Ko Te ʼu Tali Ki ʼAkotou ʼu Fehuʼi

◼ Koteā koa te fakatuʼutuʼu ʼe tonu ke mulimuli kiai mokā ʼe fai he ʼu tonu ʼi te kokelekasio?

ʼE fakamaʼuaʼi he fakatuʼutuʼu mokā ʼe ʼaoga ke fai he tonu maʼuhiga ohage la ko te totogi ʼo he ʼu koloā, ko te fakafoʼou peʼe ko te laga ʼo te Fale ʼo te Puleʼaga, peʼe ko te foaki ʼo he meʼa ʼofa makehe ki te Sosiete, peʼe ko te falā ʼe foaki ki te taupau fakakolo ʼo ʼuhiga mo tana feʼaluʼaki. ʼI te agamāhani ʼe lelei age te fakahā ʼo te fakatuʼutuʼu ke feala ai he ʼiloʼi e te kokelekasio te falā ʼe fakaʼaogaʼi.

E lagi feala pe ke mole fai he tonu mokā ʼe ʼi ai he ʼu faʼahi ʼe ʼaoga tāfito ʼo ʼalutahi mo he ʼu fakatuʼutuʼu peʼe ko he gāue maʼuhiga. Ohage la, ʼe feala ke foaki e te kokelekasio he meʼa ʼofa ʼi te māhina fuli ki te Sosiete ʼo ʼuhiga mo te gāue faka mafola ʼi te malamanei. Koia, ko te ʼu meʼa neʼe totogi ʼo ʼuhiga mo te fakaʼaogaʼi ʼo te Fale ʼo te Puleʼaga, ohage la ko te totogi ʼo te ʼu meʼa kehekehe ʼe ʼaoga pea mo te ʼu meʼa ʼe ʼaoga ki te fakamaʼa, ʼe mole fakamaʼuaʼi ke fai he tonu.

Kapau ʼe ʼaoga ke fai he tonu, ʼe tonu ke palalau fakalelei te ʼu tagata ʼāfea ki te faʼahi ʼaia. Kapau ʼe nātou ʼio fuli ʼe ʼaoga ke fai he tonu, ko he tahi ʼi te ʼu tagata ʼāfea, e lagi ko he tahi ʼi te Komite Gāue ʼo te kokelekasio, ʼe tonu ke teuteu ʼo tohi te tonu ʼaia ke fakahā ʼi te Fono Gāue.

Ko te tagata ʼāfea ʼaia ʼe tonu anai ke ina fakahā fakanounou kae ke mātala lelei te meʼa ʼaē ʼe ʼaoga pea mo te faʼahi ʼe koleʼi mai e te ʼu tagata ʼāfea ke fai. ʼOsi ʼaia pea ina tuku he faigamālie ki te kokelekasio ke ina fai he ʼu fehuʼi ʼe ʼaoga. Kapau ʼe faigataʼa te fakatuʼutuʼu ʼo he tonu, ʼe lagi lelei age ke tuku te vote ki te fono gāue ka haʼu ke feala ai hanatou fakakaukauʼi takitokotahi te faʼahi ʼaia. ʼE fai te vote ʼaia ʼaki te hiki ʼo te ʼu nima mokā ʼe loto kiai.

ʼE fakamaʼuaʼi pe kia nātou ʼaē kua foaki tonatou maʼuli kia Sehova pea mo papitema te vote, gata pe mokā ʼe fai he tahi age fakatuʼutuʼu, ohage la ko te fakatuʼutuʼu fakakolo peʼe ko he toʼo maʼua ʼo ʼuhiga mo te Fale ʼo te Puleʼaga. ʼE mole feala anai ki te kau Fakamoʼoni ʼaē neʼe ʼōmai mai ʼihi kokelekasio ke nātou kau kiai.

ʼI te ʼosi fai ʼo te tonu, ʼe tonu anai ke tohi te ʼaho ʼaē neʼe fai ai, pea mo sinie, pea ai te pepa ki te tosie ʼo te kokelekasio.