Tou Tokoni Ki Te Hahaʼi Ke Nātou Maʼu Te ʼAtamai Mālama ʼAē ʼe Ina Taki Ki Te Maʼuli
1 Ko te ʼapositolo ko Paulo neʼe ina fakamahino ‘ ʼe loto e te ʼAtua ke maʼu e te faʼahiga tagata fuli pe te ʼatamai mālama totonu ʼo te moʼoni.’ (1 Tim. 2:4) ʼE lava feafeaʼi hatatou tokoni ki te hahaʼi ke nātou maʼu te ʼatamai mālama ʼaia? Ko tona faʼahiga fai ʼe ko te ʼaʼahi te hahaʼi ʼaē neʼe fia logo ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te tohi ʼaia ʼe ina fakahā te moʼoni ʼo te Tohi-Tapu ʼaki te ʼu kupu ʼaē ʼe tāsilo, ʼe faigafua mo totonu. ʼI tanatou ako te tohi ʼaia, ko te faʼahiga tagata fuli pe ʼe feala ke iku ki te maʼuli. Koteā te ʼu meʼa ʼaē ʼe feala ke tou tala moʼo fakaloto mālohiʼi te hahaʼi ke nātou ako te tohi ʼaia mo tatou?
2 Ki te hahaʼi ʼaē neʼe fia logo ki te Tohi-Tapu ohage ko he takitaki ʼe ʼaoga, ʼe feala ke tou liliu kia nātou ʼo fakaafe ke fai hanatou ako, ʼo ʼui fēnei age:
◼ “ ʼI taku haʼu fakamuli, neʼe tā palalau pe koʼe ʼe feala ke tou falala ko te Tohi-Tapu ʼe ko he matapuna ʼo te takitaki lelei. Koteʼuhi ʼe haʼu mai te ʼAtua, ʼe feala foki ke tou maʼu te fakafimālie mo te ʼamanaki ʼi te Tohi-Tapu, ohage ko te meʼa ʼaē neʼe ʼui e te tahi ʼo te ʼu ʼapositolo ʼo Kilisito. [Lau ia Loma 15:4.] ʼI te fakaʼosi ʼo tatā ʼuluaki fai palalau, neʼe ʼau fai te fehuʼi ʼaenī, ʼE lava feafeaʼi ke tou maʼu he ʼu fua lelei ʼaki te ʼatamai mālama ʼaē ʼe maʼu ʼi te Tohi-Tapu?” Lau te palakalafe 18 ʼi te pasina 11 ʼo te tohi Te ʼAtamai Mālama. Koutou fakatokagaʼi ko te kau Fakamoʼoni ʼa Sehova ʼe nātou fai te ʼu ako mo te ʼu hahaʼi ʼe lauʼi nima miliona ʼi te malamanei katoa, ʼo tokoni kia nātou ke nātou maʼu te ʼatamai mālama ʼaē ʼe ina taki ki te maʼuli heʼegata. Koutou fakahā fakanounou peʼe feala feafeaʼi ke fai te ako pea mo fakaʼaogaʼi te ʼu ʼuluaki palakalafe e nima ʼi te kapite 1.
3 Kapau neʼe koutou palalau mo he tahi ʼo ʼuhiga mo te faikole, koutou faigaʼi te faʼifaʼitaki ʼaenī moʼo kamata he ako:
◼ “ ʼE ʼau mahalo neʼe ke fiafia ki te ʼu fakamahino ʼaē ʼo ʼuhiga mo te faikole, ʼaē neʼe tā palalau kiai ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe ʼau fakapapau atu ʼe ʼau haʼu anai pea tā vakaʼi peʼe lava feafeaʼi kia nātou ʼaē ʼe faikole ki te ʼAtua ke nātou fakalogo kia te ia. Fakatokagaʼi te meʼa ʼaē ʼe ʼui mai ʼi te pasina 158. [Lau te palakalafe 18.] Koia, ʼe tou fakalogo ki te ʼu meʼa ʼaē ʼe ʼui mai e te ʼAtua mokā ʼe tou ako takitokotahi te Tohi-Tapu. Ko te fai ʼo te faʼahi ʼaia ʼe ina fakaōvi tatou kia te ia pea ʼe tokoni kia tatou ke tou tauʼi te ʼu faigataʼaʼia ʼo te ʼu ʼaho fuli ʼaē ʼe tou faikole kiai. ʼE ko he meʼa fakafiafia anai kia ʼau ke tā ako fakatahi te Tohi-Tapu.” Kapau ʼe lotolelei kiai, koutou kamata ʼaki te ʼuluaki kapite ʼo te tohi Te ʼAtamai Mālama.
4 Kapau neʼe koutou fakaʼaogaʼi te fakahā fakahagatonu moʼo kamata te ako, ʼe lagi feala ke koutou fakahoko atu ʼaki te ʼu palalau ʼaenī:
◼ “Neʼe ʼau faigaʼi tāfito ke ʼau ʼaʼahi koe he neʼe ʼau loto ke ʼau fakamahino atu te tahi ʼu meʼa ʼo ʼuhiga mo tamatou polokalama ako ʼo te Tohi-Tapu ʼaē ʼe mole totogi. Neʼe ʼau tuku atu te tohi Te ʼAtamai Mālama ʼAē ʼe Ina Taki Ki Te Maʼuli Heʼegata ʼaē ʼe mātou fakaʼaogaʼi moʼo fai ʼo te ako. Fakatokagaʼi peʼe feafeaʼi tana fakaloto mālohiʼi tatou ke tou vakaʼi te Folafola ʼa te ʼAtua. [Lau te palakalafe 23 ʼi te pasina 22.] ʼE ʼau kole atu ke ke toʼo tau tohi, pea ʼe lagi feala ke hoko atu te ako ʼi te faʼahi ʼaē neʼe tā tuku ai.” Kapau neʼe mole kamata te ako ʼi te ʼuluaki ʼaʼahi, ʼe feala ke koutou ʼui: “Ko te temi ʼaenī ʼe lagi lelei ke ʼau fakahā atu peʼe feafeaʼi tatā fai te ako Tohi-Tapu.” Fai he fakatuʼutuʼu ke koutou toe ʼōmai ʼo hoko atu te ako.
5 Ko te fakaʼaogaʼi fakalelei ʼo te tohi Te ʼAtamai Mālama, ʼe ina faka fealagia anai kia tatou ke tou faka mafola te ʼatamai mālama totonu ke maʼu e te hahaʼi he ʼu tapuakina. (Taag. 15:7) Ko nātou ʼaē ʼe loto faitotonu, ʼe nātou maʼu anai te fiafia lahi pea mo fakaloto mālohiʼi anai ia nātou ke nātou mulimuli ki te faitotonu ʼa Sehova. Ki muli age, ko te fai ʼo te faʼahi ʼaia ʼe ina taki anai nātou ki te maʼuli heʼegata.