ʼE Tou Nonofo ʼAlaʼala Koa—Ke ʼAua Naʼa Fakahēʼi Tatou e Te ʼu Fakafiafia?
1 Neʼe tuku mai e Sesu te fakatokaga ʼaenī: “Ke koutou nonofo ʼalaʼala . . . ke feala ai hakotou hāo” ʼi te ʼu malaʼia ʼaē ʼe tonu ke hoko moʼoni. (Luka 21:36) ʼE tou maʼuʼuli nei ʼi te ʼu temi fakatupu tuʼutāmaki ʼaupito ʼo te hisitolia ʼo te tagata. ʼE hoko te ʼu tuʼutāmaki kia nātou ʼaē ʼe tulemomoe ʼi te faʼahi fakalaumālie. Ko te faigataʼaʼia ʼaia ʼe hoko kia tatou takitokotahi. Neʼe talanoa ia Sesu ki te meʼa kai, te ʼinu, pea mo te ʼu faigataʼaʼia ʼo te maʼuli ʼo te ʼaho fuli. Koteā te tupuʼaga ʼo te talanoa ʼa Sesu ki te ʼu meʼa ʼaia? Koteʼuhi ʼe feala pe foki ke tou tuʼaniaʼi te ʼu meʼa ʼaia, ʼo tou fakafiafia, pea mo tou tulemomoe ai ʼi te faʼahi fakalaumālie.
2 Te ʼu Fakafiafia Māhani: Ko ʼihi ʼe lahi fau tonatou maʼumaʼua ʼi te ʼu fakafiafia, peʼe ko he fakafiafia ʼe mole lelei, peʼe kua lahi fau tanatou sio televisio. ʼE mahino ia, ko te kumi muʼa ʼo te Puleʼaga ʼe mole faka ʼuhiga ʼaki ʼe tonu ke tou līaki te ʼu fakafiafia fuli. Kapau ʼe tou maʼu te fakapotopoto pea mo te fakaʼaluʼalu lelei, ʼe feala ke leleiʼia te ʼu fakafiafia. (Vakaʼi ia 1 Timoteo 4:8.) Kae ʼe liliu te ʼu fakafiafia ko he ʼu meʼa ʼe nātou fakalelu te ʼu meʼa ʼaē ʼe tonu ke tou fai, mokā ʼe liliu ia ko he koga maʼuhiga ʼo totatou maʼuli, ʼo ina toʼo totatou temi, tatatou falā, peʼe ko te temi ʼaē ʼe tou kau ai ki te gāue faka mafola ʼo te Puleʼaga.
3 Ko te tahi fakafiafia māhani ʼe ina uga te tulemoe fakalaumālie, ko te holi ʼaē ki te ʼu meʼa fakamālama ʼaē ʼe mole hona ʼaoga. ʼE ina fakamaʼuaʼi he tahi ke lahi tana fakaʼaogaʼi tona temi ʼi te gāue fakamālama, pea ʼe tāʼofi ai tana mulimuli ki te ʼu meʼa fakalaumālie. Ko ʼihi kua puli ia nātou tanatou ʼu fakatuʼutuʼu fakalaumālie ʼi tanatou maʼumaʼua ʼi te kumi ʼo te ʼu meʼa fakamālama, ke feala ai hanatou maʼu te ʼu meʼa ʼe ʼaoga ki te maʼuli. Logope la ʼe ʼaoga kia tatou “te meʼa kai mo te meʼa kofu,” kae ʼe tonu ke tou tokakaga ke ʼaua naʼa tou fakatuputupu te manako ki te falā, ʼaē ʼe feala ke ina fakamamaʼo tatou mai te tui. (1 Tim. 6:8-10) Kapau ʼe mole haga ʼotatou ʼu mata ki te ʼu meʼa ʼo te Puleʼaga, ʼe feala ke tou liliu ʼo meʼa noaʼi te ʼu meʼa fakalaumālie ʼo totatou famili, pea ʼe mole tou fakahoko totatou minisitelio.—1 Tim. 5:8; 2 Tim. 4:5.
4 Ko ʼihi ʼe nātou tuku ke hēʼia tonatou ‘ ʼu loto ʼi te ʼu tuʼania ʼo te maʼuli’ ʼo tupu ai tanatou momoe ʼi te faʼahi fakalaumālie. (Luka 21:34) ʼI ʼihi temi, ʼe tou tuʼania ʼuhi ko te mahaki fakasino peʼe ko he maʼuli faka famili fakatupu mamahi. Kae ko te ʼu faʼahiga tuʼania takitokotahi ʼaia ʼe mole tonu ke nātou fakavaivai tatatou tokaga ʼaē kua tou fakaōvi ki te fakaʼosi ʼo te tuʼu ʼo te ʼu faʼahiga meʼa ʼaenī.—Maleko 13:33.
5 ʼE mole he meʼa ʼe lahi age anai tona leleiʼia e te Tevolo ʼi tana loto ʼaē ke tou maʼuli ʼi he moemisi, ʼaki hatatou mulimuli ki he ʼu meʼa ʼe holi kiai te mālama. Ke feala hatatou nonofo ʼalaʼala ʼi te faʼahi fakalaumālie, ʼe tonu ke tou tauʼi te ʼu meʼa ʼaia. ʼE tou ʼiloʼi ko ‘te ʼaho ʼo Sehova ʼe hoko mai ohage ko he tagata kaihaʼa,’ pea ʼe ʼaoga ke tou “nonofo ʼaʼala pea mo tou aga fakapotopoto.” (1 Tes. 5:2, 6) Kapau ʼe tou fakatokagaʼi he ʼu fakaʼiloga ʼo tatatou māʼumoe fakalaumālie, ʼe maʼuhiga ke tou “līaki te ʼu gāue ʼa te fakapōʼuli.”—Loma 13:11-13.
6 Te ʼu Tokoni Kia Tatou Ke Tou Nonofo ʼAlaʼala: Koteā te ʼu faʼahiga tokoni ʼaia? Ko te faikole ʼe maʼuhiga. ʼE tonu ke tou faikole tuʼumaʼu. (1 Tes. 5:17) Ko te fakatahitahi mo te kokelekasio faka Kilisitiano ʼe ina ‘uga [anai] tatou ki te ʼofa pea mo te ʼu gāue lelei.’ (Hep. 10:24) Ko te sivi fakahagatonu tuʼumaʼu ʼo kita ʼe feala ke tokoni ai kia tatou ke tou ʼiloʼi te maʼuhiga ʼo te tauʼi ʼo totatou ʼu vaivaiʼaga. (2 Ko. 13:5) Ko te fakamāmāhani ʼo fai he ako takitokotahi ʼe lelei, ʼe tokoni anai kia tatou ke tou ‘kai ki te folafola ʼo te tui.’ (1 Tim. 4:6) Kapau ʼe tou mālohi, ʼe feala hatatou falala ʼe tou lava tekeʼi anai te ʼu fakafiafia ʼaē ʼe nātou fakaleluʼi tatou ke feala hatatou ‘nonofo ʼalaʼala, pea mo tou tāʼofi maʼu ʼi te tui.’—1 Ko. 16:13.