Tou Tokoni Ki Niʼihi Ke Nātou “Mulimuli Ki Te ʼu Meʼa ʼAē ʼe Tohi”
1 ʼE mole feʼauga te “fagono” pe ki te ʼu palalau ʼo te ʼu lea faka polofeta ʼo te tohi ʼo te Fakahā. Ke ʼaoga katoa, ʼe tonu ke kita “mulimuli” ki te ʼu meʼa ʼaē ʼe tohi ʼi ai. (Fkhā. 1:3) Ko te tuku ʼo te ʼu tohi ko te ʼuluaki fakatuʼutuʼu ʼaia ki te fai ʼo ni ʼu tisipulo. Ka tou ʼosi maʼu he ʼu hahaʼi ʼe nātou lotolelei ke nātou fagono, ʼe tonu ke tou liliu fakavilivili ke tou tokoni kia nātou ke lahi age te meʼa ʼaē ʼe nātou ako. Koteā ʼaē ʼe feala ke tou palalau kiai ʼi tatatou ʼaʼahi?
2 Kapau neʼe tou palalau ki te ʼu tagata heka hōsi fakatātā ʼi te ʼuluaki ʼaʼahi, e lagi tou kamata fēnei tatatou fai palalau:
◼ “ ʼI tatā felāveʼi ʼuluaki neʼe tā palalau ki te tohi ʼo te Fakahā pea mo te hoko ʼo te ʼu lea faka polofeta ʼi te temi nei ʼi te ʼu meʼa ʼaē ʼe hoko ʼi te malamanei. Neʼe fakakikite e te Fakahā kapite 6 te lele ʼo te ʼu tagata heka hōsi e fā, ʼaē ʼe iku ai ki te agamālohi pea mo te mamahi lahi ʼi te kele. Neʼe tā fakatokagaʼi, kua hoko te ʼu meʼa ʼaia. Tokolahi ʼe nātou feʼekeʼaki pe ko te temi fea ʼaē ka gata ai anai te mamahi ʼaia, ke feala hatatou maʼuli fakafiafia ʼi he mālama tokalelei. Koteā la tau manatu? [Tou tuku ke ina fai hana tali.] Neʼe fia ʼiloʼi e te ʼu tisipulo ʼa Sesu te tali ki te fehuʼi ʼaia.” Tou lau age ia Mateo 24:3, ʼaē neʼe lagaʼi ai te fehuʼi, pea mo te vaega 34, ʼaē neʼe fai ai e Sesu te tali. Kapau ʼe ina tali lelei, tou fakamahino he tahi age ʼu meʼa ʼo ʼuhiga mo te ʼu ʼaho fakamuli.
3 Kapau neʼe tou palalau ʼo ʼuhiga mo te Puleʼaga ʼa te ʼAtua ʼi te ʼuluaki ʼaʼahi, ʼe feala hatatou hoko atu ʼaki te fai age ki ai te fehuʼi ʼaenī:
◼ “ ʼI tau manatu, ko te faʼahiga puleʼaga feafeaʼi ʼaē ʼe ʼaoga moʼo fakahokohoko te ʼu meʼa ʼaē ʼe ʼaoga ki te malamanei katoa? [Tou tuku ke ina fai hana tali. Tou lau ia Selemia 10:23.] Lagi kua ke fakatokagaʼi pe, neʼe mole heʼeki fakatuʼutuʼu e te ʼAtua ke takitaki tonu e te tagata tona maʼuli. ʼE lahi te ʼu faigataʼaʼia ʼe felāveʼi mo tatou ʼe tupu mai te ʼu faʼahi ʼaia. ʼE ko te Puleʼaga pe ʼo te ʼAtua ʼaē ʼe ina lava foaki mai te meʼa ʼaē ʼe ʼaoga kia tatou.” Tou fuli age te pasina 339 ʼo te tohi Comment raisonner, pea tou palalau ki te ʼu vaega ʼaē ʼe tuʼu ʼi te ʼuluaki kupu tāfito. Tou hoko atu te fai palalau ʼo tou fakamahino te tupuʼaga ʼaē ʼo tatatou lava falala ki te ʼAtua.
4 E lagi tou fia kamata he fai palalau faka Tohi-Tapu ʼaki te palalau ʼaenī:
◼ Tou fakahā age te paki ʼi te pasina 302 ʼo te tohi Révélation: dénouement, pea tou fakamahino age: “ ʼE ʼiloʼi anai e te malamanei te ʼu ʼaluʼaga ʼaia ʼi te temi ʼaē ka hoko anai te finegalo ʼo te ʼAtua ʼi te kele ohage ko te lagi. Kae, ko ʼihi ʼe nātou tuʼania he toe liliu mai ʼo te agakovi. Ko te meʼa ʼaia ʼe mole feala anai ia ke hoko, koteʼuhi kua puli anai te kau agakovi.” Tou lau age ia Pesalemo 37:10, 11. Tou fakaafe ia ia ʼaē ʼe palalau mo tatou ke ina maʼu te ʼu lelei ʼo tatatou polokalama ako faka Tohi-Tapu ke lahi age te ʼu meʼa ke ina ako.
5 Kapau neʼe tou tuku te kiʼi pepa lotu “Une vie paisible dans un monde nouveau,” tou fakahā age te paki ʼo te ʼuluaki pasina pea tou lau age te palakalafe 1 ʼaē ʼe tuʼu ʼi te lalo kupu tāfito ʼaenī “La vie dans le monde nouveau de Dieu.” Pea tou ʼui age leva:
◼ “Kapau ʼe tou fia maʼuʼuli ʼi he mālama ohage ko ia ʼaenī, ʼe ʼi ai te meʼa maʼuhiga ʼe tonu ke tou fai.” Tou lau age te palakalafe fakamuli, pea tou tuku age te tohi Révélation: dénouement.
6 Mai tona ʼaluʼaga ʼaē ko tatatou fakatuʼutuʼu ko he kamata ʼo te ʼu ako faka Tohi-Tapu, koia ʼe ʼaoga ai ke tou fai he ʼu ʼaʼahi ʼe fua lelei. Tou fakatuʼutuʼu he temi ki te ʼu ʼaʼahi ʼaia mo nātou, pea tou teuteu fakalelei. ʼAki tatatou fai ʼaia, ʼe feala anai hatatou tokoni moʼoni kia nātou ʼaē ʼe fakamalotoloto.—Fkhā. 22:6, 7.