ʼI Te Temi Nei, Kua Tou Mahu ʼAupito ʼi Te Faʼahi Fakalaumālie!
1 Ko te tokolahi ʼo te hahaʼi ʼe nātou fakaʼamu ki te ʼaho ʼaē ka feala ai hanatou ʼui, “ ʼI te temi nei kua mātou fiafia ʼaupito!” ʼI tanatou manatu, ʼe hoki feala anai ke nātou ʼui te faʼahi ʼaia mokā lahi anai tanatou ʼu koloā, ke nātou ‘mālōlō ai, mo kakai, mo ʼiʼinu, pea mo fakafiafia.’ (Luka 12:19) Kae ʼi te temi nei, kua feala hatatou ʼui ʼi te faʼahi fakalaumālie, kua tou maʼu fuli te ʼu meʼa ʼaē ʼe tou loto kiai. (Pes. 34:10) ʼO feafeaʼi?
2 ʼE ʼui fēnei ia Tāʼaga Lea 10:22, ko “te tapuakina ʼa Sehova—koʼena te meʼa ʼaē ʼe ina fakakoloaʼia.” Ko tatou ʼaenī ʼaē kua tou maʼu te ʼu fua lelei fakaʼatua, kua feala ke tou ʼui moʼoni, ko te ʼAtua ʼe ina “foaki fakalahi mai kia tatou ia meʼa fuli, ke tou fiafia ai.” (1 Tim. 6:17) Ko te faʼahi ʼaia ʼe ina fakaliliu ai tatou ko te hahaʼi koloaʼia ʼi te kele!
3 Tou ʼIloʼi Te ʼu Tapuakina ʼAē ʼe Tou Maʼu: Tokosiʼi ia tatou ʼe lahi tanatou ʼu koloā fakamālama. Kae ʼe tapuakina tatou heʼe mole lahi fau tatatou tuʼania ʼo ʼuhiga mo te ʼu meʼa ʼaē ʼe ʼaoga kia tatou ʼi te ʼaho fuli. ʼE ʼiloʼi e Sehova te meʼa ʼaē ʼe ʼaoga kia tatou, pea ʼe ina fakapapau mai ʼe ina foaki mai anai te meʼa ʼaia. (Mat. 6:31-33) Ko tana ʼu fakapapau ʼe nātou foaki mai te tokalelei ʼo te ʼatamai ʼaē ʼe maʼuhiga moʼoni.
4 Kae, ʼe toe lahi ʼaupito mo tatatou ʼu tapuakina fakalaumālie. ʼE fakalogo totatou maʼuli ki te meʼa kai fakalaumālie ʼaē ʼe foaki mai e Sehova. (Mat. 4:4) ʼE pakupaku te hahaʼi ʼaē ʼe nātou kumi hanatou meʼa kai fakalaumālie ʼi te mālama, kae ko tatou ʼe tou mahu ʼi te meʼa kai fakalaumālie. (Is. 65:13) ʼE foaki mai e te ‘tagata kaugana agatonu’ te faka fealagia ʼaē ke tou maʼu te ʼatamai mālama ʼaē ʼe ina taki ki te maʼuli heʼegata.—Mat. 24:45; Soane 17:3.
5 Ko tatatou felogoi fakatautehina ʼi te malamanei katoa, ʼe ina foaki mai kia tatou te ʼofa ʼo te ʼu tēhina pea mo tuagaʼane ʼaē ʼe nonofo ʼi te ʼu potu kehekehe ʼo te kele. (Soane 13:35) ʼE maʼu e te kokelekasio te tokalelei, pea ʼe feala ke tou maʼu ai te fīmālie. ʼE tokakaga te ʼu tagata ʼāfea ki totatou ʼu nefesi, ʼo tokoni kia tatou ke tou tauʼi te ʼu fihifihia kehekehe. (Hep. 13:17) Ko te ʼu fua ʼaē ʼe tou maʼu ʼaki tatatou ʼu felogoi mo totatou ʼu tēhina, ʼe ko te fefakaloto mālohiʼaki, mo tou fefakamālohiʼi ia tatou ke tou faʼa kātaki.—Loma 1:11, 12.
6 Māʼiape la mo tatatou gāue ʼe ko he tapuakina. ʼE lahi te hahaʼi ʼe gāue kinakina pea ʼe mole nātou logo fīmālie. Ko te fakahā ʼo te logo lelei ʼe ina fakafiafia ai te hahaʼi, ʼo feiā aipe mo tatou. (Gāue 20:35) ʼI te temi nei, kua tou sio moʼoni ki te ʼu fua lelei ʼo tatatou gāue kinakina.—Tagata Tānaki 2:24.
7 Tokolahi ia tatou, ʼe tou maʼu te ʼamanaki taulekaleka ki te temi ka haʼu. (Loma 12:12) ʼE tou fakatalitali ki te mālama foʼou haohaoa ʼaē ʼe maʼu ai te faitotonu, pea ʼe tou maʼuʼuli ai anai mo te ʼu hahaʼi ʼaē ʼe tou ʼoʼofa mamahi ai, ʼo tou maʼuli fiafia pea mo tokalelei ʼo talu ai! Ko te ʼamanaki ʼaia ʼe ko he koloā ʼe lahi age ia ʼi te ʼu koloā ʼaē ʼe feala ke foaki mai e te mālama ʼaenī.—1 Tim. 6:19.
8 ʼE Lava Feafeaʼi Hatatou Fakahā Tatatou Loto Fakafetaʼi? ʼE mole feala anai ke tou totogi ia Sehova ʼo ʼuhiga mo te ʼu meʼa ʼaē neʼe ina fai maʼa tatou. ʼE feala pe ke tou fakahā tatatou loto fakafetaʼi ʼaki (1) tatatou fakamālo kia te ia ʼi te ʼaho fuli ʼo ʼuhiga mo tona ʼofa makehe (Ef. 5:20), (2) ke tou fakahā totatou ʼofa kia te ia ʼaki tatatou fakalogo (1 Soane 5:3), (3) ke tou tāpuhā tona huafa ʼo tou faka mafola te logo lelei (Pes. 83:18), pea mo (4) tou lagolago ki te kokelekasio faka Kilisitiano ʼaki totatou loto katoa.—1 Tim. 3:15.
9 ʼI te kele katoa, ʼe tou fiafia ʼaupito. (Pes. 144:15b) ʼOfa pe ke hā ʼi tatatou ʼu aga, pea mo tatatou ʼu gāue, te fiafia ʼaē ʼe tou maʼu ʼi tatatou nonofo ʼi te palatiso fakalaumālie—pea ko te fiafia ʼaia kua mahu ʼaupito ʼi te temi nei!