Ko Te Logo Lelei Ki Te Hahaʼi Agavaivai
1 ʼE tou maʼuli nei ʼi te temi ʼaē ka fakahoko ai te fakamāu. (Esk. 9:5, 6) ʼE maʼuhiga ʼaupito ke fakahā te faʼahi ʼaia ki te hahaʼi agavaivai ʼi te ʼu potu fuli ke feala hanatou teuteu ki te meʼa ʼaē ka hoko mai. ʼI te manavaʼofa ʼo Sehova neʼe ina fakatotonu ki tana hahaʼi ke nātou “fakahā ki te kau agavaivai he logo lelei.” (Is. 61:1, 2) ʼE tokoni ʼatatatou ʼu nusipepa kia tatou ke tou tala te logo lelei ʼaia ki te ʼu potu mamaʼo.
2 Ko Te Tule Leʼo pea mo te Réveillez-vous! ʼe nā foaki te meʼa kai fakalaumālie ʼe lelei moʼo fakamālohiʼi pea mo uga tatou. Ko Te Tule Leʼo ʼe ina fakafimālieʼi te hahaʼi agavaivai ʼaki te logo lelei ʼaē ko te Puleʼaga ʼo te ʼAtua kua ʼamanaki ke ina fakaliliu te kele ko he palatiso. ʼE fakatuputupu e te Réveillez-vous! te falala ki te ʼu fakapapau ʼa te Tupuʼaga ʼo ʼuhiga mo te tokalelei pea mo te fīmālie ʼi te mālama foʼou. Ko te lahi ʼo te tufa ʼo te ʼu nusipepa ʼaia ʼe ko he faʼahiga fakatuʼutuʼu moʼo foaki fakavilivili te logo lelei ki te hahaʼi agavaivai. Koteā te ʼu puani ʼe feala ke tou faka maʼuhigaʼi te ʼu nusipepa foʼou?
3 ʼE feala ke koutou fakahā “Te Tule Leʼo” ʼo te ʼaho 1 ʼo Maio ʼi te alatike ʼaenī “Tou Maʼu He ʼu Fua Lelei ʼi Te Lau ʼo Te Tohi-Tapu ʼi Te ʼAho Fuli” pea mo koutou fai te fehuʼi ʼaenī:
◼ “ ʼI tau manatu koteā koa te ʼu fua lelei ʼe tou maʼu mokā tou lau te Tohi-Tapu? [Koutou tuku ke fai mai hana tali.] Ko te Tohi-Tapu, ia Loma 15:4, ʼe tokoni mai kia tatou ke tou fakakaukauʼi te fehuʼi ʼaia. [Koutou lau age ia Loma 15:4.] Tokolahi te hahaʼi ʼi totatou kolo ʼe ʼi ai tanatou Tohi-Tapu, kae ʼe tokosiʼi ia nātou ʼaē ʼe nātou lau tuʼumaʼu. ʼE mātou faka tui ko te falala moʼoni e tahi ʼo ʼuhiga mo te temi ka haʼu ʼe tuʼu ʼi te Tohi-Tapu, pea ʼe tou maʼu anai te ʼu fua lelei mo kapau ʼe tou lau.” Koutou fai mo he tahi age ʼu fakamahinohino ʼe ʼalutahi mo te fai palalau, pea koutou tuku age te ʼu nusipepa pea mo fai he apone.
4 Ko “Te Tule Leʼo” ʼo te ʼaho 15 ʼo Maio ʼe talanoa ki te alatike maʼuhiga pea koʼeni tona kupu tāfito: “Ko He Maʼuli Foʼou Maʼa Tatatou ʼu Kui.” ʼE feala anai ke koutou lagaʼi tana fia fagono ʼaki te ʼu ʼuluaki palalau ʼaenī:
◼ “Tokolahi ʼe nātou tautau feʼekeʼaki peʼe neʼe feafeaʼi tonatou ʼu kui. Koteʼuhi kua nātou mamate pea mo pupuli, tokolahi ʼe nātou ʼui ko te faʼahi ʼaia ʼe mole nātou ʼiloʼi anai ʼi he temi. ʼE ʼi ai koa la ʼi tau manatu he fealagia ke tou ʼiloʼi anai totatou ʼu kui?” Tuku ke fai mai hana tali. Koutou lau age ia Soane 5:28, 29, pea koutou fakamahinohino age ko te ʼAtua neʼe ina fakapapau ke ina foaki age kia nātou he maʼuli foʼou ʼi te palatiso fakakelekele.
5 Kapau ʼe koutou tuku te ʼu nusipepa ʼi muʼa ʼo te ʼaho 14 ʼo Maio, koutou tokakaga lelei ke koutou maʼu te ʼu Logo ʼo Te Puleʼaga N° 34 pea ke koutou tufa kia nātou fuli ʼaē neʼe mole heʼeki nātou maʼu. ʼE tonu anai ke tou nofo teuteu tuʼumaʼu ʼo kau ki te tufa ʼo tatatou ʼu tohi faka Tohi-Tapu, ʼo mahino kia tatou ʼe feala ke lau e niʼihi ʼo tonatou famili, ʼo toe feiā aipe mo ʼonatou ʼu kaumeʼa ʼaē ʼe feala ke ʼōmai kio nātou. (1 Tim. 6:18) Ko te logo lelei ʼaē ʼe tou foaki ki te hahaʼi agavaivai ʼe feala ke ina hāofaki nātou.—1 Tim. 4:16.