Ko Te Aga Fea Koa ʼAē ʼe Koutou Fakahā?
1 Neʼe fakaʼosi te tohi ʼa Paulo ki te kokelekasio ʼo Filipe ʼaki te palalau fakaloto mālohi ʼaenī: “Ko te ʼofa heʼe tau ʼo te ʼAliki ko Sesu Kilisito ke fakatahi mo te aga ʼaē ʼe koutou fakahā.” (Filp. 4:23) Neʼe ina vikiʼi ia nātou ʼo ʼuhiga mo tanatou fai fakamalotoloto ʼo faka mafola te logo lelei ʼo feiā ai foki mo tonatou fiafia, mo tanatou fetokagaʼaki, ʼaki te ʼofa.—Filp. 1:3-5; 4:15, 16.
2 ʼE tonu ke tou faiga ke tou fakahā te aga ʼaia ʼi tatatou kokelekasio. Mokā ʼe faiva te kau fai faka mafola, mo nātou agaʼofa, pea mo tali kāiga, ʼe tupu ai he aga ʼe hā lelei kia nātou ʼaē ʼe nātou fakatokagaʼi tatatou aga. Ko he aga ʼe lelei pea mo fonu ʼi te ʼofa ʼe fakatupu ai te logo tahi pea mo te ʼu tuputupu fakalaumālie. (1 Ko. 1:10) Ko he aga ʼe mole lelei ʼe tupu ai te lotovaivai pea ʼe mole maʼu ai te fiafia.—Fkhā. 3:15, 16.
3 Ko Te ʼu Tagata ʼĀfea ʼe Nātou Tuku He Faʼifaʼitaki: Ko te ʼu tagata ʼāfea ʼe nātou maʼu te maʼua ko te taupau ʼo he ʼatamai ʼe lelei ia nātou pea mo tonatou kokelekasio. Koteā tona tupuʼaga? Koteʼuhi ko tanatou manatu pea mo tanatou aga ʼe feala ke tokagaʼi e te kokelekasio. ʼE tou leleiʼia te ʼu tagata ʼāfea ʼaē ʼe faiva ʼi te gāue faka mafola, ʼaē ʼe nātou tali tatou ʼaki he loto fiafia pea mo he palalau ʼe lelei, pea mo nātou foaki mai he ʼu tokoni ʼe lelei pea mo ʼaoga, peʼe nātou foaki mai kia tatou takitokotahi peʼe nātou fai mai muʼa ʼi te potu ʼaē ʼe fai ai te akonaki.—Hep. 13:7.
4 ʼIo, ko tatou fuli ʼe tonu ke tou kaugā gāue fakatahi, ke maʼu ʼi te kokelekasio te aga ʼaē ʼe lelei, te tali kāiga, te faiva, pea mo te fakakaukau fakalaumālie. Ko tatou takitokotahi, ʼe feala ke tou fakahā totatou fiafia pea mo totatou ʼofa ʼi tatatou fakatahi mo ʼihi. (1 Ko. 16:14) ʼE mole tonu ke tou fai he ʼu fakapalatahi ia tatou ʼuhi ko te taʼu, te lanu, te poto, peʼe ko te ʼaluʼaga faka sosiale. (Vakaʼi ia Efesi 2:21.) ʼUhi ko tatatou ʼamanaki, ʼe feala ke tou maʼu he aga ʼe hā ai te fiafia, te tali kāiga, pea mo te faiva ʼi te minisitelio.—Lom. 12:13; Kol. 3:22, 23.
5 Ko nātou fuli ʼaē ʼe fakatahi mo tatou, ʼo kau ai mo nātou ʼaē ʼe foʼofoʼou mai, ʼe tonu ke nātou tokagaʼi ʼe tou tali ia nātou pea mo nātou logoʼi te ʼofa pea mo te tokaga fakatautehina. ʼAki totatou minisitelio pea mo tatatou maʼuliʼi te ʼu kalitate faka Kilisitiano, ʼe tou fakamoʼoni ko te kokelekasio ʼe “ko te pou pea mo te lagolago ʼo te moʼoni.” (1 Tim. 3:15) ʼE tou maʼu foki te fīmālie ʼi te faʼahi fakalaumālie ʼaki “te tokalelei ʼa te ʼAtua” ʼaē ʼe ina taupau ʼotatou ʼu loto pea mo ʼatatou ʼu fakakaukau. (Filp. 4:6, 7) ʼOfa pe ke tou gāue mālohi ʼo fakahā ia te taʼi aga ʼaia, ʼaē ʼe feala ai ke tou maʼu te ʼofa heʼe tau ʼo Sehova ʼaki te ʼAliki ko Sesu Kilisito.—2 Tim. 4:22.