Ke ʼAua Naʼa Fakaleluʼi Tatou ʼi Tatatou Gāue ʼAē Kia Sehova
1 “Manuʼia te hahaʼi ʼaē ko tonatou ʼAtua ko Sehova!” (Pes. 144:15) Ko te ʼu palalau ʼaia ʼa te Hau ko Tavite ʼe kei moʼoni koa, māʼiape la te ʼu ʼaho agakovi ʼaenī? (Ef. 5:16) ʼIo! Ko te kau Kilisitiano ʼe kei nātou maʼu te fiafia ʼi tanatou kaugana ʼaē kia Sehova. ʼE mole faigafua tuʼumaʼu kia tatou. ʼE fakatupu e Satana te ʼu faigataʼaʼia lolotoga te “ ʼu temi faigataʼa,” kae ʼe mole tou lotovaivai. (2 Tim. 3:1, 2) Ko te ʼu ʼaluʼaga ʼo te maʼuli ʼaē ʼe ʼāsili ʼosi tona kovi, ko te tahi ʼaia fakamoʼoni ko te temi kua fakalogo ki te pule ʼa te Puleʼaga ʼo te ʼAtua, ʼaē ka ina fetogi te mālama fakalialia ʼāfea ʼaki te mālama foʼou ʼaē ʼe maʼa. (2 Pe. 3:13) Ko te fakapōʼuli ʼo te mālama ʼaenī ʼe mole ina faka lotovaivai peʼe ina molehi te mālohi ʼo tatatou ʼamanaki fakafiafia; kae, ko tatatou falala ki te Puleʼaga ʼe lahi ake tona gigila. ʼE mole koutou fiafia koa ʼi te kaugana kia Sehova ohage he ʼu nofoʼaga mālama ʼi te mālama fakapōʼuli ʼaenī?—Filp. 2:15.
2 ʼE tonu ke tou tokaga takitokotahi peʼe feafeaʼi tatatou kaugana ʼaē kia Sehova. Koteā tona tupuʼaga? Koteʼuhi ko Satana ko he tahi ʼe lahi ʼaupito tana Fakalelu. ʼE fakaliliu fēnei e te tikisionalio te kupu “fakalelu” ki te “fakamaliu kehe,” “toho peʼe fakahaga (ohage ko te faigaʼi ʼo he tahi) ki he faʼahiga meʼa peʼe ki he ʼu faʼahi kehekehe ʼi te temi pe e tahi,” pea “fakamafuli peʼe ko te fakamaveuveu ʼo tana ʼu manatu peʼe ko te ʼu meʼa ʼaē ʼe holi ki ai.” Talu mai te lī ifo ʼo Satana ki te kele, neʼe feala ai tana “kākāʼi” ia te malamanei. ʼE lahi te ʼu faʼahiga meʼa ʼe ina fakaʼaogaʼi moʼo fakamaliu ʼo te hahaʼi ke nātou fakamamaʼo mai te ʼu moʼoni ia ʼaho nei. (Fkhā. 12:9) Logope la te faiga ʼa te kau Fakamoʼoni ʼa Sehova ʼi te fai faka mafola ʼo te Puleʼaga ʼi te sēkulō kua hili, ko te tokofia koa ʼaē ʼe mahino ki te maʼuhiga ʼo te tāpuhā ʼo te huafa ʼo te ʼAtua pea mo te fakatonutonu ʼo tana pule ʼaki te Puleʼaga ʼo te ʼAtua? Ko te tokosiʼi. (1 Soane 5:19) Kapau ʼe lava fakaleluʼi e Satana te lauʼi miliale hahaʼi ʼi te kele, ko te tuʼutāmaki ʼaē ʼe hoko tuʼumaʼu, ko tana fakahēʼi tatou peʼe ina fakamafuli tatou ke feala ai hatatou līaki tatatou tauhi ʼaē kia Sehova. ʼI meʼa fakaʼofaʼofa leva, ko ʼihi ʼi ʼotatou ʼu tēhina neʼe fakahēʼi e Satana ʼaki te ʼu fakafiafia. Neʼe nātou faka fealagia ki tanatou fakakaukau ke maliu ki he ʼu faʼahi kehekehe. Ia ʼaho nei ʼe tou maʼu te atu ʼu fakafiafia kehekehe. Tou vakaʼi muʼa he faʼahi ʼi te ʼu fakafiafia ʼaia.
3 Te ʼu Faigataʼaʼia Faka Ekonomike Pea Mo Te ʼOfa Ki Te ʼu Meʼa Fakamālama: ʼI te ʼu ʼatu fenua ʼi te kele, ko te somasi pea mo te totogi kovi ʼo te ʼu meʼa ʼe ʼaoga ki te maʼuli ʼe fakatupu ai te tuʼania. ʼE moʼoni, ʼe tonu ke maʼu hatatou meʼa kai, hotatou meʼa vala, pea mo hotatou nofoʼaga mo totatou famili. Kae kapau ʼe lahi tatatou tuʼaniaʼi te ʼu meʼa ʼaē ʼe ʼaoga ki te maʼuli, ko te ʼu faʼahi ʼaia ʼe nātou taki anai tatatou fakakaukau. Ko totatou maʼuli fakasino ʼe feala ke liliu ia ʼo maʼuhiga age ʼi tatatou lagolago ʼaē ki te Puleʼaga. Ko te ʼapositolo ko Paulo neʼe ina foaki te tokoni ʼo ʼuhiga mo te faʼahi ʼaia ia Hepeleo 13:5, 6. ʼE fakapapau mai e Sesu Kilisito kia tatou ko nātou ʼaē ʼe nātou ʼuluaki kumi te Puleʼaga ʼe mole tonu ke nātou tuʼaniaʼi he meʼa; ʼe foaki e Sehova te meʼa ʼaē ʼe ʼaoga moʼoni kia nātou. (Mat. 6:25-34) Ko te ʼu pionie pea mo ʼihi ʼe gāue katoa ʼi te malamanei ʼe feala ke nātou fakamoʼoni ia te faʼahi ʼaenī.
4 Ko te mālama ʼa Satana ʼe ina fakaloto mālohiʼi te ʼofa ki te ʼu meʼa fakamālama. Ko te maʼu koloā peʼe ko te hāofaki ʼo tonatou sino ʼe ko te mālohi ʼaia ʼe taki ai te maʼuli ʼo te lauʼi miliona hahaʼi. Ohage pe ko te ʼu fakafiafia neʼe hoko ʼi te temi ʼo Sesu ʼe toe feiā aipe ia ʼaho nei. Neʼe fehuʼi age e he tūpulaga maʼu koloā kia Sesu pe koteā te meʼa ke ina fai ke ina maʼu ai te maʼuli heʼegata. Neʼe tali ake e Sesu: “Kapau ʼe ke loto ke ke haohaoa [peʼe, katoa] ʼalu ʼo fakatau te meʼa ʼe ke maʼu, pea ke foaki ki te kau māsisiva, pea ʼe ke maʼu ai anai hou koloā ʼi te lagi; pea ke haʼu ʼo mulimuli mai ia te ʼau.” (Mat. 19:16-23) ʼIo, ko tona ʼu koloā fakamālama neʼe fakahēʼi ai te tūpulaga ʼaia mai te gāue ʼaē ki te ʼAtua mo tona nefesi katoa. Neʼe maliu tona loto ki tona ʼu koloā. Neʼe ʼiloʼi e Sesu ʼe fua manuʼia te tūpulaga ʼaia mokā ʼe ina fakamaʼamaʼa mai te ʼu meʼa ʼaia. Ko te ʼu meʼa ʼaia ʼe nātou tāʼofi ai ia ke ʼaua naʼa ina foaki katoa tona maʼuli ki te ʼAtua. Kaeā koa la koutou? ʼE koutou foaki koa tokotou temi moʼo fai ʼo he gāue ʼi te mālama moʼo taupau ʼo he faʼahiga maʼuli kua koutou māhani ki ai? ʼE ina toʼo koa tokotou temi ʼaē ʼe koutou gāue ai kia Sehova? Ko ʼakotou ʼu koloā fakamālama ʼe nātou toʼo koa tokotou temi pea mo tokotou mālohi ʼo mole feala ai takotou gāue ki te Puleʼaga? (Mat. 6:24) ʼE feala koa hakotou vakavakaʼi tokotou temi ke feala ai hakotou foaki he temi lahi ʼaupito ki te ʼu meʼa fakalaumālie?
5 Te ʼu Meʼa Māhani ʼo Te Maʼuli: Kapau ʼe mole tou nofo tokaga, ʼe feala ke lahi tatatou tokaga ki te ʼu meʼa māhani ʼo te maʼuli ʼo feala ai ke tōtō tatatou faiga ʼi te faʼahi fakalaumālie. Tou manatuʼi te hahaʼi ʼi te ʼu ʼaho ʼo Noe. ʼI tanatou maʼumaʼua ʼaupito ʼi te ʼu meʼa faka sosiale, te meʼa kai pea mo te meʼa ʼinu, te fai ʼohoana pea mo te faka ʼohoanaʼi ʼo tanatou fānau, neʼe mole nātou tokagaʼi te logo ʼaē neʼe fakahā age e Noe ʼo ʼuhiga mo te Lōmaki ʼaē ka hoko. ʼI muʼa ʼo tanatou tokagaʼi te faʼahi ʼaia, neʼe hake te Vai pea ʼave ai ia nātou fuli. Ko te faka ʼuhiga ʼo te ʼu fakafiafia ʼaia ko tonatou fakaʼauha. Neʼe tala e Sesu: “Heʼe, ohage pe ko te ʼu ʼaho ʼaē ʼo Noe, ʼe toe feiā pe anai mo te ʼi henī ʼa te Foha ʼo te tagata.” (Mat. 24:37-39) Kae, tokolahi te hahaʼi ia ʼaho nei ʼe nātou maʼumaʼua katoa ʼi te ʼu meʼa ʼe ʼaoga ki tonatou maʼuli ʼo mole nātou tokagaʼi te fakatokaga ʼaē ʼe tou fakahā age kia nātou. ʼE nātou fakahā ai ʼe mole nātou fia fai ki te ʼu meʼa fakalaumālie.
6 Kua liliu koa tokotou maʼuli ʼo maʼumaʼua ʼi te ʼu gāue faka sosiale ʼo siʼisiʼi ai takotou faiga pea mo tokaga ki te ʼu meʼa fakalaumālie? ʼI he ʼaho, neʼe fakaafe ai Sesu ki te ʼapi ʼo Maleta pea mo Malia. Neʼe fakalogo lelei ia Malia ki te meʼa ʼaē neʼe talanoa ia ki ai. Kae, ko Maleta “neʼe tokaga ki te fai ʼo te ʼu gāue lahi.” Neʼe lahi fau te tokaga ʼa Maleta ki te ʼu meʼa kai, ko tona loto ʼaē ke lelei tana tali kāiga. Neʼe mole tokaga ia ki te maʼuhiga ʼaē ʼo te fakaʼaogaʼi ʼo he temi moʼo fakalogo ai kia Sesu. ʼAki te manavaʼofa, neʼe fakahā age e Sesu kia Maleta ʼe mole maʼuhiga te lahi ʼo te ʼu meʼa kai; ʼe tonu ke lahi tana tokaga ʼaē ki te ʼu meʼa fakalaumālie. ʼE ʼaoga koa takotou maʼuliʼi te tokoni ʼaia? (Luka 10:38-42) Neʼe toe fakatokagaʼi foki e Sesu ʼe tonu ke tou tokaga kia tatou totonu, ke ʼaua naʼa lahi tatatou holi ʼaē ki te meʼa kai pea mo te meʼa ʼinu, ʼo vaivai ai totatou mālohi. ʼI te temi faigataʼa ʼaenī ʼo te hisitolia ʼo te tagata, ʼe ʼaoga ke tou nonofo ʼalaʼala.—Luka 21:34-36.
7 Te Kumi ʼo Te ʼu Fakafiafia: Ko he fakafiafia lahi ʼe fakaʼaogaʼi e te Tevolo moʼo fakamafuli ʼo tatou mai te Puleʼaga ʼo te ʼAtua ko te kumi ʼaē ʼo te fakafiafia. Ko te toko miliona hahaʼi ʼo te Keletiate neʼe nātou fakamuʼamuʼa te ʼu fakafiafia ʼo lahi ake ʼi te ʼAtua. Neʼe nātou leleiʼia age te ʼu fakafiafia ʼi te faiga fakamalotoloto ʼaē ki te Folafola ʼa te ʼAtua. (2 Tim. 3:4) ʼIo, ko te fakafiafia pea mo te maʼuli mālōlō ʼaē ʼe lelei ʼe mole kovi tona fai. Kae ko te fakaʼaogaʼi fakavale ʼo he temi ʼi te vāhaʼa fuli ki te ʼu meʼa ohage ko te televisio, te sinema, te viteo, te fai gaoʼi, te lau ʼo te ʼu tohi ʼo te mālama, peʼe ko te fai ʼo he ʼu meʼa ʼe tou holi mamahi kiai, ʼe feala pe ke liliu te ʼu faʼahi ʼaia ʼo kākāʼi totatou loto pea mo fakamamaʼo ai tatou mai ia Sehova. (Sel. 17:9; Hep. 3:12) E feafeaʼi koa te hoko ʼo te faʼahi ʼaia? Lolotoga te ʼu fono faka Kilisitiano, e lagi ʼe koutou fakatokagaʼi ʼe mole ʼalu akotou manatu ki te fono; e lagi ʼe koutou fakaʼamu ke ʼosi la te fono ke feala ai hakotou ʼolo ʼo kumi te ʼu fakafiafia. ʼO vave aipe, takotou maʼu he ʼu tupuʼaga ʼo takotou nonofo ʼi tokotou ʼapi kae mole koutou ʼolo ki te ʼu fono peʼe ko te kau ʼaē ki te gāue fai faka mafola. Ko te temi ʼaenī ʼe ʼaoga ai ke fakatokagaʼi fakalelei peʼe kua liliu te ʼu meʼa ʼaia ko he ʼu fakafiafia ʼi tokotou maʼuli. (Luka 8:14) ʼE mole feala koa hakotou fakaʼaogaʼi te ʼu hola maʼuhiga ʼaē ʼe koutou fakaʼaogaʼi ki te fakafiafia ʼo ʼuhiga mo takotou tuputupu ʼi te faʼahi fakalaumālie?
8 Fakaʼaogaʼi ʼo He Temi Lahi Ki he ʼu Fehuʼi: Ko ʼihi ʼe nātou talaga ʼo ʼuhiga mo te fakatokatoka ʼo te ʼu faigataʼaʼia māhani ʼo te malamanei. ʼE ʼaoga ke fakamamaʼo te kau Kilisitiano mai te ʼu talaga ʼo te malamanei ʼe mole ʼiloʼi hona gataʼaga ʼo ʼuhiga mo te ʼu fehuʼi faka sosiale peʼe ko tana ʼu faiga ʼaē ʼe mole hona fua moʼo fakatonutonuʼi ʼo te ʼu aga heʼe faitotonu. (Soane 17:16) Ko te ʼu faʼahi fuli ʼaia neʼe faigaʼi e Satana moʼo fakamaliu ʼo te hahaʼi mai te tokoni ʼa te Tohi-Tapu pea mo te puleʼaki loaloaga pe e tahi—ia te Puleʼaga ʼo te ʼAtua. Kapau neʼe tou tau mo he mamahi peʼe ko he aga heʼe faitotonu, ʼe tonu ke tou tokakaga ke ʼaua naʼa maliu foki tatatou fakakaukau peʼe tou fia kami ʼo galo ai leva ia tatou ko tatou ko te—kau Fakamoʼoni ʼa Sehova. Koia, ko Sehova ʼaē neʼe faka lākahalaʼi, pea ʼe tonu ke tou tāpuhā tona huafa.—Is. 43:10-12; Mat. 6:9.
9 Logope la ʼe tou tahi fia maʼu he faʼahiga mālōlō, ka ko te faiga fakavale ki te faʼahi ʼaia pea mo te kumi ʼo te ʼu faitoʼo ʼaē ʼe foaki mai, ʼe feala ke tokaga katoa ai he tahi ki te ʼu talanoa ʼo ʼuhiga mo te maʼuli mālōlō. Tokolahi ʼe nātou fakatuʼutuʼu he ʼu faʼahiga meʼa kai, pea mo te ʼu faitoʼo ʼo ʼuhiga mo te faigataʼa fakasino pea mo te ʼatamai, kae lahi te ʼu faitoʼo ʼe fefakafeagaiʼaki. ʼE koutou tahi fai pe he tonu ʼo ʼuhiga mo te maʼuli mālōlō, kae ʼaua naʼa koutou faka fealagia ki tokotou temi pea mo takotou faiga ke lahi takotou tokaga ki te faʼahi ʼaia ʼo feala ai leva ke vaivai takotou faiva ʼi te faka mafola ʼo te Puleʼaga ʼo te ʼAtua, ʼaē ko te faitoʼo moʼoni ʼaia ʼo te ʼu mahaki ʼo te mālama ʼaenī.—Is. 33:24; Fkhā. 21:3, 4.
10 Koutou Mālolohi, Lototoʼa: ʼI te kua ōvi mai ʼo te ʼaho fakaʼosi, ʼe fakatuputupu anai e Satana tana ʼu faiga ʼaē ke ina fakahēʼi koutou ʼi takotou gāue ʼaē kia Sehova. “Ke koutou tekeʼi fakamālohi ia ia ʼaki te tui.” (1 Pe. 5:9) ʼO feafeaʼi koa? ʼE tonu ke koutou fafaga tuʼumaʼu ia koutou ʼaki te ʼu manatu ʼa te ʼAtua. (Mat. 4:4) Ke ʼaua naʼa koutou tuku te ʼu fakafiafia ʼo te mālama ke nātou toʼo te temi ʼaē ʼe ʼaoga kia koutou pea mo tokotou famili moʼo metitasio pea mo maʼuliʼi ʼo te Folafola ʼa te ʼAtua. ʼI te ʼu kai faka famili, ʼe maʼuhiga takotou fai palalau fakatahi, ʼo koutou fai he ʼu fakamatala pea mo koutou talanoa ki niʼihi ʼu manatu fakalaumālie. Koutou fai hakotou polokalama ke ʼaoga ʼo ʼuhiga mo te ako takitokotahi pea mo te teuteuʼi ʼo te ʼu fono.
11 Kapau ʼe vaivai takotou fakakaukau ʼuhi ko te ʼu faigataʼaʼia, ke koutou fakahā kia Sehova tokotou kavega ʼi te faikole. ʼE tonu ke koutou ʼiloʼi papau ʼe ina tokagaʼi ia koutou. (1 Pe. 5:7) Ke taupau tokotou loto e te tokalelei ʼa te ʼAtua pea mo takotou ʼu fakakaukau. (Filp. 4:6, 7) Ke ʼaua naʼa koutou tuku te ʼu fakafiafia ke nātou faka nenefu takotou sio fakalaumālie. Koutou taupau maʼu ia Sehova, ohage ko Sesu. (Gāue 2:25) Koutou tokaga ke hagatonu takotou sio ki takotou fakatuʼutuʼu, ohage ko te fakaloto mālohiʼi ʼo tatou e Tāʼaga Lea 4:25-27: “Ki tou ʼu mata, ʼe tonu ke haga sio ki muʼa, ʼio, ko tou ʼu mata ʼe tonu ke haga tonu ki muʼa. Fakamaʼamaʼa te ala ʼe ʼalu ai tou vaʼe, pea ke tuʼu mālohi tou ʼu ala. Ke ʼaua naʼa ke haga ki tou toʼomataʼu peʼe ki tou toʼohema.”
12 Ke koutou agatonu ʼo koutou kau ki te ʼu fono, pea ke koutou fakatonutonuʼi ia koutou, ke feala ai hakotou tokagaʼi te akonaki ʼa te Folafola ʼa te ʼAtua. (Hep. 2:1; 10:24, 25) Pea ke ʼaua naʼa koutou tokagaʼi te ʼu fakafiafia ʼe foaki atu e te mālama fakalialia ʼaenī, kae ke koutou fai hakotou fakatuʼutuʼu ke tuputupu tokotou minisitelio. Ko te faʼahi ʼaenī ʼe ina ʼaumai te fiafia pea mo te fīmālie heʼegata. (1 Tes. 2:19, 20) Pea, ke ʼaua naʼa koutou faka fealagia ki he meʼa peʼe ko he tahi ke ina fakaleluʼi koutou ʼi takotou gāue taputapu. “Koutou mālolohi, lototoʼa, koutou faʼa gāue ʼi te gāue ʼa te ʼAliki, ʼo manatuʼi ʼe mole ʼalunoa takotou gāue ki te ʼAliki.”—1 Ko. 15:58.