Te Tali Ki ʼAkotou ʼu Fehuʼi
◼ Koteā te meʼa ʼaē ʼe tonu ke fai mokā hoko he ʼu tuʼutāmaki ki totatou ʼu tēhina?
Kapau ʼe Hoko He Tuʼutāmaki ʼi Tokotou Kolo: ʼAua naʼa koutou matataku. ʼAua naʼa koutou loto hoha, kae ke koutou tokakaga ki te meʼa ʼaē ʼe maʼuhiga tāfito—tokotou maʼuli, kae mole ko te ʼu koloā. Koutou vakaʼi te ʼu meʼa ʼaē ʼe foimo ʼaoga tāfito ki tokotou famili ʼi te faʼahi fakasino. ʼOsi ʼaia pea koutou fakahā ki te ʼu tagata ʼāfea te ʼu meʼa ʼaē neʼe hoko kia koutou pea mo te ʼaluʼaga ʼo tokotou ʼapi.
ʼE maʼuhiga ki te ʼu tagata ʼāfea pea mo te ʼu tagata faifekau faka minisitelio ke nātou fakatuʼutuʼu te ʼu tokoni ʼaē ʼe ʼaoga ki te faʼahi ʼaia. Kapau ʼe fakahā fakatomuʼa te tuʼutāmaki, ohage la ko he afā, ʼe tonu ke ʼiloʼi e te ʼu tēhina ʼaia peʼe lelei te nofoʼaga ʼo te ʼu tēhina mo tuagaʼane, pea kapau ʼe maʼu he temi, pea ʼe tonu ke nātou kumi te ʼu meʼa ʼaē ʼe feala ke ʼaoga kia nātou.
Ki muli age, ko te ʼu tēhina ʼaē ʼe nātou fai te ʼu ako tohi, ʼe tonu ke nātou ʼiloʼi peʼe nonofo ʼifea te ʼu famili fuli, pea ke nātou fakalavelave peʼe nātou feafeaʼi. Ko te tagata taupau pelesita peʼe ko he tahi age tagata ʼāfea, ʼe tonu ke ina ʼiloʼi te ʼaluʼaga ʼo te ʼu loto fale fuli, tatau aipe pe neʼe mole faʼa tuʼutāmakiʼia he loto fale. Kapau neʼe lavea he tahi, ʼe faiga anai te ʼu tagata ʼāfea ke fai hona faitoʼo. Tahi ʼaē meʼa, ʼe nātou foaki anai he ʼu meʼa ʼi te faʼahi fakasino ohage ko te meʼa kai, te mutuʼi meʼa, te nofoʼaga, peʼe ko he ʼu meʼa ʼe ʼaoga ki te loto fale. (Soane 13:35; Kal. 6:10) Ko te ʼu tagata ʼāfea ʼe nātou foaki anai te ʼu tokoni fakalaumālie pea mo fakafimālie ki te kokelekasio, pea ʼe nātou fakatuʼutuʼu fakavilivili anai ke fai te ʼu fono ʼo te kokelekasio. Pea ʼi te ʼosi fakafuafua ʼo te ʼu meʼa ʼaē ʼe tonu ke fai, ʼe tonu ke faka felogoi he tagata ʼāfea ʼo te kolesi ʼo te ʼu tagata ʼāfea mo te tagata taupau faka silikosikilipisio ʼo fakahā kia ia te ʼu lāvevea ʼaē neʼe hoko, te ʼu meʼa ʼaē neʼe maumau ʼi te Fale ʼo te Puleʼaga, te ʼu maumau ʼaē neʼe hoko ki te ʼu ʼapi ʼo te ʼu tēhina, ʼo feiā aipe mo te tahi ʼu meʼa. ʼE telefoni anai te tagata taupau faka silikosikilipisio ki te pilō ʼo te filiale, ʼo fakamatala kiai te ʼu meʼa ʼaē neʼe hoko. ʼO fakatuʼutuʼu anai e te filiale te ʼu meʼa ʼaē ʼe ʼaoga ke fai.
Kapau ʼe Hoko He Tuʼutāmaki ʼi He Tahi Faʼahi: Koutou manatuʼi ʼi takotou ʼu faikole, te ʼu tēhina pea mo tuagaʼane ʼaē ʼe nonofo ʼi he ʼu fenua neʼe hoko ai he ʼu tuʼutāmaki. (2 Ko. 1:8-11) Kapau ʼe koutou fia foaki he tokoni ʼi te faʼahi ʼo te paʼaga, ʼe feala ke koutou fakamomoli takotou ʼu meʼa ʼofa ki te Sosiete, ʼaē ʼe ina fakatuʼutuʼu ai te tokoni ʼaē ʼe ʼaoga ki te faʼahi ʼaia. (Gāue 2:44, 45; 1 Ko. 16:1-3; 2 Ko. 9:5-7; vakaʼi Te Tule Leʼo, Fakafalani ʼo te ʼaho 1 ʼo Tesepeli 1985, pasina 20 ki te 22.) ʼAua naʼa koutou fakamomoli he ʼu meʼa ʼofa ki he kolo neʼe hoko ai he tuʼutāmaki, kae mole koutou faka felogoi totonu mo te ʼu tēhina ʼaē ʼe tokakaga ki te faʼahi ʼaia. Kapau ʼe koutou fai feiā, pea ʼe faigafua anai te fakaʼaluʼalu lelei ʼo te tufa ʼo te ʼu meʼa ʼofa. (1 Ko. 14:40) ʼAua naʼa koutou telefoni ki te Sosiete, mo kapau ʼe mole hona ʼaoga, heʼe feala ke tāʼofi ai te ʼu pāui ʼaē ʼe fai e te hahaʼi ʼaē ʼe nonofo ʼi te koga meʼa ʼaē neʼe hoko ai he tuʼutāmaki.
ʼI te ʼosi vakavakaʼi ʼo te ʼu faʼahi ʼaia, ʼe fakatuʼutuʼu anai e te Sosiete peʼe ʼaoga ke fakatuʼu he komite ke ina foaki te ʼu tokoni ʼaia. ʼE fakahā anai te ʼu meʼa ʼaia ki te ʼu tēhina ʼaē ka tokaga ki te faʼahi ʼaia. ʼE tonu ke tou gāue tahi mo te ʼu tagata ʼāfea, ke feala ai te foaki fakafeauga ʼo te ʼu meʼa ʼaē ʼe ʼaoga ki te ʼu tēhina fuli ʼaē ʼe tau mo te faigataʼaʼia.—Vakaʼi te tohi Les Témoins de Jéhovah: Prédicateurs du Royaume de Dieu, pasina 310 ki te 315.