ʼE Tou ʼIloʼi Papau ʼe Maʼuhiga Te Fakahā ʼo Te Logo Lelei
1 ʼE tou fakahā tatatou loto fakafetaʼi mālohi ki te ʼu fakapapau ʼo te Puleʼaga ʼa te ʼAtua, ʼaki tatatou kau fakamalotoloto ki te minisitelio faka Kilisitiano. ʼE tonu ke tou kau ki te gāue ʼaia ʼi tatatou ʼiloʼi papau ʼaē tona maʼuhiga. Koteā tona tupuʼaga? Koteʼuhi ʼe tokosiʼi te kau gāue, pea kua ōvi mai te fakaʼosi ʼo te tuʼu ʼo te ʼu faʼahiga meʼa ʼaenī, pea ko te maʼuli ʼo te ʼu hahaʼi ʼo totatou telituale ʼe nātou tau mo te tuʼutāmaki. (Esk. 3:19; Mat. 9:37, 38) Ko te maʼua tāfito ʼaia ʼe fakamaʼua kiai ke tou fai fakalelei totatou minisitelio. ʼE lava feafeaʼi hatatou fakahā te maʼuhiga ʼo te gāue fai faka mafola? ʼAki tatatou teuteuʼi lelei he ʼu faʼifaʼitaki, ʼaki tatatou faiga mālohi ʼo kumi te ʼu hahaʼi ʼi te ʼu potu fuli ʼaē ʼe feala ke tou maʼu ai ia nātou, ʼaki tatatou tohi lelei ki te pepa ʼe tou fakaʼaogaʼi ki te fai faka mafola te ʼu higoa ʼo te hahaʼi ʼaē ʼe nātou fia logo ki te moʼoni, ʼo tou foimo liliu ʼo ʼaʼahi ia nātou ʼaia, pea mo tou manatuʼi ʼe tonu ke tou fai fakalelei tatatou minisitelio, heʼe pipiki kiai te maʼuli ʼo te hahaʼi. Ko te ʼu tokoni ʼaenī ʼe feala ke ʼaoga kia tatou ʼi tatatou teuteu tatatou fakahā ʼo te logo lelei, ʼi tatatou ʼiloʼi papau ʼaē ʼe maʼuhiga te gāue ʼaia lolotoga te māhina ʼo Fepualio. ʼE tou tufa anai te tohi Te ʼAtamai Mālama ʼAē ʼe Ina Taki Ki Te Maʼuli Heʼegata.
2 ʼE feala ke koutou kamata he fai palalau ʼo koutou talanoa fakanounou ki he ʼu fihifihia ʼe tau mo te hahaʼi, pea koutou ʼui age fēnei:
◼ “Tokolahi te hahaʼi ʼe nātou tui ʼe ʼi ai te ʼAtua, kae ʼe nātou feʼekeʼaki: ‘Koteā te faʼahiga ka haʼu ʼe ina loto ke tou maʼu?’ Koteā anai tau tali ki te fehuʼi ʼaia? [Koutou tuku ke fai atu hana tali.] Neʼe kua ke ʼiloʼi koa la te fakapapau ʼaē neʼe fai e Sesu ʼo ʼuhiga mo he palatiso ʼi te temi ka haʼu ʼi te kele?” Koutou fuli age te pasina 8 ʼi te palakalafe 8 ki te 9 ʼi te tohi Te ʼAtamai Mālama. Lau ia Luka 23:43 ʼi te palakalafe 8 pea mo te fakamahino ʼo te vaega ʼaia. Koutou fuli age ki te paki ʼo te pasina 4 ki te 5 ʼo fakahā te faka ʼuhiga ʼo te faʼahi ʼaia ki totatou ka haʼu. Fai te fehuʼi ʼo te palakalafe 10, pea mo koutou tuku age te tohi. Koutou fakatuʼutuʼu he temi ʼe feala ai ke koutou toe liliu ʼo hoko atu te fai palalau.
3 ʼE feala ke hoko atu takotou ʼuluaki fai palalau kia Luka 23:43 ʼaki te faʼifaʼitaki nounou ʼaenī:
◼ “ ʼI taku haʼu talu mai ai, neʼe tā vakaʼi te fakapapau ʼa te ʼAtua ʼaē ke ina teuteuʼi he kele foʼou maʼa te hahaʼi. [Fakahā age te paki ʼi te pasina 4 ki te 5 ʼi te tohi Te ʼAtamai Mālama.] ʼE ke fia sio koa ki tou famili ʼe maʼuli ʼi te ʼu ʼaluʼaga ʼaia? [Tuku ke fai atu hana tali.] ʼE feala ke ke fakatokagaʼi te meʼa ʼaē ʼe ʼui e te ʼAtua ʼo ʼuhiga mo te Palatiso ʼaia.” Koutou fai te fehuʼi ʼo te palakalafe 11, pea koutou lau ia Fakahā 21:3, 4 ʼi te palakalafe ʼaia. Koutou fakahā age ki ai ʼe feala ke fai hana ako Tohi-Tapu. Fai he fakatuʼutuʼu ke koutou fakahā ki ai ʼi he tahi temi.
4 Mai tona ʼuhiga ʼaē ko te tokolahi ʼe nātou tuʼaniaʼi te tuputupu ʼo te ʼu fihifihia ʼaē ʼe tau mo te malamanei, koia ʼe feala ke koutou fai fēnei takotou ʼuluaki palalau:
◼ “Ko te hahaʼi fuli ʼaē neʼe ʼau felāveʼi mo nātou, ʼe nātou tuʼania ʼo ʼuhiga mo te ʼu fihifihia ʼaē ʼe tau mo te hahaʼi. [Talanoa ki he fihifihia.] Talu mai fualoa mo te fakapapau ʼa te ʼu hahaʼi fai politike, ʼe nātou maʼu anai he ʼu puleʼaki ʼe tologa, pea ko ʼihi neʼe nātou faigaʼi te ʼu faʼahi ʼaia. ʼI tau manatu, koteā ʼaē ʼe tupu ai te fakaʼāsili kovi ʼo te ʼu ʼaluʼaga ʼo te malamanei? [Tuku ke fai atu hana tali.] ʼE foaki mai e te Tohi-Tapu te fakamahino neʼe mole heʼeki vakaʼi e te tokolahi. ʼE talanoa te tohi Fakahā ki te tau neʼe hoko ʼi selo. Koutou fakatokagaʼi te ikuʼaga ʼo te tau ʼaia, ʼaē ʼe tuʼu ia Fakahā 12:9.” Koutou lau te vaega, pea koutou fakahā age te pasina 99, ʼi te palakalafe 3 ki te 4, ʼi te tohi Te ʼAtamai Mālama. Koutou fakamahino age te pikipikiga ʼo Satana ki te ʼu meʼa ʼo te kele. Koutou tuku kiai te tohi pea mo fakahā age tona totogi. Fai he ʼu fakatuʼutuʼu ke koutou toe liliu ʼo vakaʼi mo ia peʼe fakatokatoka feafeaʼi anai e te ʼAtua te ʼu fihifihia ʼo te malamanei.
5 Kapau neʼe koutou fakapapau ʼe koutou toe liliu age anai ʼo fakamahino ki ai te puleʼaki ʼa te ʼAtua ʼo ʼuhiga mo te ʼu fihifihia ia ʼaho nei, ʼe feala ke koutou ʼahiʼahi te ʼu palalau ʼaenī:
◼ “Neʼe ʼau faiga tāfito ke ʼau toe liliu mai ke hoko atu tatā fai palalau ʼo ʼuhiga mo te puleʼaki ʼaē ʼe ʼaoga moʼoni ki te ʼu fihifihia ʼo te malamanei. ʼI taku haʼu talu mai ai, neʼe tā vakaʼi ʼe fakahā e te Tohi-Tapu ʼe ko Satana te Tevolo ʼaē ʼe ina fakahēʼi te kele katoa. Mai tona ʼaluʼaga ʼaē ko ia ʼe ko he laumālie mālohi, ʼi tau manatu ʼe feala koa ke pulihi tona mālohi? [Tuku ke fai atu hana tali.] Koʼeni te meʼa ʼaē ʼe ʼui e te Tohi-Tapu.” Koutou lau pea mo koutou fakamahino age ia Fakahā 20:1-3. Koutou fakaʼaogaʼi te paki ʼo te pasina 4 ki te 5 ʼo te tohi Te ʼAtamai Mālama, ʼo koutou fakahā te ʼu ʼaluʼaga ʼaē ka maʼu mokā pulihi anai te mālohi ʼa Satana. Koutou fakahā age te ako Tohi-Tapu pea mo koutou faiga ke kamata atu aipe he ako Tohi-Tapu.
6 ʼI te tuʼaniaʼi e te hahaʼi tokolahi te agaaga ʼo te fenua, ʼe feala ke koutou ʼui age te manatu ʼaenī moʼo kamata ʼo te fai palalau:
◼ “Neʼe mātou tokagaʼi ko te tokolahi ʼo te hahaʼi ʼe nātou tuʼania ʼo ʼuhiga mo te ʼuli ʼo te ʼaele, ʼo te vai, pea mo te meʼa kai. ʼI ʼihi ʼu koga meʼa, ʼe mole fua lelei te ʼu ʼōloto ohage ko te temi muʼa. ʼI te tahi ʼu fenua, ko te fihifihia ʼaia ʼe fakatupu tuʼutāmaki ki te maʼuli ʼo te hahaʼi. Mai tona ʼaluʼaga ʼaē ko te ʼAtua ʼaē neʼe ina fakatupu te kele, ʼi tau manatu, koteā anai te meʼa ʼaē ka ina fai ʼo ʼuhiga mo te faʼahi ʼaia? [Tuku ke fai atu hana tali.] ʼE ʼui mai e te Tohi-Tapu ʼe fakaʼui mai anai e te ʼAtua peʼe feafeaʼi tatatou fakahoko totatou maʼua kia te ia. [Lau ia Fakahā 11:18b.] Fakakaukauʼi age muʼa he maʼuli ʼi te kele ʼe mole ʼuli ai te ʼaele, te vai, pea mo te meʼa kai!” Koutou fakahā age te fakapapau ʼa te ʼAtua ʼo ʼuhiga mo he palatiso, ohage ko tona tuʼu ia Fakahā 21:3, 4. Koutou fakahā age te paki ʼo te pasina 4 ki te 5 ʼi te tohi Te ʼAtamai Mālama. Koutou fakahā age te tohi pea koutou fakatuʼutuʼu ke koutou toe liliu ʼo ʼaʼahi ia ia.
7 Mokā koutou liliu ʼo ʼaʼahi he tahi neʼe fia logo ki te talanoa ʼo ʼuhiga mo te Palatiso ʼi te kele, ʼe feala ke koutou ʼui age fēnei:
◼ “ ʼI taku haʼu talu mai ai, neʼe tā felogoi tahi ki te ʼui ʼaē ʼe tonu ke fakatokatoka tonu e te ʼAtua te fihifihia ʼaē ʼo te tagata, ʼo ʼuhiga mo te kua ʼuli ʼo te kele. Kae ʼe feala ke fai te fehuʼi ʼaenī, Koteā te meʼa ʼe tonu ke tou fai ke tou maʼuʼuli ʼi te mālama foʼou faitotonu ʼaē ka fakatuʼu e te ʼAtua?” Lau ia Soane 17:3. Fakaafe ia ia ke fai hana ako Tohi-Tapu ke feala ai hana maʼu te ʼatamai mālama makehe ʼaia.
8 ʼE ko he pilivilesio ʼe tou maʼu ʼi te temi nei ke tou kau ki te kau gāue ʼo te taʼukai, pea ke tou kau ki te gāue fai faka mafola ʼaē ka ina hāofaki te hahaʼi! ʼOfa pe ke tou maʼumaʼua ʼi te fakahā ʼo te logo lelei ʼo te Puleʼaga pea mo tou mahino papau ki te maʼuhiga ʼo te gāue ʼaia, ‘ ʼo tou ʼiloʼi ko tatatou gāue ʼe mole vaʼiganoa.’—1 Ko. 15:58.