Ko He ʼu Tokoni ʼo ʼUhiga Mo Te ʼAho Fakamanatu

ʼE tonu ke tou tokakaga ki te ʼu meʼa ʼaē ka hoa mai ʼi muʼa ʼo te toʼotoʼoga ʼo te ʼAho Fakamanatu ʼi te Feliatolu, ʼaho 2 ʼo ʼApelili:

◼ ʼE tonu ke fakahā ki te hahaʼi fuli, ʼo kau kiai te tēhina ʼaē ʼe ina fai te akonaki, te hola totonu pea mo te faʼahi totonu ʼaē ʼe fai ai te toʼotoʼoga ʼaia.

◼ ʼE tonu ke maʼu pea mo teuteuʼi te faʼahiga pane mo te faʼahiga vino ʼaē ʼe ʼalutahi mo te toʼotoʼoga ʼaia.​—Vakaʼi Te Tule Leʼo, Fakafalani, ʼo te ʼaho 15 ʼo Fepualio 1985, ʼi te pasina 19.

◼ ʼE tonu ke ʼaumai pea mo teuteuʼi fakatomuʼa he laupapa, he kie fola laupapa ʼe maʼa, he ʼu pa pea mo he ʼu ipu ki te Fale Fono. Ko te ʼu meʼa ʼaia ʼe tonu ke tau mo te ʼAho Fakamanatu.

◼ ʼE tonu ke fakamaʼa te Fale ʼo te Puleʼaga peʼe ko te faʼahi ʼaē neʼe fakatuʼutuʼu ke fai ai te fono.

◼ Ko nātou ʼaē ʼe kau ki te gāue fakatalitali pea mo te ʼu tagata ʼaē ʼe nātou feʼāveʼaki te pane mo te vino, ʼe tonu ke fili ia nātou pea mo fakamahino fakatomuʼa kia nātou te gāue ʼaē ka nātou fai.

◼ ʼE tonu ke fai he ʼu fakatuʼutuʼu moʼo ʼaumai te pane pea mo te vino ki te ʼu Kilisitiano fakanofo ʼaē ʼe mahahaki peʼe māʼimoa.

◼ Kapau ʼe fakatuʼutuʼu ke fai he tahi ʼu toʼotoʼoga ʼi te Fale ʼo te Puleʼaga pe ʼaia, ʼe tonu ke felogoi te ʼu kokelekasio ke mole fakapupu te hahaʼi ʼi te ʼu muʼa matapā pea mo te ala ʼaē ʼe hū mai ki te Fale Fono ʼi te tauʼaga motokā, te ala ʼe taki ki te Fale Fono mo te ʼu kau ala ʼi tuʼa pea mo te tauʼaga motokā.