Ko Te Folafola ʼo Te Puleʼaga—ʼE Tou Mahino Ki Tona ʼUhiga
1 ʼI tana lea faka polofeta ʼo ʼuhiga mo te tagata tūtū ʼakau, neʼe ʼui e Sesu ko te pulapula ʼaē ʼe to ʼi “te kele lelei” ʼe fakatātā “kia ia ʼaē ʼe logo ki te folafola pea mahino ki tona ʼuhiga.” (Mat. 13:23) ʼI te hili ʼo tatatou logo ki te fakamatala ʼo ʼuhiga mo te Puleʼaga, kua tou mahino koa “ki tona ʼuhiga”? Neʼe lave feafeaʼi ki totatou maʼuli? Kua tou fakamuʼamuʼa koa te ʼu meʼa ʼe ʼaoga ki te Puleʼaga, ʼo tou fakahā ʼaki ai ʼe tou mahino ki te ʼuhiga ʼo te logo?
2 Ko te mahino fakalelei ki te logo ʼo te Puleʼaga ʼe fakamaʼua ke tou ako takitokotahi. ʼE ʼaoga ke tou toʼo he temi moʼo metitasio ki te meʼa kai fakalaumālie ʼaē ʼe foaki mai. Ko te lau fakavilivili ʼo Te Tule Leʼo ʼe fakatatau ki te kai fakavilivili ʼo he meʼa kai ʼe lelei pea mo ʼaoga. ʼE koutou toʼo koa he temi ke koutou leleiʼia te meʼa kai fakalaumālie? Ke feala hatatou maʼu te fua lelei ʼe lahi age, ʼe tonu ke tou loto ki ai pea ke tou ʼuakai ki te ʼu meʼa kai fakalaumālie. Kapau ʼe mole koutou maʼu te faʼahi ʼaia ʼe feala ke fakasiʼisiʼi e te tahi age ʼu gāue te ʼu lelei ʼo te ako takitokotahi, peʼe nātou toʼo te temi ʼaē ʼe ʼaoga ke fai ai tatatou ako. Ko te fakatuʼutuʼu ʼo he polokalama lelei ʼo ʼuhiga mo te ako ʼe mole ko he meʼa faigafua. Logope la ia te fakamaʼua ʼaē ke tou maʼu te fakapotopoto ʼi te ʼu meʼa ʼaē ʼe tou ʼuluaki faiga kiai, ko te ʼu koloā fakalaumālie ʼaē ʼe tou maʼu ʼe maʼuhiga age ia.—Taag. 3:13-18; Kol. 1:27.
3 Ko te kaupepa veliveli ʼaē Tou Vakaʼi Te Tohi-Tapu ʼi Te ʼAho Fuli ʼe tokoni kia tatou ʼi te ʼaho fuli ke tou maʼu he fakatuʼutuʼu lelei, he ʼu manatu ʼe ʼaoga ʼo ʼuhiga mo te Puleʼaga. Ko nātou ʼaē ʼe nātou “ ʼiloʼi te maʼuhiga ʼo te ʼu meʼa fakalaumālie kia nātou” ʼe nātou fakatuʼutuʼu he ʼu kiʼi minuta ʼi te ʼaho fuli moʼo lau ʼo te koga tohi ʼo te ʼaho fuli pea mo tona fakamatala. (Mat. 5:3) ʼE lahi te ʼu vaega ʼe fakamahino ai te ʼu agaaga kehekehe ʼo te Puleʼaga. Ohage la, ko te ʼaho 22 ʼo Novepeli 1994, ko te koga tohi ʼo te ʼaho ʼaia ko Mateo 13:4. Neʼe fakatokagaʼi e te fakamatala te ʼamanaki ʼo te Puleʼaga pea neʼe ina fakamanatuʼi mai kia tatou te ʼu fakakaugā mo ʼotatou kāiga pea mo ʼotatou vāhaʼa fale ʼaē ʼe mole lelei. ʼI te ʼu Petele ʼi te malamanei, ʼe nātou fakaʼaogaʼi te ʼu minuta e 15 moʼo lau ʼo te koga tohi ʼi te uhu fuli, ʼo fakahā ai te ʼu tapuakina ʼe maʼu pea mo fakahā ai te maʼuhiga ʼo te fai fakatahi ʼo te koga tohi ʼo te ʼaho fuli. Kua koutou fakatuʼutuʼu koa mo tokotou famili te faʼahi ʼaia ʼi takotou polokalama ʼi te ʼaho fuli?
4 ʼI te tuputupu ʼo takotou fakafetaʼi ʼo ʼuhiga mo te Puleʼaga, ʼe ʼi ai anai he meʼa fakaloto mālohi ʼe lahi age, ʼo ʼuhiga mo te fakahā ʼo te logo ʼo te Puleʼaga ki niʼihi. Ko Te Tule Leʼo pea mo te Réveillez-vous! ʼe nā foaki mai te meʼa ʼe ʼaoga ki totatou ʼatamai, te ʼu fakamatala ʼo te meʼa ʼe hoko ʼi te temi ʼaenī. ʼE nā tokoni kia tatou ke tou mahino lelei ki te ʼaoga ʼaupito ʼo te Puleʼaga ʼo te ʼAtua ki te malamanei. ʼE nā tokoniʼi tatou ke tou liliu ko he hahaʼi ʼe aga fakalaumālie, ʼaē ʼe tou “maʼu te manatu ʼa Kilisito.” (1 Ko. 2:15, 16) Ko te ʼu meʼa fuli ʼaenī ʼe feala ke fakamālohi ai tatatou ʼamanaki pea mo fakatuputupu tatatou faiva ʼo tou kau ki te fakahā ʼo te ʼamanaki ʼo te Puleʼaga ki niʼihi.—1 Pe. 3:15.
5 ʼE maʼuhiga tatatou mahino takitokotahi ki te ʼuhiga ʼo te logo ʼo te Puleʼaga. Ko te Puleʼaga ʼe ko te faʼahi ʼaia ka fakaʼaogaʼi e te ʼAtua moʼo fakatuʼu ʼo tana pule, moʼo fakagata ʼo te agakovi, pea moʼo fakatuʼu ʼo te mālama foʼou—te palatiso. Neʼe fakatotonuʼi mai e Sesu ke tou fakamuʼamuʼa te faʼahi ʼaia ʼi totatou maʼuli. ʼE tonu ke tou kumi te hahaʼi ʼe hage ko he ʼu ōvi, ke tou fakahā kia nātou te maʼuli ʼe tou maʼu anai ʼi te pule ʼa te Puleʼaga. (Mat. 6:10, 33) Ke lahi te ʼu meʼa ʼe koutou fai ke koutou leleiʼia te ʼu tapuakina ʼe tuku mai e te Puleʼaga.