʼi neʼe palalau mo ʼau ʼi te uhu ʼaenī ʼe nātou fia logo ki te meʼa ʼaenī [fakahā he ʼu logo foʼou neʼe hoko ʼi te vāhaʼa fale peʼe ko he meʼa neʼe hoko ʼi te koga meʼa ʼaia]. ʼI tau manatu neʼe loto koa te ʼAtua ke fēnei te malamanei?” Tuku ke fai mai hana tali. ʼO ʼuhiga mo te faʼahi ʼaia ʼe feala ke koutou fakahā age te kiʼi pepa lotu Fiafia ʼi he maʼuli faka famili. Koutou vakaʼi fakanounou te paki ʼi te pasina 1 pea mo te manatu ʼo te ʼu palakalafe 1 ki te 3 mokā ʼe fealagia te temi. ʼO feala ai leva ke koutou fakahā age te tohi Mauli heegata. ʼE feala hakotou fakatokagaʼi age kia te ia te Pesalemo 37:9, 10 ʼaē ʼe tuʼu ʼi te pasina 157 pea mo lau age te vaega ʼaia ʼi te tohi. ʼAki te fakaʼaogaʼi ʼo te ʼu paki ʼi te ʼu pasina 156 ki te 157, ʼaē ʼe fakamahino ai te ʼu ʼaluʼaga faitotonu ka tuʼu ʼi te kele mokā pulihi anai te agakovi.
3 Tou teuteu tuʼumaʼu ʼo fakahā Te Tule Leʼo pea mo te nusipepa ʼaē ko te Koutou ʼaʼala! ʼI te potu fuli ʼe tuʼaniaʼia e te hahaʼi te puli ʼaē ʼo te ʼu aga ʼe tonu ke fai. Kapau ʼe koutou lau te nusipepa ʼaē ko te Koutou ʼaʼala! ʼo te ʼaho 8 ʼo ʼaukusito, koutou fili he ʼu manatu ʼe feala ke uga ai te fia logo ʼa te hahaʼi ʼi tokotou telituale. ʼAua naʼa talanoa fualoa ki te ʼu meʼa kovi ʼaē ʼe hoko, koutou fakahā age kia ia ʼaē ʼe fai palalau mo koutou te alatike “Le guide moral parfait,” pea ke koutou palalau ki te ʼu meʼa ʼaē ʼe ʼaoga ʼo ʼuhiga mo te ʼu tapuakina ʼe maʼu ʼi te mulimuli ʼaē ki te tokoni ʼo te Folafola ʼa te ʼAtua. ʼI te māhina ki muli age, ka ʼe koutou fakahā te nusipepa ʼaē ko te Koutou ʼaʼala! ʼo te ʼaho 22 ʼo ʼaukusito, fakahā age te alatike “Quand toutes les races vivront ensemble dans la paix.” Koutou fakahā age te tokoni ʼa te Tohi-Tapu ʼaē moʼo fakahoko ʼo te felogoi lelei ʼi te hahaʼi fuli. Tatau aipe pe ko te ʼu alatike foʼou peʼe ko te ʼu alatike ʼāfea ʼo Te Tule Leʼo pea mo te nusipepa ʼaē ko te Koutou ʼaʼala! ʼe feala tona fakahā ʼi te temi fuli ʼo mole gata ʼaki pe te ʼu ʼaho makehe ʼaē neʼe fakatuʼutuʼu moʼo tufa ʼo te ʼu nusipepa ʼaia.
4 Tou manatuʼi ko tatatou fakatuʼutuʼu ʼe ko te lagaʼi ʼo te fia logo ki te logo ʼo te Puleʼaga. Ke tou maʼu he tahi ʼe fakalogo fakalelei, ʼe tonu muʼa ke tou faigaʼi tana fia logo pea mo uga tana ʼu manatu. Ko te meʼa ʼaia ʼe ina ʼekenaki anai te hahaʼi ʼaē ʼe hage ko he ʼu ōvi ke nātou fia “logo ki te meʼa ʼe talanoa ki ai te ʼAtua moʼoni ko Sehova” ʼo ʼuhiga mo tana fakatuʼutuʼu ki te malamanei. — Pes. 85:8.