Te ʼAtamai Mālama ʼo ʼUhiga Mo Te ʼAtua Moʼoni ʼe Ina Taki Ki Te Maʼuli
1 Neʼe ʼui e Sesu ʼi te faikole ki tana Tāmai: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni pe e tahi.” (Soane 17:3) ʼE ko he meʼa ʼofa lahi ia! Ka tou fakaʼaogaʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe feala ke tou tokoni ki te hahaʼi ke nātou ako pe koteā te ʼu meʼa ʼaē ʼe tonu ke nātou fai moʼo maʼu te maʼuli heʼegata. Koteā ʼaē ʼe feala ke tou ʼui age moʼo fakatupu tanatou fia logo pea mo tanatou loto ʼaē ke nātou lau te tohi Te ʼAtamai Mālama?
2 ʼE feala hakotou fakaʼaogaʼi he faʼifaʼitaki ʼe hā ai ko te Tohi-Tapu ʼe ko he matapuna lelei ʼo te takitaki, ʼo koutou ʼui fēnei:
◼ “ ʼE mātou palalau mo ʼomātou ʼu vāhaʼa fale pe kofea ʼaē ʼe feala ke maʼu ai he matapuna lelei ʼo te takitaki moʼo fakatokatoka te ʼu fihifihia ʼo te maʼuli. ʼI te temi muʼa neʼe vakaʼi tāfito e te hahaʼi te Tohi-Tapu. Kae ia ʼaho nei ʼe mole kei tatau; ko te tokolahi ʼe mole nātou falala ki te Tohi-Tapu, heʼe ʼi tanatou manatu ko he tohi neʼe fai pe ia e te tagata. Koteā tau manatu? [Koutou tuku ke ina fai atu hana tali.] ʼE ʼi ai te tupuʼaga ʼe lelei ʼaupito ke ʼui ai ko te Tohi-Tapu ʼe ʼaoga ki totatou temi. [Lau ia 2 Timoteo 3:16, 17.] Ko te ʼu pelesepeto ʼo te Tohi-Tapu ʼe maʼuhiga ʼi te temi nei ohage pe ko te temi ʼaē neʼe tohi ai ʼaki te laumālie ʼo te ʼAtua.” Tou fuli age ki te pasina 16 ʼo te tohi Te ʼAtamai Mālama, mo palalau fakanounou ʼo ʼuhiga mo te takitaki lelei ʼaē ʼe maʼu ʼi te Akonaki ʼaē neʼe fai e Sesu ʼi te Moʼuga. Tou lau te talanoa ʼo te palakalafe 11 peʼe ko te 13. Tou tuku age te tohi pea mo fakatuʼutuʼu ke koutou toe liliu ʼo tali ki te fehuʼi ʼaenī, ʼE lava feafeaʼi ke tou maʼu takitokotahi he ʼu fua lelei mai te ʼatamai mālama ʼaē ʼe maʼu ʼi te Tohi-Tapu?
3 Koteʼuhi ko te tokolahi ʼe nātou fia palalau ʼo ʼuhiga mo te faikole, ʼe feala ke koutou ʼui age fēnei:
◼ “ ʼAki te ʼu fihifihia fuli ʼaē ʼe tonu ke tou tauʼi ʼi totatou maʼuli ia ʼaho nei, ʼi tau manatu ʼe feala koa ki te faikole ke tokoni moʼoni mai kia tatou? [Koutou tuku ke ina fai ʼatu hana tali.] ʼI te manatu ʼa te tokolahi ʼaē neʼe fakaōvi ki te ʼAtua ʼaki te faikole pea ʼaki te faʼahi ʼaia neʼe nātou maʼu ai te lotomālohi, ohage ko te meʼa ʼaē ʼe fakapapau totonu mai e te Tohi-Tapu. [Koutou fuli ki te pasina 156 ʼo te tohi Te ʼAtamai Mālama pea mo lau ia Filipe 4:6, 7.] Kae, ʼi ʼihi temi e lagi feala ke logoʼi e he tahi ʼi tona loto ʼe mole ʼi ai he ʼu tali ki tana ʼu faikole. Ko te kupu tāfito ʼo te kapite ʼaenī ‘ ʼE Lava Feafeaʼi Hakotou Fakaōvi Ki Te ʼAtua.’ [Tuku age te tohi ki tona totogi fakaʼofa ko te falā 150.] ʼE toe fakamahino foki e te kapite ʼaia peʼe lava feafeaʼi hatatou fakalogo ki te ʼAtua, koteʼuhi ʼi tatatou felogoi mo ia ʼe mole ko he tokotahi pe ʼaē ʼe fakalogo. ʼE feala hatā palalau ki te faʼahi ʼaia mokā ʼau toe liliu mai.”
4 ʼE koutou fia fakaʼaogaʼi koa he fakahā fakahagatonu moʼo kamata he ako? Koʼeni te ʼu palalau ʼe feala ke fua lelei kia koutou:
◼ “ ʼE mātou fakahā ki te hahaʼi ʼe feala ke fai hanatou ako Tohi-Tapu ka mole totogi. Neʼe ke ako koa te Tohi-Tapu ʼi muʼa atu? [Koutou tuku he fai atu hana tali.] Tuku muʼa kau fakahā atu te tohi ako ʼaē ka tā fakaʼaogaʼi.” Koutou fakahā te tohi Te ʼAtamai Mālama, ʼo fuli age ki te pasina 3, ke feala kia ia ʼaē ʼe koulua palalau ke sio ki te tānakiʼaga ʼo te ʼu kupu, pea fai te fehuʼi ʼaenī, “Kua ke fai koa te fehuʼi ʼaē pe koteā te ʼui ʼa te Tohi-Tapu ʼo ʼuhiga mo te ʼu potu ʼaia?” Koutou vakaʼi te kapite ʼaē ʼe fia sio kiai pea mo lau age te ʼu kupu tāfito. Koutou fakamahino age ʼe koutou fia fakahā fakanounou age te faʼahiga fai ʼo te ako. Peʼe kamata te ako peʼe kailoa, koutou tuku age te tohi mo kapau ʼe ina fia lau.
5 ʼI te temi nei tokolahi te hahaʼi ʼe nātou tali te ʼatamai mālama totonu ʼo ʼuhiga mo te ʼAtua moʼoni. (Is. 2:2-4) Ko totatou pilivilesio ko te tokoni ki te hahaʼi tokolahi ʼaupito ke nātou ako pe ko ai ia Sehova pea mo taki nātou ki te maʼuli.—1 Tim. 2:4.