Tou Kalagaʼi ‘Te ʼu Palalau ʼo Te Lea Faka Polofeta’
1 ʼE tou maʼuʼuli ʼi te temi ʼaē ʼe lolotoga hoko ai te ʼu lea faka polofeta ʼa te tohi ʼo te Fakahā. Tokolahi ʼe nātou faiga ke nātou mahino ki te faka ʼuhiga ʼo te ʼu meʼa fakatupu maveuveu ʼaē ʼe lolotoga hoko. ʼE feala ke nātou maʼu he ʼu lelei ʼaki tanatou “fagono ki te ʼu folafola” ʼo te lea faka polofeta ʼo te Fakahā. (Fkhā. 1:3) Lolotoga te māhina ʼo Malesio, ʼe tou lava tufa anai te tohi Révélation: dénouement. ʼI tatatou tufa te tohi ʼaia, tou manatuʼi ko te ʼu faigataʼaʼia ʼaē ʼe felāveʼi mo te hahaʼi ʼi te temi nei neʼe fakakikite ʼi te tohi ʼo te Fakahā. Koia, koteā he faʼahiga palalau ʼe tou lava fai?
2 Ko te palalau ʼaenī ʼe lagi lelei anai:
◼ “Ko te tau, mo te hoge, pea mo te mahaki, ko te tautea ʼaia ʼo te malamanei ʼi te 20 sēkulō ʼaenī. ʼI takotou manatu, he koʼe koa ʼe feiā ʼi te temi ʼaē ʼe haʼele ai ki muʼa te ʼu meʼa ʼaē ʼe faʼufaʼu e te tagata? [Koutou tuku ke ina fai hana tali.] Tokolahi ʼe nātou punamaʼuli ʼi tanatou ʼiloʼi ʼaē ko te ʼu ʼaluʼaga ʼaia neʼe fakakikite ʼi te Tohi-Tapu. ʼE mahino ia kua koutou ʼiloʼi te kupuʼi palalau ʼaē ko ‘te ʼu tagata heka hōsi ʼo te Apocalypse.’ Ko te meʼa ʼaē ʼe ʼui e te Tohi-Tapu ʼo ʼuhiga mo te ʼu tagata heka hōsi ʼaia ʼe ko he lea faka polofeta ʼe lolotoga hoko ʼi te temi nei ʼi te ʼu meʼa ʼaē ʼe hoko ʼi te malamanei. [Koutou avahi te tohi Révélation: dénouement ʼi te kapite 16, pea koutou fakahā age te ʼu pasina 91 ki te 97.] Logope ʼe fakakikite e te lea faka polofeta ʼaia te temi ʼo te mamahi lahi, ʼe ina toe foaki mai foki te ʼamanaki. [Koutou lau ia Fakahā 6:2 ʼi te palakalafe 3.] Ko te Tagata ʼaē ʼe heka ʼi te hōsi hina ʼe ko Sesu Kilisito. Neʼe ina fakapapau ʼe ina tauʼi anai te kovi pea ʼe ina foaki mai anai he mālama fiafia mo tokalelei ʼaki te Puleʼaga ʼaē neʼe ina akoʼi tatou ke tou faikole kiai.” Koutou tuku age te tohi.
3 ʼE lagi fakatupu anai e te fehuʼi ʼaenī he fai palalau lelei:
◼ “ ʼI takotou manatu, koteā ʼaē ʼe ʼaoga moʼo pulihi te ʼu ʼaluʼaga kovi ʼo te malamanei? [Koutou tuku ke fai atu hana tali.] Tokolahi ʼe nātou ʼio ʼo ʼuhiga mo te ʼui ʼaē ʼe ʼaoga ke hoko he ʼu fetogi katoa mo kapau ʼe tonu ke hoko atu te maʼuli ʼi te mālama ʼaenī. ʼE fakahā e te Tohi-Tapu ʼe ʼiloʼi e te ʼAtua te puleʼaki moʼo fakatokatoka ʼatatou ʼu faigataʼaʼia pea neʼe ina fakapapau mai ʼe tokoni mai anai kia tatou.” Koutou fuli age te tohi Révélation: dénouement ʼi te pasina 171, pea koutou lau ia Fakahā 11:15 ʼi te palakalafe 1. Koutou fuli age ki te ʼu paki ʼaē ʼe tuʼu ʼi te ʼu pasina 302 pea mo te 308, pea koutou fakahā age te ʼu tapuakina ʼaē ka fakahoko anai ʼaki te takitaki ʼo te Puleʼaga e Kilisito. Pea koutou fakamahino age kia ia ʼaē ʼe fai palalau mo koutou peʼe feafeaʼi hana maʼu e ia totonu te ʼu lelei ʼaia.
4 ʼE lagi koutou leleiʼia anai he ʼu palalau ohage ko te palalau ʼaenī:
◼ “Tokolahi ʼi te hahaʼi ʼaē neʼe nātou lau te tohi ʼo te Fakahā neʼe nātou fakatokagaʼi te faigataʼa ʼo te mahino ki te tohi ʼaia. ʼE ina fakamatalatala te ʼu meʼa kehekehe ʼe mole hoko māhani pea mo maʼuhiga. Ko te tohi ʼaenī, La Révélation: le grand dénouement est proche!, ʼe ko he fakamatalatala ʼo te ʼu vaega fuli ʼo te tohi katoa ʼo te Fakahā pea ʼe ina fakahā te malave ʼo te fakahoko ʼo te ʼu lea faka polofeta ʼaia kia tatou takitokotahi.” Koutou avahi te tohi ʼi te pasina 15, ʼi te palakalafe 2, pea koutou fakahā age te vaega ʼo Fakahā 1:1, ʼaē neʼe fakaʼiloga keheʼi. Koutou fakamahino age ko te ʼu fakamatalatala ʼo te ʼu vaega fuli ʼe maʼu ʼi te tohi ʼo te Fakahā pea ko te manatu ʼaia ʼe tokoni age anai ki ai ke mahino ki te ʼu lea faka polofeta fakaofoofo ʼaia. Koutou tuku age te tohi ki te falā 400.
5 Kapau ʼe maʼua te tagata peʼe ko te fafine, koutou tuku age he nusipepa peʼe ko he kiʼi pepa lotu. Ka koutou toe liliu ki ai pea ʼe koutou fakatokagaʼi hana fia logo, ʼe feala ke koutou tuku age ki ai te tohi.
6 Ko te logo ʼaē ʼe tuʼu ʼi te tohi ʼo te Fakahā ʼe ʼaoga ki te hahaʼi fuli. ʼE ʼaoga ke fagono te hahaʼi fuli ki te ʼu palalau ʼo te lea faka polofeta. ʼOfa pe ke tou fai te ʼu meʼa fuli ʼe tou lavaʼi moʼo kalagaʼi ʼo te logo maʼuhiga ʼaia.