Koutou Fakaafe Ia Nātou Fuli ʼAē ʼe Fia ʼIʼinu
1 Ohage ko tona fakakikite e te polofeta ko Amosi, ʼe mamahi te malamanei ia ʼaho nei ʼuhi ko “he fia ʼinu, ʼe mole ko he fia ʼinu ki he moʼi vai, kae ki te fagono ki te ʼu folafola ʼa Sehova.” (Amosi 8:11) Moʼo tokoni ki te hahaʼi ʼaē ʼe fakaʼofaʼofa feiā tonatou ʼaluʼaga ʼi te faʼahi fakalaumālie, ʼe tou fakahā kia nātou te ʼu fakatuʼutuʼu ʼaē ka fai anai e te ʼAtua maʼa te hahaʼi talagafua moʼo faka ʼāteainaʼi nātou mai te agahala pea mo te mate, pea ʼi te kapite fakaʼosi ʼo te tohi ʼo te Fakahā, ʼe fakatātā te ʼu fakatuʼutuʼu ʼaia ki te “vaitafe vai ʼo te maʼuli.” ʼE tou maʼu te pilivilesio ʼaē ke tou fakaafe ia nātou fuli ʼaē ʼe ʼoʼofa ki te faitotonu ke nātou “toʼo noa te vai ʼo te maʼuli.” (Fkhā. 22:1, 17) ʼE lava feafeaʼi hatatou fai te faʼahi ʼaia ʼi te māhina ʼo Fepualio? ʼE tou fakahā anai kia nātou ʼaē ʼe fia logo moʼoni ke nātou apone ki Te Tule Leʼo. ʼE feala ke koutou ʼahiʼahi te ʼu faʼifaʼitaki ʼaenī:
2 Mai tona ʼuhiga ʼaē ʼe lahi te hahaʼi ʼe nātou tuʼania ʼuhi ko te heʼe faitotonu, ʼe lagi lelei anai takotou fai te ʼu palalau ʼaenī:
◼ “Tokolahi te hahaʼi ʼe nātou tuʼaniaʼi te heʼe faitotonu pea mo te agakovi ʼaē ʼe hoko ʼi te mālama ʼaenī. ʼE ʼi ai koa he puleʼaki moʼoni ki te fihifihia ʼaia? [Koutou tuku ke fai hana tali.] ʼE ke falala koa ʼe maʼu anai te puleʼaki ʼaia? [Koutou tuku ke fai hana tali.] ʼE ʼi ai te ʼamanaki taulekaleka ʼe ʼau fia fakahā atu.” Koutou lau pea mo fai palalau ki te Pesalemo 37:1, 2 ʼaē ʼe tuʼu ʼi te lua alatike ʼo Te Tule Leʼo ʼo te ʼaho 1 ʼo Fepualio 1998. Moʼo fakaʼosi, koutou fakahā age te ʼu tupuʼaga ʼaē ʼe foaki mai e Te Tule Leʼo ke tou falala ki te ka haʼu, pea koutou fai te apone, ʼo koutou fakatuʼutuʼu ke koutou toe ʼaʼahi ia ia.
3 Ka koutou toe liliu ʼo fai te ʼaʼahi, ʼe feala anai hakotou fakanounou te ʼuluaki fai palalau ʼo koutou ʼui fēnei:
◼ “ ʼI tatā fai palalau fakaʼosi, neʼe tā talanoa ki te puleʼaki moʼoni ki te ʼu fihifihia ʼo te malamanei. ʼI tau manatu la, ʼe ʼi ai koa he temi ʼe pulihi katoa anai te heʼe faitotonu? [Koutou tuku ke fai hana tali.] Koutou fakatokagaʼi te ʼu palalau maʼuhiga ʼaenī ʼo ʼuhiga mo te ʼaluʼaga ʼo te malamanei ʼi te temi ʼaē ka pule anai ia Kilisito.” Koutou lau ia Isaia 11:4. ʼOsi ʼaia, pea koutou toʼo te ako 6 ʼi te kaupepa Fakamaʼua, pea koutou talanoa ki te ʼu palakalafe 5 ki te 7, ʼo koutou fai te fehuʼi ʼaē ʼe tuʼu ʼi te kamata ʼo te ako pea mo lau he ʼu vaega ʼaē ʼe tuʼu ʼi te ʼu palakalafe. Koutou fai he ʼu fakatuʼutuʼu ke koutou toe liliu ʼo ʼaʼahi ia ia moʼo vakaʼi te ʼu palakalafe 1 ki te 4 ʼo te ako ʼaia.
4 Kapau ʼe palalau te hahaʼi ki he mate fakafokifā ʼo he tahi neʼe fakahā ʼi te ʼu tala logo, ʼe feala ke koutou ʼui fēnei:
◼ “Lagi neʼe koutou logo ki te [koutou talanoa ki te meʼa ʼaē neʼe fakahā ʼi te ʼu tala logo]. Ka mate fakafokifā he tahi ʼi he ʼaluʼaga fakaʼofaʼofa, ʼe tokolahi te hahaʼi ʼe nātou feʼekeʼaki peʼe lava feafeaʼi te fakafimālieʼi ʼo te famili ʼaia. Koteā la tau manatu ki te faʼahi ‘aia?” Koutou tuku ke fai hana tali. ʼOsi ʼaia, pea koutou ʼui fēnei: “Tokolahi te hahaʼi ʼe nātou punamaʼuli mokā fakahā age kia nātou, ʼe fakatuʼuake anai te hahaʼi faitotonu pea mo heʼe faitotonu ki te maʼuli ʼi te Palatiso ʼi te kele. [Lau ia Gāue 24:15 ʼi takotou Tohi-Tapu] ʼE mole koutou ʼio koa la, ʼe ko te hahaʼi pe ʼaē ʼe mālohi tanatou tui, ʼaē ʼe tui kiai? [Koutou tuku ke fai hana tali] Kua hili kiai taʼu ʼe lauʼi afe, neʼe maʼu e Apalahamo te taʼi tui mālohi ʼaia ki te fakatuʼuake. [Koutou fakahā te paki ʼaē ʼe tuʼu ʼi te pasina 10 ʼo Te Tule Leʼo ʼo te ʼaho 15 ʼo Sanualio 1998, pea koutou lau te laini fakaʼosi ʼo te palakalafe 11 ʼo te pasina 11.] ʼE talanoa te nusipepa ʼaenī ki te tui ʼaē ki te ʼu fakapapau ʼa te ʼAtua, ohage la ko te fakatuʼuake. Kapau ʼe koutou fia ʼiloʼi he tahi ʼu meʼa ʼo ʼuhiga mo te faʼahi ʼaia, pea ʼe lelei ke koutou fai hakotou apone ki te nusipepa ʼaenī.” Koutou fakatuʼutuʼu ke koutou toe ʼaʼahi ia ia, ʼo koutou tohi te ʼu meʼa ʼaē ʼe fia logo kiai.
5 ʼI takotou toe fai te ʼaʼahi, koutou fetogi takotou ʼu palalau ʼo koutou ʼui fēnei:
◼ “ ʼI tatā ʼuluaki fai palalau, neʼe tā talanoa ki te fakatuʼuake. Neʼe ʼau leleiʼia te meʼa ʼaē neʼe ke ʼui mai ʼo ʼuhiga mo te fakatuʼutuʼu ʼa te ʼAtua ki te kele. [Koutou toe fakahā te ʼu meʼa ʼaē neʼe ina ʼui atu.] Neʼe ʼau maʼu te ʼu kiʼi fakamatala pea ʼe ʼau mahalo ʼe ke leleiʼia anai.” Koutou avahi te kaupepa Fakamaʼua ki te ako 5. Koutou lau pea mo fai palalau ki te ʼu palakalafe fuli ʼaē ʼe ina fia vakaʼi. ʼI takotou ʼosi fakatuʼutuʼu he temi ke koutou toe ʼaʼahi, koutou foaki age he kiʼi pepa fakaafe ʼe fakahā ai te ʼu hola ʼo te ʼu fono ʼo te kokelekasio. Koutou fakamahino age pe koteā te Akonaki ki te Kaugamālie, pea mo koutou fakaafe ke haʼu ʼo logo kiai.
6 Kapau ʼe koutou loto ke faigafua takotou fakahā ʼo he kaupepa, pea ʼe feala ke koutou fai te ʼu palalau ʼaenī:
◼ “ ʼE ʼau fia tuku atu te kaupepa ʼaenī ko tona kupu tāfito Mokā Mate He Tahi ʼe Tou ʼOfa Mamahi Ai. ʼI tau manatu la, ʼe feala koa ke tou toe sisio kia nātou ʼi he temi?” Koutou tuku ke fai atu hana tali. ʼOsi ʼaia, pea koutou talanoa ki te paki ʼaē ʼe tuʼu ʼi te pasina 29, mo koutou lau te kiʼi talanoa ʼi te pasina 28, pea koutou tuku te kaupepa ki te 50. Koutou fakatuʼutuʼu ke koutou toe ʼaʼahi ia ia.
7 ʼI tatatou fai te fakaafe lelei ʼaia ki te hahaʼi, ʼe lagi uga anai nātou ke nātou ʼōmai ki te vai ʼo te maʼuli, ʼaē ʼe foaki mai e Sehova ia ʼaho nei. Koia, tou ʼui kia nātou fuli ʼaē ʼe nātou fia ʼiʼinu, koutou ‘ ’Ōmai!’—Fkhā. 22:17.